Пет лица се лишени од слобода, со едно лице е извршен службен разговор, а полицијата постапувала по вкупно 10 пријави за семејно насилство во последното деноноќие во повеќе градови низ државата.

Во Скопје, на подрачјето на Карпош, полициски службеници на 18 јуни во 20:30 часот го лишиле од слобода З.С. (46) од Скопје, по пријава дека во домот физички ја нападнал својата 47-годишна сопруга.

Истиот ден во 18 часот, 29-годишна жена во СВР Скопје пријавила дека во период од околу шест месеци била физички и психички малтретирана од нејзиниот вонбрачен сопруг Е.Х.

Во уште еден случај во главниот град, 55-годишна жена пријавила дека нејзиниот син О.Г. упатувал закани кон неа и кон неговата сестра.

Во СВР Скопје била пријавена и 46-годишна жена која навела дека околу 9 часот наутро на подрачјето на општина Аеродром била физички нападната од нејзиниот поранешен партнер К.С.

Дополнително, 41-годишна скопјанка пријавила дека во изминатите три месеци нејзиниот поранешен партнер А.Ј. (37) психички ја вознемирувал со постојани телефонски повици, пораки оставени на нејзиното возило, како и со појавување пред нејзиниот дом.

Во Кочани, полициски службеници во 22:30 часот го лишиле од слобода Ф.Р. (40), откако неговата 40-годишна сопруга пријавила дека во семејниот дом физички ја нападнал со тврд предмет. Според пријавата, таа подолг период била изложена на психичко и физичко малтретирање.

Во Штип, непосредно пред полноќ, бил приведен А.Б. (56), по пријава од неговата 49-годишна сопруга дека попладнето физички ја нападнал во семејниот дом.

Во Делчево, во раните утрински часови на 19 јуни, бил лишен од слобода Д.А. (30), откако неговата 23-годишна сопруга пријавила дека во повеќе наврати ја нападнал во домот и во градскиот парк, при што употребил и тврд предмет. Полицијата утврдила дека бил под дејство на алкохол и му биле измерени 1,79 промили алкохол во крвта. Според пријавеното, жената подолг период трпела психичко и физичко насилство.

Во Велес, полициски службеници извршиле службен разговор со З.Б. (57), по пријава дека агресивно се однесувал и упатувал закани кон својата 54-годишна сопруга.

Неколку часа подоцна во истиот град бил приведен С.С. (43), по пријава од неговата 72-годишна мајка дека физички ја нападнал во семејниот дом. Претходно, С.С. пријавил дека неговата мајка извесен период вршела насилство врз неговиот малолетен син и дека на 16 јуни физички го нападнала. За случајот биле известени јавен обвинител и Центарот за социјални работи во Велес.

Во Крива Паланка, пак, бил лишен од слобода Д.И. (29) од селото Конопница, откако бил пријавен дека агресивно се однесувал и упатувал закани кон својата 27-годишна сопруга. Тој бил пренесен во здравствена установа во Скопје и задржан на лекување.

Од Министерството за внатрешни работи информираат дека се преземаат мерки за расчистување на сите случаи, по што против сторителите ќе бидат поднесени соодветни пријави.

The post ТЕПАЊЕ, ЗАКАНИ И ПСИХИЧКО МАЛТРЕТИРАЊЕ Десет пријави за семејно насилство, приведени пет лица appeared first on plusinfo.mk.