Германскиот претседател Франк-Валтер Штајнмајер оцени дека новата американска администрација е безобѕирна кон остатокот од светот, пренесе Дојче веле.

– Таа има поинаков светоглед од нас – рече Штајнмајер.

Зборувајќи на почетокот на безбедносната конференција во Минхен (МСЦ), која ќе трае до 16 февруари, шефот на германската држава предупреди: „Нередот не смее да стане модел за нов поредок на светот“.

Новата ориентација на политиката во Вашингтон, нагласи Штајнмајер, не може да се смени од страна на другите држави, и „тоа мора да го прифатиме, со тоа мора да се справуваме“.

Но, германскиот претседател е уверен:

– На меѓународната заедница не ѝ е во интерес овој светоглед да стане доминирачка парадигма.

Тој истовремено ја критикуваше и „историски невидената концентрација на технолошка, финансиска и политичка моќ“ што моментално се создава во САД.

– Искрено ви велам: како демократ, јас сум загрижен, многу загрижен, кога мала претприемничка елита има моќ, средства и волја да редефинира суштински дел од правилата на игра во либералните демократии – рече Штајнмајер.

Особено е загрижувачки, потенцира Штајнмајер, „кога некои од оваа елита не го кријат својот презир кон институциите и нормите на нашата демократија“.

Тој ја предупреди американската влада од преземање самостојни потези:

– Дури и најсилните, и САД, во 21 век се упатени на сојузници – порача Штајнмајер.

The post НЕРЕДОТ НЕ СМЕЕ ДА СТАНЕ МОДЕЛ ЗА НОВ СВЕТСКИ ПОРЕДОК Штајнмајер ја обвинува владата на Трамп за безобѕирност appeared first on plusinfo.mk.

Ова сознание е најскапоценото за многу луѓе во моментов во Германија. Матијас Нас со право го нарекува феноменот на сплотеноста на демонстрантите „демократско чудо”.

Пред опасноста од екстремната десница, пред заканата да се повампират духовите на нацизмот, германското општество се освести и буквално се крена на нозе. Спонтаната прва голема демонстрација против екстремната десница беше уште во вторникот (16.01) во Келн, на која се собраа 30 илјади демонстранти. Сите тие реагираа на шокот што кај демократската германска јавност го предизвикаа информациите кои ги презентираше истражувачката мрежа „Коректив“ за тајната средба во близината на Потсдам. На средбата учествувале политичари од ЦДУ и од АфД, претставници на деснорадикалната граѓанска група, блиска на ЦДУ, „Унија на вредности” (Werteunion), еден истакнат австриски претставник на идентитарците, како и советникот на главната политичарка на АфД, Алис Вајдел. Тоа што ја згрози јавноста беа плановите кои оваа група ги дискутирала на средбата. Според тие планови, доколку АфД и другите деснорадикални сили еден ден би дошле на власт, тие имале намера да депортираат милиони мигранти од Германија, но и германски државјани со мигранстко потекло.

Откако јавноста дозна за тајната средба, веднаш стартуваа две петиции: за забрана на АфД и за одземање на граѓанското право да гласа и да биде избран на избори за шефот на АфД во Тирингија, Бјорн Хеке, кој, според германскиот суд, смее да се нарекува фашист. Петициите беа само почетокот, зашто вистинската лавина на демократската јавност почна да се одвива на германските улици, секој ден сѐ посилно. По Келн, во петокот следеа демонстрациите во Хамбург, на кои учествуваа 70 илјади граѓани. Во саботата следеше Франкфурт на Мајна со околу 35 илјади демонстранти, а истата бројка беше типична и за многу средно големи градови. Вчера во Бон, пред старото здание на Ратхаусот, на чиј балкон пред неколку децении стоеја величини како Де Гол и Кенеди, поздравувајќи ја новата, поинаква повоена (Западна) Германија, се беа собрале повеќе од 20 илјади граѓани. Во Минхен истото неделно попладне улиците ги преполнија, според организаторите, 350 илјади граѓани. Како во Хамбург во петокот, кога 70 илјади граѓани го исполнија сиот простор долж кејот на Алстер, притоката на Елба, заканувајќи се некои од демонстрантите да паднат во водата, така и демонстрацијата во Минхен беше прекината поради преполнетост на улиците кога, во исто време, од сите страни на градот луѓето уште се движеа кон центарот. Што значи, бројката на тие кои сакале да учествуваат на демонстрацијата би била уште повисока. Во Берлин се повтори истата слика.

Сите германски граѓани, кои се свесни дека демократијата која ја градеа татковците на денешниот уставен поредок, величините како Конрад Аденауер, Вили Брант или Хелмут Шмит, деновиве се обединети во желбата да го одбранат својот свет од ретроградните соништа на малкумина. Германските градови не се повеќе такви, како што беа веднаш по војната. На секојдневната слика во германските градови припаѓаат луѓе со различна боја на кожата, со различен изглед, со различно првобитно етничко потекло, луѓе кое не се родени во Германија, но која за нив, во меѓувреме, станала нивна вистинска татковина, а германскиот јазик нивен втор мајчин јазик. Особено Келн е горд на своето културно и етничко шаренило.

Зошто вреди да се одбрани германското секојдневно шаренило, истакна дури и германскиот претседател Франк-Валтер Штајнмајер во вчерашната видео-порака. Тој им се заблагодари на стотиците илјади граѓани кои и овој викенд демонстрираа во своите градови, обединети против нечовечноста и екстремната десница, затоа што сакаат и во иднина да живеат во мир со сите граѓани. Тие нѐ охрабруваат сите, истакна Штајнмајер, затоа што тие ја бранат нашата Република и нашиот Устав од неговите непријатели. „Тие ја бранат нашата човечност”, потцрта тој. „Нам сега ни треба сојуз на сите демократи”, порача германскиот претседател, „ независно дали живееме во град или на село, независно од тоа дали сме стари или млади, со или без мигрантско потекло.” Штајнмајер го истакна сознанието кое секој германски граѓанин го поседуваше додека ги следеше демонстрациите овие денови. Имено, „дека иднината на демократијата во Германија не зависи од гласноста на нејзините непријатели, туку од силината на тие кои ја бранат демократијата”.

Таква е 29-годишната Германка, која во коментар во весникот „Цајт” вели дека АфД ја ужаснува, затоа што е нечовечно да се депортираат луѓе кои се родени во Германија. Ним сега, значи, ќе им биде кажано дека тие не се доволно „Германци”, иако имаат германски пасош. За себе младата Германка вели дека на часовите по историја таа се заветувала дека ќе биде на вистинската страна, доколку некогаш се повтори такво стравотно нешто. „Не смееме да дозволиме да бидеме потчинети од фашистите”, истакнува таа.

Ваквите храбри, чесни и хумани германски граѓани се надежта дека Аушвиц во денешна Германија никогаш нема да се повтори, колку и да ја сонуваат неговата реприза „стаорците на историјата”. Доколку продолжи овој храбар бран (а се чини дека ќе продолжи!), тогаш артистите од фашистичкиот аматерски театар на АфД ќе побрзаат да се „преоблечат” во други костуми, за да глумат во некоја друга застарена драма или историска бурлеска.

The post Германските граѓани ја бранат својата демократија appeared first on plusinfo.mk.

„Кандидатурата на РСМ за членство е попречена од спорот со Бугарија, кој може да го блокира проширувањето на ЕУ – процес кој бара едногласна согласност од сите земји членки. Предмет на спорот се историјата и културното наследство. За да се реши тоа, Македонија се обврза да го промени својот Устав, признавајќи го постоењето на етнички Бугари во земјата“, потсетува бугарската агенција.

Според БГНЕС, Штајнмаер рекол дека уставниот амандман е „важна одлука“, бидејќи ќе обезбеди напредок во преговорите со ЕУ.

„Со години, Германија е најголемиот трговски партнер на Северна Македонија, со речиси половина од извозот на земјата. Околу 200 компании под германска контрола вработуваат околу 15.000 луѓе во Северна Македонија“, потсетува агенцијата.

The post ПОСЕТАТА НА ШТАЈНМАЕР ПОГЛЕДНАТА СО БУГАРСКИ ОЧИ Германците ја притискаат Македонија да ги внесе Бугарите во Уставот appeared first on plusinfo.mk.

„Продолжете одлучно по патот кон членството. Не се враќајте назад од последните метри”, рече Германецот во инспиративниот настап во македонскиот парламент.

Се разбира, јас не очекувам Уставот да биде отворен во јануари. Да бидам искрен, воопшто не очекувам и не посакувам да се случи тоа, пред Бугарија да ја запре својата негаторска политика кон Македонците и пред да ги признае идентитетот и самобитноста на македонската нација. Мислам дека тоа е еден сериозен и мошне фер услов што Скопје треба итно да го промовира во Брисел, за воопшто да почнат сериозни и плодни разговори за барањата на Софија. И убеден сум дека владата на Ковачевски за тоа би добила поддршка од Европската Унија.

И од германскиот претседател, бездруго.

Имам впечаток дека Штајнмајер денеска на македонската влада ѝ ги отвори очите, изразувајќи целосно разбирање за правото на Македонците за спорните прашања да разговараат отворено, со емоции, па дури и страстно.

„Протоколот со Бугарија, неопходните уставни измени: тоа се прашања што ги засегаат луѓето во вашата земја, затоа што се работи за прашања на националниот идентитет, македонската историја, јазик и култура. Правилно е да се водат овие дебати со емоции. На важни социјални дебати им е потребна оваа страст. Сметам дека овие дебати можете да ги водите со самодоверба“, рече Штајнмајер.

Хер Штајнмајер, вас ис дас?!

Па нашиве шупци пропагандисти од Илинденска, овие што шетаат со „наративите“ под мишка, цело време ја убедуваат јавноста дека протоколите не се важни, уставните измени исто, а за прашањата поврзани со националниот идентитет, јазикот, историјата и културата воопшто не се разговара.

Зошто Германецот не е добро брифиран? М?

Без да ја оспорувам суштината на неговата убедувачка мисија – Штајнмајер очигледно е голем државник, на прв поглед се забележуваат неговиот шарм и неговата аура, што вешто ги употребува за дисциплинирано да ја изврши својата задача – сакам да кажам дека ми се допадна неговиот стил.

Ми се допадна, на пример, неговиот патетичен апел до пратениците и до граѓаните да мислат на заедничкото добро, а не на својата личната корист. Којзнае колку сурати сретнал денеска Германецот, што директно го инспирирале да каже вакво нешто!

Ми се допадна и тоа што го посети гробот на македонскиот револуционер Гоце Делчев. Таман на време. Пред последната битка. Во која нашата историска комисија и него ќе го шитне за ич пари…

А најмногу ми се допадна што Германецот ги цитираше Блаже Конески и Петре М. Андреевски.

„Јазикот е нашата татковина“. Позната мисла на Конески.

Од „Пиреј“ на Петре М. Андреевски, човекот ископал еден „миротворен“ цитат: „Неодоливиот копнеж за мирен живот“.

И така, Штајнмајер поентираше: „Вие сами одлучувате што ја прави вашата земја посебна. Вие решавате како изгледа македонскиот идентитет денес и како ќе изгледа во иднина“.

Добро.

Така е, драг претседателе.

Многу нешта ја чинат нашата земја посебна. Мала, блиска со соседните, ама сепак посебна. И вредна човек да ја замисли како „општо добро“. Дури и како кауза, ако баш се мора…

Нашата земја ја чини посебна и спомнатиот Конески, на пример. Но и кога пее: „Ќе дојде време на лажни пророци / што божем во мое име / ќе ве збираат по плоштадите, / ќе креваат врева до небеси, / ќе се бувтаат во градите. / Немојте да им верувате!…“

И Петре М. Андреевски демонстрира една посебна состојба на духот на Македонецот, која во „Пиреј“, на пример, ја опишува и вака: „На изгореното срце и окото му е суво. Не пушта солза и да го молиш“.

И сликарот Илија Пенушлиски ја отсликува нашата посебност. На свој начин. Тој денеска кликна „ова е травестија“ и јавно ја повлече својата слика од изложбата „Заедно“ во новиот Бугарски културен центар во Скопје. Срцето на Пенушлиски изгорело кога разбрал како се злоупотребени неговото дело и неговото име, но тој ниту солза пушта ниту допушта некој да го моли, туку одлучно заповеда – сликата да се повлече, а името да ми се избрише од излогот!

Можело некој да се сети сликата на Пенушлиски да му се подари на Штајнмајер. Еве идеја, уште не е доцна…

Да, секако и Гоце ја чини Македонија посебна. Бидејќи колку и да му бараат бугарска ДНК, тој се борел за автономна Македонија. Не за Бугарија, туку за Македонија.

Нејсе…

Тоа е таа Македонија за која најголемите пропагандисти на СДСМ јавно ломотат дека е „петтокласна нација“.

И клеветат дека нејзините поети се второкласници. Или така некако беше…

И си се убедуваат дека Скопје и Македонија не биле „романескни“.

И измислиле – ова да го слушне Штајнмајер, молам! – дека македонскиот јазик, на пример, покрај другите недостатоци, имал уште една голема фалинка, не овозможувал филмски израз на емоцииите. На македонски јазик не можело да се сними добар филм. Дури ниту пристоен. Не е ниту снимен. Нашиот јазик немал филмска мелодика. Поради акцентот.

Сигурно се прашувате, која будалетинка го кажала ова?

Оној колумнистот од „првата борбена линија“. Чија првокласност, јебемлига, не може да дојде до израз, бидејќи е припадник на „петтокласна нација“. Кој зборува и пишува на јазик на кој, ете, не можело да се сними филм. Поради акцентот.

Хахахахаха!

Која романескна будалетинка!

Шокур разбираш ти за акцентот, шапшалу еден, ти си чкљ класа!

Снимај си ги ти твоите шизички филмчиња во главата на бугарски јазик, ако ти е така полесно и помило!

Лајно едно!

(Нели мелодично звучи ова „лајно“?)

Си помислив денеска да го побарам на кратко германскиот претседател и да му речам: „Драг господине Штајнмајер, не ли ви се чини дека германскиот јазик не е поетичен и погоден за снимање филмови?“

Да бев ко овие шутрациве што си го мразат сопствениот јазик и сѐ друго македонско, ќе му ја објаснев таа омраза со општо познатите предрасуди за германскиот јазик. И на Штајнмајеров ќе му речев:

„Можеби поради акцентот не ви чини јазикот. Јас и не знам кај ви паѓа акцентот. Кај нас ни паѓа на третиот отпозади. Овој колумнистов од „првата борбена линија“ секогаш е прв, нормално, и затоа никогаш на него да падне акцентот. Фрустриран е поради тоа. А и тоа швапската лексика, па ви се молам. Лос, шнел, натурлих… Како ли воопшто пишуваат вашите поети? Треба да размислите и за ревизија на правописот, секогаш имате вишок букви. Затоа ли не можете да ги титлувате филмовите?“.

Веројатно Штајнмајер ќе ме погледнеше загрижено и ќе ми шепнеше на уво: „Еншулдиген зи, ова кај вас во Скопје да не е заразно?“

За среќа, до таа средба не дојде, а Германецот продолжи по протоколот, со цитатот на денот: „Искрено се надевам дека македонската култура наскоро ќе ја збогати културната разновидност на Европската унија. Денес сум тука за да научам уште повеќе за неа“.

И?

Што научил Штајнмајер?

Со оглед на тоа што не се сретнал со Македономрзецот, веројатно не сфатил зошто сме „петтокласна нација“. Добро, такви сме какви што сме, не сјаеме баш, теписине во „Св. Спас“ од комунистичко доба… Ама ете, имаме и ние со нешто и да се пофалиме.

Македономрзецот веројатно бил на проекција на филмот „Кајмак“ на Милчо Манчевски, со опрема за ловење погрешни акценти во репликите. И со цврста намера да ја докаже својата теза за нашиот „нефилмски“ јазик.

Кај и да е, ќе се огласи на Фејсбук. Додуша, тој јавно повика на цензура и на заведување некаков негов ред на социјалните мрежи, но редот ќе важи за сите освен за него. И за таквите како него. Тоа, впрочем, е сонот на секој цензор.

Не знам дали Штајнмајер научил за најважното. За планот. Со кодни имиња: Дранг нах Остен. Барбароса. Кур те дуа Еуропе. Сардисаалееее!

Имено, целата таа пропагандистичка багра што ги „демистифицира“ и ги „брани“ политиките на владата на СДСМ и на ДУИ очекуваат проблемите на нивниот работодавец да се решат на тој начин што тие егзалтирано ќе вреват, странците ќе суфлираат (лос, шнел…), а опозиционерите ќе бидат приведени во парламентот и натерани да гласаат. Потоа сите заедно ќе бидат натоварени на воз во Монополот и…

И така, всушност, уште еднаш ќе се потврди тезата дека Македонија навистина е петтокласна нација.

За која не може да се сними филм. Ни краткометражен, од 1945-та наваму, мамицу му!

Неверојатно глупав план, хер Штајнмајер!

Овој план ја потврдува теоријата на младиот свештеник Дитрих Бонхофер – Германецот сигурно знае кој е тој, другите ќе научат – според која глупавите луѓе се поопасни од злобните. Глупавоста не е интелектуално, туку морално нарушување. Таа е поврзана со драстичното зголемување на моќта и на привилегиите, а со тоа и на злобата.

Како поинаку да се разбере зошто некои луѓе со неочекувана глупавост ги поминуваат сите граници на пристојноста и потоа пројавуваат симптоми на класичен кататоничен раптус (возбуда) на умот?

И?

Што да правиме со таквите луѓе? Што да правиме со себе? Што ако таа болест е заразна? Што ако со нивните блуеници по медиумите и на социјалните мрежи навистина се маркираат конкретни и опасни политики? Како ќе се спасиме?

Не грижете се. Имајте повеќе самодоверба, убаво ве советува Штајнмајер. Зашто, овој наш „петтокласен народ“ и за ова зло нашол лек. Го опишува Конески во песната „Молитва“:

Спаси ме Боже, од болните луѓе
што се накажани,
та не се криви,
нивната злоба умерено суди ја,
самите од неа одвај се живи.

(…)

Дај Господе, што помалку очите да
им ги бодам –
штом тие лево ќе фатат,
јас десно да одам.

Значи, кратко и јасно. И ептен филмски:

Штом тие лево, ние веднаш десно?

Ја, натурлих!

The post Штом тие ќе фатат лево, ние веднаш десно? Ја, натурлих! appeared first on plusinfo.mk.

Штајнмајер во обраќањето до пратениците побара да се надмине последната пречка, а тоа се уставните измени. Притоа, тој ги спомена Петре М. Андреевски и романот „Пиреј“.

– Во романот на векот ‘Пиреј’, Петре М. Андреевски на впечатлив начин ја опишува судбината на Македонците Јон и Велика на почетокот на 20 век. Овој роман ни предочува, покрај сето страдање, дека има нешто што е посилно и поважно од националистичките интереси и политичките несогласувања. Нескротливиот копнеж за мирен живот. Тој копнеж верувам дека постои и денес, го има секаде во Европа, тој постои и тука. И 100 години по објавувањето на овој роман, дозволете на овој нескротлив копнеж за мир и слобода да му дадеме заедничка татковина во Европа – рече Штајнмајер.

Тој пред пратениците рече и дека протоколот со Бугарија и потребните уставни измени се теми што ги засегаат луѓето бидејќи станува збор за прашања од националниот идентитет, за македонската историја, јазикот и културата и сигурно дека е правилно овие дебати да се водат со страст.

– На важните општествени дебати им е потребен овој страстен пристап. Сметам дека вие самите можете самоуверено да ги водите овие дебати, луѓето на Северна Македонија, вие ја обликувате и одредувате што ја сочинува вашата земја, вие решавате како треба да изгледа македонскиот идентитет денес и како тој треба да изгледа во иднина. Онака како што тоа го правите од пред 30 години, онака како што го формулираше тоа македонскиот писател Блаже Коневски кога кажа и кога напиша дека ’јазикот е нашата татковина‘. Се надевам многу дека македонската култура наскоро ќе ја збогати културната различност во ЕУ и овие денови сум тука за да научам уште повеќе за тоа – порача Штајнмајер.

Германскиот претседател во говорот се осврна и на филмот „Медена земја“ и на пораката што го обиколи светот.

– Утре ќе разговарам со Атиџе Муратова и со авторите на филмот „Медена земја“. Муратова, која е една од последните диви пчеларки во Европа, кога таа собира саќе и мед им вели на своите пчели: ‘Пола за мене, пола за вас’. Оваа порака, на овој успешен македонски филм, кој истовремено е полн со значења, го обиколи светот. И ние ја знаеме во Германија. Во моите очи ‘Медена земја’ истовремено е две нешта: израз на гордата култура на една мала земја, а истовремено пренесува една уште поголема порака чие значење излегува надвор од границите на поединечната земја. Не смееме целосно да ги искористиме даровите од природата, ниту неповратно да ја уништиме нашата животна средина. Ова е задачата пред која е исправено човештвото и ние во Германија сакаме да соработуваме на ова поле – додаде Штајнмајер во своето обраќање.

Штајнмајер додаде дека влезот во ЕУ ќе им ја отвори портата на граѓанките и граѓаните на Северна Македонија кон најголемиот трговски блок во светот.

– Исто така и портата кон 450 милиони Европејци. Портата за работа, за живеење, за патување низ нашиот континент. Ние се радуваме да ве видиме вас тука од Северна Македонија како минувате низ оваа порта – додаде германскиот претседател.

The post ШТАЈНМАЈЕР ЌЕ СЕ ВИДИ СО АТИЏЕ ОД „МЕДЕНА ЗЕМЈА“ Во Собранието го цитираше Конески и говореше за романот „Пиреј“ на Петре М. Андреевски appeared first on plusinfo.mk.

„Детерминираноста за спроведување на реформите е клучна за да се зачува демократијата и европските вредности. На средбата заеднички беше констатирано дека целата поддршка и напори кои ги вложуваат двете земји, вклучително и претстојните уставни измени, се во насока на обезбедување европска иднина на граѓаните“ – соопшти владината прес-служба.

Покрај сојузништвото и партнерството во НАТО, ОН и ОБСЕ, Германија оваа година имаше и успешна улога во Берлинскиот процес кој резултираше со три потпишани договори за меѓусебно признавање на академските квалификации/дипломи, професионалните квалификации и патните исправи, се потсетува во соопштението.

Владата наведува дека денешната посета на Штајнмајер е потврда на пријателството и соработката и дека блиските релации на двете земји се потврдуваат и преку економската соработка.

„Германија е прв и најголем економски партнер на Северна Македонија, која околу 45 проценти од целокупниот извоз го извезува во Германија. Околу 200 компании во Северна Македонија се германски компании меѓу кои и WPD која вложува околу 500 милиони евра во ветерна електроцентрала со моќност од 415КВ во Куманово – Крива Паланка, и која претставува сериозен чекор во производството на електрична енергија од обновливи извори“ – соопшти владината прес-служба.

The post ГЕРМАНИЈА САКА ДА ЈА ВИДИ МАКЕДОНИЈА ШТО ПОСКОРО ВО ЕУ Штајнмајер на средбата со Ковачевски appeared first on plusinfo.mk.

Франк Валтер Штајнмаер денеска е реизбран за претседател на Германија. За него во првиот круг гласаа 1.045 од 1.472 членови на таканаречената сојузна конвенција, составена од пратеници во националниот Парламент и претставници на сојузните покраини.

Штајмајер по реизборот вети дека вториот претседателски мандат ќе се посвети на ублажување на последиците од пандемијата со ковид-19.

Во претседателската трка учествуваа четворица кандидати. Стефани Гебауер од Сојуз на слободни гласачи Стефани Гебауер освои 58 гласа, кандидатот на левицата Герхард Траберт – 96, додека за кандидатот на Алтернатива за Германија, Макс Оте, гласаа 140 членови на конвенцијата.

Штајнмаер, кој беше министер за надворешни работи во првата влада на Ангела Меркел, се истакна во својот прв мандат како посредник меѓу конфликтните страни во пристапот кон борбата против пандемијата на ковид-19. Тој ужива и мнозинската поддршка од граѓаните.

Според аналитичарите, Штајнмаер е претседателот кој успешно ја водеше земјата низ неколку кризи за време на неговиот прв петгодишен мандат, од кои најголемата беше предизвикана од пандемијата.

The post ЌЕ ВЛАДЕЕ УШТЕ ПЕТ ГОДИНИ Германија го реизбра претседателот Штајнмајер appeared first on plusinfo.mk.

Германскиот претседател Франк-Валтер Штајнмајер ја разлути Украина со изјавите за дипломатската вредност на гасоводот Северен поток 2, преку кој треба да се доставува руски гас во Европа.

Украинскиот амбасадор во Берлин, Андриј Мелник за германската новинска агенција ДПА изјави дека „сомнителните историски аргументи“ на Штајнмајер во Украина предизвикале „чудење и индигнација“.

Претходно, Штајнмајер во интервју за весникот „Рајнише пост“ го бранеше гасоводот Северен поток 2 тврдејќи дека енергетските односи се меѓу последните мостови со кои Русија се уште е поврзана со Европа. Тој потсети и на германската инвазија врз Советскиот Сојуз за врема на Втора светска војна.

– Во војната на подрачјето на тогашен Советски Сојуз страдаа повеќе од 20 милиони луѓе. Тоа не ги оправдува денешните погрешни потези во руската политика, но не би смееле да ја изгубиме од вид пошироката слика – истакна Штајнмајер за „Рајнише пост“.

Додека Мелник тврди дека Северен поток 2 и понатаму е геополитички проект на рускиот претседател Владимир Путин, а штетен за интересите на Украина.

– Затоа е цинично, посебно во оваа дебата, да ги споменува жртвита на нацистичкиот терор и уште кон тоа да ги препишува милионите советски жртви на германската истребувачка и поробувачка војна исклучително на Русија – истакна Мелник.

Тој додаде дека историјата „опасно се искривува“ кога се спомнуваат милионите жртви на нацистите во Украина, која беше дел од СССР.

Украина е меѓу најжестоките критичари на гасоводот Северен поток 2, преку кој во Германија ќе се транспортираат 55 милијарди кубни метри гас.

Москва во моментов и плаќа такси на Киев за транзиција на гасот преку Украина. Русија во следните години планира да ги намали давачките и да испрати поголеми количини на гас директно во Европа преку Балтичкото Море.

The post Германскиот претседател ја налути Украина appeared first on plusinfo.mk.

Претседателот на државата Стево Пендаровски денеска оствари телефонски разговор со претседателот на Германија, Франк-Валтер Штајнмајер.

Пендаровски изразил задоволство од интензивниот политички дијалог меѓу двете држави и упатил благодарност до германскиот претседател за постојаната германска поддршка за нашата европска интеграција и затоа што прашањето за проширување на ЕУ е во приоритетите на германското претседавање.

„Во таа насока, претседателот Пендаровски  посочи дека очекува до крајот на годинава да се одржи првата меѓувладина конференција со што ќе се означи официјалниот почеток на преговорите на Република С. Македонија со ЕУ. Отпочнувањето на преговорите ќе биде дополнителен мотив за земјава и поттик за понатамошно спроведување на неопходните суштински реформи, особено во сферата на правната држава и социоекономскиот развој“, се наведува во денешното соопштение од кабинетот на Пендаровски.

Штајнмајер истакнал дека после конструктивните разговори меѓу претставниците на владите на С. Македонија и Бугарија во Берлин во текот на вчерашниот ден, се надева дека во рамки на германското претседателство, до крајот на годинава, официјално ќе започнат преговорите на ЕУ со нашата држава.

„При тоа, истакна дека билатералните прашања треба да се решаваат во духот на добрососедството и на европските вредности“, се наведува во соопштението.

Двајцата претседатели констатирале дека прашањата во однос на историјата треба да продолжат да се дискутираат меѓу експертите во рамки на заедничката комисија за историски и образовни прашања. Било истакнато и позитивното искуство на Германија во оваа сфера и понудена поддршка на работата на комисијата.

Претседателите Пендаровски и Штајнмајер го осудиле терористичкиот напад во Виена и оцениле дека тоа е напад врз заедничките европски вредности во кои веруваме. Се согласиле дека е неопходна засилена соработка на безбедносен план за превенција и пресретнување на терористичките закани.

Пендаровски и Франк-Валтер Штајнмајер разговарале и за состојбите во двете држави во справувањето со пандемијата на ковид-19, при што шефот на нашата држава се заблагодарил за добиената севкупна германска помош во справувањето со пандемијата.

The post По средбата во Берлин, Штајнмајер очекува почеток на преговорите appeared first on plusinfo.mk.