Иранското правосудство изврши уште една егзекуција под обвинение за шпионажа, погубувајќи го денеска информатичарот Ехсан Афраште, пренесе новинската агенција „Мизан“, поврзана со судството.

Властите го обвинија Афраште за соработка со израелската разузнавачка служба Мосад, пренесе ДПА.

Според Агенцијата на активисти за човекови права со седиште во САД (HRANA), Афраште бил уапсен во 2024 година по неговото враќање во Иран од Турција. Првично бил држен во самица во затворот Евин во Техеран.

Групата „Ирански човекови права“ (IHR), со седиште во Норвешка, наведува дека Афраште, по струка градежен инженер, кој работел во областа на ИТ и кибер-безбедноста, додека бил во Турција сфатил дека странските разузнавачки служби го искористуваат, цитирајќи сведоштво на затвореник кој бил негов цимер.

И покрај тоа, активистите велат дека тој одлучил да се врати во Иран откако неговиот татко контактирал со иранските безбедносни власти за да ја објасни ситуацијата. Афраште потоа им се предал на официјалните лица, но подоцна во притвор бил принуден да даде лажно признание, тврдат групите за човекови права.

Иранското правосудство тврди дека Мосад му поставил задача да документира потенцијални цели, да ја набљудува околината на министерството за разузнавање, да присуствува на собири и да фотографира поединци.

Организациите за човекови права го критикуваат екстензивното користење на смртната казна во Иран, обвинувајќи ги властите дека ги користат егзекуциите како средство за заплашување. Според податоците на „Ирански човекови права“, најмалку 1.639 лица биле погубени во земјата минатата година, што е најголем број во изминатите 35 години.

The post ИРАН ЕГЗЕКУТИРАШЕ ИНФОРМАТИЧАР Наводно, шпионирал за Мосад appeared first on plusinfo.mk.