Српскиот претседател Александар Вучиќ потврди дека земјата ќе продолжи да добива руски гас до 31 март 2026 година, откако е постигнат нов тримесечен договор со Гcаспром. Тој изјави дека граѓаните можат да бидат спокојни бидејќи Србија има доволно резерви од гас и електрична енергија за целата зима.

– Имаме договор за продолжување на снабдувањето со гас за следните три месеци. Нека луѓето спијат мирно, Србија ќе има и електрична енергија и доволно гас за претстојната сезона – рече Вучиќ на свечениот прием во Палатата „Србија“.

Српскиот лидер неодамна ја нагласи потребата за инфраструктурна надградба на енергетската мрежа, потсетува српски Блиц.

– Треба многу да градиме. Ќе изградиме интерконектор до Северна Македонија и нафтовод до Романија. Тоа ќе ни овозможи сигурност и независност – изјави Вучиќ.

Лидерот на Србија додаде дека Белград има информации оти „Гаспром“ преговара со унгарската компанија „МОЛ“ за учество во српската нафтена компанија НИС, што може да донесе промени во сопственичката структура на енергетскиот пазар.

Српската влада веќе подолго време го поставува обезбедувањето енергетска независност како приоритет.

Вучиќ нагласи дека Србија мора да обезбеди долгорочна стабилност на пазарот, без разлика на можните европски санкции.

The post ГАСНИТЕ ВРСКИ СО МАКЕДОНИЈА И СО РОМАНИЈА ЌЕ НИ ДАДАТ СИГУРНОСТ Вучиќ се фали дека договорил руски гас до 31 март appeared first on plusinfo.mk.

Македонските граѓани и компании не треба да бидат загрижени дека ќе секне снабдувањето со гас, изјави денес министерката за енергетика Сања Божиновска.

Вчера, 20 октомври, Советот на Европската Унија го поддржаа предлогот за укинување на увозот на рускиот природен гас од 1 јануари 2026 година, но дека ќе има преоден период за склучените договори.

Краткорочните договори склучени пред 17 јуни 2025 година можат да продолжат до 17 јуни 2026 година, додека долгорочните договори можат да важат до 1 јануари 2028 година.

– Ние имаме долгорочен договор, што значи не важи одлуката за укинување на рускиот гас од 1 јануари 2026-та. Македонија троши 500.000 кубни метри и тоа не е некоја голема количина. Додека да престанат да важат долгорочните договори, би требал да биде готов гасоводот со Грција и не би требало да имаме проблеми. За сите оние кои немаат решение за гасот, алтернативни решенја ќе се бараат на ниво на Европската унија. Секако, нема да останеме без гас – изјави министерката Божиновска.

Гасот за скопјани е особено важен затоа што најголем дел од централното греење доаѓа од когенеративната гасна централа ТЕ-ТО.

Засега гас имаме само од гасоводот од Бугарија.

И во случај ако не го направиме гасоводот и не работи Александропулис  потенцираше дека не треба да се грижиме и оти нема да останеме без гас.

– Ќе има  решение на ниво на ЕУ, секако дека никој нема да не остави без гас, бидејќи тоа е исто и за Европа и за сите држави и не треба да не загрижува. Ние сме многу мали во однос на тоа што го трошат сите, рече Божиновска.

Таа потврди дека државава уредно ги плаќа фактурите за годишен закуп на капацитет во новиот терминал во Александрополис иако не работи.

– Можам да ги прашам колегите во ЕСМ, колку што знам не работеше, а ние ги плаќаме уредно  фактурите, кривични пријави беа поднесени и немаме инфорација дека нешто  е процесуирано. Се плаќаат 250.000 евра месечно, тоа е договор склучен на 15 години и мора да се плаќа – рече Божиновска.

Како што посочи, времето ќе покаже дали се плаќа за бадијала.

– Тоа треба да се види сега засега плаќаме нешто што ниту сме можеме да го користиме, ниту годинава ќе го користиме. Има ангажирано правни служби кои работат на тоа. Според тоа што е потпишано не може да се раскине договорот – рече Божиновска. 

The post НЕМА ОПАСНОСТ ДА НИ БИДЕ СОПРЕН ГАСОТ, ВЕЛИ БОЖИНОВСКА Македонија има долгорочен договор, до тогаш треба да профункционира гасоводот со Грција appeared first on plusinfo.mk.

Осум земји-членки на ЕУ продолжуваат да купуваат гас од Русија, иако Европската комисија презентираше план за забрана на увоз на руска енергија, изјави портпаролката ЕК за енергетика, Ана-Каиса Итконен.

Според неа, Белгија, Холандија, Франција, Шпанија и Португалија сè уште набавуваат руски течен природен гас, додека гас преку гасоводот Турски тек купуваат Грција, Словачка и Унгарија.

– Не знаеме каде точно завршува овој гас, бидејќи нема официјални информации за тоа. Знаеме каде гасот влегува во системот на ЕУ, но не знаеме каде останува и каде на крајот се троши – рече Итконен.

И покрај заложбите за намалување на зависноста, околу 19 проценти од увозот на гас во ЕУ сè уште доаѓа од Русија, што е значителен пад од 45 проценти, колку што изнесуваше пред 2022 година. По саботажата на цевководите Северен тек во 2022 година и прекинот на транзитот низ Украина, Турски тек остана единствената директна рута за руски гас до ЕУ.

Европската комисија соопшти дека земјите-членки продолжуваат да спроведуваат чекори за диверзификација на снабдувањето и проширување на инфраструктурата за течен природен гас, а истовремено работат на намалување на зависноста од рускиот гас. Ова вклучува одржување на залихи во подземни складишта и развој на алтернативни извори на енергија за подобрување на отпорноста на енергетскиот систем во Европа.

Порано оваа година, Брисел се откажа од идејата за целосна забрана за течен природен гас, поради противењето на неколку земји, вклучувајќи ги Унгарија и Словачка, но во мај презентираше план за целосно укинување на руските нафтоводи и гасоводи до крајот на 2027 година. Претседателката на Европската комисија, Урсула фон дер Лајен, неодамна изјави дека Унијата има намера да го суспендира увозот на руски течен природен гас од 1 јануари 2027 година, како дел од новиот пакет санкции.

The post 8 ДРЖАВИ ОД ЕУ СЀ УШТЕ КУПУВААТ РУСКИ ГАС Во план е целосна забрана на увоз на енергија од Русија во ЕУ appeared first on plusinfo.mk.

На 17 јуни, Генералниот директорат за енергетика предложи Регулатива на Европскиот Парламент и на Советот за постепено укинување на увозот на руски природен гас, подобрување на следењето на потенцијалните енергетски зависности и измена на Регулативата (ЕУ)2017/1938. Предложената регулатива има за цел решително постепено укинување на природниот гас и течниот природен гас (LNG) што потекнува од Руската Федерација, или се извезува директно или индиректно од неа, со што се спречува нивниот пристап до пазарот на Унијата.

Според законодавниот предлог што го поднесе Европската комисија во јуни годинава, ЕУ постепено и ефикасно ќе го запре увозот на руски природен гас и нафта до крајот на 2027 година. Ова, согласно so објаснувањето на Комисијата, ќе ја прекине изложеноста на ЕУ на пазарни и економски сигурносни ризици, поради зависноста од руските фосилни горива и на крајот ќе ја зголеми енергетската независност и конкурентност на Унијата.

Законодавниот предлог го следи Патоказот (Roadmap), кој Комисијата го усвои во месец мај годинава. Тој утврдува план на ниво на цела ЕУ за постепено и добро координирано укинување на увозот на руски природен гас, во дух на солидарност, додека се стреми кон чиста транзиција. Предлогот има за цел зачување на сигурноста во снабдувањето со енергија на ЕУ, а воедно да се ограничи какво било влијание врз цените и пазарите, како што е објаснето во придружната анализа.

Преостанатите количини на руски природен гас можат постепено да се укинат без значително економско влијание или ризици за сигурноста во снабдувањето, поради достапноста на доволно алтернативни трговци на глобалниот пазар на природен гас, добро поврзан пазар на природен гас на Унијата и достапноста на доволна инфраструктура за увоз во ЕУ.

Предложената Регулатива предвидува постепено запирање на гасните испораки преку цевководи како и на течниот природен гас што потекнува од Руската Федерација, или се извезува директно или индиректно од нејзина територија. Исто така, предлага мерки за да се олесни целосното запирање на увозот на руска нафта до крајот на 2027 година.

Имено, со разгорувањето на воените дејства во Украина во февруари 2022 година и во согласност со Версајската декларација на шефовите на држави и влади од 11 март 2022 година, Комисијата го започна Планот „REPowerEU“ на 18 мај 2022 година, за да овозможи целосна диверзификација од увозот на руска енергија на безбеден, достапен и одржлив начин. Планот се темели на долгогодишна политика за диверзификација, исто така наведена во Европската стратегија за енергетска сигурност и во Стратегијата за енергетска унија.

ЕУ го намали увозот на руски гас за 70%

Од 2022 година, ЕУ и нејзините земји – членки работеа на спроведување на Планот за заштеда на енергија, забрзување на транзицијата кон чиста енергија, зголемување на домашното производство на енергија, финализирање на клучната инфраструктура што овозможува понатамошна диверзификација на снабдувањето со природен гас и подобрување на енергетската дипломатија на ЕУ. Како резултат на тоа, Унијата успеа да го намали увозот на руски природен гас од 2021 до 2023 година за над 70%, од 150 милијарди кубни метри на 43 милијарди кубни метри, а цената на природниот гас значително се намали во однос на 2022 година кога цената на природниот гас скокна до плафон. Во 2024 година, увозот на руски природен гас во Унијата изнесуваше 53 милјарди кубни метри.

И покрај значителниот напредок и прекинот на транзитот на руски природен гас низ Украина, проценката за  увоз на рускиот природен гас во 2025 година е дека истиот повторно ќе има удел од 13% во вкупниот увоз на гас на Унијата. Бидејќи преостанатите количини на руски природен гас што се увезуваат во Унијата се сè уште значителни, Комисијата ги предложи горенаведените легислативи за целосно постепено укинување на увозот на руски природен гас и подобрување на постојната рамка за енергетска зависност.

Дополнително значителен дел од капацитетот за увоз на LNG е контролиран од страна на руски компании во одредени земји – членки, што создава ризик дека овие права за закуп на капацитет би можеле да се искористат за да се попречи увозот од алтернативни извори  преку практики на складирање на капацитети. Во минатото, случаите со складирање на природен гас доведоа до значителни нарушувања на пазарот, зголемени цени и закани за успешноста на кризните мерки предвидени за обезбедување на сигурноста во снабдувањето со природен гас.

Во 2024 година, 46% од увозот на LNG во Европа доаѓаше од САД, 16% од Русија, 11% од Алжир, 10% од Катар, 5% од Норвешка и 4% од Нигерија.

Увозот на руски природен гас во ЕУ целосно ќе прекине до крајот на 2027 година

Според предвидената временска рамка, увозот на руски природен гас во ЕУ, склучен согласно новите договори, ќе биде прекинат од 1 јануари 2026 година. Увозот според постојните краткорочни договори ќе биде прекинат до 17 јуни 2026 година, освен за оние гасни испораки до земјите членки на ЕУ кои немаат излез на море и се поврзани со долгорочни договори чие времетрање истекува до крајот на 2027 година. Увозот склучен согласно на долгорочните договори ќе биде целосно прекинат до крајот на 2027 година.

Склучувањето на долгорочни договори за услуги на терминали за LNG за клиенти од Русија, или контролирани од руски претпријатија, исто така ќе бидат забранет. Ова ќе обезбеди пренасочување на капацитетот на терминалот кон алтернативни снабдувачи, со што на крајот ќе се зголеми отпорноста на енергетските пазари.

Овој постепен пристап ќе помогне ефикасно да се запре увозот на руски природен гас, а воедно ќе се ограничат можните влијанија врз цените на енергијата во Унијата и ќе се избегне каков било ризик за сигурноста во снабдувањето.

Комисијата ќе ги поддржува земјите – членки во текот на целиот процес. Заедно со Агенцијата на ЕУ за соработка на енергетските регулатори (ACER), Kомисијата внимателно ќе го следи, напредокот и влијанијата на постепеното укинување на увозот на руски гас и нафта. Во случај сигурноста во снабдувањето со гас на една или повеќе земји-членки да биде загрозена, Комисијата може да преземе дополнителни мерки за кризна состојба.

Одредбите за подобрување на транспарентноста и следењето на рускиот гас на пазарите на ЕУ ќе ја поддржат ефикасната имплементација на забраната за увоз. Според предложената Регулатива, компаниите што имаат договори за снабдување со гас ќе мора редовно да доставуваат информации до Комисијата. Покрај тоа, увозниците на природен гас ќе мора да им ги обезбедат на царинските органи сите потребни информации што ќе го потврдат патот на движење на увезениот природен гас од неговото вистинско потекло до точката на увоз во Унијата.

Предложената Регулатива ќе го следи процесот на заедничко одлучување за легислативата, што значи дека ќе треба да биде усвоена од Европскиот парламент и Советот.

Да не се потцени „Моќта на Сибир 2“

Согласно на информациите пласирани од страна на руски Газпром, на маргините на самитот на ,,Шангајската организација за соработка“, кој се одржа неделава во градот Тјенџин, Н.Р. Кина, меѓу другото беше потпишан и правно обврзувачки Меморандум за изградба на гасоводот „Моќта на Сибир 2“ со националната кинеска нафтена корпорација. Се очекува гасоводот „Моќта на Сибир 2“, долг 2.600 километри, да поминува низ Монголија и да стане оперативен на почетокот на 2030 година.

За разлика од „Моќта на Сибир 1“, кој транспортира природен гас од гасните полиња во Источен Сибир, новиот гасовод ќе транспортира природен гас од Јамал и Западен Сибир, односно од истите гасни полиња од кои се транспортира природниот гас кон земјите на Западна Европа. Гасоводот „Моќта на Сибир 2“со проектиран годишен капацитет од 50 милијарди кубни метри, во комбинација со планираното зголемување на капацитетот на постојните гасни рути на 56 милијарди кубни метри, би го зголемил вкупниот извозен капацитет на Русија во Кина на нешто над 100 милијарди кубни метри годишно.

За споредба, вкупниот увоз на природен гас во Кина во 2024 година изнесуваше приближно 180 милијарди кубни метри. Дополнително на ова, Кина има и свое производство на гас кој ланската година изнесуваше 246 милијарди кубни метри. За Русија, удвојувањето на капацитетот за извоз на гас во Кина значи компензација на намалената продажба на природен гас во Европа поради кои руски Газпром се најде во сериозни финансики потешкотии.

Кина и Русија ќе ја оспорат доминација на американскиот течен гас

Актот на склучување на договорот за реализација на гасоводот „Моќта на Сибир 2“ на самитот во Кина, не само што означува пресвртница во траекторијата на протокот на руски природен гас преку цевководниот систем на земјата, туку од страна на некои светските аналитичари беше протолкуван и како политичка потврда за постоењето на новиот Мултиполарен поредок во светот.

Имено, овие настани се случуваат во услови кога постои растечка загриженост на Пекинг од аспект на енергетската сигурност, а се поврзани со нејзината зависност од увозот на LNG. Иако клучните комерцијални параметри сè уште не се преговарани, проектот „Моќта на Сибир 2“ би можел да предизвика големи турбуленции на глобалниот пазар на течен природен гас.

Дополнително пристигнувањето на санкционираниот (од САД) руски товар на течен природен гас од постројката „Arctic LNG 2“ во земјата на испорака – Кина, е доволен сигнал дека двете земји се движат кон оспорување на доминанцијата на американскиот течен природен гас.

Меморандумот, исто така, ја нагласува и преференцата на Пекинг да увезува природен гас преку цевководи наместо течен природен гас, по неодамнешните настани што отворија низа на прашања за сигурноста на увозот на течен природен гас од двата најголемите извозници на LNG во светот. Трговската војна помеѓу САД и Кина ги натера кинеските увозници на течен природен гас да ја намалат трговијата со американски течен природен гас речиси на нула, поради воведувањето на високи царини на американските испораки на течен природен гас од страна на Пекинг во февруари годинава, како одмазднички мерки на политиката на САД. Конфликтот меѓу Иран и Израел во јуни годинава, дополнително го истакна ризикот за  увоз на течен природен гас (во износ од 30%) во Кина преку трасата што поминува низ Ормутскиот теснец поради неговото затворање од страна на иранскиот парламент во јуни годинава.

Импликации на глобалниот пазар на гас

Проектот „Моќта на Сибир 2“ и проширувањето на другите два постојни гасоводи би додале 58 милијарди кубни метри дополнителен капацитет на испораките на природен гас до Кина, што како каузалитет би предизвикало намалена побарувачка на течен природен гас во земјата.

Иако дополнителните 8 милијарди кубни метри годишно од двете проширувања на цевководите до 2031 година само маргинално ќе влијаат на среднорочната побарувачка на течен природен гас во Кина (105 милијарди кубни метри LNG годишно), тоа ќе биде уште еден фактор за пад на побарувачката на течен природен гас во време кога се очекува на светскиот пазар да се пласираат дополнителни 360 милијарди кубни метри нови LNG капацитети на почетокот на 2030 година.

Влијанието на транспортот на природен гас преку цевководите врз глобалните пазари за LNG ќе зависи од тоа дали и колку брзо капацитетот на „Моќта на Сибир 2“ ќе се зголеми во текот на 2030 година и колку целосно ќе се искористи. Дури и со 50 проценти искористеност на капацитетот на „Моќта на Сибир 2“ се очекува продолжување на трендот од крајот на 2020 година, кога на пазарот имаше прекумерни количини на природен гас за потрошувачите – што секако ќе влијае на падот на цените, намалување на јазот помеѓу понудата и побарувачката на LNG во 2030 година, зголемување на неизвесноста во носењето на инвестициските одлуки за некои проекти за LNG, како и лимитирање на маневарските способности на компаниите за LNG од Катар во обезбедувањето на дополнителни договори со Кина за нивните неискористени капцитети.

Во меѓувреме, кинеските договори за годишна набавка на LNG во износ од околу 75 милијарди кубни метри, истекуваат во 2030-та година. Пристапот до евтин руски природен гас би им дал на кинеските компании моќна алатка за преговарање, пружајќи им слобода да ги продолжат само оние договори што најдобро се совпаѓаат со нивните потреби во однос на капацитетот, цените и геополитиката. Австралија, Катар и играчите од портфолиото ќе бидат особено изложени на ризик од договорно раскинување.

Овие договори, исто така, ќе ја зголемат меѓурегионалната трговија на природен гас преку цевководи, која значително се намали по војната во Украина, како и изложеноста на Азија на снабдување со природен гас преку цевководи. Иако останува неизвесно дали Кина ќе ја замени Европа како глобален пазар за балансирање – бидејќи овие испораки преку цевководи веројатно ќе станат поевтини од испораките на LNG,  кинеските компании со големи портфолија на LNG, вклучувајќи го и американскиот LNG, ќе станат сè помоќни во арбитражата меѓу регионите.

Пекинг ја зацврстува својата позиција

Без разлика во која конотација се гледа потпишаниот меморандум за „Моќта на Сибир 2“ од страна на светските аналитичари, во поширока смисла истиот укажува на промена на  пејзажот на глобалните енергетски односи. Ова пренасочување на значителни количини на природен гас би имало каскадни ефекти низ глобалните пазари на природен гас, потенцијално влијаејќи врз цените на европските и на азиските пазари.

Развојот на гасоводниот проект би ја зацврстил позицијата на Кина како примарен пазар за раст за природен гас во наредните децении, потенцијално давајќи му на Пекинг зголемено влијание врз динамиката на глобалниот пазар на природен гас.

(Авторот е експерт за гас)

The post АНАЛИЗА Кина е новиот голем играч на глобалниот пазар на гас – таа го закупува рускиот гас што ЕУ го бојкотира! appeared first on plusinfo.mk.

Словачка нема да поддржи нов пакет санкции на Европската Унија против Русија и ќе побара одложување на гласањето додека не се разгледаат загриженостите на оваа земја за снабдувањето со гас по 2027 година, изјави словачкиот премиер Роберт Фицо, пренесоа британските медиуми.

Фицо го повтори својот став дека плановите за прекин на увозот на руски гас од 2028 година претставуваат закана од недостиг на снабдување и зголемување на цените, како и потенцијални загуби од арбитража поради прекршување на долгорочен договор со рускиот снабдувач Газпром.

The post ФИЦО ГО КОЧИ БРИСЕЛ ЗА САНКЦИИТЕ КОН МОСКВА Словачка не се откажува од руски гас ни по 2028 година appeared first on plusinfo.mk.

Данска, Естонија, Летонија, Литванија, Финска и Шведска во писмо упатено до Европската Комисија предлагаат дополнително да се намали максималната дозволена цена за увоз на руска нафта. Според правилата поставени од Г7, западните компании можат да набавуваат руска нафта до максимално утврдената од 60 долари за барел.

Во писмото на шесте балтички земји се нагласува дека е потребно „понатамошно зголемување на влијанието на европските санкции“, со намалување на максимално утврдената цена за увоз на руска нафта.

Г7 го воведе оваа ограничување за да ги намали приходите на Москва од извозот на нафта, но при утврдување на висината на цената на рускиот енергенс се водеше сметка за задржување на стабилноста на глобалните енергетски пазари.

Ваквото ограничување беше воведено врз основа на прогнозите дека во 2025 година ќе има глобален суфицит на понудата на нафта и како привремено решение до евентуално осмислување на построги мерки.

Шесте земји членки на ЕУ сега наведуваат дека со нивниот предлог дополнително ќе се намалат руските приходи, а нема да се предизвикаат „значителни нарушувања“ на глобалните нафтени пазари. Според нив, меѓународниот пазар на нафта моментно е добро снабден, со што нема значителен ризик од пазарен шок поради намалувањето на лимитот цената на рускиот енергенс.

Енергетски експерти посочуваат дека западните санкции, но и нападите на украинските дронови веќе го нарушија производството на нафта во Русија, а три рафинерии во реонот на Црното Море запреа со работа или работат со намален капацитет.

Според експертите, ова, заедно со ограничениот капацитет за складирање, ја принуди Русија да продава нафта на други земји со попусти и по пониски цени и да прифаќа повисоки каматни стапки, што дополнително ги оптоварува капацитетите на рускиот нафтен сектор.

Овие земји членки на ЕУ, заедно со Ирска, Полска, Романија и Чешка, побараа од ЕК да воведе и целосна забрана за увоз на обичен гас и течен природен гас (ЛНГ) од Русија.

„Како крајна цел, неопходно е да се забрани увозот на руски гас и ЛНГ што е можно поскоро“, се наведува во документот инициран од десетте земји.

Ваквиот предлог доаѓа во време кога Европската Комисија работи на подготовка на 16-от пакет санкции кон Русија, кој би требало да биде објавен во пресрет на третата годишнина од руската агресија врз Украина, што започна во февруари 2022 година.

ЕУ досега го забрани увозот на руски гас по морски пат, но и натаму овозможува негова дистрибуција преку системот на гасоводи до земјите членки, кои и натаму се зависни од него.

Со новата иницијатива се бара целосен прекин на дистрибуцијата на гасот преку гасоводите, како и забрана за пристап на руските танкери за ЛНГ во ЕУ.

Предлагачите наведуваат дека на овој начин дополнително ќе се намалат приходите на Москва, како и дека иницијативата оди во прилог на плановите на ЕУ за целосен прекин на употребата на руски фосилни горива во перспектива.

Но, за воведување на ваквата забрана ќе биде потребен консензус од страна на земјите на ЕУ, што засега е тешко веројатно да биде постигнат, од причина што некои членки, како Словачка, Унгарија и Бугарија и натаму се зависни од рускиот гас.

The post ШЕСТ БАЛТИЧКИ ДРЖАВИ ТРГНАА ВО ОФАНЗИВА ПРОТИВ РУСКИТЕ ЕНЕРГЕНТИ ВО ЕУ Бараат целосна забрана за увоз на гасот и пониска максимална цена за нафтата appeared first on plusinfo.mk.

Рускиот енергетски гигант Газпром во средата соопшти дека извозот на гас преку Украина во Европа е прекинат во 8 часот по московско време, бидејќи договорот за транзит истекол.

Украина во средата соопшти дека транзитот на руски природен гас низ нејзина територија е суспендиран од 7 часот наутро по локално време, наведувајќи ја „националната безбедност“.

– Го запревме транзитот на руски гас. Ова е историски настан – изјави министерот за енергетика Герман Галушченко. Соопштението на украинското Министерство за енергетика уследи по истекот на петгодишниот договор меѓу Гаспром и украински Нафтогас.

– Русија ги губи своите пазари, ќе претрпи финансиски загуби. Европа веќе донесе одлука да се откаже од рускиот гас – рече министерот Галушченко.

Деценија на затегнати односи

Затворањето на најстарата руска рута за гас за Европа стави крај на една деценија на тензични односи предизвикани од руското заземање на Крим во 2014 година. Украина престана да купува руски гас веќе од следната година.

Запирањето на протокот на гас се очекуваше поради војната, која започна во февруари 2022 година. Украина беше категорична дека нема да го продолжи договорот.

Транзитот на гас преку Украина сочинуваше приближно половина од вкупниот извоз на гас на Русија преку цевководи до Европа.

Русија сè уште извезува гас преку гасоводот Турски тек на дното на Црното Море. Турски тек има две линии – едната за турскиот пазар, а другата за снабдување на потрошувачите во Централна Европа, вклучувајќи ги Унгарија и Србија.

Европската унија ги удвои напорите за намалување на зависноста од руската енергија по избувнувањето на воениот конфликт во Украина во 2022 година, барајќи алтернативни извори.

Останатите купувачи на руски гас преку Украина, како Словачка и Австрија, исто така се договорија за алтернативни испораки.

Во декември Австрија реши да го раскине долгорочниот договор со Гаспром, Словачка му се закани на Киев со одмазда.

Закани од Словачка

Словачкиот лидер Роберт Фицо, еден од ретките сојузници на Кремљ во ЕУ, ја осуди одлуката на Киев и како одговор отпатува за Москва за да се сретне со Путин.

„Прифаќањето на едностраната одлука на украинскиот претседател е целосно ирационално и погрешно“, му напиша Фицо на Брисел, нагласувајќи „голем финансиски ефект во комплициран економски период“.

Словачкиот премиер се закани дека ќе го прекине снабдувањето со електрична енергија што очајно и треба на Украина, бидејќи нејзината сопствена енергетска инфраструктура е оштетена од речиси тригодишно систематско руско бомбардирање.

Молдавија, некогаш дел од Советскиот Сојуз, е една од најтешко погодените земји. Таа вели дека сега ќе мора да воведе мерки за намалување на потрошувачката на гас за една третина и прогласи вонредна состојба од 60 дена.

„Поради постојаното и јасно изразено одбивање на украинската страна да ги обнови тие договори, Гаспром е лишен од техничката и правната можност да испорачува гас за транзит низ територијата на Украина од 1 јануари 2025 година“, се вели во соопштението на Гаспром на апликацијата за пораки Телеграм.

Украина сега се соочува со загуба од 800 милиони долари годишно како транзитни такси од Русија, додека Гаспром ќе загуби речиси 5 милијарди долари од продажбата на гас.

Русија и поранешниот Советски Сојуз потрошија половина век обезбедувајќи голем дел од европскиот пазар на гас, кој на својот врв беше околу 35 отсто, но војната речиси го уништи тој бизнис за Гаспром.

Гасоводот Јамал-Европа преку Белорусија исто така беше затворен, а гасоводот Северен тек преку Балтичкото Море до Германија беше кренат во воздух во 2022 година.

Во комбинација, различните транзитни рути испорачаа рекордни 201 милијарда кубни метри гас во Европа во 2018 година.

Русија испорача околу 15 милијарди кубни метри гас преку Украина во 2023 година, што е намалување од 65 милијарди кубни метри кога започна последниот петгодишен договор во 2020 година.

The post РУСИЈА И УКРАИНА ГУБАТ МИЛИЈАРДИ, МОЛДАВИЈА СЕ СМРЗНУВА, СЛОВАЧКА СЕ ЗАКАНУВА Ова се последиците од прекинот на испорака на руски гас за Европа преку Украина appeared first on plusinfo.mk.

Европската комисија ја отфрли можноста за значителни последици од денешниот прекин на транзитот на руски гас преку Украина, наведувајќи дека тоа се очекувало и дека Европската унија е подготвена.

– Европската инфраструктура за пренос на гас е доволно флексибилна за да обезбеди гас од неруско потекло за Централна и Источна Европа преку други рути. Од 2022 година ја зајакнавме нашата мрежа со значителни нови можности за увоз на течен природен гас – изјави денеска претставник на Европската комисија, пренесува БТА.

Украинското министерство за енергетика претходно соопшти дека утрово го прекина транспортот на руски гас низ земјата.

„Во 7 часот, во интерес на националната безбедност, беше прекинат транспортот на руски природен гас преку територијата на Украина“, соопшти украинското Министерство.

Во соопштението се наведува дека Украина за ова ги известила меѓународните партнери, согласно утврдената процедура.

„Го запревме транзитот на руски гас, одбележувајќи историски настан. Русија ги губи пазарите и ќе се соочи со финансиски загуби. Европа веќе одлучи да се откаже од рускиот гас“, наведе украинското министерство за енергетика.

The post ЕВРОПА МОЖЕ БЕЗ РУСКИОТ ГАС Европската комисија не очекува последици од прекинот на транзитот на гас преку Украина appeared first on plusinfo.mk.

Украина соопшти дека транзитот на руски природен гас низ нејзината територија е суспендиран од 7 часот наутро по локално време, поради „националната безбедност“.

– Го запревме транзитот на руски гас. Ова е историски настан – изјави министерот за енергетика Герман Галушченко.

Потегот на киевското Министерство за енергетика уследи по истекот на петгодишниот договор меѓу Гаспром и украински Нафтогас.

– Русија ги губи своите пазари, ќе претрпи финансиски загуби. Европа веќе донесе одлука да се откаже од рускиот гас – рече Галушченко.

Затворањето на најстарата руска рута за гас за Европа стави крај на еднодецениските тензични односи предизвикани од руското заземање на Крим во 2014 година. Украина престана да купува руски гас следната година.

Вчера, 31 декември, „Газпром“ го намали протокот на гас низ украинската територија од 42,4 на 37,2 милиони кубни метри.

„Поради постојаното и јасно изразено одбивање на украинската страна да го обнови договорот за транзит, Гаспром е лишен од техничката и од правната можност да испорачува гас за транзит низ територијата на Украина од 1 јануари 2025 година“, објави Гаспром на мрежата Телеграм.

Запирањето на протокот на гас се очекуваше поради војната која започна во февруари 2022 година. Украина беше категорична дека нема да го продолжи договорот.

Транзитот на гас преку Украина сочинуваше приближно половина од вкупниот руски извоз на гас преку цевководи до Европа.

Русија сè уште извезува гас преку гасоводот „Турски тек“ на дното на Црното Море. Турски тек има две линии – едната за турскиот пазар, а другата за снабдување на потрошувачите во Централна Европа, вклучувајќи ги Унгарија и Србија.

Европската Унија ги удвои напорите за намалување на зависноста од руската енергија по избувнувањето на воениот конфликт во Украина во 2022 година, барајќи алтернативни извори. Останатите купувачи на руски гас преку Украина, како Словачка и Австрија, исто така, се договорија за алтернативни испораки. Во декември Австрија одлучи да го раскине долгорочниот договор со Гаспром, а Словачка му се закани на Киев со одмазда.

The post УКРАИНА ГО СОПРЕ ТРАНЗИТОТ НА РУСКИ ГАС, ГАСПРОМ УТРОВО ЈА ПРЕКИНА ИСПОРАКАТА Крај на ерата на руски евтин гас во ЕУ appeared first on plusinfo.mk.

Прекинот на испораката на руски гас преку Украина ќе има огромни последици за Европската унија, која ќе се соочи со загуби од дури 120 милијарди евра во периодот од 2025 до 2026 година. Ова го изјави словачкиот премиер Роберт Фицо, кој нагласи дека одлуката на украинскиот претседател Володимир Зеленски за прекин на транзитот на руски гас ќе ја чини Европа значително.

– Европската унија ќе загуби околу 50 милијарди евра поради недостигот од гас, додека дополнителни 70 милијарди евра ќе бидат изгубени поради проблемите со електричната енергија што се произведува од гас – објасни Фицо.

Според него, оваа одлука на Украина ќе има сериозни економски последици и ќе ја доведе Европа во финансиска криза.

Тој истакна дека овие штети ќе се чувствуваат особено во Словачка, преку која транзитира рускиот гас, но и во другите европски земји кои зависат од овие испораки. Проблемите со снабдувањето со енергија се очекува да ја зголемат цената на гасот и електричната енергија во Европската унија и да предизвикаат нови економски тешкотии.

The post УКРАИНА ЌЕ ЈА ЧИНИ ЕУ 120 МИЛИЈАРДИ ЕВРА Фицо предупредува на катастрофални последици од прекинот на руски гас appeared first on plusinfo.mk.