Фондот за здравствено осигурување на Македонија (ФЗОМ) одлучи значајно да ги намали цените на две клучни дијагностички услуги во рамките на програмата за рано откривање на рак на грлото на матката – ХПВ генотипизација и ликвид ПАП цитологија. Мерката директно придонесува кон зголемување на бројот на достапни тестирања и подобрување на пристапот на жените до превентивна здравствена заштита.

Цената за ХПВ генотипизација се намалува од 5.500 на 3.310 денари, односно за 39,8%. Партиципацијата која ја плаќа пациентот се намалува од 550 на 350 денари. Оваа цена важи од 01.05.2026 година.

Цената за Ликвид ПАП цитологија се намалува од 2.200 на 1.250 денари, односно за 43,2%. Партиципацијата се намалува од 250 на 150 денари. Оваа цена важи од 09.06.2026 година.

Конвенционалниот ПАП тест останува на постојната цена од 600 денари, без промена.

Ревизијата на цените е пресметана врз основа на реалните фактурирани услуги во 2025 година. Анализата покажува дека со задржување на истото ниво на финансирање, бројот на достапни тестирања значително се зголемува. За ист финансиски влог значително поголем број жени ќе можат да бидат опфатени со скрининг, вклучително и жени кои досега поради финансиски причини не пристапувале кон овие превентивни прегледи. Така, бројот на ХПВ тестирање се зголемува од 13.466 тестови на 22.375 тестови годишно што е зголемување од 8.909 тестови (+66,2%), а Ликвид ПАП цитологијата се зголемува од 2.427 тестови на 4.271 тест годишно што е зголемување од 1.844 тестови (+76,0%).

Ракот на грлото на матката е малигно заболување кое може успешно да се превенира и лекува доколку се открие навреме. Кога болеста се дијагностицира во рана фаза, стапката на успешно лекување и преживување е значително повисока.

ХПВ тестирањето и цитолошкиот скрининг претставуваат клучни алатки за навремено откривање на преканцерозни промени и рак во ран стадиум, овозможувајќи навремена интервенција и подобри здравствени исходи.

– Со оваа мерка не само што ги намалуваме трошоците за осигурениците, туку создаваме услови значително поголем број жени да бидат опфатени со современи превентивни тестирања. Нашата цел е средствата што ги обезбедува Фондот да се користат поефикасно, а здравствените услуги да бидат подостапни за граѓаните. Раното откривање на болестите спасува животи и затоа вложувањето во превенција останува еден од нашите приоритети – истакна генералниот директор на ФЗОМ, Сашо Клековски.

The post НАМАЛЕНИ ЦЕНИ ЗА ХПВ ТИПИЗАЦИЈА И ЗА ЛИКВИД ПАП ЦИТОЛОГИЈА Повеќе жени ќе имаат пристап до рано откривање на рак на грлото на матката appeared first on plusinfo.mk.

Вештачки колкови чекаат повеќе од 650 пациенти, во три главни јавни здравствени установи има значителен пораст на бројот на интервенциите, а пристапот до операции за замена на колк и колено значително се подобрува – изјави генералниот директор на Фондот за здравствено осигурување Сашо Клековски на денешниот брифинг за новинарите.

Тој подвлече дека има значителен пораст на операциите на колк и колено. Вкупно 4.044 интервенции имало во 2025 година. За 9,9 проценти имало пораст, за периодот 2023-2025 година. Се работело за 14 опфатени јавни здравствени установи. Клековски истакна дека земјава е солидна во замена на колкови, но, во однос на интервенции на замена на колена сѐ уште заостанува зад регионот.

– Овие бројки потврдуваат дека пристапот до операции за замена на колк и колено значително се подобрува. Следува отворање на оперативните блокови на Клинички центар и ГОБ 8 Септември и понатамошен развој на коленската артропластика – нагласи Клековски.

Тој нагласи дека во анализата не се вклучени пациенти од приватните здравствени установи во земјава.

На новинарско прашање зошто се толку долги листите на чекање, Клековски одговори дека пациентите придонесуваат за тоа.

– Да, точно е, листите на чекање се такви какви што се, меѓу другото во 8 Септември и на Клинички, затоа што поединци сакаат да се оперираат кај одреден хирург, а не кај некој кај кого можеби има слободен термин – одговори Клековски.

The post ВО МАКЕДОНИЈА 650 ПАЦИЕНТИ ЧЕКААТ ВЕШТАЧКИ КОЛКОВИ Во 2025 година имало вкупно 4.044 операции на колк и колено appeared first on plusinfo.mk.

Аналитичкиот извештај за болничкото лекување 2023–2025 година на Фондот за здравствено осигурување на РСМ (ФЗОРСМ) покажува стабилен раст на бројот на пациенти, зголемени буџети и постепено зајакнување на капацитетите на здравствениот систем, истакнаа на денешната прес-конференција директорот на ФЗОРСМ Сашо Клековски и заменик-директорот Седат Бислими.

Според податоците, во 2025 година биле лекувани 194.230 пациенти, што е зголемување од 5,1 отсто во однос на 2023 година. Во истиот период, вкупниот болнички буџет пораснал за 24 отсто, достигнувајќи 32,5 милијарди денари.

– Просечното болничко лекување траело малку под 5 дена, го чинело здравствениот систем околу 32 милијарди денари, а просечната сложеност на интервенциите изнесувала 1,55 –  рече Клековски.

Најголем раст на болнички случаи има во две категории – очни болести и болести на мускулно-скелетниот систем, со раст од околу 20 проценти. Тоа, рече, се должи на обидите да се намалат листите на чекање за операции на катаракта, како и за планирани операции на колкови и слично.

Од друга страна, посочи Клековски, има пад од 3 проценти кај хоспитализациите за циркулаторни, односно кардиоваскуларни болести. Треба дополнително да се анализира дали станува збор за тренд на намалување на овие заболувања, што, рече, би било позитивен сигнал.
Забележан е и пад од 7,5 проценти кај хоспитализациите поврзани со бременост и породување, што, потемцира, повторно е одраз на демографските промени.

– Во однос на сложеноста на болничките случаи, хируршките интервенции генерално се издвојуваат по својата комплексност и тие се споредливи со земјите со среден европски развој.
Она што можам да го истакнам е дека имаме напредок во 9 од 12 општи болници, што е за поздравување. Од клиничките болници, најголема сложеност покажува Клиничката болница Штип, а најголем напредок има Клиничката болница Битола. Морам да ја издвојам и ГОБ „8 Септември“, која иако формално е општа болница, со индекс на сложеност близу 2 има ниво споредливо со клиничките центри и нуди значително посложени интервенции – рече Клековски.

Според Извештајот, бројот на болнички случаи расте стабилно — од 184.829 во 2023 година на 194.230 во 2025 година (+5,1 проценти), со пораст кај речиси сите типови здравствени установи, освен кај клиничките болници. Болестите на очите бележат +21,9 проценти повеќе хоспитализации, а заболувањата на мускулоскелеталниот систем +28,9 проценти, што укажува на надоместување на одложените ортопедски интервенции по пандемијата. Хоспитализациите поради кардиоваскуларни заболувања бележат пад од 26.651 на 25.876 случаи (–2,9 проценти) — позитивен сигнал кој укажува на можни подобрувања, рече Клековски.

Договорните буџети со ЈЗУ бележат раст од 24 отсто за две години  милијарди денари, при што најголем апсолутен пораст има кај универзитетските клиники (+33 отсто).

Анализата по установа открива јасна структура во однос на комплексноста на третманите. Тоа е изразено преку Индексот на комплексност на случаи Case Mix Index — ЦМИ, односно  просечната релативна тежина на сите DRG Diagnosis Related Groups случаи во една здравствена установа за одреден период.

На врвот се кардиохируршките болници: ПЗУ „Систина“ — CMI 18,4 и ПЗУ „Филип Втори“ — CMI 15,4, по што следуваат: УК за Хематологија — CMI 9,8, УК за Државна кардиохирургија — CMI 9,1. Кај општите болници, ГОБ „8 Септември“ со CMI 1,95 се издвојува како единствена општа болница со вредност на ниво на клиника и практично функционира како референтен центар за Скопје.Меѓу регионалните болници, Клиничката болница Штип предничи со CMI 1,31, додека Клиничката болница Битола бележи најголем пораст во 2025 година (+0,09).

Според ФЗО, особено значајно е што 9 од 12 општи болници го подобриле својот CMI во 2025 година во споредба со 2024 година. ОБ Куманово има најголем раст (+0,091), а ОБ Струмица за првпат го надминува прагот од CMI 1,0.

– Ова укажува дека регионалните болници постепено преземаат посложени случаи, што претставува позитивен сигнал за децентрализација на здравствената грижа и подобар пристап за граѓаните надвор од Скопје – велат од Фознот за здравствено осигурување.

The post БОЛНИЦИТЕ ЛЕКУВААТ ПОВЕЌЕ ПАЦИЕНТИ, СРЕДСТВАТА ПОРАСНАЛЕ ЗА 24% Анализата на ФЗО за последните 2 години покажува општ раст во здравството appeared first on plusinfo.mk.

Започнува децентрализацијата на добивање третман и терапија за пациентите со мултипла склероза (МС) во три регионални центри, информираше денеска директорот на Фондот за здравствено осигурување, Сашо Клековски, кој присуствуваше на одбележувањето на Денот на мултипла склероза во Скопје.

Од националното Здружение за МС велат дека ова претставува долгогодишно примарно барање на здружението и успешно се имплементира како пилот-програма во три клучни јавни здравствени установи низ државата: ЈЗУ Градска општа болница „8-ми Септември“ – Скопје, ЈЗУ Клиничка болница – Штип (за покривање на Источна и Североисточна Македонија) и ЈЗУ Специјализирана болница за ортопедија и трауматологија „Св. Еразмо“ –Охрид (за Југозападниот регион).

– Директорот на Фондот за здравствено осигурување (ФЗО), д-р Сашо Клековски, потврди дека Фондот максимално излегува во пресрет на зголемените потреби преку одобрување зголемен наменски условен буџет. Клековски со гордост истакна дека ветувањето дадено минатата година на истиот овој ден е во целост исполнето благодарение на макотрпната синергија меѓу ФЗО, Здружението и Клиниката за неврологија. Доколку оваа пилот-фаза ги потврди очекуваните резултати, децентрализацијата ќе се прошири и во други градови со цел терапијата да биде доближена блиску до домот на пациентот, со што ќе се елиминираат исцрпувачките патувања и патните трошоци, наведуваат од националното Здружение за МС.

Претседателката на Националното здружение за МС, Ана Карајанова Димитрушева, која го отвори настанот, упати порака за солидарност, нагласувајќи дека луѓето кои живеат со оваа комплексна состојба во Македонија повеќе не се сами во својата борба.

Во своето обраќање, в.д директорот на ЈЗУ Универзитетска клиника за неврологија, д-р Јован Божиновски, презентираше податоци од клиничката пракса и се осврна на системските напори за модернизација на дијагностиката. Според официјалните евиденции, во нашата земја во моментов живеат околу 2.500 дијагностицирани пациенти со МС.

Трендот на откривање нови пациенти со МС има нагорна линија, што се потврдува со регистрираните 115 новодијагностицирани пациенти во текот на 2025 година. Божиновски објави дека Клиниката е во интензивен процес и напори за набавка на нов апарат за магнетна резонанца (МРИ), кој драстично ќе го скрати времето за поставување дијагноза и евалуација на болеста. Дополнително, буџетот на Клиниката само за набавка на лекови за МС за 2026 година пораснал за дополнителни средства и сега изнесува 451 милиони денари. Ова зголемување овозможува пристап на поголем број пациенти на третман – од 961 пациент во 2025 година, планот за 2026 година опфаќа над 1.020 лица на терапија. Во согласност со светските медицински трендови, речиси 600 пациенти се на третман со високоефикасна модифицирачка терапија, со што директно се спречуваат релапси и долгорочен инвалидитет.

Од националното Здружение на МС посочуваат и дека посебно емотивен и сензитивен дел од настанот беше презентацијата на најновото истражување, спроведено меѓу членките на здружението од страна на д-р Слободанка Бурнеска Саздова од Клиниката за неврологија.

Анкетата, фокусирана на планирањето на семејството кај жените со МС во Македонија, покажа дестимулирачки, но алармантни резултати кои бараат итна општествена акција. Се истакнува дека мултиплата склероза сè уште се доживува како огромна психолошка бариера за бременост, но не поради биолошка неможност, туку исклучиво поради неоправдан страв од влошување на состојбата и изразен дефицит на информации.

Клучни заклучоци од истражувањето за бременост и МС се дека пациентките имаат силна желба за остварување како мајки, но се оневозможени од страв од релапс по породувањето и дека се чувствуваат недоволно информирани.

Како директен и брз одговор на собраните податоци, Здружението официјално промовираше локализирана и испечатена едукативна брошура за планирање семејство кај МС.

Здружението објави дека монументалната зграда на Археолошкиот музеј на Македонија во центарот на Скопје, почнувајќи од вечерва па сè до крајот на неделата, ќе биде целосно осветлена во портокалова боја – официјалниот меѓународен симбол за поддршка на лицата со МС. Организаторите ги повикаа граѓаните деновиве да прошетаат покрај кејот на реката Вардар во знак на симболична поддршка за надминување на бариерите.

The post ТРЕТМАНОТ ЗА МУЛТИПЛА СКЛЕРОЗА ЌЕ БИДЕ ДОСТАПЕН И ВО ШТИП И ВО ОХРИД Обезбеден рекорден буџет за набавка на лековите appeared first on plusinfo.mk.

Повеќе од 1.800 вработени во јавното здравство поднеле тужби против здравствените установи во кои работат, а вкупната вредност на побарувањата достигнала околу 2,18 милиони евра. Според информациите презентирани на денешниот брифинг во Фондот за здравство, тужби се поднесени во 62 од вкупно 108 јавни здравствени установи во државата.

Директорот на ФЗО, Сашо Клековски, изјави дека најголем дел од тужбите се поврзани со неисплатени додатоци на плата – за прекувремена работа, ноќни смени, работа за викенди и празници, бонус плати и јубилејни награди.

– Тужбите претежно произлегуваат од проблеми во примената на Законот за работните односи и колективните договори. Реалниот финансиски товар врз јавното здравство може да биде значително повисок, бидејќи голем дел од постапките сè уште не се завршени – рече Клековски.

Највисок износ на тужбени барања има Клиничката болница – Битолаa со 16,8 милиони денари, додека болницата во Куманово има најмногу тужители – дури 317 вработени.

Од ФЗО предупредуваат дека бројот на тужби може дополнително да расте. Како пример беше посочен Јавниот центар Кратово, каде се најавени уште околу 65 нови тужби во текот на 2026 година, со побарувања од над 3,5 милиони денари.

Фондот денеска ја презентираше и анализата за платите во јавното здравство, која опфаќа 18.872 вработени во 12 типа здравствени установи за декември 2025 година. Според податоците, просечната вкупна нето-плата во јавното здравство изнесувала 50.039 денари, додека просечната основна плата била 37.660 денари.

Најголем удел на додатоци во платите имале установите што работат во непрекинат 24-часовен режим.

– Универзитетската клиника за државна кардиохирургија има 40,66 проценти удел на додатоци, Клиничка болница Штип 37,83 проценти, а Институтот за радиологија 37,67 проценти. Од друга страна, превентивните установи и поликлиниките имаат многу помал удел бидејќи работат без дежурства – посочи Клековски.

Тој откри дека Министерството за здравство веќе формирало работна група заедно со ФЗО и синдикатите, со цел да се расчистат нејаснотиите околу исплатата на додатоците и да се намали бројот на судски спорови.

– Наш став е дека сè што им следува на вработените треба да биде исплатено, но не смеат да се оставаат сиви зони за неетичко постапување – нагласи директорот на ФЗО.

Меѓу препораките што беа посочени се побрза исплата на правосилните пресуди за да не растат каматите, централен регистар за следење на судските предмети и зајакнување на правните служби во болниците каде има најмногу тужби.

На брифингот беше отворено и прашањето за недостигот на медицински кадар. Клековски призна дека најкритична е состојбата со анестезиолозите, кои, како што рече, „речиси ги нема“ во дел од јавните здравствени установи.

Воедно, тој информираше дека со одлука на Владата добил четиригодишен мандат како директор на ФЗО, додека за заменик-директор е назначен Седат Бислими.

The post НАД 1.800 ЗДРАВСТВЕНИ РАБОТНИЦИ ГО ТУЖАТ СИСТЕМОТ Побаруваат повеќе од 2 милиони евра за дежурства и за бонуси appeared first on plusinfo.mk.

Фондот за здравство бара решение за техничките проблеми при исплатата на породилното отсуство, дел од проблемите се од помалите фирми кои не прават разлика помеѓу пријавувањето на патолошка бременост или породилното отсуство, вели директорот на Фондот за здравствено осигурување, Сашо Клековски.

– Бараме техничко решение како тоа да се надмине, меѓутоа за разлика од другите исплати, овие се фреквентно променливи и некогаш процесите не се следат соодветно. Дел од проблемите што настануваат се, посебно од помалите фирми кои не прават разлика помеѓу пријавувањето на патолошка бременост и породилен надомест. Разликата е во тоа што за едните надоместот е 70, а за другите е 100 проценти. А за тоа мора да се поднесе ново барање. Само овој месец имавме 10-тина случаи на жалби и констатиравме дека е побаран надомест за патолошка бременост, а не е испратен документ дека родилката е на породилно отсуство. Работиме на тоа, ние постојано се извинуваме за непријатностите, меѓутоа се трудиме да најдеме техничко решение, за да го олесниме процесот и на пријавување и на исплата – објаснува Клековски.

Системот за исплата на породилните боледувања е таков каков што е, додаде тој.

Посебно има проблеми со почетните и со завршните месеци, бидејќи и првиот и последниот месец поминуваат низ процес на верификација во подрачните служби на Фондот и таа верификација сè уште се врши рачно.

– Во основа, подрачните служби ги верификуваат породилните отсуства, ги испраќаат во дирекцијата во Скопје каде што се исплаќаат боледувањата. Како што пристигнуваат породилните и другите долги боледувања, ние така ги исплаќаме. Само минатиот месец имаме исплатено 511 милиони денари за боледувања. Минатата година исплативме 72 милиони евра за породилни боледувања – рече Клековски, кој денеска присуствуваше на промовирањето на новата опрема во прилепската болница.

The post ФЗОМ БАРА РЕШЕНИЕ ЗА ПРОБЛЕМИТЕ ПРИ ИСПЛАТА НА ПОРОДИЛНОТО БОЛЕДУВАЊЕ Помалите фирми не прават разлика меѓу патолошка бременост и породилно отсуство appeared first on plusinfo.mk.

Директорот на Фондот за здравствено осигурување Сашо Клековски вечерва откри дека со германска болница во Фленсбург каде порано биле испраќани случаи за трансплантација на матични клетки се водат 11 спорови пред германските судови.

– Судските спорови на Фондот се стари и врзани се една болница во Фленсбург во Германија, каде во подамнешно минато се испраќани најчесто хематолошки случаи за трансплантација на матички клетки. Бидејќи тоа било доста редовна пракса во тоа време, не се собирале меѓусебните сметки и во еден момент Фондот прекинува да испраќа на лекување во таа болница и настануваат разлики. Со таа болница се водат 11 судски спорови во германските судови, ние ги очекуваме исходите – рече Клековски во вечерашното интервју за емисијата „Вин-Вин“ на телевизија Телма.

Минатата година имало околу 290 случаи на лекување во странство за што биле издвоени седум милиони евра.

Според него, она што недостасува во лекувањата во странство е добивање на завршно мислење од конзилиумот што ги испратил пациентите, како фидбек како е направена интервенцијата.

Во однос на можните злоупотреби со дежурствата на што претходно укажаа и министерот за здравство Азир Алиу и премиерот Христијан Мицкоски информирајќи дека лекари во јавното здравство земале месечно и до 10.000 евра плата, Клековски рече дека одговорност мора да има.

– Не може еден доктор да биде во иста ноќ дежурен и во Скопје и во Битола. Одговорност мора да има. Не може сите вработени во една установа да имаат ист број на прекувремени часови за да се постигне некое посакувано ниво на плата. Не може цел ден ништо да не работите во сала, а да се нарекувате хирург – вели Клековски.

The post ФЗО СПОРИ СО ГЕРМАНСКА БОЛНИЦА ЗА СТАРИ СЛУЧАИ Фалат сметките за трансплантации во Фленсбург appeared first on plusinfo.mk.

Тројца актуелни или поранешни директори на јавни здравствени установи вратија по 500.000 денари или вкупно 1,5 милиони денари, што ги зеле врз основа на неправилна пресметка на плата. Ова денеска го истакна генералниот директор на Фондот за здравствено осигурување, Сашо Клековски, кој рече дека покрај медицинската контрола нивна континуирана активност е и финансиската контрола.

– Во три случаи актуелни или поранешни директори ги вратија погрешно пресметаните приходи од околу милион и пол денари – потенцира Клековски.

Одговарајќи на новинарско прашање за тоа дали очекува и други да вратат пари, рече „сите заедно мора да изградиме систем каде меѓусебно ќе се почитуваме“.

– На едната страна дека ќе бидеме подобро платени и тоа ќе биде вреднувано легално со 33 отсто зголемени капитации за матичните доктори или кумулативно претходните две зголемувања во јавното здравство беа 17 отсто. Сега од март има уште едно зголемување. Праќаме јасен сигнал до сите здравствени работници дека ќе ја вреднуваме работата и платите ќе одат нагоре, меѓутоа од друга страна очекуваме фер однос и од другата страна и да престанат злоупотребите на додатоците. Таа комуникација ја имаме и со јавните здравствени установи и со синдикатите – посочи Клековски.

Тој најави дека постојано ќе комуницираат за да се придвижи состојбата во која трудот не се вреднувал, па некои луѓе сами си со наплаќале според тоа што сметале дека им следува.

– Не може да дозволиме да има самовреднување и самонаплата. Ќе има правила кои ќе бидат фер и ќе се бара да се придржуваме до нив – додаде Клековски.

The post ТРОЈЦА ДИРЕКТОРИ НА ЗДРАВСТВЕНИ УСТАНОВИ ВРАТИЛЕ ПО 500.000 ДЕНАРИ Ги зеле врз основа на неправилна пресметка на плата appeared first on plusinfo.mk.

Во моментов во Македонија има 1.836.667 осигуреници, од кои 470.774 осигуреници или секој четврти (25%) се лица кои не остваруваат приходи, a за кои осигурувањето го покрива државата, соопшти Фондот за здравствено осигурување (ФЗО) кој денеска објави најнови податоци за бројот на осигуреници во земјава.

– Македонија е дефинирана како социјална држава, а согласно Законот за здравствено осигурување постојат повеќе основи за задолжително здравствено осигурување, со што системот е поставен инклузивно и социјално одговорно. Обезбедено е здравствено осигурување и за лицата кои не остваруваат приходи и не можат да се осигураат по ниту еден друг основ – при што трошоците за нивното осигурување ги покрива државата преку програма во Министерството за здравство. Тезите дека одредени категории граѓани се оставени без здравствена заштита не се точни – рече директорот на Фондот Сашо Клековски.

Во моментот се работи на три реформи на здравственото осигурување. Работна група на Фондот, Министерството за финансии, Министерството за здравство и УЈП, работи на критериумите за лицата кои не остваруваат приходи, каде е фокусот на две групи проблеми: осигурениците што непосредно останале без работа и осигурениците кои имаат непријавени приходи (сива економија, работа во странство). Владата, Фондот и УНИЦЕФ ги анализираат потребите и можностите за независно здравствено осигурување на малолетни лица до 18 години.

Во финална фаза е подготовката на ново законско решение од страна на Министерството за социјална политика, демографија и млади, со активно учество на Фондот за здравствено осигурување. Со ова законско решение ќе се опфатат лицата кои работат во флексибилни форми на ангажман.

Број на осигуреници по основ на осигурување

Лицата што минатата година имале под 293.000 денари приходи, кои во последните два месеци имале помалку од 48.000 денари, да добијат бесплатно здравствено осигурување, а лицата што имале повисоки приходи од овие да плаќаат придонес на основицата 50 отсто од просечната плата, а тоа е 2.593 денари месечно, да добијат здравствено осигурување.

– Точно е дека немаме категории што не се опфатени, но има проблеми со здравственото осигурување во одделни случаи, но ние работиме на тоа. Првин работната група на Министерството за здравство, Министерството за финансии, Управата за јавни приходи и Фондот, кои ги гледаат овие критериумите за тие 470.000 лица. Тука имаме два типа проблеми, прво, за лицата што непосредно дале или добиле отказ и како да се обезбеди транзицијата и, второ, за лицата што остваруваат нерегистрирани приходи, односно работат во сивата економија во земјата или кои приходите ги остваруваат во странство. Овие лица не би требало да бидат осигурени со бесплатно здравствено осигурување – рече Клековски.

Одговарајќи на новинарско прашање, тој посочи дека можно е да има починати лица, кои се носители на здравствено осигурување, и преку нив да се осигурени други членови на семејството.

– Ние координираме со матичните книги како да ја подобриме комуникацијата за прочистувањето на здравственото осигурување од вакви лица да биде редовно. Втората група, каде што е можно да имаме непотребно здравствено осигурување, е кај лицата што не остваруваат приходи – додаде Клековски.

The post СЕКОЈ ЧЕТВРТИ ОСИГУРЕНИК НЕ ОСТВАРУВА ПРИХОДИ Во Македонија има 1.836.667 осигуреници, од кои 415.183 се пензионери appeared first on plusinfo.mk.

Фондот за здравствено осигурување (ФЗО) денеска апелираше до сите јавни здравствени установи што имаат магнетна резонанца да ја проверат снабденоста со хелиум, бидејќи тоа е една од суровините што поскапува и ќе биде тешко да се набавува поради војната во Иран.

Цената на овој гас веќе скокна за 30 отсто на европскиот пазар.

– Без хелиум не можат да работат магнетните резонанци. Побаравме да се направат навремени проверки на состојбите на магнетните резонанци во земјата дури уште има достапен хелиум на европскиот пазар – рече директорот на Фондот Сашо Клековски денеска на прес конференција.

The post ЗДРАВСТВЕНИТЕ УСТАНОВИ ИТНО ДА ЈА ПРОВЕРАТ СНАБДЕНОСТА СО ХЕЛИУМ Без овој гас нема да може да се прават магнетнти резонанци appeared first on plusinfo.mk.