Во Дневниот центар за лица со аутизам во Штип денеска беше промовиран новоопремениот сензорен простор, наменет за поддршка на лицата со аутизам. Просторот е опремен како донација од Фондацијата „Д-р Верица Механџиска“, со цел да се создаде сигурна, пријатна и поддржувачка средина за корисниците на овој дневен центар.

На настанот присуствуваше и Вања Џамбазова, претставник од Општина Штип, која истакна:

– Oвој е центар е од огромно значење за нашата заедница. Тој претставува сигурно место за децата и нивните семејства, а за негово непречно функционирање, Општината континуирано ги обезбедува сите потребни човечки ресурси кои секојдневно и посветено работат.

Таа истакна дека денешниот повод е уште позначаен благодарение на вредната донација од Фондацијата „Д-р Верица Механџиска“  со која во центарот се создадоа нови сензорни простории опремени со нови реквизити и современи дидактички средства. Со оваа  опрема, условите за престој и развој на децата се подигнуваат на повисоко ниво. Овие сензорно соби се од огромно значење за стимулација, развојот и терапијата на децата. Со заеднички сили меѓу Општината, граѓанскиот сектор и хуманите организации, се гради вистинска инклузивна заедница.

Бранка Џајковска, претставник на Фондацијата „Д-р Верица Механџиска“, истакна дека поддршката за создавање на сензорни простори е дел од пошироките заложби на Фондацијата за подобрување на квалитетот на живот на лицата со аутизам и нивните семејства.

– Среќни сме што денеска можеме да го предадеме овој сензорен простор на корисниците на дневниот центар за лица со аутизам во Штип. За нас, секој ваков простор значи многу повеќе од опрема, значи создавање средина во која лицата со аутизам може да се чувствуваат прифатени и поддржани – рече Џајковска.

Наталија Митрева Митев, директор на Меѓуопштинскиот центар за социјална работа во Штип, како примател на донацијата, истакна:

– Како установа чија примарна мисија е грижата и заштитата на ранливите категории граѓани, изразуваме длабока и искрена благодарност до Фондацијата „Д-р Верица Механџиска“ за оваа исклучително вредна донација. Преку ваквите заеднички заложби и континуирана соработка, покажуваме дека со усогласени сили можеме да создадеме реални, позитивни промени во општеството. Опремувањето на сензорниот простор во Дневниот центар за лица со аутизам директно ги зајакнува нашите капацитети за давање современи социјални услуги и им овозможува на вработените современи услови за работа. Оваа соработка не само што ги подобрува секојдневните вештини и добросостојбата на корисниците, туку испраќа и силна порака за поддршка до нивните семејства. Верувам дека ова успешно партнерство со Фондацијата ќе продолжи и во иднина, како модел за општествена одговорност и грижа за оние на кои поддршката им е најпотребна.

Донацијата претставува уште една во низата активности што ги реализира Фондацијата „Д-р Верица Механџиска“ во насока на поддршка на лицата со аутизам и нивните семејства. Само во последните 12 месеци, донациите на Фондацијата и на компанијата „Зегин“ надминуваат 300.000 евра и се пример во нашата држава за континуирана и посветена општествена одговорност.

The post ОПРЕМЕН СЕНЗОРЕН ПРОСТОР ВО ДНЕВНИОТ ЦЕНТАР ЗА ЛИЦА СО АУТИЗАМ Донација од Фондацијата „Д-р Верица Механџиска“ appeared first on plusinfo.mk.