Чешкиот премиер Андреј Бабиш денеска во Белград ја повтори поддршката за членството на Србија во Европската Унија, но и за нејзино приклучување кон Шенген-зоната, оценувајќи дека Србија и другите земји кои не се дел од Шенген, според него, поефикасно ја штитат надворешната граница на Унијата од илегалната миграција отколку некои земји членки.

Бабиш, кој ја предводи чешката државна делегација во дводневна посета на Белград, на заедничката прес-конференција со српскиот претседател Александар Вучиќ истакна дека Европската Унија треба да вложи напори Србија и останатите земји од Западен Балкан да станат дел од „европското семејство“, бидејќи процесот на проширување трае со децении.

– За жал, на ниво на Европската Унија не сме во состојба да кажеме зошто не ги сакаме овие земји. Србија ја има нашата поддршка, а тоа е особено важно за Европа, особено во време кога наместо за мир постојано се зборува за војна – изјави Бабиш.

Српскиот претседател Александар Вучиќ му се заблагодари на Бабиш за поддршката од Чешка за европскиот пат на Србија, нагласувајќи ја важноста од приклучувањето кон единствениот европски пазар, како и од отворените граници во регионот и кон земјите членки на Унијата.

Бабиш потсети дека Србија за време на пандемијата со Ковид-19 на Чешка ѝ донирала 100.000 вакцини, во период кога неговата земја, како што рече, „се борела за вакцини во рамките на ЕУ“.

„Таквите гестови не се забораваат“, порача чешкиот премиер.

Тој изјави дека е „воодушевен“ од работењето на чешките компании во Србија и од трговската размена меѓу двете земји, која достигнала 2,4 милијарди евра.

Во текот на денот Србија и Чешка ќе одржат и бизнис-форум на кој ќе учествуваат околу сто компании.

Вучиќ најави дека стопанствениците ќе ги претстават можностите за понатамошна соработка меѓу Србија и Чешка и се заблагодари за одлуката на чешката Влада да учествува на специјализираната изложба „ЕКСПО 2027“.

The post БАБИШ СО СИЛНА ПОДДРШКА ЗА СРБИЈА Чешкиот премиер бара Белград да влезе во ЕУ и Шенген appeared first on plusinfo.mk.

Вицепремиерот Александар Николоски и денеска повтори дека проблемот на професионалните возачи од земјава со системот за влез и излез во шенген зоната владата го решава самостојно и веќе има резултати од преговорите со шест земји од ЕУ околу воведување долгорочни работни дозволи.

– Разговорите ги водиме билатерално и така ќе продолжиме. Се договоривме со Швајцарија и со Хрватска. Во финална фаза сме да постигнеме договор и со Словенија. Исто така се договоривме и со Романија и во финална фаза сме на постигнување договор со Австрија и и со Германија – информира Николоски.

Тој додаде дека во Грција и во Србија како прекугранични земји не се бројат деновите на престој.

-Со ова , може да се реле, дека проблемот на нашите професионални возачи е решен – рече Николоски.

Тој ги повика професионалните возачи да не наседнуваат на информациите кои доаѓаат од другите земји, бидејќи владата го решава проблемот.

The post МАКЕДОНИЈА САМА ГО РЕШАВА ПРОБЛЕМОТ НА ПРОФЕСИОНАЛНИТЕ ВОЗАЧИ СО ПРЕСТОЈОТ ВО ЕУ Со шест земји од ЕУ се потпишани или се пред потпишување договори за продолжени работни дозволи appeared first on plusinfo.mk.

Европската комисија воведува „флексибилен ЕЕС“ за да ги ублажи застојот и долгите чекања на дел од границите и аеродромите. Националните власти ќе можат привремено да ја суспендираат биометриската регистрација во случаи кога редиците ќе станат предолги, но без укинување на стандардните гранични контроли.

Портпаролот на Европската комисија, Маркус Ламерс, соопшти дека Брисел веќе работи со земјите-членки за надминување на оперативните проблеми што се појавија по воведувањето на системот за влез и излез (EES).

Тој најави и технички состанок со претставници на воздухопловната индустрија за да се разгледаат предизвиците што ги создава новиот режим на контрола.

1.000 лица оценети за ризични, не влегле во ЕУ

Според Ламерс, новиот систем веќе покажал конкретни резултати во областа на безбедноста.

– Имаме нов систем што ни овозможува идентификација и вкрстена проверка на биометриските податоци. Во изминатите неколку месеци идентификувавме околу 1.000 лица кои биле оценети како безбедносен ризик и поради тоа не влегле во Европската Унија – изјави Ламерс.

Тој нагласи дека ваква проверка не била можна со стариот систем базиран на печати во пасошите.

Што значи „флексибилен ЕЕС“?

Најважната новина е што локалните власти ќе можат привремено да ги запрат дополнителните биометриски процедури, како фотографирањето и земањето отпечатоци од прсти, кога ќе се појават прекумерни доцнења.

Тоа нема да значи укинување на контролите, туку прилагодување на темпото на регистрација за да се избегне колапс на премините и терминалите.

Одлуката за таков чекор ќе ја носат националните служби директно на терен.

– Ако времето на чекање ги надмине вообичаените рамки, тогаш надлежните ќе треба да проценат дали е потребно привремено суспендирање на биометриската регистрација – објасни Ламерс.

Брисел ги отфрла критиките

Иако медиумите во повеќе европски земји објавија дека ЕЕС значително ги продолжува редиците и создава дополнителни проблеми за патниците, Европската комисија не се согласува со таквите оценки.

Од Брисел тврдат дека дел од проблемите на границите постоеле и пред воведувањето на новиот систем и дека придобивките за безбедноста се далеку поголеми од привремените тешкотии.

Сепак, одлуката за воведување „флексибилен ЕЕС“ покажува дека Комисијата признава оти новиот систем бара дополнителни прилагодувања за да функционира без сериозни последици за патниците.

The post ХАОСОТ СО ЕЕС СИСТЕМОТ ГО НАТЕРА БРИСЕЛ ДА ВОВЕДЕ „ФЛЕКСИБИЛНОСТ“ Земјите ќе можат привремено да ја прескокнат биометриската регистрација appeared first on plusinfo.mk.

Европските аеродроми и авиокомпании упатија итен апел до претседателката на Европската комисија, Урсула фон дер Лајен, предупредувајќи дека воведувањето на Шенгенскиот систем за влез и излез (EES) достигнало „критична точка“ и предизвикува сериозни нарушувања за милиони патници во екот на летната туристичка сезона.

Во отворено писмо, објавено на 1 јули, организациите „ACI EUROPE“, „Airlines for Europe“ (A4E) и Меѓународната асоцијација за воздушен транспорт (IATA) побараа од Брисел да им овозможи на земјите-членки привремено да ја суспендираат примената на системот кога бројот на патници ќе го надмине капацитетот на граничните служби.

„Денес стигнавме до критична точка. Сегашната примена на системот EES предизвикува сериозни оперативни последици, го нарушува патувањето на патниците и создава неодржлив притисок врз граничните служби, аеродромите и авиокомпаниите. Затоа ве повикуваме итно да реагирате пред ситуацијата дополнително да се влоши во текот на летната сезона“, се наведува во писмото.

Системот EES стана целосно оперативен низ Шенген-зоната во април годинава, заменувајќи го печатирањето на пасошите со дигитален систем кој ги евидентира влезовите и излезите на државјаните од земјите надвор од Европската Унија, заедно со нивните биометриски податоци, како отпечатоци од прсти и фотографија на лицето.

Целта на системот е да ја зајакне безбедноста на надворешните граници, полесно да ги идентификува лицата кои го пречекориле дозволениот престој и да го подобри управувањето со границите.

Сепак, претставниците на воздухопловната индустрија тврдат дека во пракса неговото функционирање создава сериозни проблеми.

Според нив, чекањето на граничните контроли на некои аеродроми достигнува и до пет часа, што резултира со пропуштени летови, доцнења и дополнителен притисок врз персоналот.

Тие предупредуваат дека особено погодени се помалите аеродроми во туристичките региони, каде што патниците чекаат во редици и надвор од терминалите, бидејќи граничните служби не успеваат навреме да ги обработат сите пристигнувања.

„Авиокомпаниите се принудени да ги затвораат портите за качување додека авионите сè уште се полупразни, бидејќи патниците се заглавени во редиците на граничната контрола“, предупредуваат организациите.

Тие потсетуваат дека земјите-членки веќе имаат можност привремено да го суспендираат собирањето биометриски податоци до почетокот на септември, но оценуваат дека оваа мерка не ги решила проблемите со долгите чекања.

Со оглед дека европските аеродроми во јули и август очекуваат околу 40 милиони патници повеќе отколку во претходните два месеца, предупредуваат дека состојбата може дополнително да се влоши.

Во писмото тие бараат Европската комисија:

– веднаш да им овозможи на земјите-членки целосно да ја суспендираат примената на системот EES кога бројот на патници ќе го надмине капацитетот на граничните служби, барем во текот на јули и август;

– до септември да воспостави траен механизам кој ќе овозможи привремено суспендирање на процедурите во исклучителни околности, со цел да се избегнат сериозни нарушувања во патничкиот сообраќај.

Организациите предупредуваат дека во прашање се доведуваат угледот на Европската Унија и довербата во нејзиниот регулаторен систем.

Според нив, дел од меѓународните патници веќе ги преиспитуваат своите планови за патување во Европа поради можноста да поминуваат часови во редици на границите.

WTTC предупредува на милијарди долари загуби

По апелот на воздухопловната индустрија реагираше и Светскиот совет за патување и туризам (WTTC), кој повика на координирана акција за да се обезбеди непречено функционирање на системот.

Организацијата предупредува дека Европа би можела да ја изгуби конкурентноста во однос на другите туристички дестинации доколку долгите чекања станат секојдневие.

Според анализите на WTTC, чекањето подолго од три часа значително ги обесхрабрува туристите да патуваат во Шенген-зоната. Дури една третина од анкетираните изјавиле дека поради тоа би ја избегнувале Европа.

Организацијата проценува дека до 2026 година би можеле да бидат загрозени околу 41 милион туристички пристигнувања, како и околу 45,4 милијарди американски долари туристички приходи.

– Системот EES претставува важен чекор кон помодерни и побезбедни европски граници. Но, неговата примена мора да биде практична, добро координирана и насочена кон потребите на патниците. Ако долгите чекања станат правило, патниците ќе избираат други дестинации. Европа не смее да си дозволи да ја загрози својата конкурентност и искуството што им го нуди на милиони посетители – изјави претседателката и извршна директорка на WTTC, Глорија Гевара.

The post ПАТНИЦИТЕ ЧЕКААТ И ПО ПЕТ ЧАСА, АВИОНИТЕ ПОЛЕТУВААТ ПОЛУПРАЗНИ Новиот систем на ЕУ предизвика хаос на европските аеродроми appeared first on plusinfo.mk.

Превозниците од Македонија, Србија, Црна Гора и Босна и Херцеговина денеска официјално ќе испратат писмо до Европската комисија во кое бараат до 10 август да понуди прифатливо решение за проблемот со ограничувањата за престој на професионални возачи во Шенген зоната.

Ова е одлучено на вчерашната средба на претставниците на превозниците од четирите земји.
Писмото ќе биде испратено и до владите на четирите земји, извозните компании и стопанските комори со цел да се забрза процесот на решавање на проблемот.

– Се согласивме дека во овој момент нема да преземеме никакви конкретни активности, но дека од денешниот состанок ќе испратиме писмо до Европската комисија со рок до 10 август за да се најде прифатливо, ако не конечно, тогаш барем привремено решение за нашите возачи и транспортни компании да можат да работат без пречки – изјави претседателот на Меѓународната асоцијација за транспортен бизнис, Неџо Мандиќ по средбата во Белград.

Тој потсети дека проблемот стана уште поизразен по проширувањето на Шенген зоната кон Хрватска, Романија и Бугарија, поради што земјите од регионот се практично целосно опкружени со земји-членки на Шенген, па возачите голем дел од своето работно време го поминуваат во таа зона.

– Со оглед на тоа што сега има 33 земји во Шенген, тоа значи дека на никаков начин не можеме да прифатиме дека транзитот значи престој. Ако возиме кон земја или дури и кон земја што не е членка на ЕУ, имено Обединетото Кралство, ние сме во Шенген цело време и не престојуваме во ниту еден момент, бидејќи сме или во камионот или на паркингот додека правиме пауза, но тие денови брзо се трошат до моментот кога ќе пристигнеме и ќе се вратиме, па практично се покажува дека престојуваме 90 дена. Сосема е неточно дека професионалец не може да си ја заврши работата – заклучи Мандиќ.

Тој додаде дека превозниците на ваков начин сакаат да одбегнат протести и најави нова средба пред 10 август, ако дотогаш нема решение.

– Во тој случај, ќе објавиме нови конкретни мерки за забрзување на решавањето на овој проблем – рече Мандиќ, без да прецизира кои мерки би можеле да се преземат.

Според, превозниците 10 август е значаен бидејќи тогаш завршуваат 90 дена за престој на возачите во Шенген зоната по ресетирањето на деновите на 10 април по одлука на Комисијата. На 10 април на сите возачи на превозните компании кои возат во Шенген зоната деновите на престој им се вратија на нула.

-Тоа значи дека по овој датум повторно ќе се се јават проблемите со престојот на возачите во Шенген зоната, односно ќе почне надминувањето на границата од 90 дена за престој. Ќе се вратат повторно истите проблеми со опомени, депортации и слично – вели Билјана Муратовска од Макам-транс.

Муратовска додава дека напоредно со ова нашето Министерство за транспорт води билатерални преговори со повеќе земји за да им овозможи на нашите возачи да можат да се движат непречено.

-Хрватска веќе прифати да помогне, доднсе измени на законот за странци с кој се опфатени и нашите возачи, но се уште не се донесени некои подзаконски акти. Значи не е во функција. Има преговори и со Романија, Австрија и други земји. Но нас ни треба трајно решение кое ќе ги опфати сите 33 земји вод Шенген зоната. Решението е во рацете на Европската комисија, а ние сега се трудиме да ги обновиме разговорите тоа да се донесе побрзо – вели Муратовска.

Затоа вели таа треба во периодот до 10 август да се лобира во ЕК да добиеме трајно решение.

-Тоа ќе го постигнеме со заедничко дејствување на сите влади од регионот, компаниите извознички, странските инвеститори и стопанските здруженија, зашто овој проблем не е само на превозниците, туку на економиите на овие земји – вели таа.

Превозниците велат дека сегашното правило според кое државјаните на трети земји можат да останат во Шенген зоната максимум 90 дена во период од 180 дена не е прилагодено за професионалните возачи.
Според анализата која ја направиле нивните здруженија на возачите им се потребни околу 130 дена работа во период од 180 дена за непречено извршување на меѓународен транспорт.

The post КАМИОНЏИИТЕ СО УЛТИМАТУМ ДО БРИСЕЛ Бараат решение на проблемот со престој во Шенген зоната до 10 август appeared first on plusinfo.mk.

Зголемениот број руски државјани кои, со стекнување српско државјанство добиваат можност за безвизен влез во Европската Унија, претставува потенцијален безбедносен ризик за Унијата, смета Европската комисија.

Во најнов документ на Европската комисија, што го објавува Радио Слободна Европа, во кој се оценува напредокот на Србија во поглавјата 23 и 24, кои се однесуваат на владеењето на правото, оваа институција наведува дека бројот на државјанства доделени на руски државјани е зголемен во изминатиот период.

„И покрај сувереното право на Србија да одлучува за своите политики за државјанство и натурализација, забрзаното стекнување на правото за патување без визи во ЕУ за граѓаните на Русија со доделување на српско државјанство, чиј број е зголемен во споредба со претходните години, претставува потенцијални безбедносни ризици за ЕУ“, се наведува во нон-пејперот на Европската комисија, до кој Радио Слободна Европа има пристап.

Овој документ бил предмет на дискусија на ниво на дипломати на земјите-членки на ЕУ на крајот на мај.

„Србија мора да ја подобри проверката на барањата за виза поднесени од граѓани на земји кои се сметаат за ризик во однос на нерегуларната миграција или безбедноста“, пишува РСЕ.

Српскиот претседател Александар Вучиќ веќе објави дека Србија нема да воведува визи за руските граѓани.

Според условите на Планот за раст, Србија треба да воведе визи за најмалку три земји до крајот на годината. Визната политика на Србија е „само делумно усогласена“ со визната политика на Европската Унија. Во моментов, 12 таканаречени трети земји уживаат безвизен режим со Србија, но не и со ЕУ: Ерменија, Азербејџан, Бахреин, Белорусија, Кина, Индонезија, Јамајка, Киргистан, Казахстан, Русија, Суринам и Турција.

The post ЗГОЛЕМЕНИОТ БРОЈ РУСИ СО СРПСКИ ПАСОШ СЕ ЗАКАНА ЗА ЕУ? Европската комисија негодува во извештај appeared first on plusinfo.mk.

Едно од највредните нешта поврзани со ЕУ е секако Шенгенскиот договор, камен-темелник на слободното движење во Европа. Договорот значи дека се укинати постојаните внатрешни гранични контроли меѓу земјите-членки, дозволувајќи им на над 450 милиони луѓе слободно да патуваат, живеат и работат без да мора да ги покажуваат своите пасоши на границите. Но дали тоа се уште функционира баш така?

„Бај, бај Шенген“ (Bye bye Schengen) е фраза која ја користат европските десничарски политичари и медиуми со која ја опишуваат кризата и повторното воведување на гранични контроли меѓу ЕУ-членките. Фразата првично стана вирална во 2015 година, а се до денес ваквите привремени контроли остануваат честа појава поради безбедносни предизвици и миграциски политики. Но, во исто време е тешко да се замисли дека некој од европската бирократија во Брисел би истапил јавно со тврдења што би можеле да бидат протолкувани како извесно оспорување на темелниот принцип на слободно движење и безграничен режим.

Заклучокот кој, всушност, најчесто се слуша е следниов: Шенген зоната функционира, но соработката е под сериозен притисок. Сепак, какво е тоа слободно прекугранично движење кога веќе со години поголоем број ЕУ-членки (вкупно девет земји) не попуштаат за да ги повлечат воведените „привремени“ гранични контроли? Контролите беа воведени по големата бегалска криза во 2015-16 година и терористичките атентати во Париз.

Протокот на бегалци кон ЕУ навистина се намали во значаен обем, но се верува дека тоа се должи токму на граничните контроли. Во секој случај, тешко се отстапува од барањето дека контролитe мора да останат сѐ додека ЕУ на ефикасен начин може да ги заштити и контолира своите надворешни граници.

Тоа, се разбира, веќе подолго време ја става Европската комисија во Брисел пред тешка дилема. Дали треба да направат исклучоци од правилата и да се дозволат продолжувања на граничните контроли и со тоа да се ризикува натамошно еродирање на еден од основните столбови на ЕУ?

Колку подолго се продолжуваат граничните контроли, толку потешко ќе биде враќањето кон целосно слободно движење. Но, ако Европската комисија заземе поцврст став и каже не, ќе ризикува најмоќните и најбогати земја во ЕУ, пред се Германија, отворено да се спротивстават.

Повеќе од десет години, Шведска има „привремени“ гранични контроли со Данска, што е спротивно на правилата на ЕУ. Деновиве Европската комисија соопшти дека таквите мерки се неоправдани и неодржливи во долгорочна смисла, и ја повикува Шведска да ги укине. Данска, Германија, Австрија, Франција, Италија, Холандија и Словенија се повикани да го сторат истото и постепено да ги укинат своите гранични контроли со други земји од ЕУ. „Комисијата ќе одржува близок контакт со сите засегнати земји-членки за да се постигне оваа цел“, беше соопштено неделава во соопштението од Брисел.

Шведска ги продолжува граничните контроли со Данска на секои шест месеци во текот на единаесет години. Најновата одлука важи до ноември 2026 година. Од самиот почеток, Шведска ја наведуваше неконтролираната миграција како причина. Сега се повикува на сериозна безбедносна ситуација, вклучително и поради „сериозен прекуграничен криминал поврзан со државни актери и тероризам“.

Сепак, Комисијата на ЕУ смета дека шведската полиција веќе има доволно алатки и без контрола на внатрешните граници. „Со оглед на алтернативните мерки што ги воведоа шведските власти, земјата треба да се стреми постепено да ги укине контролите на внатрешните граници“. Соопштението од Брисел е првиот чекор во долг процес што на крајот би можел да значи дека Европската комисија ќе ги однесе земјите-членки со продолжени меѓугранични контроли пред Европскиот суд на правдата.

Но треба да се има предвид дека причините поради кои Европската комисија чекаше десет години се пред сѐ поврзани со миграцијата, што и понатаму се смета за мошне чувствително прашање. Во моментов, ЕУ воведува нови правила за азил и миграција, напоредно со инсталирање на „најсовремен систем во светски рамки за управување со границите.“

Во тек е и нов обид Европскиот парламент и земјите-членки да се договорат за регулативата за враќање на мигрантите кои се одбиени од ЕУ. Но, група земји не чекаат на исходот на дебатата, туку веќе водат разговори за воспоставување таканаречени собирни центри за враќање надвор од ЕУ.

Наскоро, големиот пакт на ЕУ за миграција и азил стапува на сила на 12 јуни. Десет законски акти – за сè, од гранични контроли до процедури за азил – се усвоени. Еден сè уште недостасува: регулативата за враќање, која ќе воспостави заеднички правила за тоа како треба да се одбиваат мигрантите без право на престој во ЕУ. Комесарот за миграција Магнус Брунер го опиша како „последното парче од сложувалката“ во пактот.

Сепак, преговорите меѓу земјите-членки и Европскиот парламентг за правилата за враќање заглавија во мај. Преостанатото несогласување не се однесува на содржината на правилата, туку кога тие треба да стапат во сила. Европскиот парламент сака законот да стапи во сила веднаш по усвојувањето, за разлика од Советот на министри, кој се залага за двегодишен преоден период за повеќето мерки. Но за одбележување е секако дека Советот на министри е подготвен веднаш, без непотребни одложувања, да ги примени само одредбите за центрите за враќање, кои би можеле да се наречат и „центри за притвор“ надвор од ЕУ, каде што ќе можат да бидат испратени мигранти со конечни одлуки за протерување.

Без оглед на тоа што ќе се случи во следната рунда преговори, Холандија, Австрија, Данска, Германија и Грција ги здружија силите за да воспостават заеднички центри за враќање надвор од Унијата. Групата сега преговара со осум до десет потенцијални земји-партнери, вклучувајќи ги Казахстан и Узбекистан, за воспоставување вакви објекти, објави „Политико“. Моделот би бил базиран на меѓусебни договори. Во замена за прифаќање мигранти со наредби за депортација, на земјите-партнери ќе им се понуди финансиска помош или олеснети визни правила за нивните граѓани.

Моментно многу нешта, очигледно, се случуваат кога се во прашање граничните контроли и слободното (мигрантско) движење во ЕУ. Но, историски гледано, европскиот проект за безграничен режим им беше продаден на граѓаните во различни ЕУ-членки, меѓу другото, преку атрактивноста на слободното движење. Доколку меѓуграничните рампи останат спуштени, поддршката за ЕУ уште повеќе ќе ризикува да се намали.

Можеби ќе потрае долго време, најмногу поради стравот од неконтролирани текови на бегалци, за да се обнови Шенгенскиот договор, и да се рестартира според изворната замисла. Доколку тоа воопшто ќе може да се направи во догледна иднина.

The post Бај, бај Шенген appeared first on plusinfo.mk.

Од почетокот на етапното воведување на новиот систем за гранична контрола во Европската Унија (ЕЕС) лани во октомври на над 27.000 лица им бил одбиен влез, соопшти денеска Европската комисија. Меѓу лицата на кои им е забранет влезот, околу 700 претставувале директна закана за безбедноста.

„Од почетокот на примената на ЕЕС регистрирани се над 52 милиони влегувања и излегувања. Комисијата го поздравува денешното целосно воведување на овој нов систем за влез во ЕУ и излез од блокот“, се наведува во соопштението.

Благодарение на новата автоматизирана контрола, регистрирањето на еден патник трае во просек 70 секунди, што значително ја забрзува процедурата, се наведува во соопштението.

Системот, се додава, ги заменува рачните печати и овозможува евиденција на личните и биометриските податоци, со цел полесно следење на пречекорувањата на престојот. Новите правила се однесуваат на државјани на трети земји кои не се членки на ЕУ или на Шенген-зоната (Исланд, Лихтенштајн, Норвешка и Швајцарија), а се применуваат за краткорочен престој до 90 дена.

Иако на почетокот на годината секторот за воздушен транспорт изрази незадоволство поради одложувањата, ЕК денеска потврди дека системот е успешно имплементиран на сите гранични премини на надворешните граници на ЕУ.

The post НАД 27.000 ЛИЦА СЕ ОДБИЕНИ ЗА ВЛЕЗ ВО ЕУ ПРЕКУ НОВИОТ СИСТЕМ ЕЕС Регистрирањето на еден патник трае во просек 70 секунди, тврди Европската комисија appeared first on plusinfo.mk.

Системот за влез во Европската Унија (ЕЕС – Entry/Exit System) од денеска треба да стане целосно оперативен и да ги регистрира сите странски државјани што ќе ги преминуваат надворешните граница на ЕУ преку кој било копнен премин, пристаниште или аеродром.

Со системот што почна да се применува делумно од 12 октомври лани, на надворешните граници на Европската Унија се воведува нов, дигитализиран начин на евиденција и контрола на државјаните што патуваат за краткорочен престој, а се од држави што не се членки на ЕУ.

Со денешното целосно воведување на ЕЕС системот, влезовите и излезите ќе се евидентираат електронски, а системот ќе овозможи обработка на основни биометриски податоци – отпечатоци од прсти и фотографија. Целта е побрза идентификација и поефикасно следење на дозволениот престој во согласност со правилото 90 дена во период од 180 дена.

Со новата мерка времето на задржување на граничните премини за влез во ЕУ ќе се зголеми.

Според Министерството за внатрешни работи, од страна на Граничната полиција на Македонија се преземени сите потребни мерки и активности, односно ставени се во функција сите расположливи материјално-технички и човечки ресурси, со цел да се обезбеди брз и непречен проток на патници на македонските гранични премини.

„Граничната полиција ќе постапува со засилена ангажираност на терен, континуирано ќе ја следи состојбата, ќе презема соодветни мерки за одржување на проточноста на сообраќајот и ќе ги информира граѓаните за сите важни информации поврзани со примената на системот“, информираа од МВР.

Со оглед дека новиот електронски систем на ЕУ – ЕЕС, беше во функција на влезните гранични премини во Шенген зоната и претходно, голем број од професионалните возачи се регистрирани во него. Според претседателката на Асоцијацијата на превозници „Макамтранс“ Билјана Муратовска, не се очекуваат зголемени застои и тесни грла на граничните премини за товарниот сообраќај од вообичаените, што не е случај со превозот на патници и патничките возила.

– Насоките за професионалните возачи, но и за вработените во превозните трговски друштва е редовно следење и броење на денови на престој во последните 180 дена, со правилно организирање на соодветна динамика за безбедно користење на превозните средства, со цел да не се појават проблеми и застој на територија на Шенген зоната – вели Муратовска.

Таа појаснува дека од 10 април ќе почне комбинирано броење на денови за престој особено за професионалните возачи. Тоа значи дека сè до истекување на 180 дена (10 октомври) ќе се користат податоците од електронскиот систем, но ќе се бројат и печатите евидентирани во патните исправи, сè додека не се овозможи добивање на работни визи од одредени држави со кои ќе се надминат проблемите до дефинитивно усвојување на новата Визна стратегија, каде возачите се признаени како професионалци.

The post СЕ ОЧЕКУВА МЕТЕЖ И ЗАСТОЈ НА ГРАНИЧНИТЕ ПРЕМИНИ Почнува целосната примена на ЕЕС системот за влез ЕУ appeared first on plusinfo.mk.

Проблемот со превозниците на товарен превоз и на патници со влезот и излезот од шенген зоната најверојатно ќе се реши преку издавање годишни визи со повеќекратен влез и излез, изјави премиерот  Христијан Мицкоски, по средбата со странските инвеститори.

Мицкоски информира дека во процесот Македонија е проактивна и веќе разговара на билатерално ниво со неколку држави од ЕУ за решавање на проблемот.

-Предизвикот со транспортерите е пред нас и ние ќе мораме да го решаваме. Беше тука комесарот кој е задолжен за влез/излез системот. Ние како држава тука сме проактивни, нашата дипломатија и министерствата за внатрешни работи и транспорт работат заедно. Веќе имаме на билатерална основа разговор со неколку држави од Европската Унија кои истовремено се и членки на Шенген зоната, така што најверојатно начинот на кој ќе се реши тој проблем, ќе биде преку издавање годишни визи со повеќекратен влез и излез од Шенген зоната – рече Мицкоски.

Тој потсети дека транспортерите не ги опфаќаат само карго превозниците, туку и патничкиот сообраќај.

The post ПРЕВОЗНИЦИТЕ ЌЕ ДОБИВААТ ВИЗИ СО ПОВЕЌЕКРАТЕН ВЛЕЗ ВО ШЕНГЕН ЗОНАТА? Македонија почна билатерални разговори со повеќе земји на ЕУ appeared first on plusinfo.mk.