Уште еден пациент починал од западнонилска треска вчера попладне, и ова е шести случај со смртни последици, потврди денеска директорот на Клиниката за Инфективни болести, Фадил Цана. Станува збор за 72-годишен пациент од Скопје. Пациентот имал сериозни придружни заболувања.

– За жал, морам да известам дека вчера во попладневните часови почина уште еден пациент – соопшти директорот.

Починатиот пациент бил хоспитализиран пред 15 дена на клиниката, во изразито тешка општа состојба, со тешка клиничка слика, и покрај сите преземени интензивни мерки во Одделот за интензивно лекување, вчера во попладневните часови настапила смртта.

Во изјава за медиумите, Цана информираше дека до денеска, на Клиниката за инфективни болести биле или се хоспитализирани 51 пациенти, од кои 27 досега се излекувани и испишани од клиниката.

– Моментално на клиникава се 18 пациенти, од кои 15 се со лабораториски потврдена западнонилска инфекција невроинвазивна форма, додека тројца пациенти се клинички суспектни на Западен Нил невроинвазивна форма на инфекција – соопшти директорот.

Во моментов, најмладиот пациент на клиниката е 26-годишен и е во добра здравствена состојба.

Во Одделот за интензивна нега, со тешка клиничка слика се уште петмина пациенти. Сите се во напредната возраст.

The post ШЕСТА ЖРТВА НА ЗАПАДНОНИЛСКА ТРЕСКА Пациентот имал и други сериозни заболувања appeared first on plusinfo.mk.