„Не знаат како да потпишат ненуклеарен договор. Подобро би било наскоро да се вразумат“.

Вака напиша шефот на САД на својата социјална мрежа и објави монтирана слика на која држи руже со натпис „Го нема веќе доброто момче“.

Објавата доаѓа во време кога цената на нафтата порасна од 112 на 114 долари за барел што ги подгрева стравовите од економска криза.

Иран ги обвини САД за „пиратство“ и заплена на бродови, со најава за можен воен одговор од страна на Исламската револуционерна гарда (ИРГЦ).

Западните медиуми пишуваат дека стратегијата на Доналд Трамп е долгорочна економска блокада на Иран.

Во меѓувреме, Израел пак гаѓaше цели во Јужен Либан.

The post ГО НЕМА ДОБРОТО МОМЧЕ, ВЕЛИ ТРАМП „Иран да се опамети, не знае да потпише договор“ appeared first on plusinfo.mk.

Иран остро возврати на заканите од американскиот претседател Доналд Трамп дека земјата ќе биде „вратена во камено доба“. Во Техеран порачаа дека нивната цивилизација трае илјадници години и дека нема да биде скршена со воени закани.

Командантот Маџид Мусави директно ја нападна реториката на САД и ја нарече „холивудска илузија“, додавајќи дека Америка ги испраќа своите војници во смрт, а не ја загрозува Иранската држава.

„Се заканувате на цивилизација стара 6 милениуми“

– Со само 250 години историја, вие се заканувате на цивилизација што постои повеќе од шест милениуми – порача Мусави.

Тој нагласи дека Иран е подготвен да ја брани својата држава и дека ваквите закани нема да останат без одговор.

„Луди изјави“

Портпаролот на претседателот Масуд Пезешкијан оцени дека изјавите на Трамп се „луди“.

– Трамп се вмеша во луди изјави – рече Елиас Хазрати.

Во Техеран тврдат дека ваквата реторика само го зајакнува единството во земјата.

„Не знаете каде произведуваме оружје“

Портпаролот на иранската Револуционерна гарда испрати директна порака:

– Центрите за кои мислите дека сте ги таргетирале се незначителни, а нашето стратешко воено производство се одвива на локации за кои немате знаење и никогаш нема да стигнете – рече Ебрахим Золфагари.

Дополнително, иранските власти тврдат дека земјата има целосна контрола врз Ормускиот теснец и дека е подготвена за секое сценарио.

Трамп со закани за „камено доба“

Трамп претходно во своето обраќање во рече дека војната ќе продолжи сè додека на биде отворен Ормускиот Теснец. Притоа тој најави дека во следните 2 до 3 недели САД „силно ќе го удрат Иран“ и дека операцијата треба да биде брза.

– Ќе ги вратиме во камено доба, каде што им е местото – порача американскиот претседател.

The post ИМАТЕ 250 ГОДИНИ ИСТОРИЈА, А СЕ ЗАКАНУВАТЕ Џабе гаѓате, не знаете каде е оружјето, му порача Иран на Трамп appeared first on plusinfo.mk.

Израелскиот премиер Бенјамин Нетанјаху изјави дека Израел и САД се на половина пат во војната против Иран. Тој одби да даде временска рамка за крајот на конфликтот.

– Секако сме на половина пат. Но, не сакам да поставувам временска рамка – рече Нетанјаху.

Тој појасни дека проценката се однесува на постигнувањето на воените цели, а не на времетраењето на војната.

Нетанјаху тврди дека израелските и американските сили убиле илјадници припадници на Иранската револуционерна гарда. Според него, операциите се блиску до уништување на индустријата за оружје.

– Целата индустриска база, сè, фабриките, нуклеарната програма, сè уништуваме – рече тој.

САД и Израел ја започнаа војната на 28 февруари 2026 година. Американскиот претседател Доналд Трамп првично најави дека операциите ќе траат 4 до 6 недели.

Американскиот државен секретар Марко Рубио изјави дека војната ќе трае уште неколку недели. Во меѓувреме расте противењето во американската јавност и цените на нафтата бележат раст.

Нетанјаху изјави дека падот на иранскиот режим не е непосредна цел.

– Она што го правиме е слабеење на нивната војска, нивните ракети и нивните нуклеарни капацитети, но и нивно слабеење одвнатре – рече тој.

Аналитичарите предупредуваат дека тврдењата за нуклеарна закана се контроверзни. Меѓународната агенција за атомска енергија наведува дека нема докази за активна програма за нуклеарно оружје.

The post НА ПОЛОВИНА ПАТ СМЕ ДО ЦЕЛТА ВО ВОЈНАТА Нетанјаху одбива да даде рок за крај appeared first on plusinfo.mk.

Иран одговори на американскиот мировен план од 15 точки со свои барања кои вклучуваат затворање на сите воени бази на САД на Блискиот Исток и наплата за премин низ Ормускиот Теснец, објави „Волстрит Џурнал“.

Покрај затворањето на базите во регионот на Заливот, Техеран бара отштета за нападите врз земјата, гаранции дека војната нема повторно да започне, прекин на израелските напади врз Хезболах и укинување на сите санкции. Иран, исто така, инсистира на задржување на својата балистичка програма без никакви ограничувања. Американски официјален претставник ги опиша овие барања како „смешни и нереални“.

Според извештаите на Аксиос, во Техеран постои голема недоверба бидејќи Иран двапати беше нападнат додека води разговори со администрацијата на Трамп. Додека Трамп тврди дека во тек се продуктивни разговори, Техеран негираше дека имало комуникација.

„Може, ама прво да се координираат со нас“

Од друга страна, во вторникот Иран ги известил Обединетите нации за нови услови за, како што вели, непријателските бродови кои минуваат низ Ормускиот Теснец. Бродовите ќе можат да поминат ако прво се координираат со иранските власти, се вели во писмо на Иран до ОН и до сите 175 членки на Меѓународната поморска организација.

„Условот е тие да не учествуваат или да не поддржуваат агресија против Иран и целосно да ги почитуваат објавените безбедносни прописи“, се вели во писмото.

„Не може да се сметаат за пријатели“

За бродови кои нема да можат да се квалификуваат како невини или пријателски се споменати бродовите на САД и на Израел, „како и на другите учесници во агресијата“.

Со други зборови, бродови кои не се сметаат за непријателски и не поддржуваат воени дејства против Техеран ќе можат да поминуваат.

„Бродовите ќе мора да ги почитуваат иранските безбедносни прописи и да ја координираат пловидбата со надлежните власти“, се додава во соопштението.

Пораката доаѓа во време кога американско-израелската војна против Иран речиси го запре преминувањето на околу една петтина од светската нафта и течен природен гас низ теснецот, предизвикувајќи значителни прекини во глобалните испораки, пишува Ројтерс.

„Ги презедовме сите мерки“

Во писмото се наведува дека Иран „презел неопходни и пропорционални мерки за да ги спречи агресорите и нивните поддржувачи да го искористат Ормускиот теснец за да спроведат непријателски операции против Иран“.

Претходно беа објавени и 15. американски услови доставени преку пакистански посредници, кои бараат демонтирање на нуклеарните капацитети на Иран, предавање на залихите на збогатен ураниум на МААЕ и прекин на поддршката за регионалните прокси-групи. За возврат, САД нудат укинување на меѓународните санкции и помош за цивилна нуклеарна програма.

The post КОНТРАУСЛОВИ ЗА САД, ТЕХЕРАН САКА ДА ГИ ЗАДРЖИ РАКЕТИТЕ Иран има и нови правила за бродови кои минуваат низ Ормуз appeared first on plusinfo.mk.

Техеран порача дека евентуален крај на војната со Израел и со САД мора да биде конечен. Иранската дипломатија тврди дека земјата не бара прекин на огнот, туку јасен и траен завршеток на конфликтот.

– Иран не побара прекин на огнот и сака секој крај на војната со Израел и со САД да биде дефинитивен – рече шефот на иранската дипломатија Абас Арагчи.

Според него, Техеран не прифаќа привремени решенија. Тој порача дека ако конфликтот заврши, тоа мора да биде трајно.

Коментарите на Арагчи се однесуваат и на американските и израелските напади врз Иран.

– Интересно е што САД признаваат дека напаѓаат за забава. Нè изненадува што меѓународната заедница не презема мерки – рече тој.

Арагчи тврдеше дека во Иран биле нападнати цивилни објекти, меѓу нив болници и училишта.

– Според извештајот на министерот за здравство, нападнати се 53 болници. Нападнати се и стадиони, меѓу нив и стадион со 12.000 седишта – рече тој.

Тој додаде дека има жртви и меѓу спортската заедница.

Иранскиот министер порача дека земјата ќе продолжи да се спротивставува на притисоците.

– Нашата нација е угнетена, но е херојска нација. Таа се спротивставува на сите овие притисоци со достоинство – изјави Арагчи.

The post ИРАН ПОСТАВИ УСЛОВ ЗА МИР „Ако е крај, дефинитивно да е крај!“ appeared first on plusinfo.mk.

Првите денови од воениот судир со Иран веќе ја чинат Америка милијарди долари. Според американски медиуми кои се повикуваат на извори од Пентагон, само во првите шест дена од конфликтот биле потрошени повеќе од 11,3 милијарди долари.

Во оваа сума не се вклучени трошоците за подготовка на операцијата, како распоредување воена опрема и војници пред почетокот на нападот на 28 февруари.

Според анализа на Центар за стратешки и меѓународни студии (ЦСИС), првите 100 часа од американско-израелските напади врз Иран ја чинеле администрацијата во Вашингтон околу 3,7 милијарди долари.

Тоа значи дека дневните трошоци достигнувале речиси 900 милиони долари, главно поради огромната потрошувачка на муниција.

Истражувачите Марк Кансијан и Крис Парк посочуваат дека само мал дел од овие средства биле однапред предвидени во буџетот.

Според нивната проценка, од вкупните 3,7 милијарди долари потрошени во првите часови од конфликтот, дури 3,5 милијарди долари не биле планирани во буџетот.

Поради тоа, се очекува Пентагон наскоро да побара дополнителни средства од Конгресот за да ги покрие непредвидените трошоци.

Аналитичарите предупредуваат дека ова може да стане политички проблем за администрацијата на Доналд Трамп и да отвори нова дебата во САД околу цената на војната.

The post ВОЈНАТА СО ИРАН ГО ПРАЗНИ АМЕРИКАНСКИОТ БУЏЕТ Над 11 милијарди долари потрошени за само шест дена appeared first on plusinfo.mk.

Репрезентацијата на Иран ќе може да настапи на Светското првенство во 2026 година, и покрај растечките политички тензии, откако претседателот на Соединетите Американски Држави, Доналд Трамп, потврдил дека иранскиот тим е „секако добредојден“ на турнирот.

Ова го изјави претседателот на ФИФА, Џани Инфантино, кој откри дека за ова прашање разговарал директно со американскиот претседател.

– Се сретнав со претседателот Трамп и разговаравме за учеството на Иран. Тој јасно кажа дека иранската репрезентација е добредојдена да игра на Светското првенство – изјавил Инфантино, пренесува Политико.

Светско првенство во фудбал 2026 ќе се одржи во три држави – Соединетите Американски Држави, Канада и Мексико, а Иран веќе обезбеди пласман на турнирот.

Според планот, иранската селекција треба да одигра три натпревари од групната фаза во Лос Анџелес и Сиетл.

Сепак, учеството на тимот во последните недели беше доведено во прашање поради ескалацијата на конфликтот меѓу Соединетите Американски Држави и Иран.

Пред околу десет дена, администрацијата на Доналд Трамп, заедно со израелски сојузници, започна воена офанзива против Иран, која вклучуваше воздушни напади. Одговорот од Техеран следеше со напади со беспилотни летала и ракети во регионот.

И покрај политичките тензии, сигналот од Вашингтон сугерира дека спортот засега нема да биде мешан со геополитичките конфликти.

The post ИРАНЦИТЕ СЕ ДОБРЕДОЈДЕНИ НА МУНДИЈАЛОТ Трамп дозволил Иран да игра на Светското фудбалско првенство appeared first on plusinfo.mk.

Иран предупреди дека европските и другите земји би можеле да станат легитимни цели на напади доколку се приклучат на воените операции против Техеран на страната на САД и Израел.

Заменик-министерот за надворешни работи на Иран, Маџид Тахт-Раванчи, изјави дека Техеран веќе испратил пораки до европските држави и други земји да не се вклучуваат во конфликтот.

– Техеран веќе ги информираше Европејците и сите други дека треба да бидат внимателни и да не се приклучат на оваа агресивна војна против Иран. Доколку која било земја им се придружи на САД и Израел во агресијата против Иран, таа ќе биде легитимна цел на иранска одмазда – изјави Тахт-Раванчи во интервју.

Тој потврди дека иранските сили изведуваат напади врз курдски вооружени групи во соседен Ирак, откако се појавија извештаи дека тие добиваат поддршка од американската разузнавачка служба ЦИА и израелската служба Mосад.

– Доколку има потреба да го заштитиме нашиот суверенитет, дефинитивно ќе го сториме тоа – нагласи иранскиот дипломат.

Изјавата доаѓа во период на силна ескалација на тензиите на Блискиот Исток, додека меѓународната заедница стравува од проширување на конфликтот во поширок регионален судир.

The post ИРАН СЕ ЗАКАНИ СО ОДМАЗДА Европа ќе биде легитимна цел ако се приклучи на САД и Израел appeared first on plusinfo.mk.

Американскиот претседател Доналд Трамп изјави дека сака целосна промена на владејачката структура во Iran и откри дека веќе размислува за луѓе кои би можеле да ја водат земјата по актуелниот конфликт.

Во телефонско интервју за „NBC News“, Трамп рече дека Вашингтон сака „да расчисти сè“ и дека има неколку имиња кои, според него, би можеле да бидат „добри лидери“ на Иран.

– Сакаме тие да имаат добар лидер. Имаме неколку луѓе за кои мислам дека би направиле одлична работа – изјави Трамп, но одби да открие кои се тие.

Тој додаде дека се преземаат мерки за луѓето што ги има на ум да ја преживеат војната.

– Да, ги набљудуваме – кратко одговори Трамп.

Неговите изјави доаѓаат по смртта на иранскиот врховен лидер Али Хамнеи минатиот викенд, настан што дополнително ги зголеми тензиите во регионот.

Американскиот претседател се осврна и на изјавата на иранскиот министер за надворешни работи Абас Аргачи, кој претходно предупреди дека Иран е подготвен за евентуална копнена инвазија од страна на американските и израелските сили.

Трамп ја отфрли таа можност и изјавата ја нарече „залуден коментар“, додавајќи дека во моментов не размислува за копнена операција.

– Тоа е губење време. Тие изгубија сè. Ја изгубија морнарицата. Тие изгубија сè што може да изгубат – рече Трамп, најавувајќи дека нападите ќе продолжат со истото темпо.

Во меѓувреме, се појавија шпекулации дека наследник на Хамнеи би можел да биде неговиот син Моџтаба Хамнеи. Аналитичарите, пак, предупредуваат дека Корпусот на исламската револуционерна гарда, најмоќната воена и политичка структура во земјата, би можела дополнително да го прошири своето влијание доколку го преживее актуелниот конфликт.

The post КОЈ ЌЕ ГО ВОДИ ИРАН? Трамп вели дека има неколку имиња на ум appeared first on plusinfo.mk.

Во првите четири дена од воените операции против Иран, кои започнаа во саботата, САД изгубија воена опрема вредна речиси две милијарди долари, според проценките и податоците собрани од турската агенција Анадолу агенција.

Најголемата поединечна загуба е американскиот радарски систем за рано предупредување AN/FPS-132 во воздухопловната база Ал Удеид во Катар, вреден околу 1,1 милијарда долари. Системот бил погоден во ирански ракетен напад во саботата, а катарските власти потврдија дека радарот е оштетен.

Иран, исто така, објави дека ја уништил радарската компонента AN/TPY-2 на антибалистичкиот ракетен систем THAAD во Ал-Руваис во Обединетите Арапски Емирати, чија вредност се проценува на околу 500 милиони долари. Сателитските снимки од отворени извори укажуваат дека навистина имало удар.

Во неделата, три борбени авиони F-15E Strike Eagle биле изгубени во инцидент со пријателски оган од страна на кувајтската воздушна одбрана. Иако сите шест члена на екипажот преживеале, вредноста на уништените летала се проценува на 282 милиони долари.

За време на првичниот напад во саботата, Иран го погодил и седиштето на Петтата флота на американската морнарица во Манама, Бахреин, уништувајќи два терминала за сателитска комуникација AN/GSC-52B во вредност од околу 20 милиони долари, како и неколку поголеми згради. Вкупните загуби на американските воени средства во регионот достигнуваат околу 1,9 милијарди долари.

Напади врз американски бази

Од саботата, Иран нападнал најмалку седум американски воени локации на Блискиот Исток: седиштето на Петтата флота во Бахреин, кампот Арифџан, воздухопловната база Али Ал Салем и кампот Буринг во Кувајт, воздухопловната база Ербил во Ирак, пристаништето Џебел Али во ОАЕ и воздухопловната база Ал Удеид во Катар.

Во Кувајт, снимките од недела попладне покажале урнати покриви на повеќе згради во воздухопловната база Али Ал Салем. Кампот Арифџан бил местото каде што загинале шест американски војници. Снимките од кампот Буринг, исто така направени во недела, прикажуваат дрон како лета над објектот пред да експлодира во неговиот периметар.

Снимките и фотографиите потврдени од „Њујорк Тајмс“ покажуваат дека Иран повеќепати нападнал воен објект на меѓународниот аеродром Ербил во Ирак, каде што се стационирани американските сили. Се гледаат чад и пламен, а сателитските снимки од недела наутро покажале четири оштетени или уништени објекти, додека пожарите сè уште гореле и во понеделник.

Сателитските снимки од пристаништето Џебел Али во Дубаи од неделата покажале чад што се издига од голема зграда во оградена рекреативна зона што ја користи американската морнарица. Иако не е официјална американска база, Џебел Али е едно од пристаништата што најчесто ги користи морнарицата.

Дипломатски мисии исто така беа цел

Покрај воените бази, дипломатските мисии на САД во Саудиска Арабија, Кувајт и Обединетите Арапски Емирати исто така биле цел на напади.

Американската амбасада во Ријад била погодена од два дрона. Саудиското Министерство за одбрана соопштило дека станува збор за „ограничен оган и мала материјална штета“, а според The Washington Post, била погодена и станица на ЦИА во комплексот.

Американската амбасада во Кувајт била нападната со дронови и ракети, во напад што кувајтските власти го опишале како „брутален“. Во близина на комплексот бил пријавен чад, а амбасадата била затворена „до понатамошно известување“, со евакуација на небитниот персонал и нивните семејства.

Американскиот конзулат во Дубаи бил погоден од, како што се сомнева, ирански дрон кој се урнал на паркингот до зградата. Избувнал пожар кој локалните власти брзо го ставиле под контрола. Дворот на конзулатот претрпел извесна штета, но без поголеми структурни оштетувања.

The post ЗА 4 ДЕНА САД ЗАГУБИ ОПРЕМА ВРЕДНА 2 МИЛИЈАРДИ ДОЛАРИ Ескалацијата со Иран носи огромни загуби appeared first on plusinfo.mk.