Европа во моментов е директно вклучена во конфликтот во Украина и поради тоа не може да биде посредник во решавањето на кризата, изјави денеска портпаролот на Кремљ, Дмитриј Песков.

Според Песков, европското оружје „директно пука кон Русија“, поради што Москва не може да ја гледа Европа како неутрална страна во евентуалните мировни преговори.

Тој оцени дека војната во Украина би можела побрзо да заврши доколку западните земји престанат да испорачуваат оружје за Киев.

Во таа насока, Песков позитивно ја коментираше одлуката на новиот унгарски премиер, Петер Маѓар, Будимпешта да не испраќа оружје во Украина.

– Москва може само да го поздрави ставот на секоја држава која смета дека не треба дополнително да се додава масло на огнот – изјави портпаролот на Кремљ.

Осврнувајќи се на односите со Европската Унија, Песков оцени дека најголемата грешка на Брисел е целосното прекинување на дијалогот со Москва.

Според него, проблемите не можат да се решат без директни разговори, а позитивен сигнал е тоа што во Европа сè почесто се отвора прашањето кој би можел да воспостави комуникација со Русија.

Сепак, додаде дека во моментов нема конкретни предлози за европски претставник кој би го водел евентуалниот дијалог со Москва.

The post ЕВРОПСКОТО ОРУЖЈЕ ПУКА КОН РУСИЈА Песков ја отфрла ЕУ како неутрален посредник appeared first on plusinfo.mk.

Украинскиот претседател Володимир Зеленски денеска порача дека Русија продолжува со нападите врз Украина и покрај предлогот на Киев за примирје.

Тој ја критикуваше Москва за барањето краток прекин на огнот околу 9 мај.

– Треба да воспоставиме мир, а не да одиме по светските престолнини и да молиме за пауза на 9 мај. Ни треба мир – изјави Зеленски.

Украинскиот лидер предупреди дека Киев ќе продолжи со нападите со долг дострел доколку Русија не ги запре своите напади.

Зеленски тврди дека руските сили денеска извршиле напади со беспилотни летала, ракети и гранати.

Украинската армија соопшти дека соборила 92 од 102 руски дронови.

Портпаролката на руското Министерство за надворешни работи, Марија Захарова, вчера изјави дека Русија ги предупредила дипломатските мисии да го напуштат Киев во случај на можен масовен напад од страна на Москва како одговор на украинските обиди да го попречат Денот на победата.

– Овие јавни закани за напад се дел од неодговорните тактики на ескалација на Русија – изјави Анвар Ел-Ануни, портпарол на канцеларијата за надворешна политика на Европската унија.

Европската унија „нема да ја промени својата позиција или своето присуство“ во Киев, потврди портпаролот денеска, и покрај заканите од Русија.

Од Европската Унија возвратија дека нема да го менуваат своето присуство во украинскиот главен град.

The post НИ ТРЕБА МИР, А НЕ ДА МОЛИМЕ ЗА ПРИМИРЈЕ Зеленски се жали, кој ќе го попречи мирот на 9 мај? appeared first on plusinfo.mk.

Германскиот канцелар Фридрих Мерц порача дека Украина можеби ќе се соочи со тешка одлука – дел од нејзината територија да остане надвор од контрола на Киев, доколку тоа значи отворање на патот кон членство во Европска Унија.

Говорејќи пред ученици во Марсберг, Мерц оцени дека во одреден момент ќе мора да се постигне договор со Русија.

– Во одреден момент Украина ќе потпише прекин на огнот, а потоа и мировен договор. Тогаш можеби дел од територијата повеќе нема да биде украинска – изјави тој.

Референдум и европска перспектива

Мерц посочи дека украинскиот претседател Володимир Зеленски би можел да побара поддршка од граѓаните преку референдум за ваков договор.

– Ако Зеленски сака да добие мнозинство, мора истовремено да им каже дека им го отвора патот кон Европа – додаде германскиот канцелар.

Членството не е блиску

И покрај поддршката за европската перспектива на Украина, Мерц предупреди дека членството не може да се случи брзо.

– Плановите за влез во ЕУ во 2027 или дури 2028 година не се реални – нагласи тој, додавајќи дека земјата прво мора да исполни строги критериуми, особено во делот на владеење на правото и борбата против корупцијата.

Предлог за постепено приближување

Како можно решение, Мерц предложи т.н. претпристапен модел – Украина да учествува во институциите на ЕУ како набљудувач, но без право на глас.

Овој пристап, според него, веќе добил поддршка од дел од европските лидери на неодамнешниот самит во Кипар, на кој присуствувал и Зеленски.

Политички пречки и финансиска поддршка

Напредокот на Украина кон ЕУ досега беше блокиран од унгарскиот премиер Виктор Орбан, но последните политички промени во Унгарија отворија нови надежи за напредок.

Во меѓувреме, Европската Унија одобри финансиска поддршка од 90 милијарди евра за Украина, со цел да се покријат нејзините потреби до 2027 година, иако меѓу земјите членки сè уште постојат поделби околу темпото на проширување.

The post УКРАИНА ПРЕД ТЕШКА ОДЛУКА Дел од територијата можеби ќе се изгуби за ЕУ, вели Мерц appeared first on plusinfo.mk.

Русија изрази подготвеност да помогне во решавањето на конфликтот со Иран, соопшти Кремљ. Според официјалните информации, претседателот Владимир Путин веќе разговара со лидерите на земјите од Блискиот Исток со цел да се најде пат кон деескалација на тензиите.

Портпаролот на Кремљ, Дмитриј Песков, изјави дека Путин „продолжува со контактите“ и дека Москва е подготвена да придонесе во пренасочување на воената ситуација кон мирно решение во најкраток можен рок. Според него, смирувањето на тензиите може да се постигне единствено преку преговори.

Песков се осврна и на говорот на американскиот претседател Доналд Трамп, кој изјави дека размислува за повлекување на САД од НАТО. Портпаролот повтори дека Москва ја смета Алијансата за „непријателска“.

Воедно, Кремљ посочува дека евентуален руско-арапски самит би можел да послужи како платформа за дијалог и намалување на последиците од конфликтите во регионот.

Потсетувањето доаѓа во време кога Русија веќе четири години води војна во Украина, што дополнително ја усложнува геополитичката ситуација.

The post ПУТИН НУДИ ПОСРЕДУВАЊЕ Русија подготвена да помогне во конфликтот со Иран appeared first on plusinfo.mk.

Париз и Лондон наводно работат на обезбедување нуклеарно оружје за Украина, или барем на таканаречена „валкана бомба“, тврди руската Служба за надворешно разузнавање СВР.

Според руското СВР британската и француската елита не сакале да го прифатат поразот во Украина и затоа разгледувале екстремни мерки. Информацијата ја пренесе руската агенција ТАСС.

Во соопштението се додава дека Берлин одбил да учествува во, како што ја нарекуваат, опасната иницијатива.

Информациите на руското СВР не се потврдени од западни извори. Објавата на службата доаѓа на четиригодишнината од војната во Украина.

„Таен трансфер на компоненти“

„Киев би можел да се стреми кон поповолни услови за прекин на непријателствата ако поседува нуклеарна или барем таканаречена валкана бомб“, се вели во соопштението на СВР.

Според истата служба, Лондон и Париз наводно работеле на снабдување на Украина со такво оружје и со средства за негова испорака.

„Ова вклучува таен трансфер на релевантни компоненти, опрема и технологии од европско производство во Украина. Француската мала боева глава ТН-75 од балистичката ракета М51.1 лансирана од подморница се разгледува како опција“, наведува СВР.

Кршење на Договорот за неширење?

„Планот грубо го крши меѓународното право, првенствено Договорот за неширење на нуклеарно оружје, и носи ризик од уништување на глобалниот систем за неширење“, се вели во соопштението.

СВР тврди дека Британија и Франција биле свесни оти украинските вооружени сили немаат шанса да постигнат победа над Русија и затоа, како што наведуваат, се обидувале евентуалното нуклеарно вооружување да изгледа како домашен украински развој.

Предупредување од Москва

„Екстремно опасните планови на Лондон и Париз докажуваат дека тие го изгубиле контактот со реалноста“. соопшти руската служба.

Руската СВР додава дека нивните надежи за избегнување на одговорност се неосновани.

„Ништо скриено на крајот нема да остане неоткриено“.

Во моментот нема официјална потврда од Велика Британија, Франција или од Украина за вакви тврдења.

The post КИЕВ ЌЕ ДОБИЕ МАТЕРИЈАЛИ ЗА „ВАЛКАНА РАДИОАКТИВНА БОМБА“?! Москва обвинува за таен план на Лондон и Париз appeared first on plusinfo.mk.

The post ЗЕЛЕНСКИ МУ КАЖА „НЕ“ НА ТРАМП Годишнината од војната не е ден за избори appeared first on plusinfo.mk.

Украина и Русија денеска ќе одржат директни разговори во Абу Даби во обид да се најде решение за завршување на војната што трае речиси четири години, јавува германската новинска агенција ДПА.

Датумот на разговорите го потврдија и Кремљ и украинскиот претседател Володимир Зеленски, но без да прецизираат дополнителни детали.

Директните преговори меѓу Москва и Киев беа обновени пред една недела по подолга пауза. Тие се одржаа зад затворени врати, а посредуваа Соединетите Американски Држави преку својот главен преговарач Стив Виткоф. Овој пат, завојуваните страни ќе преговараат без американски претставници.

Иако преговарачките тимови повеќепати ги опишаа разговорите како конструктивни, мировен договор сè уште не е на повидок, а територијалните прашања остануваат клучна точка на несогласување.

Русија бара Киев да се повлече од делови од источниот украински регион Донбас, особено од областите околу Доњецк и Луганск, кои сè уште се под украинска контрола. Зеленски повеќепати ја отфрли можноста за територијални отстапки.

Украинската делегација ќе ја предводи главниот преговарач Рустем Умеров, додека на чело на руската делегација ќе биде Игор Костјуков, шеф на воената разузнавачка служба ГРУ.

На барање на американскиот претседател Доналд Трамп, Русија се согласи привремено да ги запре нападите врз енергетската инфраструктура поради екстремниот студ и веќе обемните оштетувања во Киев и други градови. Сепак, нападите врз други цели продолжија.

Портпаролот на Кремљ, Дмитриј Песков, во петокот изјави дека ограниченото примирје ќе трае само до недела, со цел да се обезбеди „добра основа“ за мировните преговори.

Зеленски изјави дека не постои формален договор за привремен прекин на огнот, но вети дека Украина нема да напаѓа руски енергетски цели доколку Русија се придржува до своето ветување.

Украина речиси четири години се брани од руската инвазија со поддршка од Западот.

The post МОЖНО ЛИ Е ДА ГИ НАДМИНАТ РАЗЛИКИТЕ Москва и Киев на втора рунда преговори, но без посредник appeared first on plusinfo.mk.

Европа се соочува со најсериозна безбедносна криза по Студената војна и мора брзо да ја зајакне одбраната, порача хрватскиот премиер Андреј Пленковиќ во обраќањето во Париз, каде нагласи дека континентот се наоѓа на „историска пресвртница“ и дека институционалната и енергетската стабилност веќе не се подразбираат.

Пленковиќ, кој говореше на предавањето во Францускиот институт за меѓународни односи (IFRI) под наслов „Европа на крстопат: Потврдување на суверенитетот во свет во промена“, предупреди дека европската безбедност е загрозена, а дел од темелите на трансатлантските односи се нарушени.

Тој истакна дека агресијата на Русија врз Украина, растечките хибридни закани и забрзаното производство на оружје во Русија ја поставиле Европа пред најопасната безбедносна ситуација во последните децении. Според него, европската индустрија, залихите и воените инвестиции мора да се прилагодат на противник кој го ставил целото стопанство во функција на војната.

– Затоа Европа мора да ја прилагоди својата индустрија, залихи и инвестиции за да одговори на противникот кој своето стопанство го стави во служба на војната – рече Пленковиќ.

Хрватскиот премиер посочи дека неговата земја го зголемила одбранбениот буџет тројно во помалку од една деценија и дека до 2027 година ќе инвестира 2,5% од БДП во одбрана, додека до 2030 година таа бројка ќе достигне 3%. Тој подвлече дека Хрватска е меѓу водечките производители на „FPV“ дронови во светот и одржува тесна соработка со Холандија и Летонија во коалицијата за дронови.

Пленковиќ додаде дека хрватските компании контролираат околу 80% од глобалниот пазар за машини за далечинско разминирање, а Хрватска од 2022 година и помогнала на Украина со 317 милиони евра и примила 30.000 украински бегалци.

Говорејќи за Украина, тој ја оцени војната како „одлучувачки тест за европската безбедност“ и се заложи за праведен и одржлив мир, заснован на почитување на украинскиот суверенитет.

Пленковиќ се осврна и на новата стратегија за национална безбедност на САД, во која, според него, се забележува „промена во американската перцепција за својата улога во светот“, како и предупредувања за „цивилизациско пропаѓање на Европа“ и раст на крајната десница. Токму затоа, како што рече, Европа мора да преземе поголема одговорност за сопствената безбедност, „не против САД, туку за стабилноста на трансатлантскиот простор“.

Во говорот тој подвлече дека проширувањето на Европската унија е геополитичка нужност и дека Хрватска продолжува силно да го поддржува вклучувањето на земјите од Западен Балкан, Украина и Молдавија, со посебен акцент на важноста на Босна и Херцеговина.

The post ЕВРОПСКАТА БЕЗБЕДНОСТ Е ЗАГРОЗЕНА Хрватскиот премиер повикува на брза одбранбена мобилизација appeared first on plusinfo.mk.

Американскиот претседател Доналд Трамп синоќа изјави дека украинскиот претседател Володимир Зеленски „не е подготвен“ да го потпише мировниот предлог на САД, со кој Вашингтон сака да стави крај на војната меѓу Русија и Украина. Оценката следи по тридневните разговори меѓу американските и украинските претставници, кои се одржаа во Флорида, но завршија без очигледен напредок.

– Малку сум разочаран што претседателот Зеленски сè уште не го прочитал предлогот. Тоа беше пред неколку часа. На неговиот народ му се допаѓа, но тој не го направил – изјави Трамп во разговор со новинари.

Тој додаде дека, според неговите информации, Русија е подготвена да го прифати предложениот договор, но не е сигурен дали истиот му одговара и на Зеленски. Рускиот претседател Владимир Путин досега не го одобри планот на Белата куќа, иако минатата недела во Кремљ се одржа средба меѓу американските пратеници Стив Виткоф и Џаред Кушнер и руските власти. Средбата, сепак, не донесе конкретен напредок.

Преговорите помеѓу американските и украинските претставници завршија во саботата, а Зеленски ги опиша како „конструктивни, иако не и лесни“, објави британскиот „Гардијан“.

Коментарите на Трамп доаѓаат во пресрет на денешната средба на украинскиот претседател во Лондон со британскиот премиер Кир Стармер, како и со лидерите на Франција и Германија, каде продолжуваат дипломатските обиди за изнаоѓање решение за конфликтот.

The post МИРОВНИОТ ПЛАН БЛОКИРАН Зеленски сè уште не го прочитал предлогот на САД, тврди Трамп appeared first on plusinfo.mk.

Потпретседателот на САД, Џеј Ди Венс, изјави дека преговорите за завршување на војната на Русија во Украина се фокусирани на безбедносни гаранции за Украина и на територија што Русија сака да ја контролира – вклучувајќи украинска територија што воопшто не ја окупира, додека САД се обидуваат да посредуваат во мировен договор меѓу двете земји, објави Блумберг.

– Навистина има 2 големи прашања кои сè уште висат во воздухот и некако тоа е многу едноставно, а на некој начин многу сложено. Првин, Украина сака да знае дека Русија повторно нема да ја нападне. Сака да знае дека ќе има територијален интегритет и во иднина. Русите сакаат одредени делови од територијата, најголем дел од кои веќе ги окупирале, но некои сè уште не – изјави Венс во интервју во средата за Лора Инграхам на „Фокс њуз“.

Претседателот Доналд Трамп го засилува притисокот за да ја заврши руската војна против Украина која сега е во четвртата година. Минатата недела Трамп одржа самит на Алјаска со рускиот претседател Владимир Путин, а во понеделникот имаше разговори во Белата куќа со украинскиот претседател Володимир Зеленски и со европски сојузници.

Венс рече дека смета оти средба меѓу руските и украинските лидери би можела да помогне во придвижување на преговорите напред кон нивните цели.

– Токму таму е суштината на преговорите. Украинците сакаат безбедносни гаранции. Русите сакаат одредено количество територија – рече Венс.

САД работат на организирање на таа билатерална средба, но време и место сè уште не се одредени. Трамп изјави дека ако таа средба помине добро, ќе се разгледа можност за трилатерален самит со Путин и со Зеленски.

Венс ѝ кажа на Инграхам дека со Путин разговарал по телефон повеќепати и го опиша како „помалку гласен одошто би се очекувало“.

– Американските медиуми имаат одредена слика за него. Тој е многу промислен. Многу внимателен – рече Венс.

The post „РУСИЈА МЕРКА ТЕРИТОРИИ ШТО СЀ УШТЕ НЕ ГИ ОСВОИЛА“ Американците погрешно го перцепираат Путин, вели Џеј Ди Венс appeared first on plusinfo.mk.