Унгарскиот министер за надворешни работи Петер Сијарто вчера изјави дека во последните недели десетици дронови го нападнале гасоводот „Турски тек“, преку кој се снабдува Унгарија, и додаде дека во таа серија напади имало и обид за напад и саботажа што бил спречен од српските власти, пренесе „Вјести“.

– Во последните недели, десетици дронови го нападнаа гасоводот „Турк стрим“, кој ја снабдува Унгарија, во Русија. Во оваа серија напади спаѓа и обид за напад и саботажа што беше спречен од Србите – рече Сијарто во видео на „Фејсбук“ по состанокот на Советот за одбрана што го свика премиерот Виктор Орбан.

Сијарто додаде дека за време на состанокот на Советот за одбрана, унгарскиот премиер наредил унгарскиот дел од гасоводот „Турски тек“ да биде ставен под воена заштита. Според него, Русија, Турција и Србија исто така се договориле да ја засилат физичката заштита на гасоводот.

Сијарто го опиша ова како „обид за терористички напад“, за кој рече дека е „дел од серија активности насочени кон спречување на испораката на руска нафта и гас во Европа“ и дека претставува сериозен напад врз суверенитетот на неговата земја.

Српските власти вчера објавија дека пронашле експлозивни направи во близина на гасната инфраструктура што ги поврзува Србија и Унгарија.

„Турски тек“ е гасоводен систем за транспорт на природен гас од Русија до Турција преку Црното Море, а потоа и кон делови од југоисточна и централна Европа. Системот беше пуштен во работа на почетокот на 2020 година и оттогаш стана еден од важните правци за испорака на руски природен гас во регионот, вклучително и за земји како Унгарија.

The post „ТУРСКИ ТЕК“ Е ЦЕЛ НА НАПАДИ СО ДРОНОВИ И ОБИДИ ЗА САБОТАЖА Целта е да се прекине испораката на руска нафта и гас до Европа appeared first on plusinfo.mk.

Европската Унија, водена од „фанатизам кон санкциите“ и на инсистирање на Украина, размислува за вклучување на „Лукоил“ и „Гаспром“ и енергетската корпорација „Росатом“ во својот 20-ти пакет санкции против Русија, изјави унгарскиот министер за надворешни работи и трговија, Петер Сијарто.

– Европа моментално страда од војна и фанатизам на санкциите. Се изнесуваат сè повеќе диви предлози. Сега сакаат да ги додадат „Росатом“, „Гаспром“ и „Лукоил“, односно руските енергетски компании, на списокот на санкции – рече Сијарто во емисијата „Час на вистината“.

Тој истакна дека соработката со споменатите компании е од клучно значење за Унгарија, како во однос на енергетската безбедност, така и во однос на одржувањето на намалени трошоци за комунални услуги.

Според него, Киев е за итно воведување санкции од ЕУ врз руската нуклеарна индустрија, нафтените и гасните компании.

The post ЕУ ГИ ВКЛУЧУВА „ЛУКОИЛ“, „ГАСПРОМ“ И „РОСАТОМ“ ВО ПОСЛЕДНИОТ ПАКЕТ САНКЦИИ КОН РУСИЈА Унгарскиот шеф на дипломатијата вели дека тоа е лошо за неговата земја appeared first on plusinfo.mk.

Шефот на унгарската дипломатија Петер Сијарто го соопшти ставот на владата во Будимпешта дека нема да дозволи Украина да стане членка на Европската Унија.

Тој, коментирајќи ја изјавата на неговиот украински колега Андреј Сибиха за „Европската вистина“ дека „Унгарија е единствената пречка за членството на Украина во ЕУ“, потврди дека тоа е „целосно точно“.

„Нема ништо ново за нас во фактот дека Андреј Сибиха не е наш пријател, тој нè мрази и нè напаѓа. Сепак, во интервјуто на министерот имаше една фраза со која целосно се согласуваме: „Унгарија е единствената пречка за членството на Украина во ЕУ“. Ова е сосема точно“, напиша унгарскиот министер на Фејсбук.

Тој додаде дека додека сегашната унгарска Влада е на власт, „Украина нема да биде членка на Европската Унија, бидејќи Украинците ќе донесат војна во ЕУ“.

Според него, приемот на Украина во ЕУ би значело дека оваа земја ќе биде финансирана од европските даночни обврзници, а како резултат на тоа европската економија би била во загуба.

„Нашите земјоделци би банкротирале поради украинското жито со низок квалитет, а нашата земја би станала транзитен центар за украинската мафија. Но, додека сме на власт, тоа нема да се случи“, рече унгарскиот министер.

Според него, затоа Украина се меша во претстојните унгарски парламентарни избори и е заинтересирана за победа на опозициската партија Тиса.

– На изборите на 12 април ќе биде одговорено на прашањето за мир или војна, Унгарија или Украина, рече Сијарто.

Претходно, унгарското Министерство за надворешни работи го повика украинскиот амбасадор во Будимпешта за да му предаде протест поради мешањето на Украина во изборниот процес во Унгарија.

The post УНГАРИЈА НЕМА ДА ДОЗВОЛИ УКРАИНА ДА ВЛЕЗЕ ВО ЕУ Смета дека ќе ја внесе војната во Унијата appeared first on plusinfo.mk.

Изјавата на генералниот секретар на НАТО Марк Руте дека „Европа е следната цел на Владимир Путин“ предизвика вознемиреност и остра полемика во повеќе европски престолнини.
Унгарската влада денеска го повика Руте „да престане да поттикнува воени тензии“, соопшти министерот за надворешни работи Петер Сијарто. Во објава на Фејсбук, тој напиша дека последните изјави на Руте се „јасен сигнал дека сите во Брисел се подредиле против мировните напори на американскиот претседател Доналд Трамп“, пренесе МТИ.
„Ако некој сè уште се двоумеше околу тоа дали во Брисел навистина завладеало лудило, можеше да се увери по вчерашниот говор на генералниот секретар на НАТО во Берлин“, додаде унгарскиот министер.
За време на посетата на касарната „Мија Станимировиќ“ во Ниш, претседателот на Србија, Александар Вучиќ, се осврна на предупредувањето за можен судир меѓу Европа и Русија за кое говореше Руте.
– Се разбира, тоа би бил многу поголем воен судир, со десеткратно или уште поголем број жртви отколку во руско-украинскиот конфликт – изјави Вучиќ.
Во Велика Британија, пак, синоќа стигна предупредување земјата да се подготви за можен вооружен судир со Русија. Министерот за вооружени сили, Ал Карнс, рече дека државата е во „воена готовност“ и предупреди дека „сенката на војната стои на европските порти“.

Како што пишува „Дејли мејл“, на отворањето на новата британска Служба за воено-разузнавачка безбедност – служба што треба да ја штити земјата од руска шпионажа и кибер-напади – Карнс рече:
– Сенката на војната тропа на европските врати, а тој воен судир може да биде поголем и покрвав од сè што сме виделе во поново време. Ако ги споредите британските жртви во Ирак и Авганистан, тоа одговара на отприлика една недела од војната во Украина. Доколку прашувате дали Британија е во воена готовност – да, погодивте.

Карнс – поранешен офицер на Кралската морнарица – рече дека Британија лани забележала 50-процентен раст на руските закани и напади. Иако точниот број инциденти е строго доверлив, министерот призна дека ги има „стотици“.

Во Берлин, генералниот секретар Руте ги повика членките на НАТО, вклучувајќи ја и Британија, да преминат на „воен начин на размислување“ и предупреди дека многу земји се „опасно рамнодушни“, без да наведе на кои точно мисли. Руте предвиде дека Европа е „следната цел“ на Владимир Путин, нагласувајќи дека „веќе се наоѓаме во зона на ризик.“

The post УКРАИНСКИОТ СУДИР ЌЕ ВИ СЕ ВИДИ КАКО ДЕТСКА ИГРА! Најавите на првиот човек на НАТО ги вознемириja духовите на стариот континент appeared first on plusinfo.mk.

Лидерот на босанските Срби Милорад Додик повторно ја запали политичката сцена на Босна и Херцеговина. Овојпат неговиот гнев го предизвика одлуката на министерот за одбрана Зукан Хелез да не дозволи лет на авионот со кој шефот на унгарската дипломатија Петер Сијарто требаше да слета во Бања Лука.

– Таа Босна и Херцеговина нам не ни треба. Тоа е аеродром на Република Српска – изјави Додик, јави Кликс.ба.

Меѓутоа, тој не застана тука. Додаде дека ќе повика на нова блокада на институциите, обвинувајќи ги властите во Сараево за, како што рече, „пашалук и омраза кон пријателите на Република Српска“. Притоа, најави дека неговите кадри повеќе нема да гласаат за никакви одлуки на државно ниво.

– Таа БиХ треба да ја однесе бура, сè живо да не постои. Добро им рекол Алија: ако не можете да направите демократска земја, не ја заслужувате – истакна Додик.

Според објавата на Хелез на неговиот официјален профил на „Фејсбук“, дозволата за лет била ускратена поради „отворената поддршка на унгарската влада на политиките на Додик“.

Aналитичарите предупредуваат дека со ваквите изјави Додик повторно ја турка земјата кон нова институционална криза и ги продлабочува поделбите меѓу ентитетите.

The post ЗУКАН НЕ МУ ДАЛ НА СИЈАРТО ДА СЛЕТА, ДОДИК ПОБЕСНЕ „Бура да ја однесе оваа БиХ, добро рекол Алија“ appeared first on plusinfo.mk.

Унгарската влада е подготвена да направи сè што е во нејзина моќ за средбата меѓу рускиот и американскиот претседател Владимир Путин и Доналд Трамп во Будимпешта да биде успешна, изјави унгарскиот министер за надворешни работи Петер Сијарто во интервју за неделната програма на Радио Кошут.

– Европските лидери ќе сторат сè што е можно за да се обидат да ја спречат средбата на рускиот и американскиот лидер во Будимпешта, бидејќи повеќето политичари од ЕУ се фокусирани на продолжување на конфликтот во Украина – рече Сијарто.

Како што истакна, речиси сите земји од ЕУ, со исклучок на Словачка и Унгарија, водат „воена политика“, претставувајќи го конфликтот во Украина како свој, подготвувајќи се за војна и сакајќи да воведат воена состојба во ЕУ.

– Брисел се подготвува за војна, сака да ја стави Европската Унија во воен режим, да ја вооружи и финансира Украина со парите на европските народи, додека Унгарија организира мировен самит. Тоа е разликата. Сега стигнавме до моментот кога претседателите на САД и Русија се согласија мировниот самит да се одржи во Будимпешта – нагласи Сијарто, нарекувајќи ја Унгарија „остров на мирот“ во Европа.

На 16 октомври, по телефонскиот разговор со рускиот претседател Владимир Путин, американскиот претседател Доналд Трамп објави дека се согласиле наскоро да се сретнат во Будимпешта.

Коментирајќи ја најавената средба на Путин и Трамп, претседателот на Украина, Володимир Зеленски, рече дека би било праведно и тој да учествува на таа средба. Зеленски изјави дека му рекол на Трамп, за време на состанокот во Белата куќа на 17 октомври, дека е подготвен да му се придружи на средбата со Путин.

– Како може да има какви било договори без нас за нас? Ако навистина сакаме праведен и траен мир, ни требаат двете страни од оваа трагедија – рече Зеленски во интервју за NBC News.

Планираниот мировен самит меѓу Трамп и Путин во Будимпешта би можел да стане дипломатски настан од глобално значење – но и логистички кошмар за руската страна. Поради европските санкции и забраната за прелет на руски владини авиони, претседателот Путин ќе мора да патува по речиси петпати подолга рута – преку Турција и Србија.

Безбедносните служби предупредуваат дека патувањето над Црното Море носи зголемен ризик поради воените операции во регионот, додека руските и странските власти треба внимателно да ја координираат воздушната рута.

Меѓународниот кривичен суд во Хаг објави дека „очекува апсење на рускиот претседател во Унгарија“, пишува холандскиот весник „Лајдшдагблад“. Како што е наведено во соопштението на МКС, од секоја земја-членка се очекува да ги исполни обврските што ги има и кои се официјално потпишани.

Сепак, Европската комисија оцени нема правни пречки Путин да допатува на состанок во Будимпепешта. Портпаролка на Комисијата, Анита Хипер, на прашање дали Путин може да патува на состанок во Украина, појасни дека рускиот претседател и министерот за надворешни работи Сергеј Лавров се предмет на санкции за замрзнување на средствата, но „не се конкретно опфатени со забраната за патување“.

Според Европската комисија, секоја можна средба меѓу Трамп и Путин е добредојдена доколку придонесе за постигнување „праведен и траен мир“ во Украина.

Унгарскиот министер Сијарто рече дека датумот и организациските детали за претстојните руско-американски разговори во унгарската престолнина ќе бидат познати по консултациите меѓу рускиот министер за надворешни работи Сергеј Лавров и американскиот државен секретар Марко Рубио, кои ќе се одржат во наредните денови.

The post ЛИДЕРИТЕ НА ЕУ ЌЕ СТОРАТ СЀ ДА ЈА САБОТИРААТ СРЕДБАТА ПУТИН-ТРАМП Унгарија тврди дека Брисел размислува единствено за војна appeared first on plusinfo.mk.

Кремљ денеска соопшти дека средбата помеѓу рускиот и американскиот претседтаек Владимир Путин и Доналд Трамп би можела да се одржи за две недели или малку подоцна, но оти има уште многу детали да се договорат пред да се одреди точниот датум.

Во вчерашниот телефонски разговор Путин и Трамп се договорија да одржат втор самит за војната во Украина во главниот град на Унгарија, Будимпешта. Првата нивна средба беше на Алјаска на 15 август, на која не беше постигнат напредок.

Портпаролот на Кремљ, Дмитриј Песков изјави дека рускиот министер за надворешни работи Сергеј Лавров и американскиот државен секретар Марко Рубио треба телефоински да разговарат и да договорат состанок на кој би се решиле голем број прашања пред самитот.

– Има многу прашања, мора да бидат утврдени преговарачките тимови и така натаму и така натаму. Според тоа, сè ќе се одвива во фази, секако ако има волја кај двајцата претседатели. Самитот навистина може да се одржи за две седмици или малку подоцна. Општо е прифатено дека ништо не треба да се одложува – истакна Песков.

Тој додаде дека Русија останува отворена за договор што би ја завршил војната во Украина на мирен начин.

Русија го обвинува Киев и неговите европски сојузници за застојот во мировните преговори. Тие, од друга страна, ја обвинуваат Русија за поставување неприфатливи услови и истакнуваат дека не веруваат дека Путин искрено сака мир.

За денеска е предвидено Трамп во Белата куќа да се сретне со украинскиот претседател Володимир Зеленски.

Претходно, премиерот на Унгарија, Виктор Орбан, по телефонскиот разговор со Трамп, денеска изјави дека разговарал со Путин и оти подготовките за средба во Будимпешта помеѓу рускиот претседател и неговиот американски колега „продолжуваат со полна брзина“.

– Унгарија ќе гарантира, дека Путин ќе може да влезе во земјата за средбата со Трамп и оти потоа ќе може да се врати дома – изјави шефот на унгарската дипломатија Петер Сијарто.

Меѓународниот кривичен суд има издадено налог за апсење на Путин, а Унгарија е во процес на повлекување од институцијата. Москва ги негира обвинувањата на Судот и го посочува налогот за апсење како доказ за непријателскиот став на Западот кон Русија.

– Ќе се погрижиме тој да влезе во Унгарија, да има успешни преговори тука, а потоа да си оди дома. Нема потреба од никакви консултации со никого, ние сме суверена земја тука. Ќе го пречекаме (Путин) со почит, ќе го угостиме и ќе му обезбедиме услови за преговори со американскиот претседател – наведе Сијарто.

Во вчерашниот телефонски разговор Трамп и Путин се согласија за состанок на високо ниво на нивните делегации, по што двајцата треба да се сретнат во Будимпешта.

„Претседателот Путин и јас ќе се сретнеме на договорена локација во Будимпешта за да видиме дали можеме да ја завршиме оваа неславна војна меѓу Русија и Украина“, напиша Трамп на својот профил на „Трут соушл“ (Truth Social).

Односите на Унгарија и Украина изминатите месеци се тензични, бидејќи Орбан е против ЕУ да испраќа воена помош за Киев. Зеленски минатиот месец тврдеше дека унгарски беспилотни летала навлегле во украинскиот воздушен простор, на што Орбан одговори дека Украина не е независна суверена држава.

Унгарија, исто така, сè уште се потпира на руските резерви на гас и нафта, иако ЕУ се обидува да ги намали тие резерви до 2028 година, а Трамп ја повика Унијата да престане да увезува руска енергија.

The post СРЕДБА ПУТИН-ТРАМП ЗА 2 НЕДЕЛИ ИЛИ ПОДОЦНА, ВЕЛИ ПЕСКОВ Ако има волја нештата ќе се решат во фази, смета портпаролот на Кремљ appeared first on plusinfo.mk.

Украинскиот претседател, Володимир Зеленски не е тој кој ќе одлучи дали Украна ќе се приклучи на Европската Унија, туку земјите-членки, порача шефот на унгарската дипломатија, Петер Сијарто.

Ваквата реакција Сијарто ја објави на Фејсбук откако Зеленски изјави дека Украина на крајот ќе стане членка на ЕУ, со или без унгарскиот премиер Виктор Орбан.

Сијарто истакна дека унгарскиот народ веќе ја донел својата одлука.

„Не е претседателот на Украина тој што ќе одлучува колку е подготвена една земја за членство во Европската Унија или која земја може да се приклучи на Унијата. Тоа го одлучува самата Европска Унија, каде што за ваквите одлуки се потребни едногласни ставови“, изјави Сијарто синоќа, објави унгарското Министерство за надворешни работи.

Претходно вчера, Зеленски изјави дека Украина ќе стане членка на Европската Унија без оглед на ставот на унгарскиот премиер Виктор Орбан. Тој изрази уверување дека народот на Унгарија ја поддржува Украина, дури и ако ставот на владата на земјата е различен.

Зеленски рече дека членството во ЕУ е избор на украинскиот народ и нагласи дека патот на земјата кон пристапување нема да биде блокиран од ниту една земја-членка.

The post НЕ ОДЛУЧУВА ЗЕЛЕНСКИ ДАЛИ УКРАИНА ЌЕ ВЛЕЗЕ ВО ЕУ Одлуката треба едногласно да ја донесат членките на Унијата, порача Сијарто appeared first on plusinfo.mk.

Хрватска ја искористува војната во Украина за воено профитерство, унгарскиот министер за надворешни работи Петер Сијарто пред Генералното собрание на Обединетите Нации, на што подоцна доби одговор од Хрватска.

– Хрватите нè искористуваат. Петпати ја зголемија таксата за транзит преку нафтоводот (ЈАНАФ) од почетокот на војната. Тоа е воена доплата. Тоа е профитерство – изјави унгарскиот министер во обраќањето во ОН предупредувајќи дека, како што вели, владата на Унгарија нема да дозволи нивната алчност да ги уништи резултатите од намалувањето на режиските трошоци.

Сијарто дури и изрази сомнеж дека нафтоводот може долгорочно да обезбедува сигурна испорака.

– Тестот на 17 септември покажа дека ЈАНАФ не може да поднесе континуирано снабдување под висок притисок. Тоа е ризик и неодговорност – додаде тој.

Унгарија и Словачка, без пристап до море, се зависни од ЈАНАФ за алтернативна испорака на нафта, со оглед дека директното снабдување од Русија е сè поограничено. Меѓусебното обвинување доаѓа во време кога американскиот претседател Доналд Трамп ги повика европските сојузници да не купуваат руски енергенси, нешто на што Унгарија јавно се спротивстави.

Хрватскиот премиер Андреј Пленковиќ возврати на обвинувањата на Сијарто на следниот начин:

– Со огорченост ја отфрлам лажната теза дека Хрватска е воен профитер. Напротив, Хрватска е добар и чесен сосед – нагласи тој.

Пленковиќ објасни дека ЈАНАФ има капацитети за транспорт до 15 милиони тони нафта и дека тоа е тестирано.

– Нашата задача, по руската агресија, е да обезбедиме енергетска сигурност за ЕУ. Хрватска тоа го прави и за Унгарија и Словачка – изјави тој.

Според првиот човек на хрватскатаа влада, алузиите за профитерство се опасни дезинформации:

– Прво, Хрватска не користи руска нафта од 2022 година. Второ, Унгарија сè уште добива поевтина руска енергија. Ако некој профитира, тоа е Унгарија – рече Пленковиќ.

Хрватска, тврди Пленковиќ, станала регионален енергетски центар токму поради своите напори за солидарност и инфраструктурна подготвеност, а не поради „воена алчност“.

The post „ХРВАТИТЕ ПЕТПАТИ НИ ЈА ЗГОЛЕМИЈА ТАКСАТА ЗА НАФТОВОДОТ“ Сијарто се пожали, доби одговор од Пленковиќ appeared first on plusinfo.mk.

Унгарскиот министер за надворешни работи Петер Сијарто изјави дека Будимпешта нема да се откаже од руската нафта и покрај барањата од Белата куќа. Тој го истакна ова во интервју за британскиот весник „Гардијан“ на маргините на 80-тото заседание на Генералното собрание на Обединетите нации во Њујорк.

Претходно, американскиот претседател Доналд Трамп ги повика земјите-членки на НАТО и Европа да го запрат увозот на руска нафта. Како одговор, претседателот на Европскиот совет, Антонио Кошта, забележа дека ЕУ веќе ги намалила набавките на руски енергенси за 80 отсто. Значаен дел од преостанатите 20 проценти отпаѓа на Унгарија.

– Не можеме да гарантираме безбедно снабдување со енергија за нашата земја без руски извори на нафта или гас. За нас, снабдувањето со енергија е чисто физичко прашање. Можеби е пријатно да се сонува за купување нафта и гас некаде на друго место (освен од Русија)… Но, можеме да купуваме само таму каде што имаме инфраструктура. А ако ја погледнете физичката инфраструктура, јасно е дека без руски испораки е невозможно да се гарантира сигурно снабдување на земјата – објасни унгарскиот министер.

Унгарија и Словачка продолжуваат да увезуваат нафта од Русија преку нафтоводот „Дружба“. Обемот на испораките е околу 200–250 илјади барели дневно, што сочинува околу 3% од побарувачката на Европската Унија за оваа суровина.

Полскиот министер за надворешни работи, Радослав Сикорски, во разговор за Гардијан во Киев минатата недела, рече дека го поддржува повикот на Трамп до Европа да престане да купува руска нафта. – Се надевам дека претседателот Орбан во Будимпешта ќе го слушне ова и ќе дејствува според апелот на претседателот Трамп да престане да купува руска нафта. Унгарија може да ја добива својата нафта од југ, рече Сикорски.

Запрашан за европскиот притисок, Сијарто ги нарече западноевропските претставници „фанатици“ и рече дека е „тотално невозможно да се води рационален дијалог базиран на факти, заснован на здрав разум“.

Но, додека односите со Брисел остануваат напнати, односот со САД значително се подобри, додаде тој, велејќи дека Унгарија беше „единствената европска влада која се надевала на победата (на Трамп)“.

– САД сега се пријател. Значи, да го имате американскиот претседател како ваш пријател е сосема различно во споредба со кога тие вршат притисок врз вас, без оглед на тоа што доаѓа од Брисел, е многу, многу сериозно.

Аналитичарите нагласуваат дека ваквите изјави ја покажуваат енергетската зависност на регионот и противречната позиција на Унгарија во однос на унифицираната европска политика за руските енергенси. Ситуацијата покажува дека Унгарија се обидува да ги балансира своите внатрешни потреби за стабилно снабдување со енергија со барањата на европската заедница за намалување на зависноста од Русија. Ова ги нагласува проблемите во формирањето единствен пристап на ЕУ кон политиката на енергетски санкции и прилагодувањата во трговските односи на енергетскиот пазар.

The post СИЈАРТО КОНТРА ТРАМП И БЕЛАТА КУЌА Унгарија не се откажува од руските енергенси appeared first on plusinfo.mk.