Фестивалот „Охридско лето“ во втората половина од годинешната програма влегува со Романската вечер и избрана музичка програма наречена „Од Букурешт до Мадрид“ во изведба на уметниците Ирина Муртезану на виолина и Даниел дел Пино на пијано. Концертот ќе се одржи вечерва во катедралната црква „Света Софија“ од 21 часот.

Романската виолинистка Ирина Мурезану и шпанскиот пијанист Даниел Дел Пино го претставуваат возбудливото музичко патување „Од Букурешт до Мадрид“ инспирирано од нивното лично културно наследство. Како што кажува насловoт, репертоарот музички и географски го следи патот кој води од едниот до другиот град со попатни станици во Унгарија, Австрија, Германија и Франција кои се претставени со делата на значајни композитори од овие земји.

Музичкото партнерство на ова дуо започнува на престижниот фестивал за музика во Њупорт во 2019 година, и од тогаш тие заеднички настапуваат во салите низ САД и Европа. Двајцата уметници имаат завидни солистички кариери, а заедно на подиумот на стандардниот репертоар му носат свежа и моќна енергија. Ирина Мурезану и Даниел дел Пино ги поврзува и заедничкиот интерес да креираат програми кои се музички комплексни, но истовремено подеднакво интересни и едукативни за публика од сите возрасти.

На програмата на вечерашниот концерт се дела на Константинеску од Романија, унгарскиот композитор Барток, Брамс од Германија, Крајслер од Австрија, Равел како претставник на Франција, Де Фаља и де Сарасате како композитори од Шпанија.

The post РОМАНСКА ВЕЧЕР НА ОХРИДСКО ЛЕТО Ирина Муртезану и Даниел дел Пино ќе настапат во „Света Софија“ appeared first on plusinfo.mk.

Црквата „Света Софија“ вчеравечер беше претесна да ги прими љубителите на класичната музика кои сакаат да го проследат концертот на романската виолинистка Ирина Муресану и  оркестарот „FAMES“ од Македонија.

Концертот се одржа во рамки на Романската вечер на „Охридско лето“ со поддршка на амбасадата на Романија во нашата земја, информираа организаторите на оваа традиционална културна манифестација.

Отворајќи ја вечерта, амбасадорката на Романија, Адела Моника  Аксинте рече дека оваа е ислучителна година за Романија во однос на учеството на фестивалот „Охридско лето“.

-Навистина ни беше голема чест што Анџела Георгиу , најголемата и најталентирана оперска ѕвезда  на нашето време, на 12 јули го отвори овогодинешното издание на фестивалот „Охридско лето“, заедно со Оркестарот  на Националната опера и балет на Северна Македонија, под диригентската  палка на Чипријан Теодорашку од Романија. Ова беше овозможено  само со исклучителна посветеност и професионалност на организаторите на фестивалот „Охридско лето“ и затоа упатувам најтопли честитки до Наташа Поповиќ, генерален директор на фестивалот, до маестра Бисера Чадловска, селекторка на музичката програма, како и до целиот тим за  нивните извонредни достигнувања и што преку нивната работа и ентузијазам овозможија успешно спроведување на фестивалот „Охридско лето“ еден од најистакнатите културни настани во Европа, рече амбасадорката Адела Моника Аксинте.

Уметницата Ирина Муресану заедно со Оркестарот на Институтот „ FAMES“ приредија незаборавна вечер со богат и разновиден репертоар. Муресану е  меѓународно призната виолинистка  и добитник е на награди и признанија на престижни натпревари по виолина. Настапува на бројни фестивали ширум светот како солист и камерен музичар.

-Изминатата недела имав одлична соработка со оркестарот. Поминавме преубаво време заедно и на пробите и на снимањата, а така беше и синоќа на концертот на „Охридско лето“, рече Муресану.

И младите уметници, дел од оркестарот со кој настапи таа беа задоволни од соработката со неа.

-Имавме многу разновиден репертоар. Отсвиревме  дела од многу композитори од целиот свет, од Кина, Сирија, Романија, Македонија, САД, Аргентина. Виолинистката Ирина Муресану е прекрасна и премногу енергична личност, рече Антонина Тородорска, полска уметница која има половина македонско потекло.

„Охридско лето“ вечерва продолжува со балетската претстава „Госпоѓиците од Авињон“  на македонската Национална опера и балет што ќе биде изведена на сцената „Долни Сарај“ од 21 часот.

The post РОМАНСКА ВЕЧЕР НА „ОХРИДСКО ЛЕТО“ Виолинистка Ирина Муресану и оркестарот „FAMES“ ја воодушевија публиката appeared first on plusinfo.mk.