Бугарскиот премиер Румен Радев најави во Даблин дека повторно ќе го отвори прашањето за положбата на Бугарите во Македонија во разговор со генералниот секретар на Советот на Европа, Ален Берсе. Радев тврди дека нема подобрување во односот на македонските власти кон бугарската заедница и дека, според неговата оценка, проблемите се продлабочуваат.

Изјавата беше дадена за време на 9-от Самит на Европската политичка заедница во Даблин, каде што се собраа европски лидери и претставници на меѓународни институции. Советот на Европа претходно најави дека Берсе на маргините на самитот ќе има средба и со Радев.

– Ќе имам средба со генералниот секретар на Советот на Европа, Ален Берсе. Тоа е многу важна средба, бидејќи ние треба да помагаме и сите европски држави да придонесуваме Советот на Европа сè повеќе да се зацврстува како гарант на демократијата, човековите права и владеењето на правото – изјави Радев.

Тој најави дека и овојпат ќе го постави прашањето за положбата на бугарската заедница во Македонија, тврдејќи дека македонските власти не преземаат доволно чекори за подобрување на состојбата.

– Повторно ќе ја отворам темата за која разговараме секојпат, а тоа е дека нема промена во односот на властите на Република Северна Македонија кон нашите сонародници во оваа земја. Напротив, проблемите се продлабочуваат – рече бугарскиот премиер.

Ова не е првпат Бугарија да ги наметнува односите со Македонија пред Советот на Европа. Во септември во Стразбур, претседателката Илијана Јотова му рекла на претседателот на СЕ Берсе дека Софија ги спровела досегашните препораки и дека се надева оти надзорот за групата предмети „ОМО Илинден и други против Бугарија“ наскоро ќе заврши. Таа тогаш изјави дека отворените предмети му штетат на угледот на Бугарија.

Надзорот на Комитетот на министри на Советот на Европа се однесува на спроведувањето на пресудите на Европскиот суд за човекови права за слободата на здружување. Во меѓувреме, ниту една од 14 пресуди на Судот, според кои Бугарија треба да ги регистрира македонските здруженија, не е спроведена.

The post РАДЕВ ЌЕ ЈА КОДОШИ МАКЕДОНИЈА ПРЕД СОВЕТОТ НА ЕВРОПА „Ќе го отворам прашањето за положбата на Бугарите во Македонија“ appeared first on plusinfo.mk.