Премиерот Христијан Мицкоски оцени дека во Македонија сѐ уште нема вистинско владеење на правото и дека довербата на граѓаните во правосудниот систем останува на исклучително ниско ниво. Во интервју за Македонската телевизија, по повод две години од мандатот на Владата, тој порача дека не е задоволен од работата на правосудството и очекува целосно расветлување на сите афери кои, според него, оставиле сериозни последици врз судскиот систем.

– Мојот став е дека систематски владеењето на правото е проблем во перцепцијата на граѓаните, затоа што во суштина и немаме владеење на правото, туку имаме мешетарење во правото, за жал – вели Мицкоски.

Премиерот нагласи дека не е задоволен од правосудството, посочувајќи дека очекува расветлување на сите афери за што рече дека само на тој начин може граѓаните да размислуваат за промена на перцепцијата на довербата во судските органи.

– Три работи кои што се случиле во минатото создале таков проблем кој што оставил девастирачки последици на правосудниот систем и мислам дека уште некое време тоа ќе го чувствуваме. Првиот е оној период кога тогашната најголема опозициска партија ВМРО-ДПМНЕ беше најголема опозициска партија вонпарламентарна, после изборите во 94тата година или оној познат избор на судии кој се случи во тој период на таа влада 94-98 година. Тоа беше еден целосен процес на партизирање на правосудството од страна на тогашната влада. Вториот проблем за кој ние мораме да сме свесни и да кажеме дека е имплант во правосудниот систем тоа е СЈО и сите оние состојби кои што му претходеа а потоа следеа. Му претходеа оние т.н пржински договори и преговори во едни други времиња помеѓу 2015-2016тата година, се изроди тој имплант, се создаде како некаков политички договор и компромис и потоа сето понатаму беше неправо – вели тој.

Мицкоски додава дека една друга влада таа институција ја користела да биде политичка алатка за вршење политички притисок врз неистомислениците во тоа време опозицијата или пак за реализирање на некакви лични или политички цели.

– Тука нема да ги коментирам начинот на кој што од затвор тогашната специјална јавна обвинителка практично ги пренесе ингеренциите на државното јавно обвинителство, па потоа претходниот државен јавен обвинител пред претходниот да бидам попрецизен ги пренесе тие овластувања до обвинителите кои што доаѓаа од тогаш веќе поранешното СЈО. Се сеќавате како дојде на голема врата поддржано со акламација од меѓународна заедница, во одредена мерка и финансирано од страна на меѓународна заедница со очекувања дека не знам што ќе се случува, дека тие луѓе кои што во суштина покажаа медиокритетски капацитет ќе донесат некаква правда и вредности. И сето сите ние знаеме како заврши тоа, а за да го покажат карактерот на ситни души се оние бонуси за кои до денешен останаа нерасветлени. Но, тоа нема да остане туку така и сега да се надоврзам на моите очекувања од сегашниот јавен обвинител, да поминат 100 дена кои што треба секој да ги добие на аклиматизација запознавање со средината и слично, очекувам да сите овие работи за кои сега зборував да бидат расветлени и да бидат пред јавноста обелоденети. Тогаш јавноста ќе може да почне да размислува за промена на перцепцијата, бидејќи ако останат неразјаснети и нерасчистени тогаш се плашам дека состојбата ќе биде уште полоша и довербата кон тие институции ќе биде уште помала од граѓаните – изјави Мицкоски.

The post ПРЕМИЕРОТ НЕЗАДОВОЛЕН ОД СУДСТВОТО Mицкоски бара расчистување на сите афери appeared first on plusinfo.mk.

Судот за човекови права во Стразбур не ја признава аболицијата на поранешниот претседател Ѓорге Иванов од 2016 година, а која се однесуваше на осомничените од поранешното Специјално јавно обвинителство и одлучи дека државата со право ја поништила.

Од одлуката која Европскиот суд ја објави денеска, се заклучува дека државата имала право да ги поништи помилувањата, бидејќи тие биле донесени без законска основа, во време на политичка криза.

„Европскиот суд за човекови права едногласно пресуди дека: немало повреда на член 6 став 1 (право на фер судење) од Европската конвенција за човекови права поради законодавната интервенција со која се дозволи поништување на претседателските помилувања и продолжување на кривичната постапка против подносителите на барањето“, пишува во одлуката на судот во Стразбур.

На 12 април 2016 година тогашниот претседател на државата, Ѓорге Иванов даде аболиција на над 50 осомничени лица, меѓу кои и за лица што беа под истрага на згаснатото СЈО. Можноста да даде аболиција тој ја црпеше од одлука на Уставниот суд, кој ги укина законските измени од 2009 година во кои се избриша член 11 од Законот за помилување, со кој беше укината можноста претседателот да дава аболиција без правна процедура. Ова укинување му даде можност на претседателот на дравата да дава аболиција и без спроведување на постапката за помилување. По реакциите во јавноста, во Собранието беа донесени измени на Законот за помилување, со што се отвори простор за повлекување на аболициите.

The post СУДОТ ВО СТРАЗБУР ОДЛУЧИЛ ДЕКА АБОЛИЦИИТЕ НА ИВАНОВ БИЛЕ НЕЗАКОНСКИ Државата со право ги поништила appeared first on plusinfo.mk.

Молам за трпение и за должно внимание, почитувани читатели. Оваа приказна не може да се раскаже набрзинка. Барем јас не можам. И не сакам. Е сега, кој нема трпение, подобро веднаш да се откаже од читање …

Сторијава, што ја озаглавив со насловот на познатиот роман „Херојот на нашето време“ на Михаил Лермонтов, се отвори на еден чуден начин. Средувајќи го мојот двор, во кој своевремено редовно никнуваа разни документи и белешки поврзани со новинарските статии за таканаречените „високопрофилни“ случаи на некогашното трагично нископрофилно Специјално јавно обвинителство, деновиве наидов на еден нов, а сепак стар документ. Нов е зашто прв пат го гледам. Веројатно сум го затурил во некое ќоше, во некој стар, заборавен фолдер …

Документот носи наслов „Службена белешка“. Напишан е од двајца истражители на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите. Познато како СЈО. Белешката е поврзана со две шифри, НСК.РО.бр. 48/16 и НСК.РО.бр.49/16, кои се однесуваат на предметот „Мал Ринг“. Носи датум 22.06.2016.

Битката за „Шпански скали“ во филмот на инспекторот Кочо

Врз основа на дадени насоки од јавната обвинителка Лиле Стефанова – се вели во Службената белешка – во врска со оформени предмети поврзани со изградба, доградба и надградба на објекти и реконструкција на фасади на објекти, лоцирани во централното градско подрачје „Мал Ринг“, Скопје, на ден 21.06.2016 година, во времето од 11.00 до 13.00 часот, во службените простории на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, бил обавен разговор со лицето Кочо Стојчески, раководител на сектор за инспекциски работи во општина Центар.

Стојчески им зборувал на истражителите за проектот „Шпански скали“, за Офицерскиот дом и за „хотелскиот комплекс“ на плоштадот Македонија. Го разврзал јазикот и спомнал многу звучни имиња. Во ова време денешно веќе го разбираме неговиот минхаузеновски манир, но на тој топол јунски ден пред 10 години на луѓето на Лиле Стефанова приказните на инспекторот Кочо веројатно им се чинеле како супер бинго. Иако, за волја на вистината, истражителите не биле наивни и во повеќе наврати ги нарекле „непотврдени сознанија“.

Така, од нашиот јунак Кочо Стојчески биле добиени „непотврдени сознанија“ дека градежното земјиште на просторот помеѓу „Сити Галери“ и ресторанот „Пелистер“ било планирано да биде продадено на Гоце Камчев, сопственик на КАМ маркети и чичко на Орце Камчев, меѓутоа на лицитацијата се појавила и фирмата „Амадеус груп“, сопственост на албански државјанин со живеалиште во Франција, која дала највисока понуда и победила. Сите кои го познаваа покојниот Гоце Камчев веднаш ќе сфатат дека Стојчески уште на самиот почеток на двочасовниот разговор прописно ги шетал по ќерамиди луѓето на Лиле Стефанова …

Но, мора да се признае дека Кочовата верзија на настаните е филмска, како некаков истражувачки документарец на „независна“ продукција платена од МРТВ. По склучувањето на Договорот со Министерството за транспорт и врски, во теленовелата „Шпански скали“ се појавуваат тогашниот министер за транспорт Миле Јанакиески и тогашниот премиер Никола Груевски. Бил направен обид – вели Кочо – за проширување на маркицата од 1.000 метри квадратни, на која требало да се изгради приземен објект со три ката, со фамозните „Шпански скали“, додадени на истата маркица.

Потоа Стојчески им објаснува на истражителите – ги замислувам со зинати усти и со трикотажни бели маици испотени под мишките – како со ослободување на 50% на комуналиите за објектот на фирмата „Амадеус груп“, требало да се обезбеди изградбата на „Шпанските скали“. Потоа Општина Центар издала Одобрение за градба на објектот П+3, на површина од 1.000 квадрати, на кое е споен и делот за „Шпанските скали“, како партерно уредување на просторот.

И којзнае што би било кога би било, да не се случело нешто непредвидено – Советот на Општина Центар, во јули 2015 година, донел одлука за стопирање на градби во „Мал Ринг“ до крајот на истата година, со образложение поради туристичката сезона. Денес, замислените „Шпански скали“ ги нема, но затоа ја имаме приказната на Кочо.

Андреј Жерновски жестоко оцрнет во Кочовото болеро

По налог на обвинителката Лиле Стефанова, центарскиот инспектор за урбанизам бил запрашан и за „околностите за Офицерскиот дом и хотелскиот комплекс на плоштад Македонија“, се вели во Службената белешка.

Тука Кочо го враќа филмот до 2012 година и го поврзува Миле Јанакиески (наречен Миле Ми Текна) со познатиот Алек Теранова. Тие двајцата наводно преговарале со сопствениците на парцелата од 500 метри квадратни, па кога не успеале, тогашниот раководител на урбанизам во Центар, извесен Александар Јанакиески, наводно добил наредба да подготви измени и дополнувања на ДУП-от за „Мал Ринг“ и на наведената парцела да испланира градба на фонтана. Тука се вклучила и планерската куќа „Инпума“. По многу перипетии, за кои Кочо детално раскажува, новиот ДУП за Центар е донесен со измените и дополнувањата на крајот на 2012 година. Нејсе, важно е што тој Александар Јанакиески, според Кочо Стојчески, бил под директно влијание на Миле Јанакиески, Никола Груевски и на Орце Камчев.

Но, чекајте, тоа не е сè!

Од тој момент, како lupus in fabula, или по нашки – како вол во купус, влетува Андреј Жерновски, тогашниот нов градоначалник на Центар. Жерновски го поставува Кочо за раководител на инспекциски работи, а тој, пак, веднаш го информирал градоначалникот дека одобрението за градба за Офицерскиот дом и за хотелскиот комплекс можело да се поништи. Арно ама, по тој разговор – ако му се верува на Кочо, што баш и не е лесно – Жерновски му ги одзел овластувањата на инспекторот, ги поминал измените и дополнувањата на два ДУП-а за Водно и три месеци подоцна му ги вратил.

Сега следува најинтригантниот дел од Кочовото болеро Historia de un Amor!

Кочо Стојчески на истражителите им рекол дека „во комуникација со Ратко Капушевски, управител на фирма на Сергеј Самсоненко, му било кажано дека околу 80.000 евра му се дадени на градоначалникот Жерновски за ослободување на плаќање комуналии за два објекти лоцирани во Градски парк, во близина на градски стадион, на вкупна површина од околу 14.000 метри квадратни, која Самсоненко ја купил од Република Македонија за цена од 40 евра за 1 квадрат“. Бреј!

Кметот на Центар зел милион евра и од Орце, људи моји па јели то могуче?!

Но и тоа не е сè!

Верувале или не, истражителите од фамозниот Кочо добиле „непотврдени сознанија“ дека „градоначалникот Жерновски бил во добри релации со Орце Камчев, со кого остварувале тајни средби надвор од РМ и дека за различни услуги што ги вршел Жерновски, Камчев му има исплатено на различни начини околу 1.000.000 евра, без притоа да прецизира на кој начин се исплаќани и за каков вид на услуги се исплаќани“.

Кочо Стојчески на истражителите на обвинителката Лиле Стефанова им раскажувал бајки и за купувањето на градежното земјиште на плоштад Македонија на кое е изграден хотелот „Мериот“, како и за постапката за добивање одобрение за градба и за самото градење на хотелот. Но, во тој дел од приказната баш и нема спектакуларни минхаузеновски детали, за да ве забавувам.

Ај доста е со овие рекла-казала муабети… Добар дел од нив своевремено беа опишани во спектакуларните јавни настапи на „Чарлиевите ангели“ од СЈО и во годините потоа не се потврдија со правосилни судски пресуди. Тоа е така, затоа што СЈО своите случаи ги градеше со „непотврдени сознанија“, со измислени приказни и без докази, додека шефицата Катица Јанева собираше рекет, а нејзините обвинители добиваа незаконски бонуси…

Сите фирми во бизнис империјата на Кочо Стојчески

Нејсе, доаѓаме до фокусното прашање на оваа сторија – кој е тој Кочо Стојчески?

Кој е тој херој на ова наше време-невреме, тој урбанистички инспектор Мегре што ги знаел сите марифетлуци, сите дупки и дупови, сите возможни и невозможни врски меѓу главните скопски фаци, сите тајни поткупи за кои од него обвинителката Лиле Стефанова добила „непотврдени сознанија“? Со кои, да имало правда тогаш кога Заев го отвораше „суството“ како пупка, таа можела само да се забрише, знаете каде…

За овој лик во повеќе наврати пишуваа порталите Призма, Фактор и други. Но, сепак ќе се изненадите, како што се изненадив и јас, кога дојдов до официјални и легално достапни податоци за бизнисите на спомнатиот главен лик на Службената белешка.

Кочо Стојчески е сопственик на фирмата СПЕЦИЈАЛ ГРАДБА ДООЕЛ увоз-извоз Скопје, регистрирана на адреса во Центар и основана во 2011 година. Добро упатени извори велат дека оваа фирма во своето портфолио има неколку изградени објекти во Скопје.

Пред да ја основа таа фирма, во 2006 година Кочо Стојчески се појавува како управител на СКОПСКО ПОЛЕ ДООЕЛ ’Ржаничино, Општина Петровец.

Пет години пред тоа, во 2001 година, Кочо се појавува како единствен содружник во Друштвото за угостителство, туризам и трговија МОНТАНА БИЗНИС ДООЕЛ Крушево?

Кај е хотелот „Монтана“, таму е и скијањето. Од 2010 година, Кочо Стојчески е основач-сопственик на Друштвото за туризам и угостителство СКИ ЦЕНТАР ПАНОРАМА увоз-извоз ДООЕЛ Крушево.

Од 2014 година, пак, Стојчески е содружник во МКМ ЕКСПРЕС ДОО Скопје, фирма која се занимава со изградба на станбени и нестанбени објекти.

Од 2021 година, Кочо е содружник во фирма која се занимава со управување на недвижен имот, која се вика – погодувате веќе – СПЕЦИЈАЛ ОФИС КМ ДООЕЛ.

Од февруари 2022 година, Стојчески е основач-сопственик на Друштво за производство, трговија и услуги СИДРА М.Т.В. ДОО Скопје.

Таа 2022 година била особено плодна за Кочо Стојчески. Во октомври во легендарното ’Ржаничино, Општина Петровец, „никнала“ неговата нова фирма, СКОПСКО ПОЛЕ ЕНЕРЏИ ДООЕЛ, која се занимава со производство на електрична енергија.

Одиме сега пак кон славното Крушево…

Кочо Стојчески некако е поврзан и со Планинарскиот-велосипедски клуб ПАНОРАМА БАЈК, регистриран како спортско здружение. Немам податок кое е неговото својство во ова здружение.

Но, тој е основач-сопственик и на крушевската фирма СПЕЦИЈАЛ ВРАТИ ДООЕЛ, основана во јануари 2022 година.

Градба, врати … А мебел? КМ МЕБЕЛ СПЕЦИЈАЛ ДООЕЛ Крушево е фирма од септември 2022 година, која се занимава со производство на мебел. Стојчески е основач-сопственик.

Една ваква импресивна бизнис-империја мора да се расправа со многу сметки и пресметки. Веројатно затоа Кочо Стојчески својата успешна 2022 година ја крунисува со основање фирма за сметководствени и ревизорски работи и даночно советување, која се вика – нормално – СПЕЦИЈАЛ КОНСАЛТИНГ ДООЕЛ.

Ако нешто сум заборавил од богатото бизнис портфолио на овој човек, се извинувам.

Кога те бидува, за сè те бидува!

Не го познавам лично овој „специјалец“ во бизнисот и во урбанизмот, овој лик кој ете нашол малку време, покрај редовните обврски во фирмите и во Општина Центар, на истражителите на обвинителката Лиле Стефанова да им раскаже неверојатни пикантерии за наводни корупциски релации меѓу познати ликови од политичката и од бизнис елитата.

Некој ваквото смело соопштување „непотврдени сознанија“ и овие жестоки обвинувачки наводи за директен поткуп (како во случајот на кутриот Жерновски, на пример), би ги нарекол класично цинкање, клеветење и денунцирање.

Некој друг би додал дека можеби тоа бил начинот на кој овој лик успеал да создаде една мала, а сепак за пошироката јавност невидлива бизнис империја.

А некој трет, пак, би се посомневал и дека тоа што еден ваков бизнисмен, сопственик и управител на фирми се нафатил да биде агилен општински инспектор за урбанизам, можеби било од лукративни мотиви, на чудесен начин поврзани со неговите бизниси.

Некој, да … Но не и јас!

Јас цврсто верувам дека Кочо Стојчески е еден вреден, способен и посветен човек.

Ербап, бе!

А кога еден човек го бидува, го бидува за сè!

Гледате и самите, овој човек е вистински специјалец во бизнисот, како што, впрочем, кажуваат и повеќето имиња на неговите фирми. Не е тоа случајно…

Човек кој се кренал од Крушево до славно ’Ржаничино, Општина Петровец, да вирее во бизнисот – како пиреј! – па да произведува од жито до врати и мебел, од игла до локомотива, да води сметководство и даночно да советува, за во еден значаен период од својот живот да го инспектира урбанизмот во најурбаната скопска општина Центар, еден таков човек, простете, за мене е – херој на нашето време!

Такво си е ова наше време-невреме. Како создадено за вакви херои како Кочо Стојчески, главниот јунак на Службената белешка напишана пред точно десет години, на 22.06.2016 година.

Што е сега? Нешто ми мрчите. Мислите дека денес е поинаку?

Не, почитувани читатели, секое време си има свои херои. Само ние или не ги гледаме или не сакаме да ги видиме. До нас е…

The post Херој на нашето време appeared first on plusinfo.mk.

Ѝ порачуваме на Ленче Ристоска, десната рака на Катица Јанева, за која многумина веројатно оправдано сметаат дека беспоговорно реализираше агенди на Заев и други фактори, да не глуми жртва, вели ВМРО-ДПМНЕ во соопштение, со кое реагира на нејзината оставка и на нејзиното образложение за таа одлука.

„Додека со Јанева делеа и множеа, и палеа и гасеа, и додека одеа по облаци, каде едната од нив во раката имаше ташна од Луј Витон, и откако после повеќе од 10 години таа не заврши ниеден од споменатите случаи, кокетирајќи со кого ќе ѝ дојде на ум, праќајќи абери и до ВМРО-ДПМНЕ, сега сфаќа дека правда во оваа држава ќе има, и мора да има, без разлика дали на Заев му се допаѓа тоа или не. И без разлика на нејзината лојалност кон било кого.

Не навлегувајќи во нејзината реакција и процедурите во обвинителството кои се нивна работа и одлука, сепак не можеме да споменеме една дилема која ни се јавува додека ја гледаме како мисли дека народот заборавил на Катица Јанева и трите грации од кои очекуваа правда и наместо правда добија Луј Витон афера, но ако беше Ленче Ристоска обвинител со вредности и критериуми и личност која не е врзана со СДСМ и Заев ќе имаше бар еден случај со кој ќе го докажеше тоа. Ќе имаше бар еден случај со кој ќе докажеше дека сака правда или ако ништо друго ќе се обидеше да провери барем една од стотиците наши индиции за сторен криминал на претходната влада на СДСМ и ДУИ.

Наместо да ги амнестира оние кои ја направија обвинител во СЈО, СДСМ и ДУИ, и да глуми жртва апелираме до нејзе да сфати дека моралот не е само збор туку е во својата суштина однесување и делување. Дела, а не зборови. Нејзините зборови ќе имаа поголема смисла ако зад нив имаше дела.

Иако според она што е образложено предметите Талир се предадени на обвинител кој е од обвинителство кое има стварна надлежност над нив, наместо да се заради било каква, а веројатно и партиска подобност држени надвор од секоја логика кај Ристова, како што обвинителството под контрола на СДСМ и ДУИ ги држеа кај нејзе со години, за да го држи уценето ВМРО-ДПМНЕ со ненормално долги постапки. На пример постапките за Талир траат 10 години и ако правдата функционираше досега ќе имаа епилог, било каков. Ние не навлегуваме во епилогот туку дека требаше да го има. Ако има вина пресуда, ако нема ослободување. Но не. Нема епилог, туку се добива впечаток дека Ристоска ги држеше кај себе за ВМРО-ДПМНЕ да биде уценето.

ВМРО-ДПМНЕ исто како и целиот народ очекува правда, владеење на правото и бескомпромисна борба против корупцијата без разлика на функција, партиска, етничка или било каква друга припадност. Кој згрешил, кој прекрши закон мора да одговара. Затоа овие обиди на Ристоска да глуми жртва ги сметаме за нејзиното дополнително одработување против правдата во Македонија и во заштита и обид за дефокусирање на темата од криминалите на СДСМ и ДУИ и обид да се продолжи перцепциската пресметка против ВМРО-ДПМНЕ и да се продолжи со праксата за перцепциска вина на партијата, кои СДСМ и ДУИ го правеа со години, за да ги кријат своите криминали и за да ги прават предавствата на народот и државата. Ова фрлање пердуви, иако и самата знае дека не е аргументирано и не е правно и праведно, е само уште еден доказ за нејзините намери и цели.

Заврши времето на политички агенди и инструментализација на правдата. Да беше Ристоска со вредности како што кажува, ќе си одеше од СЈО кога се делеа награди, кога лапаа награди, покачувања, дополнителни плати кои ги делеа сите таму и кога шетаа Луј Витон торбици. Таа не само што остана таму туку продолжи да биде десна рака на Катица Јанева. За сега да глуми жртва и борец за вредности. Народот памети се. И среќа нема кратка меморија како што Ристоска, исто како и Заев сметаат.

За крај не сакаме да навлегуваме во детали за нејзините обиди за лобирање кај ВМРО-ДПМНЕ, и неуспешната амбиција да оди во странство, кое ако успееше сигурно Ристова немаше вака да реагира и ќе ѝ беше сеедно дали Талир или било кој предмет е кај нејзе или не е.

Ја познаваме добро Ристоска, а некои од нашите членови и предобро, и оваа глума не проаѓа. А не проаѓа ни кај народот кој сака правда кој е свесен за улогата на СЈО и изневерените очекувања, и за предавствата и криминалите кои се случуваа со години во државата, додека Ристова беше обвинител, не ги забележуваше, и со прст не мрдна да ги спречи и санкционира“, се вели во соопштението на ВМРО-ДПМНЕ.

The post СДСМ ЈА БРАНИ РИСТОСКА, ОЧЕКУВАНО, ТАА БЕШЕ НИВЕН ИГРАЧ И ПИОН Предметите за ВМРО-ДПМНЕ ги држеше кај себе, за да бидеме уценети, обвинува партијата appeared first on plusinfo.mk.

Со внимание ја проследивме оставката на Ленче Ристоска, која до пред само еден месец самоуверено тврдеше дека дошло времето токму таа да застане на чело на обвинителството и да ја донесе толку посакуваната правда – се вели во соопштението на ВМРО-ДПМНЕ со кое партиајта среагира на оставката на обвинителката Ленче Ристоска од обвинителската функција.

„Очигледно времето за кое зборувала, важело само доколку исходот од изборот е по нејзина мерка. Во моментот кога институциите постапија согласно закон и не ја потврдија нејзината кандидатура, истата таа визија за силно и независно обвинителство одеднаш исчезна и се замени со наратив за наводни притисоци и загрозен интегритет.

Па тука, легитимно се поставува прашањето, дали принципите важат само кога носат личен напредок и дали борбата против криминал и корупција е кредибилна ако завршува таму каде што почнува нејзиното лично разочарување?

Ристоска зборува за ослабување на институции, но токму таа беше дел од тоа и ваквото однесување со условување на сопствениот ангажман со функција е суштинскиот проблем, кој со години ја уништува довербата во правосудниот систем. Наместо континуитет и професионализам, сведочиме на селективна принципиелност, каде во изјавата на Ристоска се вели дека институциите се добри кога одлуките се во наша корист, а лоши кога не се. Особено е индикативно што одлуките кои ги критикува, доааѓаат во момент кога конечно се воспоставува ред и се применува правото, без привилегирани толкувања од тесен круг на поединци кои со години се обидуваа да го монополизираат јавниот интерес.

Ристоска беше дел од истото СЈО кое беше водено од рекет-дружината на Катица Јанева, кои дрпаа народни пари на име хонорари од СЈО и кое прерасна во машина за политички прогон. Само треба да се проследи изјавата на обвинителката Лејла Кадриу, која сведочи за тоа дека Заев и Шеќеринска лично оделе навечер во СЈО на Катица, Ленче и Лиле Стефанова и селектирале предмети за политички прогон.

Јавноста има право да знае, дали оваа оставка е чин на принципиелност или политички перформанс насочен кон градење личен наратив на жртва. Вистинската борба за владеење на правото не завршува со избор или неизбор на функција, таа почнува токму тогаш. Наместо декларативни заложби, на институциите им се потребни луѓе кои ќе работат доследно, без оглед на личниот исход. Се друго е само уште една потврда дека за дел од нив правдата била прашање на позиција за контрола, а не на принцип“ – се вели во соопштението на ВМРО-ДПМНЕ.

The post „ДЕН НА ЖАЛОСТ ЗА РЕКЕТ-ОБВИНИТЕЛИТЕ И ДЕН НА СРЕЌА ЗА ОБЕСПРАВЕНИТЕ“ Коментар од ВМРО-ДПМНЕ за оставката на обвинителката Ленче Ристоска appeared first on plusinfo.mk.

Од ВМРО-ДПМНЕ соопштија дека најавеното одземање на предметите од одредени обвинители отвора прашања за нивната досегашна работа, при што упатија серија критики кон поранешни членови на Специјалното јавно обвинителство.

Во партиското соопштение се наведува дека обвинителите поврзани со периодот на владеење на Зоран Заев, меѓу кои се споменуваат Гаврил Бубевски, Ленче Ристоска и Лиле Стефанова, треба да одговорат на повеќе прашања поврзани со нивната работа во изминатите години.

Од партијата прашуваат дали треба да се утврди одговорност за, како што наведуваат, „злоупотреба на средства“ и за наводен политички прогон. Дополнително, во соопштението се споменуваат изјави на обвинителката Лејла Кадриу, во кои се тврди дека поранешниот премиер Заев и тогашната вицепремиерка Радмила Шекеринска наводно имале влијание врз изборот на предмети.

Во реакцијата се споменува и поранешната специјална обвинителка Катица Јанева, за која од ВМРО-ДПМНЕ велат дека го предводела системот кој, според нив, бил политички мотивиран.

Од партијата додаваат дека дел од обвинителите биле дел од „ист апарат“ кој, според нив, придонел за нарушување на правдата.

The post ПРЕД ДА СЕ НАВРЕДАТ ЗА ОДЗЕМЕНИТЕ ПРЕДМЕТИ Од ВМРО-ДПМНЕ прашуваат дали обвинителите ќе одговараат за работата во СЈО appeared first on plusinfo.mk.

Во својата неодамнешна колумна, новинарот Љупчо Поповски го интерпретира процесот на дискредитација на Специјалното јавно обвинителство како резултат на политичка реставрација и обид за враќање на моделот на „заробена држава“. Според неговата теза, актуелните случувања претставуваат „втор атентат“ врз институцијата, односно настојување да се избрише не само нејзиното институционално постоење, туку и самата идеја за независна правда. Аналогијата со damnatio memoriae се користи како метафора за бришење на историската и правната меморија.

Иако оваа интерпретација има наративна кохерентност и реторичка сила, реториката не смее да ја замени структурната и објективна анализа. Поповски ја редуцира сложеноста на проблемот на политичка дихотомија: прогресивна правда наспроти реставраторска реакција. Ваквата рамка го занемарува клучното прашање за структурната ранливост на институциите и моралните дефицити што овозможија автономијата да се трансформира во правно-политичка инструментализација.

Автономија без механизми на контрола

СЈО беше воспоставено како коректив на систем во кој политичкото влијание врз правосудството беше длабоко вкоренето. Неговата мисија беше да воспостави пресек со моделот на дотогашната селективна правда. Но институционалната автономија сама по себе не гарантира правна непристрасност. Таа бара јасни механизми на отчетност, внатрешна и екстерна контрола и етичка дисциплина.

Во отсуство на овие компоненти, секоја институција, па и СЈО, без оглед на иницијалната легитимација, останува подложна на злоупотреба и создавање нов центар на моќ. Токму тука лежи првиот системски дефект: институционалната архитектура не беше редизајнирана, туку само привремено заобиколена.

Затоа проблемот со СЈО не може да се сведе на дихотомијата „прогрес наспроти реставрација“. Институцијата не пропадна затоа што некој сакал да ја избрише правдата од меморијата, туку затоа што ја изгуби моралната и институционалната височина што ѝ беше доверена. Кога довербата еродира одвнатре, надворешната критика не е атентат, таа е последица.

Прва фаза: концентрација на моќ и усогласени исходи

Во почетната фаза постоеше силна концентрација на политичка моќ со директно или индиректно влијание врз обвинителството и судството. Во таков амбиент се оформил механизам на т.н. „усогласени спогодби“ – модел во кој правните постапки и политичко-финансиските интереси влегуваат во неформална интеракција.

Конфискацијата на имот, можностите за негов откуп, селективните обвиненија и контролираните постапки создадоа систем во кој законот не беше единствен критериум. Правната сигурност се замени со преговарачка логика, а законитоста стана зависна од политичка и финансиска калкулација на одредени инволвирани персони во случаите.

Институционалните празнини, недоволно јасните процедури, слаб надзор и недефинирани одговорности во комбинација со морални дефицити ја направија правдата ранлива на инструментализација. Аферата што ја потресе јавноста и апсењето на првиот човек на СЈО не беа изолиран инцидент, туку симптом на подлабока структурна слабост.

Втора фаза: адаптација на истиот модел

По укинувањето на СЈО и интеграцијата во ОЈО ГОКК, автономијата формално се зголеми. Но не следеше суштинска институционална реконструкција. Наместо демонтажа на претходниот модел, се случи негово инкорпорирање. Можеби целта беше дометастазирање на и онака метастазираниот систем.

Празнините што претходно овозможуваа политичка инструментализација сега овозможија селективност во нова конфигурација на моќ. Механизмите на неформални договори продолжија да функционираат, но со нови актери.

Ова укажува дека проблемот не е персонален, туку архитектонски. Институцијата не беше само жртва на притисоци, туку и носител на сопствени структурни слабости. Институциите не се самокоригираат, тие се приспособуваат на доминантната моќ доколку нема вградени ограничувачки механизми. А факт е дека тие не постоеа.

Улогата на меѓународниот фактор

Во овој период меѓународната поддршка беше повеќе насочена кон одржување на политичка стабилност отколку кон темелна институционална реконструкција. Овој нивен пристап не ги адресираше доволно јавно структурните слабости ниту инсистираше на јасна одговорност за злоупотребата на неконтролираната моќ и чудните неформални контакти и механизмот на усогласени спогодби.

Заклучок

Да се сведува судбината на СЈО на наратив за политичка реставрација значи да се игнорира суштинскиот дефект: слабата институционална архитектура и недоволната етичка одговорност. Проблемот не е само во тоа кој ја контролира институцијата. Проблемот е што институцијата дозволува да биде контролирана. Додека тие празнини останат, ќе се менуваат политичките гарнитури и наративите, но механизмот ќе остане ист.

Слабите институции и законските празнини создаваат простор за манипулација и селективна правда. Финансиските интереси овозможуваат повторување на селективните постапки, а моралните празнини ја олеснуваат злоупотребата на автономијата. Додека тие структурни дефекти не бидат надминати, секое сторено зло мора да биде именувано, санкционирано и институционално онеможено да се повтори.

The post СЈО меѓу митот и реалноста appeared first on plusinfo.mk.

Сведоштвата на обвинителката Лејла Кадриу од поранешното СЈО, се доказ за тоа како Зоран Заев го отвори правосудството како пупка. СЈО бил претворен во партиски штаб на СДСМ, изјави Валентин Манасиевски, член на ЦК на ВМРО-ДПМНЕ на денешната прес-конференција.

– Зоран Заев и СДСМ во тоа време ветуваа некаква вистина и правда за Македонија, но освен политички прогон, политичко монтирани случаи и изживување врз поранешни политичари, друго граѓаните не добија.

Обвинителката Кадриу, во интервју сведочи дека во еден момент, дури 4 адвокати на Зоран Заев, дошле во СЈО, да ги убедуваат обвинителите да се пуштат лица од притвор за предметот „Пуч’’. Биле убедувани да дадат позитивно мислење за да може предметот да се преземе од ОЈО ГОКК, за да може предметот да биде работен од токму СЈО. Истиот овој предмет, потоа бил и донесен во СЈО, спакуван во некакви кутии и обвиен со заштитна фолија. Овој предмет требало да го работат обвинителките Ленче Ристоска и Лиле Стефановска. Толку бил влечкан овој предмет и обвинителките не оделе на рочиштата, што според обвинителката Кадриу, овој предмет ден денес ако го најдеме некаде се уште би бил во некоја заштитна фолија, ниту отворен, ниту разгледан.

Дополнително, обвинителката Кадриу сведочи дека во уште минимум два предмети, додека таа била во СЈО, биле политички монтирани. Едниот е случајот за кој беше обвинета поранешната министерка за внатрешни работи, Гордана Јанкуловска, а другиот е случајот со Нешковски, случај со кој СДСМ излажа многу граѓани, ветуваше некаква вистина, за на крај да излезе дека нема никаква институционална одговорност.

Заев и СДСМ тогаш беа спремни да направат се само за да дојдат на власт и успеаја во намерите. Го лажеа својот народ и му ветуваа приказни, кои и ден денес се потврдуваат дека се лажни. СЈО и Катица Јанева беа користени само за Зоран Заев и СДС да дојдат на власт. По нивното искористување, сите знаеме како заврши таа приказна.

Затоа, го повикуваме ЈО да покаже дека се ослободило од канџите на Зоран Заев и СДС, и да ги истражи овие сведоштва на поранешната обвинителка од СЈО, Лејла Кадриу, за вистината конечно да излезе на виделина – рече Манасиевски.

The post АДВОКАТИ НА ЗАЕВ ГИ УБЕДУВАЛЕ ОБВИНИТЕЛИТЕ ДА УКИНУВААТ ПРИТВОРИ Манасиевски тврди дека СЈО функционирало како штаб на СДСМ appeared first on plusinfo.mk.

Поранешното Специјално јавно обвинителство наместо како независна институција делувало како партиски штаб на СДСМ – Зоран Заев и луѓе блиски до него давале насоки и директиви кој предмет ќе биде одработуван, каде ќе биде распореден и кој треба да биде обвинет, соопшти ВМРО-ДПМНЕ.

„Поранешната обвинителка од СЈО, Лејла Кадриу тврди дека четворица адвокати на Заев вршеле притисок врз обвинители за предметот „Пуч“. Во СЈО дошле 4 адвокати на Зоран Заев да ги убедуваат обвинителите да се пуштат лица од притвор за предметот „Пуч“. Биле убедувани да дадат позитивно мислење за да може предметот да се преземе од ОЈО ГОКК и да биде работен од СЈО“, се вели во соопштението.

Истиот овој предмет, се додава, потоа бил донесен во СЈО, спакуван во кутии и заштитна фолија.

„Овој предмет требало да го работат Ленче Ристоска и Лиле Стефановска. Предметот бил оставен да фаќа прав, а обвинителките не оделе на рочишта. Според обвинителката Кадриу, тој предмет и денес, ако се најде, сè уште би бил со заштитна фолија, ниту отворен, ниту разгледан. Кадриу тврди дека предметот бил префрлан и чуван без суштинска постапка, што отвора сомнежи за неговото реално процесирање. Кадриу посочува и дека најмалку уште два предмети, меѓу кои случаите поврзани со Гордана Јанкуловска и „Нешковски“, биле политички мотивирани и користени за постигнување одредени политички цели“, соопшти ВМРО-ДПМНЕ.

Поради сериозноста на изнесените тврдења неопходно е Јавното обвинителство темелно и непристрасно да ги истражи сите наводи, со цел вистината да излезе на виделина и да се утврди евентуална одговорност, се додава во соопштението.

„Само преку транспарентна и независна постапка може да се врати довербата на граѓаните во институциите и владеењето на правото“, порача ВМРО-ДПМНЕ.

The post СЈО ГО ПРЕЗЕДЕ, ПА НАМЕРНО ГО ЗАБОШОТИ ПРЕДМЕТОТ „ПУЧ“ Адвокати на Заев вршеле притисок врз обвинителите appeared first on plusinfo.mk.

Изјавите на поранешната обвинителка од СЈО Лејла Кадриу дека во институцијата постоеле сериозни проблеми и постапувања зад затворени врати, не се изненадување за правосудната фела, вели обвинителот Јово Цветановски во интервју за порталот Република.мк.

– Можеби за дел од јавноста изјавите на колешката Кадриу беа изненадување, но сигурен сум дека за правосудната фела, особено моите колеги обвинители, не. Кадриу само го потврди тоа што потајно се шпекулираше за случувањата зад затворени врати во СЈО. Сега тоа не се шпекулации, туку потврдување од сведок кој лично ги увидел состојбите – вели Цветановски.

Како јавен обвинител во Вишото јавно обвинителство Скопје, постапувајќи во втор степен по жалби во предмети на СЈО, Цветановски вели дека имал увид во повеќе нивни обвиненија.

– Во сите предметни обвиненија констатирани се голем број процесни пропусти – поднесени обвиненија со слаб корпус на докази, потпирајќи се само на незаконито прислушкуваните материјали, но и други недостатоци. Тоа беше презентирано пред Апелацискиот суд на јавни седници и расправи, а согласно внатрешните процедури изготвени се службени материјали доставени во Републичкото јавно обвинителство – наведува тој.

Според Цветановски, по згаснувањето на СЈО не била извршена комплетна ревизија на сите предмети и административни акти поврзани со СЈО.

– Предметите ги презедоа скоро истите јавни обвинители кои ги обработувале и во СЈО. Од тие причини во тој момент немало притисоци врз други обвинители, бидејќи немале контакт со тие предмети – вели Цветановски.

Затоа, според него, потребна е комплетна и независна ревизија на работата на СЈО, зашто таквиот пристап ќе овозможи да се утврдат дали СЈО работело законито, професионално и независно.

– Сепак, и од оваа временска дистанца не е касно, можност која ќе може да искористи новиот државен јавен обвинител. Јавниот обвинител со својата работа не смее да продуцира правна несигурност, туку напротив, треба да биде гарант за една правна држава во која секој граѓанин ќе биде сигурен во неселективната правда – вели Цветановски.

Обвинителот Цветановски тврди дека и кон него лично имало притисок. Клучниот момент, според него, бил предметот „Бонусите на СЈО“. Тој тврди дека од него било побарано да го потврди првостепеното решение за отфрлање на кривичната пријава против обвинители од СЈО, а откако донел спротивна одлука и го укинал решението на ОЈО за ГОКК, против него бил инициран надзор и дисциплинска постапка.

The post ПОТРЕБНА Е КОМПЛЕТНА РЕВИЗИЈА НА ПРЕДМЕТИТЕ ШТО ГИ РАБОТЕШЕ СЈО Обвинителот Цветановски вели дека сѐ уште не е доцна за тоа appeared first on plusinfo.mk.