Европската Унија е подготвена од јули да почне преговори за сите области од пристапниот процес со Украина и со Молдавија, изјави денеска еврокомесарката за проширување Марта Кос, пред почетокот на состанокот на министрите за надворешни работи на ЕУ во Луксембург.

Во врска со денешното отворање на суштинските пристапни преговори со Киев и со Кишињев, Кос оцени дека тоа е првиот голем чекор откако двете земји добија кандидатски статус пред 3 години.

– Беше време да го направиме тоа – рече таа.

Според Кос, до крајот на годинава може да завршат пристапните преговори со Црна Гора.

– Во последните месеци постигнавме повеќе во процесот на проширување на ЕУ отколку во изминатите 15 години – нагласи еврокомесарката.

Високата претставничка на ЕУ за надворешна политика и безбедност, Каја Калас соопшти дека на денешниот состанок е поканет и министерот за надворешни работи на Ерменија.

Според неа, Ерменија е изложена на сè поголем притисок од Москва, а ЕУ разгледува начини за поддршка на властите во Ереван.

Калас оцени дека синоќешните руски воздушни напади врз Украина, при кои беше погоден верски објект што се наоѓа на листата на светско наследство на УНЕСКО, претставуваат воено злосторство.

Таа потврди дека Унијата работи на дополнително проширување на санкциите против Русија.

Калас додаде и дека, според правните експерти на ЕУ, постои начин да се спроведе иницијативата за забрана за влез во Унијата на руските војници кои учествувале во војната против Украина.

The post ЕУ ЌЕ ГИ ОТВОРИ СИТЕ ПОГЛАВЈА ОД ПРЕГОВОРИТЕ СО УКРАИНА И СО МОЛДАВИЈА Унијата ќе ѝ даде поддршка и на Ерменија appeared first on plusinfo.mk.

Новите заклучоци на Европскиот совет за Украина на денешниот состанок во Брисел ги потпишаа 25 земји-членки, но не ги потпишаа Унгарија и Словачка, кои со тоа продолжуваат да ја блокираат финансиската помош за Украина.

Како што објави Гардијан, новиот документ ја потврдува поддршката за Киев од страна на лидерите на ЕУ, како и поддршката за мировните преговори што би ги почитувале границите на Украина и би обезбедиле безбедносни гаранции, но не вклучува дефинитивна одлука за исплата на заем за Украина во вредност од 90 милијарди евра, туку само намера да почне исплатата во април.

Документот содржи и намери за „брзо усвојување“ на 20-от пакет санкции против Русија, но за ова не е донесена дефинитивна одлука.

Пред денешната седница на Европскиот совет, унгарскиот премиер Виктор Орбан изјави дека земјата е подготвена да ѝ помогне на Украина само кога ќе ја добие својата нафта, чија испорака Киев ја блокира.

На новинарско прашање за нафтоводот „Дружба“, кој е надвор од употреба од крајот на јануари и за деблокирањето на кредитите за Украина, Орбан рече рече дека нема да поддржи никаква одлука во корист на Украина сè додека нафтоводот е блокиран.

– Чекаме нафта, сè друго се бајки. Веруваме само во факти. Нафтата треба да доаѓа во Украина. Дотогаш, не можеме да поддржиме никаков проукраински предлог – рече Орбан.

The post ШТОМ НЕМА НАФТА ВО „ДРУЖБА“ НЕМА НИ ПАРИ ЗА УКРАИНА Унгарија и Словачка го блокираат заемот од 90 милијарди евра за Киев appeared first on plusinfo.mk.

Европа не е вклучена во војната во Иран, оти тоа не е војна на Европа, но во залог се европските интереси, рече денеска високата претставничка на ЕУ за надворешна работи и безбедност Каја Калас.

– Политичките цели на таа војна се нејасни. Војните лесно почнуваат и е многу тешко да бидат прекинати – истакна Калас по денешната средба на министрите за надворешни работи на земјите-членки на ЕУ во Брисел.

Таа посочи дека на средбата се разговарало како Ормускиот Теснец да остане отворен за пловидба.

Калас посочи и дека ЕУ денеска воведе санкции против 16 лица и 3 организации кои ги смета за одговорни за сериозно кршење на човековите права во Иран при задушување на протестите во земјата на почетокот од годината.

На денешниот состанок во Брисел се разговараше и одлуката на САД за привремена суспензија на санкциите за руската нафта.

– ЕУ ги задржува своите санкции. Ако сакаме војната во Украина да заврши, Москва мора да има помалку, а не повеќе пари за водење војна. Донесувањето одлуки за воведување нови санкции против Русија и за обезбедување заем за Украина од 90 милијарди евра е одамна задоцнето – посочи Калас, додавајќи оти европските министри за надворешни работи потврдија дека Украина останува врвен безбедносен приоритет на ЕУ.

The post ВОЈНАТА ВО ИРАН НЕ Е ВОЈНА НА ЕВРОПА, НО ВО ЗАЛОГ СЕ ЕВРОПСКИТЕ ИНТЕРЕСИ Калас порача дека не се јасни политичките цели на тој конфликт appeared first on plusinfo.mk.

Украинскиот претседател Володимир Зеленски го повика Доналд Трамп да заземе „јасна позиција“ за да го запре Владимир Путин и да ја заврши војната во Украина. Во ексклузивно интервју за Скај њуз од Претседателската палата во Киев, Зеленски рече дека единствениот начин да се стави крај на конфликтот лежи во дефинирани безбедносни гаранции, за кои е потребна храброста на Трамп, објави медиумот.

Зеленски изрази надеж дека британскиот премиер Кир Стармер ќе ја објасни иднината на Украина за време на државната посета на американскиот претседател на Велика Британија оваа недела.

– Навистина се надевам дека тој (Стармер) ќе може да има многу специфична дискусија за безбедносните гаранции на САД за Украина – рече тој.

Пред да ја завршиме војната, навистина сакам сите договори да бидат во сила, вели Зеленски.

– Сакам… да имаме документ што е поддржан од Соединетите Држави и од сите европски партнери. Ова е многу важно. За да се случи ова, ни треба јасна позиција од претседателот Трамп – рече тој.

Украинскиот претседател, исто така, го повика американскиот лидер да преземе „силни лични чекори за да го запре Путин“. Неговиот апел доаѓа откако Трамп ги повика сојузниците во НАТО да престанат да купуваат руска нафта и воведе царини за Кина, за да извршат притисок врз Москва.

– Верувам дека САД се доволно силни за да донесат свои одлуки. Верувам дека Доналд Трамп може да ни даде системи за воздушна одбрана во доволни количини, а САД имаат доволно од нив – рече тој.

Зеленски додаде дека е уверен оти Вашингтон може да воведе санкции што ќе ѝ наштетат на руската економија.

– Сигурен сум дека САД можат да применат доволно санкции за да ѝ наштетат на руската економија, плус Донал Трамп има доволно моќ да го натера Владимир Путин да се плаши од него, рече тој, потсетувајќи дека Европа веќе воведе 18 пакети санкции.

– Сега недостасува силен пакет санкции од САД – додаде тој.

Зеленски, исто така, ги даде своите коментари во контекст на неодамнешниот самит меѓу Трамп и Путин во Алјаска, кој остро го критикуваше. Тој рече дека Трамп „му дал многу на Путин“ и дека „Путин требало да плати повеќе“ за состанокот.

– Верувам дека доколку беше трилатерален состанок (со вклучување на Украина), ќе имавме некои резултати – додаде тој.

По веста дека британските борбени авиони пресретнале руски дрон над Полска, Зеленски предупреди дека Путин ја тестира силата на Северноатлантската алијанса.

– Тој го тестира НАТО. Тој сака да види за што е подготвено НАТО, за што се способни, дипломатски и политички, и како локалното население ќе реагира на тоа – рече Зеленски.

Според него, Москва испраќа уште една порака: „Не се осмелувајте да ѝ дадете на Украина дополнителни системи за воздушна одбрана, бидејќи можеби ќе ви бидат потребни и вам“.

The post „ЗА КРАЈ НА ВОЈНАТА ПОТРЕБНА Е ХРАБРОСТА НА ТРАМП“ Зеленски го повика претседателот на САД да даде јасни безбедносни гранции за Украина appeared first on plusinfo.mk.

Во рок од две недели ќе знае дали е можен напредок во напорите за ставање крај на војната во Украина, рече денеска американскиот претседател Доналд Трампи. Тој повторно ја отвори можноста за воведување санкции врз Москва.

– Ќе видиме што ќе се случи. Мислам дека за две недели ќе знаеме во која насока одиме – рече Трамп на прес-конференција во Овалната соба.

Тој додаде дека по тие две недели ќе донесе одлука дали да воведе „масовни санкции“ или не.

Трамп рече дека не е задоволен од ниту еден аспект од мировните напори и дека има многу омраза меѓу завојуваните страни.

Истакна дека не би сакал да биде присутен на евентуална средба меѓу претседателите на Украина и на Русија, Володимир Зеленски и Владимир Путин.

– Ќе видиме дали Путин и Зеленски ќе соработуваат. Знаете, тие се како масло и оцет. Тие навистина не се сложуваат од очигледни причини, но ќе видиме. Ќе видиме дали ќе морам да бидам таму, што не би ми се допаднало – рече Трамп, додавајќи дека посакува Зеленски и Путин да одржат состанок сами.

Претходно, украинскиот претседател Володимир Зеленски изјави дека Русија прави сè што е во нејзина моќ за да спречи средба меѓу него и рускиот претседател Владимир Путин.

The post ТРАМП НЕ САКА ДА ПРИСУСТВУВА НА ЕВЕНТУАЛНИОТ СОСТАНОК МЕЃУ ПУТИН И ЗЕЛЕНСКИ За две недели ќе се знае дали е можен напредок во преговорите за Украина appeared first on plusinfo.mk.

– Се разбира, ова ни отвора проблеми со нашите руски пријатели за сè, од политички, до сè друго. Која е целта? Можеби треба да им наметнеме санкции ? И сега што? По 3 години да излезам да кажам, еве воведуваме санкции против Русите? Страшна ситуација. Не е реално. Во секој случај, не знаеме до кога ќе ни остават рок. Не може од денеска, па сега убијте се Срби. Треба да видиме што ќе пишува, кој ќе биде рокот и да видиме што мислат со тоа. Па да видиме дали руската сопственост може да се сведе само под 50%, па да преговараме со Русите, не знам, но тие имаат 56 отсто или нешто, за да го купиме тој дел. Или не смееме  воопшто или не знам што сакаат да кажат – рече Вучиќ.

Имаме разговор и за гасниот аранжман, додаде Вучиќ, би требало да разговараме со Русите за гасниот аранжман.

– Значи, се договоривме за оваа зима и добро функционира. Штом видов дека Бугарите зборуваат нешто за тоа, разбрав во кој правец се оди. Значи, сега ќе видиме. Треба да го почекаме завршниот чин, да ја видиме содржината на санкцијата, да разговараме со Американците. Мора да ни остават одреден рок. Дали тој рок е 10 дена, 15 дена, месец, 2, 3 или 6? немам поим. Тие мора да ни остават одреден рок, но, никој од нас не може да си игра – изјави Вучиќ.

Ова е геополитичка одлука, додаде тој.

– Сега гледате зошто ни требаше и зошто инсистирав да се изгради нафтовод до Унгарија. Ќе најдеме решение. Момци, ќе најдеме решение. Мора да разговараме и со Американците и со Русите што да правиме – изјави Вучиќ.

Што и да правиме, тешко е и нема добри решенија, додаде српскиот претседател.

– Таа одлука е пресметана да нè принуди да воведеме санкции за Русите. А јас тоа не можам да го кажам. И не ми се верува дека тие сега проценуваат дека ќе ги победат Русите, со тоа што во геополитичките разговори ќе имаат мала мала компанија од Србија – вели Вучиќ.

The post СТРАШНА СИТУАЦИЈА, АМЕРИКА ЌЕ ВОВЕДЕ ЦЕЛОСНИ САНКЦИИ ЗА „НАФТЕНАТА ИНДУСТРИЈА НА СРБИЈА“ Сакаат да нè натераат да ѝ воведеме санкции на Русија, ама јас не можам да го кажам тоа appeared first on plusinfo.mk.

Од велешката фабрика „БРАКО“, најголемиот производител на жица во Југоисточна Европа, велат дека се соочуваат со проблем само во една програма – производството на жица, додека високотехнолошките производи, како возилата за чистење, медицинска опрема и големи метални конструкции, работат одлично.

– Српската и турската готова жица и производи од жица се продаваат на пазарот по цена која е пониска и од самата наша суровина која ние ја купуваме за да произведеме жица. Тие и натаму купуваат од Русија, ние мораме да купуваме од Италија, Грција и од Босна, од тамошните железари, кои се поскапи. Со таква конкуренција не може да се борите. Во ‚БРАКО’ веќе е неисплатливо да се произведува жица, и ќе продолжиме да произведуваме само високотехнолошки производи со висока додадена вредност – вели Орце Давчев од БРАКО, кој е и претседател на Здружението за метална и електро индустрија при Стопанската Комора.

Тешкотии поради затворање на Русија како извор на евтина метална суровина имаат и во фабриката за цевки „Металопромет“ од Струмица. Од таму велат дека се обидуваат да го реорганизираат производството, да ги намалат фиксните трошоци и да се зголеми продуктивноста на вработените, за да се компензира разликата во набавна цена на поскапата суровина.

– Разговараме меѓу нас во овој дел на индустријата, сите имаме потешкотии, но тоа се државни санкции, на европско ниво и државата мора да се придржува до нив. Но, ние имаме сознанија дека има железари во Европа кои и натаму купуваат руска суровина, и покрај санкциите, и тоа е практично нелојална конуренција. А од нас на европскиот пазар се бара да дадеме изјава дека нашите производи немаат руско потекло, има квоти за некои производи од Македонија, како што е жица, и се бараат CO2 сертификати – велат од компанијата „Металопромет“.

Ацо Поповски од АД „Железник“ од Демир Хисар, произведувач на метални машински елементи, смета дека сите фабрики во Македонија се погодени од неможноста да дојдат до поевтина суровина: од Русија поради санкциите, а од Украина поради војната на нејзината територија.

– Сите сме во истиот проблем, а сме поврзани едни со други. Нашите клиенти бараат да платат после 90 дена, а ние не можеме да кажеме цена од сега за по три месеци, затоа што цените се менуваат, суровините се качуваат. Ние, на пример, купуваме отпадно железо од ‚БРАКО’ за преработување. Ако тие купиле поскапа суровина, и отпадот ќе биде поскап – вели Петровски од АД „Железник“, кој е и претседател на Здружението за металургија при Стопанската Комора.

Од македонската метална индустрија велат и дека проблем е тоа што дел од конкуренцијата е лоцирана на море и имаат пристап на пристаништа како Драч и Солун, поради што транспортните трошоци им се помали, во споредба со камионскиот транспорт кој сочинува значаен дел цената на суровината, кој за нас е единствено достапен при недостиг на железница, а проблем направија и квотите за извоз во ЕУ.

Македонските фабрики се соочуваат и со недостиг на работна сила, пред се заварувачи и оператори на ЦНЦ машини, и се повеќе се одлучуваат за увоз на работници од Пакистан, Шри Ланка и други земји.

The post САНКЦИИТЕ КОН РУСИЈА ПОЧНАА ДА НИ СЕ УДИРААТ ОД ГЛАВА Недостига евтината руска суровина за македонската метална индустрија appeared first on plusinfo.mk.

Конфликтот во Појасот Газа досега само умерено влијаеше на цената на нафтата, забележуваат аналитичарите, објаснувајќи го скокот на цените на проценката на Организацијата на земјите извознички на нафта (ОПЕК) за падот на залихите на крајот на годината.

„Чувството исто така се подобри откако ОПЕК објави дека очекува залихите на сурова нафта да се намалат за 3 милиони барели дневно во овој квартал. Проценката не ги зема предвид новите можни прекини во снабдувањето поради војната меѓу Израел и Хамас“, посочува еден од нив.

ОПЕК одделно извести дека барел нафта од нејзините членки во четвртокот паднал за 46 центи на 89,43 долари.

Инаку, цените на нафтата скокнаа над 89 долари на меѓународните пазари во петокот, откако САД ги воведоа првите казни за сервисирање на руски пратки што ја надминуваат ценовната граница, поттикнувајќи ја загриженоста за снабдувањето. На лондонскиот пазар цената на барелот во петокот попладне беше повисока за 3,30 долари од вчерашното затворање на трговијата и изнесуваше 89,30 долари. Речиси исто толку поскапе и цената на барелот на американскиот пазар, каде се тргуваше по 86,23 долари.

Пазарите беа потресени на крајот на неделата од американските санкции за сопствениците на танкери кои носат руски барели со цени над 60 долари. Ограничувањето на цените беше воспоставено на ниво на групата Г-7 со цел да се намалат приходите на Русија од продажбата на нафта и индиректно, капацитетот за финансирање на војната во Украина. Русија е втор по големина производител на нафта во светот и главен извозник, а построгите контроли на САД врз нејзините испораки би можеле да го намалат снабдувањето.

Во сабоптата американското Министерство за финансии го воведе првиот сет санкции против две странски бродски компании кои испорачуваа руска нафта со кршење на ценовната граница од 60 американски долари, која Западот ја воведе минатата година, јавија агенциите. Компаниите под санкции се регистрирани во Обединетите Арапски Емирати и во Турција. И двете компании се потпираа на американски даватели на услуги.

Американските казнени мерки се совпаднаа со конфликтот на Блискиот Исток, клучен регион за производство на нафта, по упадот во Израел од страна на исламистичката палестинска милитантна група Хамас од Појасот Газа и одговорот на израелските вооружени сили.

Палестина и Израел не можат значајно да придонесат ниту на страната на понудата, ниту на страната на побарувачката на сурова нафта, но она што е важно е што станува збор за регион кој е многу запалив и во кој и најмала искра може да предизвика голем пожар. Не така одамна и конфликтот во Сирија се одрази на цената на суровата нафта, бидејќи целиот регион е логистички важен, објаснуваат аналитичарите.

The post ЌЕ СЕ ОДРАЗИ ЛИ КОНФЛИКТОТ ВО ГАЗА ВРЗ ЦЕНАТА НА СУРОВАТА НАФТА? Ако регионот се втурне во војната, сѐ е можно! appeared first on plusinfo.mk.