„Демографските промени имаат директно и длабоко влијание врз образованието. Изминативе две децении Македонија се соочува со намалување на стапката на наталитет, иселување, стареење на населението и изразени регионални нерамномерности. Тоа резултираше со намалување на бројот на ученици и неадекватен сооднос со бројот на наставници. Дополнително, две третини од сите училишни објекти се подрачни училишта, но во нив учат само 12 проценти од вкупниот број ученици“.

Вака говореше Елена Ивановска, државен секретар во Министерство за образование и наука, на панел-дискусијата на тема „Политики кои ги охрабруваат луѓето“, во рамки на Регионалната министерска конференција за демографска отпорност.

Таа истакнува дека демографските промени се во основа на оптимизацијата на училишната мрежа, што треба да обезбеди подобро и поправично користење на ресурсите, со јасна цел: квалитетна настава според стандарди, со соодветен наставен кадар, простор и опрема за секое дете, без разлика каде живее, се наведува во соопштението на МОН.

Ивановска објасни дека во руралните средини, во околу 100 училишни објекти учат помалку од 5 деца. Во такви услови, квалитетот на наставата, социјализацијата и пристапот до услуги се сериозно ограничени.

За да се подобри оваа состојба, Министерството за образование и наука презема низа стратешки активности за усогласување на училишната мрежа, истовремено зајакнувајќи ги резултатите од учењето, правичноста и долгорочната одржливост. Во фокусот на овој одговор е сеопфатна реформска агенда која направи промена на моделот за финансирање на образованието, со цел подобро усогласување на финансирањето со демографските трендови.

– Институционалниот одговор става силен акцент на подобро планирање на потребите, мобилност на наставниот кадар, доквалификација и преквалификација и користење на природниот одлив преку пензионирање, наместо нагли и непланирани решенија. Овие елементи се клучни за да се обезбеди дека прилагодувањето на човечките ресурси ќе го поддржи квалитетот на образованието и стабилноста на системот, наместо да ги загрозува – посочи Ивановска.

Едносменската настава, продолжувањето на училишниот ден и развојот на воннаставни активности, како и туторска поддршка за учениците со пониски постигања и образовната асистенција за децата со попреченост, целат кон подобри знаења и вештини кај учениците, и со тоа јакнење на човечкиот капитал, што е суштински одговор на демографските предизвици.

Ивановска укажа на уште една клучна потреба: проширување на опфатот во предучилишното образование, кое денес изнесува околу 42 отсто, додека националната и европската цел е 96 отсто.

– Поради тоа, се разгледуваат можности за преквалификација и прераспоредување на дел од наставниот кадар од основното образование во раното детско образование, каде што потребите се најголеми, а повратот на инвестициите е највисок. На овој начин, демографските предизвици не се третираат како закана, туку како можност за попаметно планирање, подобро користење на ресурсите и инвестиции во најраната и најисплатлива фаза од човечкиот развој – рече Ивановска.

Оптимизацијата на училишната мрежа, паметната кадровска политика и квалитетното образование, за Министерството за образование и наука не се технички реформи, туку темел за општество засновано врз знаење и иновации.

The post ВО 100 УЧИЛИШТА ИМА ПОМАЛКУ ОД 5 ДЕЦА Во МОН спремаат голема реорганизација на образованието appeared first on plusinfo.mk.

Градежни работи веќе се одвиваат на објектот на подрачното училиште во селото Крклино, кое функционира во рамки на основното училиште ООУ „Александар Турунџев“.

Со проектот е предвидена целосна реконструкција на објектот, кој располага со две училници, канцеларија, ходник и санитарни простории. Ќе се менува кровната конструкција, ќе се обнови фасадата, ќе се постави нова ПВЦ-дограма, ќе се заменат подовите и ќе се извршат молеро-фарбарски работи во внатрешноста.

Градоначалникот на Битола, Тони Коњановски, изврши увид во текот на работите заедно со одговорните лица од проектот.

– Инвестираме во подобри услови за образование и достоинствен престој на учениците и наставниците. Оваа реконструкција е на барање на жителите и претставува уште еден чекор кон модернизација на училиштата во руралните средини – изјави Коњановски.

Проектот се реализира со финансиска поддршка од Министерство за образование и наука на Северна Македонија, а неговата вредност изнесува 3,38 милиони денари.

Со обновата се очекува значително да се подобрат условите за одвивање на наставата и квалитетот на воспитно-образовниот процес за учениците од овој дел на општината.

The post НОВО ЛИЦЕ НА УЧИЛИШТЕТО ВО КРКЛИНО Започна голема реконструкција вредна над 3 милиони денари appeared first on plusinfo.mk.