Тројца убиени се пронајдени во куќата на мажот кој денеска уби 6 луѓе во Краков, Полска, потврди полскиот премиер Доналд Туск. Станува збор за две жени и еден маж, а според првичните информации, најверојатно се членови на семејството на напаѓачот.

Туск го потврди откритието на вечерен состанок со министрите и претставниците на безбедносните служби во Краков. Идентитетите на тројцата починати сè уште не се официјално објавени, а истражителите ги утврдуваат околностите на нивната смрт.

Полскиот медиум „Онет“ неофицијално дознава дека станува збор за родителите и сестрата на напаѓачот.

Според „Онет“, телата се пронајдени во стан во градот Островјец Свјетокржиски, каде што живеел 24-годишниот напаѓач.

Полицијата ја евакуирала станбената зграда, а на местото на настанот пристигнале и членови на антитерористичката единица. Телата се откриени со помош на полициски дрон.

Премиерот Туск рече дека сè укажува дека починатите биле членови на потесното семејство на напаѓачот. Сепак, сè уште не е официјално потврдено како починале, кога починале или дали ги убил осомничениот.

Полскиот премиер го нарече нападот терористички.

– Никогаш порано не сме имале толку драстични случаи на тероризам во Полска. Така треба да се нарече овој суров напад врз човечкиот живот во Краков – рече Туск.

Тој најави продолжување на интензивната истрага во која се вклучени полицијата и безбедносните служби. Истражителите се обидуваат да го утврдат мотивот за нападот и дали осомничениот имал соучесници.

Премиерот ги пофали полицајците кои интервенираа, како и граѓаните кои им помогнаа на повредените. Тој особено им се заблагодари на сведоците кои му дојдоа на помош на ранетиот полицаец.

Напаѓачот денеска околу 15 часот со автомобил влегол на главниот градски плоштад во Краков и почнал да пука кон минувачите. Во нападот загинаа 6 лица, четири жени и двајца мажи. Меѓу загинатите е и британски државјанин. Најмалку 15 лица се повредени.

Полицијата го рани и го уапсила напаѓачот по меѓусебна престрелка.

Полскиот министер за внатрешни работи Марцин Киервински претходно изјави дека постојат индикации дека напаѓачот бил фасциниран од крајнодесничарските идеологии и дека имал радикални ултранационалистички ставови. Истражителите сè уште утврдуваат дали ова бил мотивот за нападот.

Полскиот претседател Карол Навроцки ја започна постапката за прогласување национална жалост, а Туск објави дека таа ќе трае на 9 и 10 ноември.

(ВОЗНЕМИРУВАЧКО) НОСЕЛ ПАНЦИР, УБИЛ 6 ЛУЃЕ СО ПОЛУАВТОМАТСКА ПУШКА Пукал и во коњите на плоштадот во Краков

The post ТРОЈЦА МРТВИ ВО КУЌАТА НА НАПАЃАЧОТ ВО КРАКОВ Сомнежи дека ги убил и родителите и сестрата appeared first on plusinfo.mk.