Претседателот на САД, Доналд Трамп, објави дека Соединетите Американски Држави склучиле договор со Данска и Гренланд, со кој САД добија трајна контрола врз безбедноста на Гренланд.

Договорот, како што вели Трамп, целосно ги решава сите бројни американски загрижености.

Во објавата на социјалната мрежа Трут соушл, американскиот претседател појасни дека договорот е постигнат по негов налог и во соработка со претставниците на Данска и Гренланд.

„Договорот гарантира дека САД засекогаш ќе имаат целосна способност да сторат сè што е потребно во Гренланд за да ја обезбедат и да ја одбранат безбедноста на Гренланд и на Соединетите Американски Држави“, објави тој.

Една од главните одредби е дека „ниту еден американски противник никогаш не може да има база во Гренланд, воено присуство или да спроведува чувствителни инвестиции во Гренланд без изрична писмена согласност од САД“.

Трамп ја нагласи стратешката важност на Гренланд и потврди дека американските претседатели се свесни за овој факт повеќе од 100 години, но дека „никој од нив не успеа да направи ништо во врска со тоа“.

„Горд сум што сум претседателот кој трајно и конечно ја реши оваа исклучително важна ситуација. Ова е договор со „бесконечно траење“, нема крај!“, порача Трамп.

Тој најави конкретни следни чекори.

„Веднаш ќе почнеме со процесот на развој на големо воено присуство во соодветните делови на Гренланд, кои ги има многу. САД ќе соработуваат со народот на Гренланд за овој развој и изградба“, напиша тој.

Трамп оцени дека решението е „одлично за Соединетите Американски Држави, Данска, Гренланд и за сите наши сојузници“. Изрази задоволство од идната соработка со Данска и Гренланд за, како што изјави, реализацијата на прекрасната иднина на таа стратешки важна територија.

„Ќе го заштитиме многу! Ова е остварување на сон за Соединетите Американски Држави, нешто што е многу важно, историско и посебно“, заклучи американскиот претседател во својата објава.

Данската премиерка Мете Фредериксен потврди дека договорот ќе биде потпишан следната недела на Генералното собрание на Обединетите нации. Таа рече дека договорот „ја зајакнува заедничката безбедност во Арктикот и Северноатлантската област“, ​​а во исто време „го признава суверенитетот и територијалниот интегритет на Кралството Данска и правото на гренландскиот народ на самоопределување“.

Американскиот државен секретар, Марко Рубио изјави дека договорот на САД со Данска и Гренланд е голема победа за американскиот народ.

„Овој историски договор е голема победа за САД и за американскиот народ. Благодарение на визијата и лидерството на претседателот Трамп, овој историски договор трајно ги гарантира безбедносните интереси на САД во Арктикот, без никакви трошоци за американските даночни обврзници“, објави Рубио на Икс.

Како што вели, Гренланд засекогаш ќе биде дел од стратешката одбранбена зона на Северна Америка, што ќе спречи присуство на каков било противник на таа територија и нејзината околина.

„Овој договор трајно и целосно ги решава нашите прашања за националната безбедност поврзани со Гренланд“, заклучи Рубио.

The post САД ГО ДОБИЈА ГРЕНЛАНД, ЌЕ ИМААТ ТРАЈНА ВОЕНА КОНТРОЛА Трамп објави дека е остварен еден вековен сон на САД appeared first on plusinfo.mk.