Истрагата за случајот со шпионажа во кабинетот на претседателката е во завршна фаза, додека предметот „Мазут“ е во постапка пред Вишото јавно обвинителство, од каде се очекува одлука во законски предвидениот рок.

Вака информира јавниот обвинител Ненад Савески. Тој вели дека станува на принципиелниот став да не коментира политички изјави, но нагласи дека комуникацијата со извршната власт, вклучително и контактите со премиерот, не ја смета за спорна и потенцира дека таа не влијае врз независноста во одлучувањето.

Во контекст на зголемените јавни критики и изјави од политичкиот врв за работата на обвинителството, Савески истакна дека очекувањата за резултати се легитимни, но дека самостојноста на институцијата е загарантирана со Устав и закони.

– Сè уште стојам на ставот дека нема да коментирам изјави на политичари, вклучително и функционери, или конкретно претседателот на Владата. Меѓутоа, како што кажав и претходно, секој има право да ги изнесува своите ставови, а ние имаме обврска да ги исполниме очекувањата и да дадеме резултати, што е сосема природно, изјави Савески

Во однос на изјавите на премиерот дека „трпението му е при крај“, како и неговото право да комуницира со обвинителството, Савески вели дека не гледа ништо спорно во самата комуникација.

– Не знам во колкава мера е тоа надлежност на премиерот, покрај останатото, да се јавува кај јавен обвинител, меѓутоа, како и секој друг што има право да ми се јави, ми се јави и премиерот, односно претседателот на Владата, и тука не гледам ништо спорно. Сум истакнал и во моите претходни изјави дека секогаш сум за соработка меѓу институциите. Во овој случај, комуникацијата помеѓу Јавното обвинителство и другите институции сметам дека е неопходна, со цел постигнување резултати. А за да се постигнат резултати, потребно е да се обезбедат и услови. Во голем дел, токму извршната власт има задача и улога да обезбеди услови за работа на јавните обвинители – рече Савески.

Тој ја отфрли можноста ваквите комуникации да влијаат врз самостојноста на Обвинителството.

– Самостојноста е неспорна и е предвидена и во Уставот и во матичните закони по кои постапува Јавното обвинителство. Така што, било каква реакција не можам да ја сметам како влијание врз мене при носењето одлуки или постапувањето. Во оваа прилика испраќам порака и до сите јавни обвинители – без оглед на различни активности, дејствија или изјави – да не дозволат тоа да се одрази врз нивното секојдневно постапување и одлучување – изјави јавниот обвинител.

Во однос на актуелните предмети, Савески информира дека истрагата за случајот со шпионажа во кабинетот на претседателката е во завршна фаза.

– Она што е најново е дека имаше состанок со истражителите, односно со истражителите од МВР и тимот на истражители кој работи на овој случај во Обвинителството за гонење организиран криминал и корупција. Имаше координативен состанок на кој присуствував и јас. Се изготви план за понатамошни истражни дејствија. Според информациите со кои имав увид, како од надлежниот јавен обвинител, така и од истражителите, истражните дејствија се во завршна фаза, така што сметам дека во скоро време ќе има јавнообвинителска одлука во врска со тој случај – рече тој, додавајќи дека видеоснимките се предадени и се предмет на анализа.

За предметот „Мазут“, пак, посочи дека моментално е во Вишото јавно обвинителство Скопје.

– Последниот податок што го имам е дека предметот веќе е предаден – и како физички предмет – од страна на Обвинителството за гонење организиран криминал до Вишото јавно обвинителство Скопје. Релативниот рок од 30 дена сè уште тече, така што очекувам дека во разумен рок, кој му е потребен на надлежниот виш јавен обвинител, ќе биде донесена јавнообвинителска одлука и јавноста ќе биде соодветно информирана – посочи тој во изјава за медиуми по денешната седница на Советот на јавни обвинители.

The post ВИДЕОСНИМКИТЕ СЕ АНАЛИЗИРААТ, ИСТРАГАТА Е ПРИ КРАЈ Савески најави обвинителска одлука за случајот со шпионажа во претседателскиот кабинет appeared first on plusinfo.mk.

Секторот за компјутерски криминал при Министерството за внатрешни работи соопшти дека активно постапува по две официјални наредби добиени од Основното јавно обвинителство за гонење организиран криминал и корупција – се вели во соопштение на МВР дистрибуирано до медиумите во врска со наводниот случај на шпионажа во кабинетот на шефот на државата.

Наредбите, издадени во февруари и март 2026 година, се однесуваат на детална анализа на електронски доказен материјал поврзан со конкретен случај. Во рамки на постапката, од страна на надлежните органи е извршена екстракција на податоци од одземена техничка опрема.

Од МВР информираат дека количината на дигитални докази е значителна, поради што нивната обработка бара подолг временски период и внимателна техничка анализа.

Според последните информации, процесот е во завршна фаза и се очекува во следниот период целиот обработен материјал да биде доставен до обвинителството за понатамошно постапување.

Институциите нагласуваат дека по финализирањето на анализата, јавноста ќе биде соодветно информирана за резултатите и понатамошниот тек на случајот.

„Во тек е анализа на сите електронски докази кои се екстрахирани од одземената опрема. Напоменуваме дека станува збор за поголема количина на електронски доказен материјал за кој е потребен поголем временски период“ – се вели во соопштението на МВР.

Претходно Обвинителството за организиран криминал и корупција потврди дека уште од декември лани води предистражна постапка за сомнежи за шпиунажа и недозволени активности во Кабинетот на претседателката Гордана Сиљановска-Давкова.

Од ОЈО велат дека со месеци бараат анализи, видеоснимки и податоци од МВР, но дека досега немаат добиено повратни информации за резултатите од истрагата.

ИСТРАГАТА БИЛА ПОЧНАТА ПО ПРВИТЕ ИЗВЕСТУВАЊА ОД МВР Обвинителството со месеци чека одговор за шпионската афера во Кабинетот на претседателката 

The post СТАНУВА ЗБОР ЗА ГОЛЕМА КОЛИЧИНА ПОДАТОЦИ, АНАЛИЗАТА Е ВО ЗАВРШНА ФАЗА За случајот „шпионажа“ МВР добила две наредби од Обвинителството appeared first on plusinfo.mk.

Германската полиција приведе брачна двојка во Минхен под сомнение дека шпионирале во корист на Кина.

Приведените се германски државјани, а се товарат дека одржувале контакти со научници од германските универзитети и истражните институти со цел да добијат научни информации за високотехнолошки компоненти со потенцијални воени примени, соопшти Канцеларијата на федералниот обвинител во Карлсруе.

Според истражителите, осомничените биле заинтересирани за професори и научници од областа на воздухопловното инженерство, компјутерските науки и вештачката интелигенција. Во нивните контакти со академиците, двајцата понекогаш се претставувале како преведувачи, а друг пат како вработени во автомобилската индустрија.

Обвинителството наведе дека некои научници биле измамени да патуваат во Кина, под изговор дека држат платени предавања пред обична публика, а всушност им држеле предавања на претставници на државни компании за одбрана.

Двајцата осомничени денеска требаше да се појават пред судот во Сојузниот Врховен суд на Германија, кој ќе разгледа барање за нивно притворање.

Обвинителството соопшти дека полициските операции поврзани со случајот се одвивале истовремено во неколку германски покраини, вклучувајќи ги Баден-Виртемберг, Баварија, Берлин, Бранденбург, Долна Саксонија и Северна Рајна-Вестфалија. Сепак, дејствијата биле преземени против лица кои се сметале за сведоци, а не за да се бараат други осомничени.

The post ГЕРМАНЦИ ШПИОНИРАЛЕ ВО КОРИСТ НА КИНА? Уапсена брачна двојка во Минхен appeared first on plusinfo.mk.

Премиерот Христијан Мицкоски денеска со остри критики се осврна на случајот со сомнежите за шпионажа во Кабинетот на претседателката Гордана Сиљановска-Давкова во Вила Водно, обвинувајќи дека зад случајот стојат „структури од минатото“ и лица кои ги нарече „шпионски талог на општеството“.

Одговарајќи на новинарско прашање дали располага со информации за случајот и дали може да открие повеќе детали, Мицкоски изјави:

– Па, видете, тоа се шпионски талог на општеството, структури од минатото. Коишто се наоѓале во кабинетите како глодари на некои поранешни политичари. Претседатели, премиери и така натаму.

Тој посочи дека овие лица се претставувале како група вработени и испраќале анонимни дописи до обвинителствата.

– И тие се претставуваат како група вработени и испраќаат анонимни дописи до обвинителства – рече Мицкоски.

Во својата изјава премиерот го спомена и шефот на Обвинителството за гонење организиран криминал и корупција, Ислам Абази.

– Се разбира, таму е Ислам Абази, веднаш да истрча и да создаде паника во јавноста дека нешто се случувало – изјави премиерот.

На крајот, Мицкоски порача дека нема намера повеќе да ги коментира лицата кои ги нарече „глодари“.

– Јас не би ги коментирал овие глодари, бидејќи мислам дека треба да ги заборавиме – рече Мицкоски.

Според ОЈО ГОКК, предметот бил отворен во декември 2025 година по известување од МВР – Сектор за компјутерски криминал, а се однесува на сомнежи дека доверливи електронски податоци од Кабинетот на претседателката биле неовластено копирани и можеби завршиле кај странски разузнавачки структури.

Од Обвинителството соопштиле дека со месеци бараат копии од видео надзорот од Вила Водно, но дека досега не добиле повратни информации од МВР за обезбедувањето на снимките.

The post ГЛОДАРИ ОД МИНАТОТО РОВАРАТ ВО КАБИНЕТОТ НА ШЕФОТ НА ДРЖАВАТА Мицкоски вели дека Ислам Абази шири паника appeared first on plusinfo.mk.

Федералното истражно биро на САД објави дека нуди 200.000 долари за информации поврзани со локацијата и апсењето на поранешната американска разузнавачка службеничка Моника Вит, обвинета за шпионажа во корист на Иран.

Според американските власти, Вит пребегала во Иран уште во 2013 година, а 6 години подоцна била обвинета дека открила строго доверлива американска разузнавачка програма и идентитет на американски агент.

– Со тоа наводно му го загрозила животот на агентот – соопштија американските власти.

Тајни информации за Техеран

Во обвинението се наведува дека Моника Вит соработувала со иранските власти и им предавала информации поврзани со националната безбедност на САД.

За возврат, според ФБИ, иранските власти ѝ обезбедиле сместување и техничка опрема.

Американските служби веруваат дека таа и понатаму е активна и дека продолжува да ги поддржува иранските активности.

ФБИ сè уште трага по неа

ФБИ соопшти дека потрагата по Вит продолжува и дека секоја информација што би помогнала во нејзиното пронаоѓање ќе биде разгледана.

Случајот повторно го отвори прашањето за инфилтрација, пребегнувања и разузнавачки операции меѓу Вашингтон и Техеран, во период на силни геополитички тензии меѓу двете држави.

The post РАЗУЗНАВАЛА ОД ИРАН, ГИ ПРЕДАЛА ФБИ И ПРОГРАМАТА Се нудат 200.000 долари за апсење на Моника Вит appeared first on plusinfo.mk.

Белгиските власти ноќеска се соочиле со нов инцидент што ја вознемирил јавноста. Непознати дронови се појавиле над две воени бази во североисточниот дел на земјата. Станува збор за базите „Клајне-Брогел“ и „Леополдсбург“, каде што во првата, според повеќе извори, се чува американско нуклеарно оружје, јавија белгиските медиуми.

Според весникот „Беланг ван Лимбург“, војник кој бил на должност во „Клајне-Брогел“ прв го забележал леталото, но не можел да утврди дали навистина се наоѓа над базата или лета во близина. Тој веднаш ја известил полицијата, но кога екипите пристигнале, дронот исчезнал без трага. За случајот било известено и белгиското разузнавање, кое ја презело истрагата.

„Клајне-Брогел“ е клучна воздухопловна база каде што се складирани американски нуклеарни бомби Б61, а во 2027 година таму треба да се стационираат и новите борбени авиони Ф-35. Присуството на дронови над ваква стратешка точка веднаш го зголеми безбедносното ниво во регионот.

Меѓутоа, белгиските медиуми јавуваат дека по првичниот инцидент, слични беспилотни летала биле забележани и над блиската касарна „Леополдсбург“, што дополнително ги вклучи алармите во армијата. Сепак, не се објавени детали за потеклото на дроновите, ниту дали тие биле вооружени или шпионски.

Станува збор за четврт случај на дронови во белгискиот воен простор за последните неколку недели, откако слични летови беа забележани над базите „Марш-ан-Фамен“ и „Елзенборн“ во источна Белгија. Властите не исклучуваат можност за координирани акции на странски разузнавачки служби, но засега не даваат официјални информации.

The post МИСТЕРИОЗНИ ДРОНОВИ НАД НУКЛЕАРНА БАЗА ВО БЕЛГИЈА Властите во Брисел не исклучуваат странска шпионажа appeared first on plusinfo.mk.

Цивил вработен во американска воена е осуден на речиси шест години затвор за откривање доверливи информации за руската инвазија на Украина на странска страница за запознавање во 2022 година, објави агенцијата Франс-прес.

64-годишниот Дејвид Френклин Слејтер, поранешен потполковник на армијата, се изјасни за виновен во јули. Федералниот суд во Небраска го осуди на 70 месеци затвор и парична казна од 25.000 долари.

Овој цивилен вработен во воздухопловните сили, распореден во базата Офут во Небраска, дом на Командата за стратешко нуклеарно оружје, беше уапсен во 2024 година.

Тој е обвинет за пренесување класифицирани информации помеѓу февруари и април 2022 година „преку разговор на странска страница за запознавање на неговиот соучесник, кој тврдел дека е жена што живее во Украина“. Документите се однесувале на „воените цели и капацитети на Русија поврзани со инвазијата на Украина“.

Според досието, таа го нарекувала во своите пораки „нејзиниот таен љубовник-информатор“, забележа АФП.

The post ПРЕКУ САЈТ ЗА ДОДВОРУВАЊЕ ИЗДАЛ ДОВЕРЛИВИ ИНФОРМАЦИИ Вработен во армијата на САД осуден за шпионажа appeared first on plusinfo.mk.

Прислушкувачки уред, скриен во уметничко дело во 1945 година, останал незабележан од американската безбедност цели 7 години – и тоа не е единствениот пример кога уметноста била искористена за измама.

Пред 8 децении, во последните недели од Втората светска војна, група руски извидници му подариле на американскиот амбасадор во Москва рачно изрезбан Голем печат на САД, на неговата официјална резиденција – куќата „Спасо“. Подарокот симболизирал соработка меѓу Русија и САД за време на војната, а амбасадорот В. Аверел Хариман гордо го закачил во својот дом, каде што стоел до 1952 година.

Но, амбасадорот и неговиот безбедносен тим не знаеле дека печатот содржи таен прислушкувачки уред, подоцна наречен „Нештото“ (The Thing) од американските тимови за техничка безбедност. Уредот прислушкувал дипломатски разговори цели 7 години без да биде откриен. Со користење на наизглед безопасно уметничко дело за инфилтрација и за добивање стратешка предност, Советите го извеле „најгенијалниот трик по Тројанскиот коњ“. Но, ова е вистинска приказна, иако звучи како шпионска фикција, се вели во написот на Би-Би-Си.

Американските техничари подоцна сфатиле дека рачно изработениот Голем печат бил всушност „невидливо уво“, што ги слушало разговорите на амбасадорот.

Како функционирало „Нештото“?

Специјалистот за контраразузнавање, Џон Литл, со години бил фасциниран од уредот и дури направил сопствена реплика. Оваа година беше прикажан документарец за неговата работа, кој по премиерата во мај ќе се емитува во Англија.

Литл ја опишува технологијата на „Нештото“ со музички метафори – како комбинација од цевки налик на органски свирки и мембрана „како кожа на тапан, што вибрира на човечкиот глас“. Сето тоа било сместено во минијатурен објект, како игла за шапка, и имало предност да не биде забележано бидејќи немало електроника, батерија, ниту, пак, се загревало.

Изработката била неверојатно прецизна – „помеѓу швајцарски часовник и микрометар“. Историчарот Х. Кит Мелтон изјавил дека во своето време „Нештото“ ја издигнало науката за аудио-прислушкување на ниво дотогаш сметано за невозможно.

Во рамките на куќата „Спасо“, уредот се активирал само кога од блиска зграда се испраќал високофреквентен сигнал, кој ги одразувал вибрациите од антената на бубачката. Уредот бил откриен случајно во 1951 година, кога британски воен радиооператор ја погодил точната фреквенција и слушнал разговори од далечна просторија. Следната година, американските техничари го пребарале амбасадорскиот дом и дури по тридневна претрага сфатиле дека Големиот печат бил „невидливо уво“.

Уметноста како шпионажа

Еден од руските техничари кои го користеле уредот, Вадим Гончаров, изјавил:

– Долго време нашата земја добиваше специфични и многу важни информации што ни даваа предност… во Студената војна. И до денес никој надвор од советската разузнавачка служба не знае колку уште вакви „Нешта“ биле употребени за шпионажа на Западот.

Успехот на уредот не се должел само на техничката оригиналност, туку и на тоа што ги искористил културните ставови кон уметничките предмети. Убавите објекти се доживуваат како безопасни симболи на статус или на вкус и токму таа претпоставка ја искористиле Русите со рачно резбаниот печат од јавор.

Ова не е единствениот пример кога уметноста била искористена за шпионажа. Леонардо да Винчи, покрај сликањето на Мона Лиза, дизајнирал тенкови и опсадни оружја, Петер Паул Рубенс бил шпион за време на Триесетгодишната војна, а во Првата и во Втората светска војна уметници од разни земји осмислувале камуфлажи и операции на измама. Познатиот британски историчар на уметност Ентони Блант бил советски шпион за време на Втората светска војна и на почетокот на Студената војна.

Кој го смислил ова „Нешто“?

Во чудниот случај со „Нештото“, музичката историја исто така игра улога. Нејзиниот пронаоѓач, Лев Сергеевич Термен (познат како Леон Теремин), бил руски иноватор и талентиран музичар. Тој го создал првиот електронски инструмент – тереминот, што се свири без допирање: движењето на рацете низ воздухот околу антените ги контролира тоновите. Неговиот мистичен звук станал симбол за американските научно-фантастични филмови во 1950-те, најпознато во „Денот кога Земјата стоеше мирно“ (The Day the Earth Stood Still), од 1951 година, кој честопати се толкува како парабола за паранојата во студената војна.

По неговото откривање, „Нештото“ било чувано во строга тајност од американските служби. Но во мај 1960 година, кога американски шпионски авион U-2 беше соборен над Русија, Стејт департментот на САД јавно го изнесе Големиот печат на седница на Советот за безбедност на ОН за да покаже дека шпионажата во Студената војна не е еднострана. Според Џон Литл, тоа било толку срамно безбедносно пробивање, што требало да се собори авион за да излезе „Нештото“ конечно во јавноста.

Деталите за уредот потоа биле темелно проучени од британската контраразузнавачка служба, која му дала кодно име „SATYR“. Сите информации останале државна тајна сè до 1987 година, кога поранешниот безбедносен службеник Питер Рајт го открил ова во своите мемоари „Spycatcher“.

„Нештото“ ги фасцинира историчарите поради неверојатната техничка софистицираност за своето време и поради тоа што ја обликувало шпионажата во Студената војна. Но, исто така, открива и една мрачна историја на високата култура – надвор од оперските куќи и уметничките галерии – каде што класични музичари создаваат прислушкувачки уреди, а рачно изработени уметнички дела стануваат алатки за воено разузнавање.

The post 📽 ТРОЈАНСКИОТ КОЊ НА СТУДЕНАТА ВОЈНА ИМАЛ ГОЛЕМИ УШИ Советско уметничко дело станало шпионски уред што ги прислушкувал Американците appeared first on plusinfo.mk.

Иранскиот парламент изгласа забрана за користење „Старлинк“, сателитската интернет услуга на Спејс Икс на милијардерот Илон Маск, јави денеска новинската агенција ИСНА.

Според законот, прекршувањата би можеле да бидат казнети со парични казни, камшикување или со казна до 2 години затвор.

Како што пренесе ДПА, нејасно е колку широко се користи „Старлинк“ во Иран. Сепак, цената на услугата веројатно е недостапна за повеќето домаќинства. Извештаите покажуваат дека илјадници терминали се шверцувани во земјата, а според некои проценки, дека бројот на корисници надминува 100.000.

Старлинк е една од ретките алатки, достапни за Иранците за време на државно наметнатите исклучувања на интернетот, како оние неодамна спроведени за време на војната со Израел. Иран честопати прибегнува кон исклучување на интернетот за да го спречи ширењето на информации и за да задуши немири, особено за време на протести или зголемени тензии.

Парламентот усвои и мерка за зголемување на казните за шпионажа. Според новиот закон, „оперативната соработка“ со странски субјекти би можела да биде казнета со смрт. Законодавството не го дефинира терминот, но набљудувачите го гледаат како дополнителен обид за заплашување на неистомислениците и на критичарите на режимот. Казните вклучуваат и затворски казни од 10 до 15 години за политички, културни, медиумски или за пропагандни активности кои предизвикуваат јавен страв или штета на националната безбедност, и 2 до 5 години затвор за споделување содржина со непријателски странски мрежи.

Двете одлуки сè уште треба да ги одобри Советот на чувари, моќно тело за уставен надзор. Таквото одобрување е обично формалност. Советот на чувари има улога да става вето на закони – донесени од парламентот – да надгледува избори и да одобрува или да дисквалификува кандидати.

The post ИРАН ГО ЗАБРАНИ „СТАРЛИНК“ И ВОВЕДЕ СМРТНА КАЗНА ЗА ШПИОНАЖА Камшикување или затвор за корисниците на технологијата на Илон Маск appeared first on plusinfo.mk.

Министерството за надворешни работи на Велика Британија денеска ги осуди „злонамерните и неосновани обвинувања“ за наводна шпионажа што ги наведе руските власти да протераат британски дипломати.

– Ова не е првпат Русија да изнесува злонамерни и неосновани обвинувања против нашиот персонал – изјави портпарол на британското Министерство за надворешни работи.

Лондон ги отповика акредитивите на руски дипломат на почетокот на февруари, како одговор на протерувањето на британски дипломат во ноември од страна на Москва.

Руската служба за безбедност (ФСБ) денеска ја објави својата одлука да протера двајца британски дипломати поради сомневање за шпионажа.

The post РУСИЈА ИМ УДРИ КЛОЦА НА ДВАЈЦА БРИТАНСКИ ДИПЛОМАТИ ОБВИНЕТИ ЗА ШПИОНАЖА Лондон тврди дека Кремљ злонамерно лаже appeared first on plusinfo.mk.