Драстичниот скок на цената на горивата ги натера скопските таксисти да почнат да размислуваат дали и колку да ја покачат цената на такси-услугите, а тоа да не предизвика драстично намалување на муштериите.

Плусинфо дознава дека раководствата на најголемиот дел од такси-компаниите во вторникот одржале состанок на кој било предложено новото поскапување, но наместо едногласно прифаќање или одбивање на идејата, таму се случило нешто многу поинтересно: таксистите се поделиле во две групи. Првите, кои управуваат возила на бензин или на нафта (литро гориво чини над 100 денари), прифаќале зголемување на цените на услугите, а вторите, кои управуваат со возила на плин (литро плин чини околу 50 денари), одбивале промена на цените на такси-услугите оти сметаат дека на тој начин ќе ги загубат муштериите.

Такси-возач од компанијата „Вардар“, чие возило користи дизел гориво, објаснува дека со новите цени на горивото потребно е минимум 12 часа работење во текот на денот за да се заработат чисти 600 денари.

– Порано се знаеше, полнам нафта за 500 денари и возам 100 километри без проблем. Но, сега, полнам нафта за 1.000 денари и едвај возам 120 километри. Гледате ли колкава е разликата? А да не зборувам за другите трошоци во денот. На пример, за користење на возилото секојдневно плаќам по 800 денари. Исто толку пари одвојувам и за такси-компанијата која ми ја обезбедува диспечер. Значи, тоа се 2.600 денари само за гориво и за трошоци во еден ден, па практично не ми се исплати да си одам дома без да заработам најмалку 3.200 денари. А за да заработам 3.200 денари потребно е да работам најмалку 12 часа во денот. Многу е тешко. Сметам дека зголемувањето на цените на такси-услугите барем малку ќе нѐ врати во живот – ни изјави таксист од компанијата „Вардар“, задолжен за возилото со број 122.

Најавеното поскапување на такси-услугите не е преголемо за да ги одврати муштериите, додава тој.

– Во моментов, почетната цена изнесува 40 денари, а предложено е таа да изнесува 50 денари во иднина. Исто така, цената за еден поминат километар сега чини 25 денари, а предложено е да се зголеми на 30 денари. Цената на чекање сега е 5 денари по минута, а треба да биде 7 денари. Не е некоја голема разлика, ама ете, некои такси-компании се противат само затоа што нивните возила користат плин и сметаат дека со зголемувањето на цените ќе ги загубат муштериите, но тоа не може да се случи. На состанокот долго време се расправале, а на крајот самите такси компании се поделиле во две групи: плинаши и дизелаши. Што да ви кажам, смешна работа – ни раскажа таксистот.

Сегашната цена на такси-услугите не е сменета цели 11 години, а знаете колку пати досега се зголемуваше цената на горивата.

Сашо Рајчановски Претседател на Групацијата на автотакси превоз на Град Скопје.

Сашо Рајчановски, претседател на Групацијата на автотакси превоз на Град Скопје, пак, во изјава за Плусинфо вели дека сите таксисти – и плинашите и дизелашите – веќе си легнале на брашното и прифатиле поскапување на такси-услугите.

– Точно е дека имавме средба и на таа средба присуствуваа такси-компании, присуствуваа и три-четири здруженија од Асоцијацијата на легални таксисти, присуствуваа и претставници од Синдикатот на такси-превозници, како и од Групацијата на автотакси превоз. На тој состанок ја договаравме новата цена на такси-услугите, бидејќи сегашната цена не е сменета цели 11 години, а знаете колку пати досега се зголемуваше цената на горивата. Имаше предлози од едни, од втори, од трети, а единствени бевме околу предлогот километарот да чини 30 денари, додека за почетната цена се водеше дебата дали да изнесува 50 или 60 денари. Сепак, мнозинството на крајот одлучи стартот да изнесува 50 денари. Едногласно прифативме и уште следниот ден поднесовме барање до Град Скопје, па сега чекаме тоа да биде одобрено на следната седница на Советот на Град Скопје – објасни Рајчановски.

The post СТАРТОТ ЌЕ ЧИНИ 50, А КИЛОМЕТАРОТ 30 ДЕНАРИ „Плинашите“ им се контраа на „дизелашите“, ама сепак прифатија поскапување на такси-превозот appeared first on plusinfo.mk.

Претседателот на Групацијата на такси превоз на Град Скопје, Сашо Рајчановски, вели дека иако во текот на изминатата година такси превозниците имале помалку работа и загуби, сепак, нема најава за нови цени на такси превозот во Скопје, бидејќи засега има постигнато добра цена.

– Моментално до Групацијата нема пристигнато ниту едно барање од компаниите за зголемување на цената на такси-превозот. Напротив, компаниите даваат по 10, 20 отсто или повеќе попуст или гратис километри. Кога компаниите ќе почувствуваат потреба и побараат промена на цената, тогаш ќе седнеме и ќе се договориме, а за тоа ќе биде информиран и Град Скопје кој треба да донесе одлука за новата цена – вели Рајчановски.

Тој додава дека во услови кога компаниите даваат попусти за да привлечат повеќе патници, нема логика да се бараат нови цени на превозот. Сепак, остава компаниите самите да одлучат дали ќе побараат промена на цената на авто-такси превозот.

И од Град Скопје, чиј совет носи одлука за тарифникот на такси превозот, велат дека нема никакво барање за нови цени во секторот.

– До овој момент, до Секторот за сообраќај на Град Скопје не е пристигнато барање за промена на тарифата. Доколку пристигне вакво барање, истото ќе биде разгледано и за истото ќе расправа и одлучува Советот на Град Скопје – информираат од Градот.

Дел од таксистите, пак, со став дека е дојдено време да се побара нова цена. Барањето го правдаат со најавата за воведување еко данок и повисоки цени на дизел горивото, како и истоштеноста на секторот од пандемијата.

– Пандемијата ни ја намали работата, а државата скоро и да не го помогна секторот. Имаме трошоци обнова на регистрации, лиценци поправки на возилата и плати за работниците. Најавени се нови давачки и повисока цена на дизелот. Затоа е време за повисоки цени – вели таксист.

Со одлука на Градот, а како одговор на барањето на Законот за превоз во патниот сообраќај за цената на такси превозот со кој се предвидува воведување повеќе тарифи за цената на такси превозот во 2018 година се воедени две тарифи.

Првата која ја користат моментално таксистите е 40 денари за старт на превозот и секој изминат километар чини 25 денари. Чекањето во место и движење со помалку од 20 километри на час е 300 денари.

Во втората тарифа, стартот во кој се вклучени 2 километри чини 50 денари, а цената на секој нареден изминат километар е 25 денари. Чекањето во место и движење со помалку од 20 километри на час е 300 денари и во оваа тарифа.

– Таксистите можат да изберат една од двете тарифи, но цената треба да биде во рамки на 25 денари за километар. Можат да ги намалат попустите или да не даваат гратис километри. И ако се бара нова цена на авто-такси превозот, тогаш ќе се бара и нова цена за изминат километар – појаснува Рајчановски.

The post Ќе кажат ли таксистите „оп“, ако цената на горивото направи скок? appeared first on plusinfo.mk.