Најуспешниот македонски шаховски колектив, ШК Алкалоид, со победа ја започна одбраната на двојната круна на екипните државни првенства, кои викендов стартуваа во Струга.

На машкиот турнир пријавени се дури 21 велемајстор, но и уште 13 играчи со титула интернационален мајстор и 15 играчи со титула ФИДЕ-мајстор. Вкупно 49 играчи од пријавените 100 имаат шаховска титула, наспроти 36 во 2025 година. Просечниот рејтинг на машкиот турнир е 2.119 поени, додека, пак, на женскиот турнир тој изнесува 1.847 поени, при што има вкупно 38 шахистки, од кои 14 се со меѓународни шаховски титули.

Машкиот тим на Алкалоид во првото коло тргна со убедлива победа од 5:1 над штипскиот клуб „Нов напредок“, а во второто коло беше совладан и ШК Прилеп со 4:2.

Ростерот на тимот е идентичен со минатите години, при што како засилувања на првите две табли играат ВМ Александар Инѓиќ и ВМ Велимир Ивиќ, додека, пак, помладите играчи ИМ Емил Ристески, ИМ Тони Лазов, ИМ Филип Панчевски и ИМ Дејан Стојановски овојпат ќе го понесат товарот пред велемајсторите Трајко Недев, Драгољуб Јаќимовиќ и Звонко Станојоски.

Составот на женскиот тим е непроменет во последниве неколку години: на првите две табли се Грузијките ИМ Лела Јавакишвили и ВМ Бела Котенашвили, додека, пак, ЖФМ Моника Стојковска, ЖФМ Моника Жежовска, ЖИМ Габриела Коскоска и Леа Ефтовска ќе ротираат на другите две табли. Во првите две кола тие исто така прокнижија две победи – против ШК Капабланка со 4:0, а потоа и во дербито на второто коло со 3,5:0,5 против ШК Неготино.

На женскиот турнир се играат седум кола, додека, пак, машкиот турнир има девет кола. 

The post АЛКАЛОИД СО ПОБЕДА ЈА ПОЧНА ОДБРАНАТА НА ТИТУЛАТА На машкиот турнир во Струга пријавени се дури 21 велемајстор appeared first on plusinfo.mk.