Сведоштвата за големата почит спрема шаховската игра во Македонија отсекогаш биле добро фундирани со аргументи, меѓу кои се организацијата на Шаховската олимпијада во 1972 година, а потоа и формирањето на ШК Алкалоид во 1976 година.

Клубот, кој на почетокот беше скромно ориентиран кон поттикнување и развивање на древната игра меѓу вработените кои учествуваа на натпреварувања против други компании, со текот на времето прерасна во најуспешен шаховски колектив во Македонија, кој на републичките првенства ја презеде доминацијата и во независна Македонија дури 27 пати ја освои екипната титула во 33 настапи. ШК Алкалоид во 2016 година ја понесе титулата европски клупски шампион, а во три наврати (2017, 2024 и 2025 година) беше европски клупски вицешампион! По повод петдеценискиот јубилеј, годинава се предвидени повеќе активности, кои започнуваат со првиот настан на почетокот на април на Шаховскиот фестивал.

На 4 и 5 април во хотелот „Континентал“ ќе бидат организирани два турнира: еден во брзопотезен шах (блиц) – 13 рунди со темпо на игра од три минути од играч и две секунди за потег, а вториот во забрзан шах (рапид), при што играчите ќе играат 11 рунди со темпо од 10 минути од учесник плус пет секунди за потег. Предвиден е награден фонд од 130.000 денари за првиот турнир и уште 230.000 денари за вториот турнир. Во двата случаи ќе им бидат доделени награди на десетте најдобропласирани играчи, како и специјални награди на шахистките, ветераните и на јуниорите.

Традиционално, интересот за турнирите на ШК Алкалоид е голем, а поради ограниченоста на просторот за игра чинот на пријавување завршува рано. Имајќи го предвид намаленот број на турнири кои се организираат во Македонија, со сигурност овие два турнира ќе донесат задоволство меѓу оние кои го почитуваат шахот, а упатените ќе знаат да ги препознаат и организациските напори на спортските работници меѓу фармацевтите, кои ќе дадат сѐ од себе за да направат уште едно силно издание на овој турнир, кој ужива висок углед во регионот.

Организаторите од ШК Алкалоид навестуваат дека турнирот ќе биде отворен и за публиката, со цел одбележувањето на полувековниот јубилеј да биде во што е можно подобра атмосфера.

The post ШАХОВСКИ ФЕСТИВАЛ „50 ГОДИНИ ШК АЛКАЛОИД“ Ќе се играат два турнира – за брзопотезен и за забрзан шах appeared first on plusinfo.mk.

Во последното седмо коло од Европскиот клупски куп, кој се играше на грчкиот остров Родос, шахистите на Алкалоид забележаа убедлива победа од 4,5 : 1,5 над најсилниот претставник на Израел, Ришон ле Цион, кој е седми носител на турнирот според почетниот рејтинг, со што ја освоија втората позиција на табелата, односно вицешампионската тутула!

Овој турнир е најсилен во клупската конкуренција на Стариот континент, поради што често се споредува со Лигата на шампионите, а ШК Алкалоид триумфираше на него во 2016 година, додека, пак, во 2017, 2024 и во 2025 година го освои второто место.

Импресивен резултат за клубот кој бележи 49 години постоење и шаховски раст, континуирано поддржуван од компанијата „Алкалоид“.

– Нималку лесна победа во последното коло против тим кој може да се нарече елитен, па по три часа игра резултатската неизвесност беше присутна. На првите четири табли не гледавме шанса за победа, но нештата се свртеа откако на петтата табла Александар Инѓиќ (2.618) со бели фигури успеа да го надигра Евгени Занан (2.504). Постепено и на шестата табла Абиманју Пураник го скрши отпорот на ИМ Ор Бронштајн (2.460), па на тој начин започна да се наѕира победата која беше вредна медал. Тимот покажа карактер по вчерашниот минимален пораз од ривалите за тронот, со што беше демонстриран борбен и победнички дух против тврдокорниот противник – коментираше ВМ Влатко Богдановски, кој е капитен на интернационалниот состав на ШК Алкалоид.

Израелскиот тим беше предводен од легендарниот Борис Гељфанд (2.636), поранешен учесник во меч за светски првак, кој успеа со голем жар да ја одржи послабата позиција во сицилијанска одбрана на првата табла против Арјун Еригаиси (2.773).

Ји Веи (2.754) имаше црни фигури против уште еден елитен израелски велемајстор, Максим Родштајн (2.647), кој годинава на поединечното Европско првенство го делеше првото место. Членот на ШК Алкалоид солидно се бранеше, а кога противникот ја мина црвената линија обидувајќи се да игра на победа, со целосен пресврт успеа да донесе цел поен за висок резултат.

И на третата табла Јангји Ју (2.720) не успеа да создаде конкретна предност бидејќи Ницан Штајнберг (2.554) одигра на врвно ниво. Најдолго траеше дуелот на Читамбарам Аравинд (2.711) на четвртата табла, кој играше 70 потези, и неговиот противник Јахли Соколовски (2.539), кој ги преживеа сите напади.

Ји Веи и Абиманју Пураник дополнително освоија и сребрени медали како најуспешни играчи на втората и на шестата табла, додека, пак, Читамбарам Аравинд ја присвои бронзата на четвртата табла.

Романскиот претставник СуперЧес, предводен од светскиот првак Гукеш, иако четврти носител, на крајот како единствен непоразен тим и со само една загубена партија (и тоа во последното 7. коло) за првпат го освојува пехарот во Европскиот клупски куп со максимални 14 бодови. ШК Алкалоид на второто место има 12 бодови, колку и чешкиот Нови Бор, кој играше само со македонскиот шампион меѓу ривалите од првата петорка и го загуби тој дуел, но, сепак, на крајот стигна до шест победи и до бронзен медал.

Идната година предвидено е домаќин на Европскиот клупски куп во шах да биде Црна Гора.

The post ШАХИСТИТЕ НА АЛКАЛОИД ПО ТРЕТПАТ ВИЦЕШАМПИОНИ Импресивен резултат на Европскиот клупски куп на Родос appeared first on plusinfo.mk.

Шахистите на Алкалоид во последното седмо коло од Европскиот клупски куп што се игра на Родос, Грција влегуваат со шанса за освојување медал. Победа во дуелот со израелскиот тим Рашон Ле Цион за македонскиот тим ќе значи медал, но каков ќе се знае од исходот на другите мечеви.

Во шестото коло кое заврши синоќа во дуелот на непоразените Алкалоид загуби со 2,5:3,5 од романскиот тим Супер Чес. Единствената победа за Супер Чес ја постигна светскиот првак Гукеш (со бели фигури) на првата табла совладувајќи го Арјун Еригаиси, другите пет дуели завршија реми. За Алкалоид настапија: Веи Ју (втора табла – бели); Јангји Ју (трета – црни); Читамбарам Аравинд (четврта – бели); Александар Инџиќ (петта – црни) и Абхиманју Пураник (шеста – бели).

– Белите фигури треба да донесат некаква предност во ваквите мечеви, а тоа му успеа на Гукеш во Гринфелдова одбрана. Светскиот првак успеа во системот на отворање да го наведе Еригаиси во непознати води и ја презеде иницијативата. На крајот, заслужена победа за Супер Чес, а ние се мобилизираме за следниот меч, кој ќе биде последен на турнирот – изјави велемајсторот Влатко Богдановски.

Супер Чес е единствената екипа со максимален резултат од 12 бода и во последната рунда играат со унгарскиот тим Нагиканижаи, кој во моментов е втор со 11 поени. Победникот од овој дуел ќе биде крунисан како нов шампион на Европа.

The post ШАХИСТИТЕ ОД АЛКАЛОИД ИМААТ ШАНСА ЗА МЕДАЛ Уште еден меч до крај на турнирот во Родос appeared first on plusinfo.mk.

Македонскиот шаховски шампион Алкалоид забележа победа со 6:0 над Ипотитис Родос, вчера во второто коло на Европскиот клупски куп што се одржува на грчкиот остров Родос.

– Зад резултатот се крие многу интересен меч со одлична борба! На сите табли се играше храбро и борбено, со добро подготвени системи на отворања. На првите 5 табли играа најдобрите млади грчки интернационалци, а на шестата нивниот тренер, кој е ветеран, со титула на Интернационален мајстор – изјави по мечот капитенот на Алкалоид, Влатко Богдановски.

На овој меч за Алкалоид настапија Арјун Еригаиси, Ји Веи, Јангји Ју, Читамбарам Аравинд, Велимир Ивиќ и Абиманју Пураник. По првите две кола, 21 екипа имаат освоено максимални четири бода.

Денес, 21 октомври, во рамките на третото коло, противник на Алкалоид ќе Шахфројнде од Германија, кој вчера славеше над вториот чешки тим Оаза Прага.

Мечевите започнуваат во 15 часот по грчко време, а заинтересираните имаат можност за следење на интернет-преносот преку официјалната страница www.eccc2025.com.

The post МАКСИМАЛНА ПОБЕДА ЗА ШАХИСТИТЕ НА АЛКАЛОИД Второто коло на Еврокупот запечатено со победата над Ипотитис Родос appeared first on plusinfo.mk.

Првото коло од Европскиот клупски куп во шах донесе очекуван резултатски расплет, при што најдобро рангираните екипи, меѓу кои е и македонскиот шампион ШК Алкалоид, стартуваше со победа од 5,5:0,5 против Дарданија.

За овој настап на Родос, Грција, екипата имаше две промени во однос на тимот од 2024 година, и тоа на петтата и на шестата табла, каде што настапија Абиманју Пураник и Тони Лазов, при што обајцата имаа успешно деби со освојување цел поен.

Противничкиот тим Дарданија од Косово успеа да даде отпор само на првата табла, каде што беше Арјун Еригаиси.

Од втората до четвртата табла Ји Веи, Јангји Ју и Читамбарам Аравинд донесоа цел поен за Алкалоид.

ШК Алкалоид е второрангиран тим според рејтингот и заедно со другите тимови од првата петорка се смета за еден од фаворитите во борбата за медалите.

На турнирот играат 102 екипи, а по првото коло 48 од нив се на делба на првото место со по 2 бода.

Во согласност со швајцарскиот систем на натпреварување, во втората рунда ШК Алкалоид ќе игра со домашната екипа Ипотис Родос.

The post ЕКИПАТА НА АЛКАЛОИД СТАРТУВАШЕ СО УБЕДЛИВ ТРИУМФ Успешен почеток на Европскиот клупски шаховски куп appeared first on plusinfo.mk.

Еден од најважните шаховски настани во текот на годината е Европскиот клупски куп, турнир кој традиционално се одржува кон крајот на сезоната, но кој претставува епицентар на шаховските збиднувања поради интересот кој го побудува и квалитетот што го нуди. Популарно наречен шаховска верзија на Лигата на шампионите, ЕКК секоја година го собира кремот, но не само од Европа.

Шаховскиот клуб Алкалоид неколку децении го гради својот имиџ доминирајќи на домашно тло, а веќе има и повеќедецениска традиција на учество на ЕКК, при што во три наврати беше освојувач на медали: во 2016 година беше шампион на Европа, а во 2017 и во 2024 година вицешампион. Евидентно и јасно видливо е управувањето и водењето на клубот од најдобрата македонска компанија „Алкалоид“ АД со пресликување на корпоративните искуства и знаења во клубот.

Оваа година на грчкиот остров Родос ќе се игра јубилејното 40. издание на главниот/отворен ЕКК (може да учествуваат машки, мешани и женски тимови), на кое е пријавен и Алкалоид, а паралелно ќе се игра и 29-тото издание на женскиот ЕКК (учествуваат само женски тимови). Според објавените состави, оваа година конкуренцијата за највисок пласман на ЕКК е најсилна во последните 10 години. Пет тимови се издвојуваат според просечниот рејтинг на играчите од својот тим, притоа со повеќе од 2700 се BayeganPendik (Турција) и Алкалоид, а веднаш до нив со просечен рејтинг над 2600 се SuperChess (Романија), Novy Bor (Чешка) и Tuxera (Унгарија). Фактор повеќе е што оваа година има рекорден број на учесници од 101 тим (односно од 20 тимови кај дамите).

Во тимот на ШК Алкалоид има само две измени, односно: во составот ќе настапат индиските велемајстори Arjun Erigaisi (2797), Chithambaram Aravindh (2711) и Abhimanyu Puranik (2615); кинеските велемајстори Yi Wei (2754) и Yangyi Yu (2720); српските велемајстори Aleksandar Inđić (2618) и Velimir Ivić (2628), како и македонскиот интернационален мајстор Тони Лазов (2382); Erigaisi i Wei се во топ 10 од светската елита, Yu и Aravindh во топ 30, додека, пак, Inđić, Ivić и Puranik во септември беа во топ 100; Yu има фантастичен настап за Алкалоид на ЕКК со освоени пет медали (три злата и две бронзи) за резултатот на својата табла, додека, пак, на своите први настапи минатата година за Алкалоид Erigaisi на првата табла освои злато, а, пак, Aravindh на четвртата табла бронза; српските велемајстори како репрезентативци на Србија ја освоија европската шампионска титула во 2023 г., а Inđić следната година стана европски шампион во поединечна конкуренција.

За Алкалоид настапуваа и на екипните државни првенства во 2021 (Inđić), односно во 2023 (Ivić) година. Првпат за алкалоидовата екипа на ова најсилно европско клупско натпреварување ќе настапат Puranik и Лазов, објаснува капитенот на тимот, велемајсторот Влатко Богдановски.

Вака компонираниот тим на ШК Алкалоид првично имаше највисок рејтинг (2701) според септемвриската листа на ФИДЕ, но во октомври ситуацијата се промени, па сега турскиот клуб Бајеганпендик е во минимална предност со нешто повисок рејтинг (2711). Минатогодишните ривали кои беа први носители – SuperChess и актуелниoт шампион Novy Bor – заедно со другите добропознати и мошне силни клубови од Унгарија, Израел, Азербејџан и од Турција, ја заокружуваат листата на клубови со високи амбиции, но и со подеднакво талентирани шахисти во своите состави. Така, актуелниот светски првак Dommaraju Gukesh (2752) ќе биде дел од тимот на SuperChess, Anish Giri (2.759) ќе го предводи BayeganPendik, а, пак, Vincent Kreymer (2755), кој, исто така, е дел од топ 10 според рејтингот, ќе игра за Novy Bor.

– Архитектурата на нашиот состав е обмислена и соодветно селектирана, па ја имаме онаа хомогеност што ја посакуваме. Алкалоид не е клуб кој наддава на отворениот пазар, туку доаѓа до најдобрите благодарение на својот сериозен пристап и на посветеноста, кои се манифестираат со длабока аналитичност при изборот и водењето на тимот на ЕКК. Очекувам Puranik да се вклопи во тимот и да го даде својот максимум, со што би го постигнале посакуваното ниво. Како и секогаш, просечниот рејтинг не одлучува и од пракса знаеме дека конкурентите се во ситуација рамноправно да се борат за врвот. Ние секогаш одиме на медал и ретко се случува како минатата година да има две непоразени екипи на крајот од турнирот, но факт е дека и оваа година ќе одлучуваат многу фактори, како на пример моменталната инспирација, свежината… За Лазов е мошне важно неговото шаховско созревање, но и тоа да ја почувствува атмосферата на ова најсилно европско натпреварување. Очекуваме во иднина да ја освои и велемајсторската титула по минатогодишната титула државен првак и по освоениот медал на Олимпијадата на својата табла. Во секој случај, се надеваме и посакуваме да ја оправдаме поддршката што ја добиваме и да ја продолжиме успешната низа со нов медал – додава велемајсторот Богдановски.

Ако погледнеме наназад и ако направиме анализа и споредба на успешноста во европски рамки, Алкалоид се вбројува меѓу 10-те најуспешни европски клубови во историјата на овие натпревари. Кога станува збор, пак, за најсилното државно екипно првенство, екипата е со фантастичен резултат од 13 последователни шампионски титули во последните 13 години, односно вкупно 27 шампионски титули од 33 првенства (од 1992 до 2025 година). Со одличните резултати во државни и во европски рамки, шаховскиот клуб се вбројува во неколкуте најуспешни спортски клубови во македонската историја.

Мечевите од првото коло на 40. издание од Европскиот клупски куп започнуваат на 19 октомври во 15 часот по локално грчко време. Темпото на игра предвидува 90 минути за првите 40 потези, со додавање уште 30 минути.

The post „АЛКАЛОИД“ СО ГОЛЕМИ АМБИЦИИ НА ЕВРОПСКИОТ КУП ВО ШАХ ВО ГРЦИЈА Клубот го задржа ростерот на играчи appeared first on plusinfo.mk.

Во последното седмо коло од Екипното првенство на Македонија, Шаховскиот клуб Алкалоид со нерешен резултат од 3 : 3 на мечот со Мулти Есенс успеа да стигне до својата 27. титула, сметано од 1992 година до денес, а тринаесетта во низа.

Ждрепката сакаше најтрофејниот шаховски колектив на Македонија токму на крајот да игра со младите играчи кои потекнуваат од школата на Алкалоид, но мечот се претвори во можност за сензација, па само сталоженоста и квалитетот на играње под висок притисок им помогна на сениорите да успеат да се вратат во игра, откако резултатот беше 3 : 1 за ШК Мулти Есенс.

Изненадувањето во мечот започна со триумфот на Кирил Николовски на шестата табла, кој го казни грубиот превид на ВМ Звонко Станојоски, по што следуваше и триумфот на втората табла, каде што ВМ Лука Дршаковиќ го надигра ВМ Велимир Ивиќ. Ремито на првата табла, ВМ Александар Инѓиќ против ВМ Леон Ливајиќ, не беше изненадување, но затоа на четвртата табла ИМ Емил Ристески се намачи за да дојде до реми со Стојан Велкоски.

Во финишот ИМ Филип Панчевски го совлада Михаил Јорданов на третата табла, а ИМ Тони Лазов блесна во завршницата за да го израмни резултатот во мечот со победа над Матео Ефтовски.

Тоа донесе апсолутен триумф за овие два клуба на конечната табела од Шампионатот. ШК Алкалоид е прв со 13 бода (6 победи и еден нерешен меч), а ШК Мулти Есенс е втор со 12 бода (5 победи и два нерешени меча). И двете екипи останаа непоразени на Шампионатот.

– Со години наназад друг клуб беше наш ривал во борбата за првото место, па откако беше обезбедена таа победа во 4. коло, надвладеа оптимизмот дека работата е завршена. Во меѓувреме младинците од ШК Мулти Есенс играа сѐ подобро од меч во меч и стекнаа голема самодоверба. Тие имаа сѐ што ѝ е потребно на една екипа за успех и навистина ја направија борбата за титулата драматична. Уште еднаш се покажа дека титулите и рејтингот не играат сами, туку победите ги носат играчите кои ќе останат смирени и фокусирани во текот на целата партија и нема да направат грешки. Оваа титула на ШК Алкалоид се должи само на искуството на играчите, кои подобро се снајдоа во последните минути од мечот, додека за ШК Мулти Есенс ова второ место сигурен сум дека има вредност како да се први, бидејќи лани влегоа во елитното друштво и оваа година имаа цел да изборат опстанок, а се случи сензација – изјави ВМ Драган Јаќимовиќ, капитен на ШК Алкалоид.

За шампионскиот тим на Алкалоид, покрај интернационалците ВМ Александар Инѓиќ (актуелен Европски Шампион) и ВМ Велимир Ивиќ на првите две табли, настапија уште и ИМ Филип Панчевски, ИМ Емил Ристески, ИМ Тони Лазов и ИМ Дејан Стојановски „велемајсторската гарда“ составена од ВМ Трајко Недев, ВМ Звонко Станојоски и ВМ Драгољуб Јаќимовиќ.
Целосната доминација на ШК Алкалоид на овогодинешните шампионати е комплетирана, со оглед дека претходно женскиот тим на ШК Алкалоид ја освои титулата кај дамите, каде што ИМ Лела Јавакишвили и ВМ Бела Котенашвили играа заедно со ЖИМ Габриела Коскоска, ЖФМ Моника Стојковска, ЖФМ Моника Жежовска и Леа Ефтовска.

Во освојувањето на второто место кај ШК Мулти Есенс учествуваа ВМ Леон Ливајиќ и ВМ Лука Драшковиќ, заедно со Михаил Јорданов, Теодор Јовановски, Стојан Велкоски, Матео Ефтовски, Кирил Николовски и Дино Табаковски. Сите момчиња кои денес се на возраст од дваесетина години од најрана возраст ја учат шаховската игра во јуниорската шаховска школа на Алкалоид!

Следен предизвик за ШК Алкалоид ќе биде новиот настап на Европскиот клупски куп, кој е на програмата од 18 до 26 октомври во Грција.

The post ДРАМАТИЧНА ЗАВРШНИЦА НА ШАХОВСКОТО ЕКИПНО ПРВЕНСТВО Шахистите на Алкалоид, шампиони на Македонија по 13-ти пат во низа appeared first on plusinfo.mk.

Претседателот на Србија, Александар Вучиќ додека во Белград траат протести објави фотографија од Претседателството на Србија, со порака „Моменти на релаксација“.

На сликата, претседателот на Србија игра шах со Лука Петровиќ, градскиот секретар за инвестиции.

– Само од претседателството. Моменти на релаксација – напиша Вучиќ на својот Инстаграм профил.

Студентите во блокадата денес одржуваат протест во центарот на Белград, на Видовден. Како што е најавено, собирот се одржува под слоганот „Се гледаме на Видовден“ на плоштадот Славија. Ќе трае до 21 часот.

Пред Собранието, денеска се одржа литературна вечерна програма, организирана од студенти од Пионирски парк.

Вучиќ претходно изјави дека очекува да има нереди по завршувањето на протестите.

The post ВУЧИЌ ОБЈАВИ ФОТОГРАФИЈА ОД ПРЕТСЕДАТЕЛСКАТА ЗГРАДА Еве што прави српскиот претседател додека Белград е парализиран од протести appeared first on plusinfo.mk.

Шахистите на Алкалоид освоија најмногу медали на Државното првенство за млади категории одржан во Струмица од 16 до 21 јуни.

Меѓу девојките со златни медали се вратија Моника Жежовска (У18) и Илијана Велева (У12), додека, пак, Исидора Лукановска (У14) освои сребрен медал.

Во машка конкуренција беше понеизвесно, па така Давид Атанасовски беше едно од најпријатните изненадувања бидејќи по само една година тренирање успеа да стигне до златниот медал во категоријата до 10 години, но подеднакво блескави беа и постигнувањата на Марко Стојановиќ (У12) и Никола Радоњанин (У16), кои ги освоија трофеите во својата конкуренција. Новиот член на клубот, Никола Павлески, дебитираше за ШК Алкалоид со освојување на второто место во конкуренцијата до 18 години. Сребро освои и Лука Симоновски (У12), додека, пак, Васил Иванов (У10) и Андреј Божиновски (У14) се закитија со бронзени медали.

– Ние како тренери сме задоволни од она што го прикажаа нашите младинци. Не би одел во детали, туку би рекол само „Браво шампиони“! Сите се трудеа да го дадат својот максимум и во фајтерски стил се носеа со конкуренцијата, онака како што доликува кога се бранат боите на ШК Алкалоид. Радува фактот што имаме титули и кај момчињата и кај девојчињата затоа што тоа е показател дека се стремиме кон успеси во двете конкуренции. Некои се потврдија како фаворити, а некои кои не беа меѓу првите тројца носители пријатно изненадија. Ние како тренери сме презадоволни од она што го видовме и ќе продолжиме да ги трасираме патиштата на идните македонски шаховски шампиони преку континуирана работа во клубот – изјави ИМ Дејан Стојановски.

Според календарот на Европската шаховска унија, младинските европски првенства за 2025 година во стандарден шах ќе се играат во октомври во Будва, Црна Гора, додека, пак, континенталниот собир на млади играчи во забрзан и во брзопотезен шах е закажан за 4 август во Солун, Грција.

The post МЛАДИТЕ ШАХИСТИ НА АЛКАЛОИД НАЈУСПЕШНИ НА ДРЖАВНОТО ПРВЕНСТВО Фаворитите не потфрлија, а други играчи пријатно изненадија appeared first on plusinfo.mk.

Рускиот шаховски велемејстор и поранешен светски шампион Борис Спаски почина на 89-годишна возраст, соопштија денеска Руската шаховска федерација и Меѓународната шаховска федерација.

Спаски беше светски шампион од 1969 до 1972 година, а три пати се натпреваруваше за светската титула (1966, 1969, 1972 година).

Неговиот меч со Роберт (Боби) Фишер во 1972 година, прогласен за „меч на векот“, остана запаметен во шаховската историја. Спаски имаше право да го напушти дуелот и да биде прогласен за светски шампион со резултат 2:0. Но, тој реши да продолжи, а Фишер на крајот ја освои титулата.

Реваншот помеѓу Спаски и Фишер одигран во 1992 година е забележан како еден од најдинамичните мечеви. По 20 години, двајцата шаховски великани повторно се сретнаа, но овој пат во Белград и во Свети Стефан во Црна Гора, во време кога беа во сила санкциите на ОН против Југославија. Фишер победи со 10:5, но со тоа ги прекрши меѓународните санкции.

Борис Спаски е роден во Ленинград, денешен Санкт Петербург, во 1937 година. Во Франција емигрирал во 1976 година, а во 1978 година станал француски државјанин.

Спаски во текот на кариерата настапуваше за Советскиот Сојуз, за Франција и за Русија.

The post ПОЧИНА БОРИС СПАСКИ, ЕДЕН ОД НАЈДОБРИТЕ ШАХИСТИ ВО ИСТОРИЈАТА Со Боби Фишер го одиграа „мечот на векот“ appeared first on plusinfo.mk.