Една година по смртта на Халид Бешлиќ, јавноста повторно се интересира за богатството што го стекнал во текот на долгата музичка кариера и за тоа кој ќе го наследи неговиот имот. Според проценките што ги објавуваат регионалните медиуми, неговото богатство се проценува на околу 13 милиони евра. Сепак, оваа сума не е официјално потврдена.

Покрај песните што оставија белег кај публиката низ целиот регион, зад пејачот останаа и недвижности, деловни вложувања и права поврзани со неговата музика. По смртта на неговата сопруга Сејда, која почина неколку месеци по него, повторно се актуализираа написите за тоа кому му припаднал семејниот имот.

Според наводите што ги пренесуваат српските медиуми, Халид наводно целиот имот ѝ го оставил на сопругата, со која беше во брак речиси пет децении. По нејзината смрт, таа наводно се откажала од својот дел во корист на нивниот син Дино. Овие информации, сепак, не се официјално потврдени, па не може со сигурност да се тврди дека целото наследство е распределено на тој начин.

Од станови во Сараево до куќа на Пељешац

Според медиумските написи, имотот на Бешлиќ опфаќал неколку станови, голем имот во близина на Сараево, зграда во престижен дел од градот, бензинска пумпа и мотел. Во неговото деловно портфолио се споменува и хотел, кој, според претходни извештаи, бил затворен и запуштен.

Пејачот поседувал и недвижност во Хрватска, во местото Драче на полуостровот Пељешац. Таму планирал да ги поминува пензионерските денови, подалеку од концертите и обврските што ги носеше музичката кариера. Во медиумите се споменува куќа од околу 170 квадратни метри со базен, но деталите за нејзината конечна вредност не се официјално објавени.

Важен дел од наследството се и правата поврзани со неговите песни и дискографија, како и приходите од дигиталните платформи. По смртта на пејачот, интересот за неговата музика повторно се зголеми, што отвори и прашања за идните приходи од неговиот музички каталог.

„Во бизнисот влегов за да си обезбедам мирна старост“

Иако беше познат пред сè како пејач, Бешлиќ во текот на животот вложуваше и во различни деловни проекти. Имал сопствен бренд кафе, се занимавал со дистрибуција на енергетски пијалаци, а го лансирал и парфемот „Миљацка“, произведен во ограничена серија од 1.200 пакувања. Се испробал и во градежништвото, со изградба на станбена зграда во Сараево.

Во интервју за хрватскиот портал „24 сата“, пејачот отворено зборувал за причините поради кои се впуштил во бизнисот. Објаснил дека музичката професија не нуди секогаш финансиска сигурност и дека сакал да обезбеди стабилни приходи за подоцнежните години.

– Сега сè издавам под наем и живеам од киријата, така е најдобро. Одам само повремено да ги обиколам објектите и да проверам дали сè е во ред. Важно е парите да доаѓаат – изјавил тој низ смеа.

Бешлиќ тогаш признал и дека морал да подигне кредит за да ги покрие инвестициите, но верувал дека вложувањата ќе му овозможат финансиски помирна старост.

И покрај милионските проценки, пејачот остана познат по скромниот начин на живот и приврзаноста кон семејството. Неговите блиски, особено сопругата Сејда и синот Дино, секогаш ги држеше подалеку од непотребното медиумско внимание.

The post КОМУ МУ ПРИПАДНА БОГАТСТВОТО НА ХАЛИД БЕШЛИЌ? Наследството на легендарниот пејач се проценува на околу 13 милиони евра appeared first on plusinfo.mk.

Сејда Бешлиќ, сопругата на легендарниот пејач Халид Бешлиќ, не можеше да присуствува на комеморацијата на омилениот босански пејач во Народното позориште во Сараево поради здравствени проблеми. Таа и Халид беа во брак цели 48 години, а местото што ѝ беше оставено во првиот ред, веднаш покрај нивниот син Дино, внуците и членовите на семејството, остана празно со натпис „Сејда Бешлиќ“, што ја растажи публиката.

Сејда и Халид се запознале уште пред неговата музичка кариера да се издигне — таа тогаш работела во фабрика за чоколада, а тој правел први чекори во естрадата. Стапиле во брак во 1977 година, само шест месеци по запознавањето. Нивната љубов траеше речиси пет децении, за време на кои таа беше неговата најголема поддршка, особено кога Халид во 2009 година доживеа тешка сообраќајна несреќа од која едвај преживеа.

По веста за смртта на пејачот, јавноста дозна дека и Сејда била хоспитализирана поради здравствени тешкотии. Неколку дена подоцна беше пуштена од болница и се чувствуваше подобро, но непосредно пред погребот повторно ѝ се влоши состојбата, поради што не можеше да присуствува на последното збогување со својот сопруг.

Во своите последни денови, Халид ѝ ја посвети последната песна што ја објави, насловена едноставно „Сејда“, дело создадено во соработка со Александар Милиќ Мили и текстописецот Фахрудин Пецикоза. Песната, објавена на 11 септември, беше негова интимна порака до жената со која го помина целиот живот.

Комеморацијата во чест на Халид Бешлиќ започна во 11 часот во Народното позориште во Сараево, по што во џамијата Гази Хусрев-бег беше одржана молитва, а погребот се одржа на гробиштата „Баре“. Илјадници граѓани, пријатели и колеги присуствуваа на погребот, каде што се пееше неговата песна „Romanija“. Пејачот беше погребан покрај својот долгогодишен пријател и колега, Кемал Монтено.

The post ПРАЗНОТО МЕСТО ГИ РАСТАЖИ ПРИСУТНИТЕ Сопругата на Халид Бешлиќ не можеше да присуствува на комеморацијата appeared first on plusinfo.mk.