Сенката на трагедијата што го потресе каталонскиот моден свет повторно се враќа. Џонатан Андик, синот на покојниот Исак Андик, основачот на „Манго“, стана главен осомничен за убиството на сопствениот татко, јави Ел Паис.

Исак загинал минатиот декември во несреќа на Монсерат, планина која семејството често ја посетувало. Тогашната истрага се водела како трагичен пад, но нови докази, според каталонската полиција, отвораат поинаква приказна.

Меѓутоа, семејството Андик стои зад Џонатан. Во нивното соопштение се наведува:

„Семејството Андик не коментираше и нема да коментира за смртта на Исак Андик во текот на сите овие месеци. Сепак, тие сакаат да покажат почит кон тековните истраги и ќе продолжат да соработуваат со надлежните органи, како што правеа досега. Тие се исто така уверени дека овој процес ќе биде завршен што е можно поскоро и дека невиноста на Џонатан Андик ќе биде докажана.“

Кој е Џонатан?

Џонатан Андик, 44-годишен претседател на „Манго МНГ Холдинг САУ“, ја презел семејната контрола врз холдинзите „Пунта На“ и „Манго“ веднаш по смртта на татко му. Дипломиран во САД, со специјализации од „IESE“, тој ја започнал кариерата во „Манго“ во 2005 година и ја предводел машката линија „Mango Man“ уште од нејзиното основање.

Познат е како човек што ги комбинирал традицијата и новиот маркетинг, но исто така и како строг менаџер, често во судир со дел од раководството.

Минатиот месец се повлекол од оперативните функции за да се посвети на управувањето со семејниот имот.

Сестрите во сенка

Џонатан има две сестри: Џудит (41) и Сара (28). Двете се потпретседателки на холдингот и членки на управата. Џудит студирала моден дизајн во Барселона, додека Сара, која е задолжена за недвижностите, живее дискретно во Лондон. Иако нивните имиња ретко се појавуваат во јавноста, се смета дека тие се клучни за иднината на семејната империја.

Кралот на „Манго“

Исак Андик, роден во Истанбул во 1953 година, се доселил во Каталонија на крајот на шеесеттите. Својата прва продавница „Манго“ ја отворил во 1984 година во Барселона. Почнал продавајќи маици на пазарите, а станал милијардер со визија дека „модата мора да биде достапна и модерна истовремено“. Контролирал 95% од акциите, а остатокот му го препуштил на извршниот директор Тони Руиз. Неговото лично богатство се проценува на 4,5 милијарди долари.

По смртта на таткото, компанијата „Манго“ направи реорганизација на одборот, во кој влегоа Даниел Лопез, Маргарита Салванс и независни членови како Жорди Каналс и Хорхе Лукаја.

Тајната на Монсерат

Каталонската полиција потврди дека постапката е доверлива, но негира дека истрагата е затворена. Портпаролот изјави дека „во моментов не може да се споделат детали“. Извори блиски до истрагата тврдат дека се проверуваат комуникациите меѓу Џонатан и неговиот татко во деновите пред несреќата.

Монсерат, симболичната планина на Каталонија, сега стана и симбол на семејна драма што ја потресе Шпанија.

The post СИНОТ НА ОСНОВАЧОТ НА „МАНГО“ ОСОМНИЧЕН ЗА УБИСТВО НА ТАТКОТО Семејството тврди дека ќе се докаже невиноста appeared first on plusinfo.mk.