Демократите во американскиот Сенат синоќа го блокираа годишниот предлог-закон за финансирање на одбраната во вредност од 1,15 билиони долари, изразувајќи незадоволство поради војната со Иран и одлуката на претседателот Доналд Трамп да испрати американски сили без консултација со Конгресот.

– Трамп ја започна оваа војна без одобрение, без стратегија и без план за повлекување – изјави лидерот на демократското малцинство во Сенатот, Чак Шумер.

При процедурното гласање, предлог-законот доби 50 гласа „за“ и 46 „против“, но не го обезбеди потребното мнозинство од 60 гласа за продолжување на законодавната постапка.

Законот за финансирање на одбраната традиционално добива двопартиска поддршка, но годинава демократите сметаат дека одобрувањето на рекордниот буџет за Пентагон би можело да се протолкува како поддршка за војната против Иран.

Тие се противат и на барањето на администрацијата на Трамп воените трошоци годинава да достигнат 1,5 трилиони долари, во време кога се намалуваат средствата за социјалните програми.

Лидерот на републиканското мнозинство во Сенатот, Џон Тун, ги обвини демократите дека политиката ја ставаат пред националната безбедност.

Предлог-законот предвидува средства за набавка на нови бродови, авиони и ракетни системи, зголемување на платите на припадниците на вооружените сили и финансирање мерки за справување со безбедносните предизвици.

И покрај блокадата, законодавната постапка продолжува. По усогласувањето на верзиите што ќе ги усвојат Претставничкиот дом и Сенатот, конечниот текст ќе биде испратен до претседателот Трамп за потпишување или вето.

The post БЛОКИРАН ПРЕДЛОГ-БУЏЕТОТ ЗА ОДБРАНА НА САД ТЕЖОК 1,5 БИЛИОНИ ДОЛАРИ Демократите во Сенатот не дадоа поддршка за војната во Иран appeared first on plusinfo.mk.

Сенатот на САД вчера изгласа резолуција со која се бара од претседателот Доналд Трамп да спречи продолжување на војната против Иран.

За резолуцијата гласаа 50 сенатори, а 48 се изјаснија „против“. Резолуцијата минатиот месец беше изгласана во Претставничкиот дом.

Првпат двата дома на Конгресот усвојуваат резолуција со која се бара претседателот да повлече американски вооружени сили од воена операција, откако е донесен Законот за воени овластувања во 1973 година.

Резолуцијата е изгласана по десеттиот обид.

Демократите во Сенатот речиси секоја недела предлагаа резолуции за воените овластувања, но не успеваа да го соберат потребното мнозинство за усвојување во тесно поделениот Сенат, каде што Републиканската партија на претседателот Трамп го има мнозинството.

Резолуцијата не значи дека Трамп од утре автоматски губи право да нареди воен удар врз Иран. Таа е пред сè политички и уставен притисок од Конгресот кој вели: „За продолжена војна или поголема воена кампања, треба наше одобрение.“

Според американската практика, Трамп може да нареди ограничени воени акции, може да реагира ако тврди дека има непосредна закана за американските сили или интереси и може да преземе итни воени мерки и потоа да го извести Конгресот. Но, не може да води долготрајна војна без поддршка од Конгресот, да добие нови милијарди долари за поширока воена кампања и да тврди дека има целосна политичка поддршка во Вашингтон.

Најголемото значење на гласањето е што за првпат значителен број републиканци јавно се спротивставија на продолжување на конфликтот, што е е сигнал дека дури и во неговата партија претседателот Трамп нема неограничена поддршка за натамошна ескалација со Иран.

The post СЕНАТОТ КОНЕЧНО ИЗГЛАСА РЕЗОЛУЦИЈА ПРОТИВ ПРОДОЛЖУВАЊЕТО НА ВОЈНАТА ВО ИРАН Трамп сепак ќе може да интервенира ако процени дека треба appeared first on plusinfo.mk.

Американскиот Сенат синоќа усвои резолуција за ограничување на воените овластувања на претседателот на САД, со која би се ограничила можноста претседателот Доналд Трамп самостојно да носи одлуки за воени дејствија.

Резолуцијата која допрва оди на гласање во Претставничкиот дом, доаѓа во време кога САД е во отворена војна против Иран и отвора можности за запирање на војната.

Резолуцијата беше изгласана со 50 гласа „за“ и 47 „против“.

Особено внимание привлече фактот што четворица републиканци гласаа заедно со демократите.

„Конгресот носи одлука за војна“

Поддржувачите на резолуцијата сметаат дека според американскиот Устав токму Конгресот, а не претседателот, има овластување да испраќа американски трупи во војна.

Со документот практично се бара секоја нова ескалација со Иран да биде одобрена од законодавниот дом.

Трамп и натаму има опции

Иако Сенатот ја усвои резолуцијата, таа сè уште не е конечна. Следува гласање и во Претставничкиот дом, каде мнозинство имаат републиканците.

Дополнително, Трамп може да стави и претседателско вето.

„Прекинот на огнот остава простор“

Сенаторот Тим Кејн, кој е предлагач на резолуцијата, изјави дека актуелниот прекин на огнот отвора простор Трамп своите аргументи да ги претстави пред Конгресот.

– Претседателот треба да го образложи секој чекор пред американските претставници – порача Кејн.

Нов потрес во Белата куќа

Гласањето се толкува како нов сигнал за растечка загриженост во Вашингтон околу можноста САД повторно да влезат во поширок конфликт на Блискиот Исток.

Одлуката покажува и дека дел од републиканците не сакаат Белата куќа самостојно да одлучува за нови воени операции против Иран.

The post РЕЗОЛУЦИЈА КОЈА МОЖЕ ДА ЈА ЗАВРШИ ВОЈНАТА Сенатот предложи кочници за Трамп appeared first on plusinfo.mk.

Сенатот на САД денеска со 54 гласа „за“ и 45 „против“ го потврди изборот на 48-годишниот сенатор од Оклахома, Марквејн Мулин, за нов министер за внатрешна безбедност.

Мулин, кој е поранешен борец во мешани боречки вештини (ММА) и успешен бизнисмен од редовите на Републиканската партија, зад себе има десетгодишно искуство во Претставничкиот дом и тригодишен мандат во Сенатот. Неговото именување доаѓа по ненадејното разрешување на претходната министерка Кристи Ноам од страна на претседателот Доналд Трамп на почетокот на овој месец.

Ноам, која првично беше фаворит на Трамп, се соочи со низа контроверзии поврзани со агресивната имиграциска политика. Таа беше под силен притисок на јавноста поради радикалните операции на Бирото за имиграција и царина (ICE), кое е под надлежност на нејзиното Министерство. На почетокот на оваа година, двајца американски државјани беа убиени од страна на службеници на ICE во два одделни инциденти при употреба на огнено оружје. Дополнително, нејзиниот јавен имиџ беше нарушен од скапа рекламна кампања, како и од извештаите за интимна врска со еден од нејзините соработници.

Сојузникот на Трамп, Мулин, важи за прагматичен лидер и веќе најави поумерен пристап во споредба со неговата претходничка.

За време на сослушувањата пред потврдувањето, тој призна дека е пријател со Ноам, но истакна дека нивните стилови на раководење значително се разликуваат. Сепак, пред Мулин е тежок предизвик – да ја спроведе строгата политика на Трамп за депортации, а притоа да се обиде да ги избегне негативните реакции од пошироката јавност.

The post ПОРАНЕШЕН ММЕ БОРЕЦ НА МЕСТОТО НА КРИСТИ НОАМ Марквеј Мулин избран за нов министер за внатрешна безбедност на САД appeared first on plusinfo.mk.

Претставничкиот дом на американскиот Конгрес ја отфрли резолуцијата со која би се ограничиле воените операции на американскиот претседател Доналд Трамп во Иран, еден ден откако американскиот Сенат ја блокираше истата иницијатива.

Гласањето во Претставничкиот дом за резолуцијата за воени овластувања, која има за цел да спречи продолжување на нападите врз Иран без одобрение од Конгресот, заврши со 212 гласа „за“ наспроти 219 „против “, при што само двајца републиканци ја поддржаа резолуцијата заедно со мнозинството демократи, објави Ен-Би-Си Њуз (NBC News).

Резолуцијата предвидуваше суспендирање на американските воени операции во Иран сè додека Конгресот на САД не одобри војна или употреба на воена сила.

Демократите истакнаа дека Уставот на САД му дава право на Конгресот да објави војна, додека Трамп и неговите високи функционери конфликтот не го нарекуваат војна.

Лидерот на демократите во Претставничкиот дом, Хаким Џефрис, ги критикуваше Трамп и републиканците за „воведување на Америка во уште еден бесконечен конфликт на Блискиот Исток, трошење милијарди долари за бомбардирање на Иран“, додека, според неговите зборови, грижата за цените на храната, здравствената заштита и домувањето за американските граѓани е занемарена.

Републиканците тврдеа дека Трамп имал избор и решил да ги брани САД од „непосредната закана“.

САД и Израел го нападнаа Иран во саботата утрото, на 28 февруари, со она што го нарекоа „превентивни напади“, кои се случија по неуспехот на неколку рунди преговори за нуклеарната програма на Иран.

Потоа Иран започна масовни одмазднички напади против Израел и цели поврзани со САД низ целиот регион на Блискиот Исток.

The post КОНГРЕСОТ НЕ ЈА УСВОИ РЕЗОЛУЦИЈАТА ПРОТИВ ВОЈНАТА ВО ИРАН По Сенатот, и Претставничкиот дом на САД гласаше против appeared first on plusinfo.mk.

Сенатот не ја изгласа Резолуцијата за ограничување на воените овластувања на американскиот претседател Доналд Трамп во конфликтот со Иран.

Резолуцијата со која се бараше прекин на сите непријателства кон Иран, што не беше одобрена од Конгресот, ја предложи демократскиот сенатор Тим Кејн. „Против“ неговата иницијатива се изјаснија 53 сенатори, а 47 беа „за“.

Единствен демократ кој гласаше против е сенаторот од Пенсилванија, Џон Фетермен, а за гласаше сенаторот од Кентаки Ранд Пол.

– Доналд Трамп ја втурна Америка во конфликт без јасни цели, без план и без овластување од Конгресот, изјави пред гласањето лидерот на демократите во Сенатот, Чак Шумер.

Конгресот има ингеренции за објавување на војна, но Резолуција за воени овластувања првпат беше употребена како одговор на Виетнамската војна во 1973 година, со која му се овозможува на претседателот на поведе ограничена воена интервенција за да одговори на непосредна закана по САД.

Демократите тврдат дека во случајот со Иран немало непосредна закана по САД.

За резолуцијата денеска ќе се гласа во Претставничкиот дом, а поради републиканското мнозинство се очекува сличен резултат.

The post СЕНАТОТ НЕ ЈА ИЗГЛАСА РЕЗОЛУЦИЈАТА НА ДЕМОКРАТИТЕ ЗА ВОЈНАТА ВО ИРАН Се бараше ограничување на воените овластувања на Трамп appeared first on plusinfo.mk.

Администрацијата на американскиот претседател Доналд Трамп понудила федерално финансирање на долго одложуваниот проект за тунелот „Гејтвеј“ во замена за тоа лидерот на малцинството во Сенатот, Чак Шумер, да ги преименува аеродромот Далс во Вашингтон и железничката станица Пен во Њујорк по Трамп, објавија неколку неименувани извори.

Проектот „Гејтвеј“, вреден околу 16 милијарди долари, е клучен инфраструктурен план кој треба да изгради нов тунел под реката Худсон, поврзувајќи ги Њујорк и Њу Џерси. Тој е важен за железничкиот транспорт и се очекува да олесни сообраќајот за илјадници патници дневно.

Финансирањето беше стопирано од страна на администрацијата на Трамп на почетокот на затворањето на федералната влада минатата есен, оставајќи го проектот во неизвесност. Иако затворањето заврши во ноември, а законот за целосна распределба на буџетот беше усвоен оваа недела, парите сè уште не се исплатени.

Според извори блиски до ситуацијата, Трамп предложил „одмрзнување“ на парите за тунелот само ако Шумер поддржи идејата за преименување на значајни инфраструктурни објекти по него. Одговорот на Шумер бил категоричен: тој немал овластување да го направи тоа, а и таквата одлука не е во неговата надлежност.

Политички реакции следеле веднаш. Демократски политичари и гувернери го критикуваа предлогот како обид за политичка манипулација, истакнувајќи дека именувањето на јавни објекти по сегашен претседател додека тој е на функција е исклучително необично и може да се сфати како злоупотреба на моќта.

„Проектите како Гејтвеј не треба да се врзуваат со лични его-барања. Станува збор за јавни пари и јавен интерес, а не за самопромоција“, изјави еден од демократските претставници.

Тунелот „Гејтвеј“ е критичен за инфраструктурата во регионот, а одложувањето на финансирањето го загрозува не само распоредот за изградба туку и работните места поврзани со проектот. Синдикати и локални власти веќе изразија загриженост дека понатамошни застои може да предизвикаат сериозни последици за транспортот и економијата.

Овој случај го истакнува ризикот од политичко поврзување на инфраструктурни проекти со лични интереси, а јавната дебата во САД се фокусира на прашањето како треба да се распределуваат федералните средства за јавни проекти.

The post ТРАМП БАРА АЕРОДРОМ И ЖЕЛЕЗНИЧКА СТАНИЦА ВО ЊУЈОРК ДА ГО НОСАТ НЕГОВОТО ИМЕ Во спротивно, нема да им одобри 16 милијарди долари за тунел appeared first on plusinfo.mk.

Американскиот претседател Доналд Трамп одобрил нов пакет санкции против Русија, потврди синоќа сенаторот Линдзи Греам по средба во Белата куќа. Со тоа, како што јавува „Политико“, Вашингтон подготвува нов притисок врз Москва и нејзините сојузници, во момент кога мировните обиди околу Украина повторно запаѓаат во ќорсокак.

Зелено светло од Белата куќа

– По продуктивниот состанок денес со претседателот Трамп, тој даде зелено светло за двопартискиот закон за санкции против Русија на кој работам со сенаторот Ричард Блументал и други колеги – изјави Греам, нагласувајќи дека гласањето би можело да се одржи веќе следната недела.

Од Белата куќа потврдија дека претседателот го поддржува предлог-законот, иако сè уште не е јасно дали конечната верзија целосно ќе ги задоволи барањата на администрацијата.

Санкции и за Кина и за Индија

Законот, според документите што ги објави „Политико“, предвидува воведување на секундарни санкции врз држави што продолжуваат да купуваат руска нафта и гас. Мерките би ги засегнале Кина, Индија и други партнери кои, и покрај западните рестрикции, одржуваат економски врски со Москва.

Предлогот ќе помине со „цврсто гласање“?

– Украина прави отстапки за мир, додека Путин продолжува да убива невини – додаде сенаторот Греам, повикувајќи на „навремено и цврсто гласање“ во Сенатот.

Иако претходни обиди за ваков закон беа заглавени во процедурите, американските аналитичари проценуваат дека сега, со експлицитната поддршка на Белата куќа, предлогот има реални шанси да помине.

Венецуела за Украина, одврзани раце за Москва?

Од друга страна, Дејли Мејл и Телеграф напишаа дека по успешната воена акција на САД во Венецуела и апсењето на Николас Мадуро, Трамп би можел да ја „трампа“ Венецуела за Украина.

The post „УДАР ЗА ПУТИН, ТОКМУ НА ВРЕМЕ“ Трамп дал зелено светло за санкции за Москва appeared first on plusinfo.mk.

Деца на бројни американски политичари, конгресмени и сенатори, се подготвуваат да ги продолжат своите семејни политички династии со кандидатури на изборите во 2026 година. Иако овој феномен не е нов, актуелниот изборен циклус се издвојува по големиот број потомци и блиски роднини на сегашни и поранешни функционери кои влегуваат во изборната трка.

Во трката за гувернер на сојузната држава Мејн се издвојуваат тројца кандидати со силна политичка позадина: Ангус Кинг Трети, син на независниот сенатор Ангус Кинг, демократката Хана Пингри, ќерка на конгресменката Чели Пингри, како и републиканецот Џонатан Буш, братучед на двајца поранешни американски претседатели од семејството Буш, објави „NBC“.

Во Њу Хемпшир, Стефани Шахин, ќерка на демократската сенаторка Џин Шахин, се кандидира за слободно место во Претставничкиот дом.

Сличен тренд се забележува и во Калифорнија, каде Кристин Пелоси, ќерка на поранешната претседателка на Претставничкиот дом Ненси Пелоси, влегува во трката за државниот Сенат. Во Џорџија, пак, Џим Кингстон, син на поранешниот републикански конгресмен Џек Кингстон, се кандидира за конгресното место кое претходно го држеше неговиот татко.

Феноменот на семејни врски во американската политика оди и подалеку од односите родител–дете. Во Тексас, републиканскиот конгресмен Трој Нелс јавно го поддржа својот брат близнак Тревор во претседателската трка.

Политичките аналитичари оценуваат дека препознатливото презиме може да помогне при собирање донации и медиумска видливост, но истовремено може да претставува и товар во време на засилени антиестаблишмент расположенија и обвинувања за непотизам.

Во прилог на тоа, анкета на „NBC“ спроведена во ноември покажува дека 57 отсто од гласачите изјавиле оти би гласале за отстранување на сите членови на Конгресот доколку имаат таква можност.

The post ПРОДОЛЖУВААТ ПОЛИТИЧКИТЕ ДИНАСТИИ ВО САД Деца на американски политичари ги почнуваат изборите во 2026 година appeared first on plusinfo.mk.

Републиканскиот конгресмен Томас Маси поднесе предлог-закон во Претставничкиот дом на Конгресот на САД со кој се бара повлекување на земјата од Северноатлантската алијанса (НАТО), соопшти неговиот кабинет. Иницијативата е наречена „Закон за недоверливата организација“.

Предлог-законот наведува дека НАТО е „реликвија од Студената војна“, формирана за спротивставување на СССР, кој се распадна пред повеќе од 30 години. Според текстот, учеството на САД во Алијансата ги чинело американските даночни обврзници трилиони долари.

– Нашиот Устав не го одобрува континуираното учество во странски конфликти; нашите татковци-основачи предупредуваа против тоа. Америка не треба да биде заштитник на светот, особено кога богатите земји одбиваат да плаќаат за сопствената одбрана – изјави Маси.

Доколку предлог-законот биде усвоен, претседателот на САД ќе биде обврзан во рок од 30 дена да го извести НАТО за повлекувањето на земјата. Предлогот, исто така, предвидува забрана за користење средства од федералниот буџет за финансирање на Алијансата.

Во Сенатот, соодветен предлог-закон поднесе сенаторот од Јута, Мајк Ли, исто така републиканец.

Претседателот Доналд Трамп во повеќе наврати најавуваше можност за повлекување од НАТО, критикувајќи ги сојузничките земји поради недоволни инвестиции во одбраната. По неговите критики, членките на Алијансата се согласија да ги зголемат одбранбените трошоци до 5% од БДП до 2035 година.

Во времето на администрацијата на поранешниот претседател Џо Бајден, Конгресот усвои закон кој му забранува на кој било претседател самостојно да ја повлече САД од НАТО. Сепак, како што објави „Политико“, Трамп би можел да се обиде да најде начин за заобиколување на оваа забрана преку претседателските овластувања во областа на надворешната политика.

The post СЕ БАРА САД ДА СЕ ПОВЛЕЧАТ ОД НАТО Предлог-резолуција поднесена во американскиот Конгрес и во Сенатот appeared first on plusinfo.mk.