Русија не сака отворена војна со НАТО, но се обидува со заплашување за да ја натера Европа да ја намали својата поддршка за Украина, изјави финскиот претседател Александар Стаб.

Во време кога има сè почести предупредувања за можна руска ескалација и напад во Европа, Стаб им испрати порака на европските партнери да останат смирени.

Во последните денови неколку високи европски функционери предупредија на зајакнување на руското хибридно војување. Полскиот премиер Доналд Туск изјави дека во „следните неколку месеци“ Москва би можела да лансира беспилотни летала или ракети на територијата на членките на НАТО кои ѝ помагаат на Украина. Шефот на чешката разузнавачка служба Михал Куделка изјави дека Русија би можела да изврши „ограничена инвазија, провокации со лажно знаме или масовна кампања за влијание во рок од неколку месеци, а не години.

Стаб, сепак, нуди поинаков став. Тој признава дека Европа мора да се подготви за „продолжување на хибридните напади и саботажи“, но предупредува дека не треба да „претерува со реакција“. Според него, целта на Москва е да ги заплаши сојузниците со цел да го забави доставувањето помош за Украина.

– Мора да бидеме многу внимателни и да разбереме дека Русија се обидува да ја дестабилизира и да ја исплаши Европа. Секој пат кога претерано реагираме на хибриден напад, тие всушност победуваат. Исто така, мора да разбереме дека Русија нема интерес и нема капацитет за целосна воена ескалација. Затоа тие ќе продолжат да заплашуваат, а ние мора да останеме смирени и собрани во оваа ситуација – рече Стаб, зборувајќи на маргините на Генералното собрание на ОН во Њујорк.

Тој ја пофали неодамнешната одлука на Германија да ја посочи Русија како одговорна за обидот за напад со беспилотни летала на аеродромот во Лајпциг.

– Токму тоа треба да се направи. Треба јасно да се стави до знаење: знаеме што правите и ќе има последици – рече финскиот претседател.

Од друга страна, Стаб предупреди на претерани реакции од страна на некои разузнавачки служби кои „практично велат дека ние сме следни“ во руската инвазија.

– Не гледаме докази за тоа. Сметам дека мора да бидеме претпазливи. Сепак, Финска ја дели најдолгата граница во НАТО со Русија, што е половина од вкупната граница на Алијансата. Нашите разузнавачки информации покажуваат дека има активност, но во моментов нема директна воена закана – рече Стаб.

Тој изрази умерен оптимизам во врска со средбата меѓу американскиот претседател Доналд Трамп и украинскиот претседател Володимир Зеленски, што треба да се одржи во Њујорк.

– Јасно е дека нема да постигнеме мировен договор оваа недела. Но, ако, на пример, добиеме идеја или рамка за прекин на огнот во Црното Море што би се однесувало на житото или на енергијата, мислам дека тоа би бил позитивен развој на настаните – посочи Стаб.

Тој додаде дека се надева на продолжување на мировните преговори во наредните недели, а овие преговори би можеле да вклучуваат и средба меѓу рускиот претседател Владимир Путин и украинскиот претседател Володомир Зеленски на самитот на Г20 во Мајами во декември.

– Ќе видиме што може да направи американскиот претседател Доналд Трамп пред Г20. Може ли да ги доведе Зеленски и Путин на иста маса – рече Стаб.

Додаде дека тоа е можно и дека ќе биде голем успех, иако преговорите во моментов се „далеку од тоа“.

Финскиот претседател ги отфрли шпекулациите дека би можел да стане главен европски преговарач во идните мировни преговори со Русија.

– Не, не мислам дека тоа е во план – рече Стаб.

Тој верува дека Европа нема да има таков претставник и ја гледа својата улога како „обезбедување поддршка од страна“.

The post СМИРЕТЕ СЕ ЕВРОПЕЈЦИ, РУСИЈА НЕМА ДА НЀ НАПАДНЕ Финскиот претседател уверен дека Москва нема сила за целосна ескалација appeared first on plusinfo.mk.