Мајка е тешко повредена во напад на мечка во Романија, откако се обидела да го заштити својот син додека го носела на училиште. Mомчето успеало да побегне, додека мечката се нафрлила врз мајката и ѝ нанела длабоки рани со канџите, објави романскиот портал „Диги24“.

Нападот се случил во селото Залан, во округот Ковасна, кога мечката ненадејно се појавила зад мајката и детето. Додека момчето се засолнило во дворот на соседна куќа, животното ја стигнало жената.

Мечката ѝ нанела длабоки рани со канџите на колкот и рацете. Според градоначалникот на општината Бодок, Иштван Фодор, животното не ја каснало, а дебелата јакна што ја носела ја заштитила од потешки повреди.

Нејзините повици за помош ги слушнале локални жители, кои веднаш излегле од своите домови. На местото пристигнале и градоначалникот, ветеринар, ловец, жандарми и екипа на итната помош, но мечката веќе се повлекла и не била пронајдена.

Повредената жена била пренесена во болницата во Сфанту Георге, каде што била оперирана. Имала скршеница на карлицата, а интервенцијата траела околу два часа. По операцијата била во стабилна состојба, но лекарите продолжиле внимателно да ја следат поради ризикот од инфекција.

Нападот предизвикал остра реакција од Фодор, кој го обвинил Министерството за животна средина дека не ги слуша предупредувањата на жителите од планинските села.

Според него, мечките навлегуваат во населените места, овоштарниците, полињата со пченка и на другите земјоделски површини.

Фодор најавил дека нема да чека заловување и преселување на мечките што ќе се појават на улиците во општината, туку дека ќе бидат застрелани и дека ја презема одговорноста за таквата одлука.

The post МАЈКА ВО РОМАНИЈА ЗАСТАНАЛА ПРЕД МЕЧКА ЗА ДА ГО СПАСИ СИНОТ Детето се скрило во соседен двор appeared first on plusinfo.mk.

Пет дрона за нешто повеќе од 17 часа навлегле во молдавскиот воздушен простор и се урнале на територијата на земјата, додека романските власти во саботата рано наутро прогласија воздушна тревога и кренаа борбени авиони поради сомнителна воздушна цел во близина на границата.

Руските напади врз Украина предизвикаа нови безбедносни инциденти во двете соседни земји.

Во Молдавија едно лице е полесно повредено, а причинета е и помала материјална штета. Според молдавските власти, станува збор за руски дронови што навлегле во земјата во текот на четвртокот и петокот.

Леталата се урнале главно во северните и источните делови на Молдавија, која има долга заедничка граница со Украина.

Министерството за надворешни работи во Кишињев остро ја осуди Москва, оценувајќи дека ваквите инциденти претставуваат директна закана за населението.

„Овие инциденти претставуваат закана за безбедноста на граѓаните и ги покажуваат директните последици од руската агресивна војна против Украина врз регионалната стабилност“, соопшти молдавското Министерство за надворешни работи.

Ова не е прв ваков случај. Минатата недела дрон се урнал на околу 35 километри од главниот град Кишињев.

Молдавските власти во повеќе наврати го повикувале рускиот амбасадор Олег Озеров на разговор, барајќи објаснување за нарушувањата на воздушниот простор.

Претседателката Маја Санду редовно ја обвинува Москва дека ја загрозува безбедноста на Молдавија, додека Кремљ ја критикува нејзината проевропска политика.

Портпаролот на Кремљ, Дмитриј Песков, во четвртокот изјави дека подобрување на односите е можно само доколку владата во Кишињев се откаже од, како што рече, „политиката заснована на русофобија“.

Во меѓувреме, воздушна тревога беше прогласена и во романскиот округ Тулча, откако радарите откриле воздушна цел над Украина што се движела кон романската граница, северно од местото Плауру.

Два борбени авиона Ф-18 на шпанските воздухопловни сили полетале од воздухопловната база „Михаил Когалничану“, каде што учествуваат во засилениот надзор на воздушниот простор.

Романските власти испратиле предупредување до населението преку системот РО-алерт во 1:54 часот по полноќ.

Тревогата била укината во 2:30 часот, а романското Министерство за национална одбрана соопшти дека не е регистрирано навлегување во романскиот воздушен простор.

Истовремено, руските напади врз Украина продолжија со голем интензитет. Во петокот загинале најмалку осум лица, а 60 биле повредени во нападите врз повеќе украински области, според украинските власти.

Во Харков загинале 71-годишна жена и 58-годишен маж, додека во Краматорск и во Дњепропетровската област биле пријавени по две жртви.

Нападите погодиле и цивилни објекти, меѓу кои два трговски центри во Суми и во Ривненската област, како и погон за преработка на храна во Волинската област.

Особено тешки биле последиците од ударите врз енергетската инфраструктура. Повеќе од еден милион жители останале без електрична енергија, а во одделни региони биле регистрирани големи прекини во снабдувањето.

Украинското Министерство за енергетика подоцна соопшти дека ремонтните екипи успеале повторно да воспостават снабдување со електрична енергија за повеќе од еден милион луѓе погодени од нападите. Не е прецизирано колку домаќинства сè уште се без струја.

Во Волинската област, која граничи со Полска, во напад врз погон за преработка на храна загинало едно лице, а осум биле повредени. Во градот Ковел бил погоден и царински терминал, при што изгореле околу десет камиони

The post РУСКИ ДРОНОВИ ГИ ВОЗНЕМИРИЈА МОЛДАВИЈА И РОМАНИЈА Во Украина осуммина загинати, над милион жители останаа без струја appeared first on plusinfo.mk.

Палењето на 11 антени на „Старлинк“ во Бугарија, ограничувањата на воената сателитска комуникација и неизвесноста околу американските разузнавачки информации сериозно го поткопуваат капацитетите на Украина да се спротистави на руските напади, кои во последно време се интензивираат. Истовремено, се отвораат прашања за тоа дали сме сведоци на прелевање на конфликтот и хибридните напади кон други земји на ЕУ, како и за американската поддршка на Украина во судирот со Русија, која се повеќе слабее. Во исто време, договорот меѓу Вашингтон и Москва, за набавка на руски дизел и притисокот за постигнување енергетско примирје ја продлабочуваат недовербата меѓу сојузниците.

Нападот во Бугарија отвора нови безбедносни прашања

Палењето на 11 од вкупно 17 антени поврзани со сателитскиот систем „Старлинк“ во објект во близина на Софија отвори нови прашања за безбедноста на комуникациската инфраструктура што се користи и во војната во Украина.

Според бугарскиот пратеник Ивајло Мирчев, двајца маскирани мажи намерно ја запалиле опремата на објектот, а бугарските безбедносни служби започнале истрага. На 15 октомври, бугарската новинска агенција БТА објави дека осомничени лица се идентификувани, но властите не открија детали за да не ја загрозат истрагата.

Според Мирчев, антените претставуваат важна врска со сателитите на „СпејсИкс“, кои се користат и за комуникациите на украинската војска. Тој постави прашања за тоа дали безбедносните служби навреме реагирале на можните закани. Засега, меѓутоа, не е утврдено кој стои зад нападот, ниту е докажано дека неговата цел била директно да се попречат украинските воени операции.

Инцидентот добива пошироко значење поради истовремените проблеми со воената сателитска комуникација на Украина и неизвесноста околу континуитетот на американската воена и разузнавачка помош. Сепак, нема докази што ги поврзуваат палењето на антените во Бугарија со одлука на американската влада да ги ограничи способностите на Украина.

Европа признава дека не може брзо да го замени „Старлинк“

Европската Унија отворено признава дека во моментов нема подготвена алтернатива со која би можела да ги замени комуникациските можности што Украина ги добива преку „Старлинк“.

– Старлинк е навистина неопходен за Украина и, за жал, Европа не може да го замени овој капацитет на краток рок – изјави високата претставничка на ЕУ за надворешна политика Каја Калас на самитот на Европскиот совет што се одржа во петокот во Брисел.

Европа има алтернативи, меѓу кои и сателитските услуги на „Еутелсат“ и мрежата „УанВеб“, но тие не можат веднаш и во целост да ја заменат инфраструктурата на „СпејсИкс“. Проблемот не е само во бројот на сателити. Потребни се соодветни кориснички терминали, сигурна покриеност, доволен пренос на податоци, ниско доцнење на сигналот, заштитени комуникации и можност системите да се интегрираат со веќе постојната украинска воена инфраструктура.

Зошто „Старлинк“ е толку важен за украинската војска?

За да се разбере сериозноста на проблемот, потребно е да се објасни како функционира системот и зошто неговото ограничување може да влијае врз текот на воените операции. „Старлинк“ користи илјадници сателити во ниската орбита на Земјата, кои обезбедуваат широкопојасен интернет и во области каде што нема сигурна копнена комуникациска инфраструктура. Бидејќи сателитите се релативно блиску до Земјата, доцнењето на сигналот е мало во споредба со традиционалните геостационарни сателити. Тоа е особено важно кога се потребни брза размена на податоци и континуирана комуникација.

Во Украина, системот има неколку клучни функции: Управување со беспилотни летала, комуникација меѓу единиците, пренос на податоци од бојното поле, како и за логистика и координација. Во современото војување, сите овие сфери на комуникација се од огромно значење. Комуникациите ги поврзуваат извидувањето, командувањето и дејствувањето, па ако податоците пристигнуваат со задоцнување или врската се прекинува во критичен момент, тоа може да ја намали ефикасноста на операциите.

Која е разликата меѓу „Старлинк“ и „Старшилд“?

„Старлинк“ е комерцијална сателитска интернет-мрежа, додека „Старшилд“ е систем наменет за владини и воени корисници, со дополнителни безбедносни карактеристики и можности приспособени за операции од национална безбедност. Двата система делат дел од технолошката основа, но не се идентични и не се целосно заменливи.

Според украински воени претставници, неодамнешните ограничувања влијаеле врз некои операции со дронови, предизвикувајќи неуспешни мисии и губење летала. Иако врската била делумно обновена, инцидентот покажа колку е ранлива војската што зависи од инфраструктура врз која нема целосна контрола.

Маск се огради од одговорноста и ја посочи американската влада

По критиките од Украина дека ограничувањата на сателитската комуникација ги попречуваат воените операции, Илон Маск одговори дека „Старшилд“ е во сопственост и под контрола на американската влада.

„Сите ограничувања на брзината или користењето ги одредува американската војска, а конечната одлука е кај претседателот“, напиша Маск на социјалната мрежа Икс.

Со ова, сопственикот на „СпејсИкс“ ја отфрли одговорноста на својата компанија за ограничувањата на воениот систем и ја насочи кон Вашингтон. Тој истовремено нагласи дека комерцијалниот „Старлинк“ е услуга на „СпејсИкс“ и дека неговата употреба е ограничена на цивилни и одбранбени активности, а не на офанзивни воени операции.

Разузнавачките информации се вториот критичен фронт

Покрај сателитските комуникации, Украина во голема мера зависи од американските разузнавачки информации. Тие се користат за рано предупредување за руски ракетни напади, следење на воените движења и идентификување цели за украинските операции.

Американскиот систем за инфрацрвено следење од вселената може да открива лансирања на ракети и да помогне во навременото предупредување за опасност. Според воени експерти, европските сојузници имаат многу ограничени можности брзо да го заменат овој капацитет.

Ако Вашингтон ги ограничи овие услуги, последиците би можеле да бидат драматични. Украина би имала помалку време за реакција при ракетни напади, потешко би ги координирала одбранбените операции и би имала помалку информации за планирање на сопствените удари.

Енергетското примирје и рускиот дизел: што сака Трап?

Зад актуелните тензии стои и поширока политичка и економска пресметка. Американската администрација се обидува да постигне договор за запирање на нападите врз енергетската инфраструктура на Русија и Украина, а Трамп ја поврза својата иницијатива со потребата да се намалат цените на горивата.

Вашингтон изврши притисок врз Киев да ги запре нападите врз руските рафинерии. Во исто време, Трамп објави договор според кој Русија треба да испорача повеќе од 300.000 метрички тони дизел за американскиот и светскиот пазар. Вашингтон привремено ги ублажи ограничувањата за рускиот дизел, со образложение дека дополнителната понуда може да помогне во намалувањето на цените на горивата.

Ова се случува во период на силен притисок врз американскиот енергетски пазар и пред ноемвриските избори за Конгресот. Трамп ги обвини украинските напади врз руските рафинерии дека придонесуваат за растот на цените, додека Зеленски оцени дека рускиот дизел нема значително да ги намали цените во САД, но ќе ѝ обезбеди дополнителни приходи на Москва.

Дали сојузниците во НАТО почнуваат да се сомневаат во Вашингтон?

Неизвесноста околу американската поддршка предизвикува загриженост кај европските сојузници, но засега никој не излегува со обвинувања дека американската влада намерно ги намалува украинските воени капацитети.

Она што е видливо е растечката загриженост во европските престолнини за зависноста од американската технологија и разузнавачки системи. Полскиот министер за надворешни работи Радослав Сикорски, јавно го праша Маск дали политиката влијае врз услугите што ги обезбедува неговата компанија, што покажува дека прашањето веќе не се третира само како технички проблем.

За европските земји оваа ситуација е предупредување: ако една држава или компанија може да влијае врз пристапот до клучна воена комуникација, тогаш политичките несогласувања меѓу сојузниците можат да се претворат во сериозен ризик на бојното поле.

Затоа европските влади сè повеќе зборуваат за намалување на зависноста од одлуки врз кои немаат контрола и развивање сопствени сателитски системи, независни разузнавачки капацитети и посигурни комуникациски мрежи. Но, тоа е полесно да се каже, отколку да се направи. И бара прилично многу време.

The post АМЕРИКА ЈА ОТПИШУВА, БРИСЕЛ НЕ МОЖЕ ДА ЈА ЗАПИШЕ! Без „Старлинк“ и без ЦИА Украина се соочува со воен пораз appeared first on plusinfo.mk.

Координативниот центар на Романската поморска администрација денеска презеде итна операција за спасување откако избувна пожар на трговски брод во Црното Море.

Бродот „Вајд трејдер“, што плови под знамето на Сан Марино, испратил сигнал за помош дека осум лица се исчезнати по избувнувањето пожар. Бродот се наоѓа на 13 наутички милји југоисточно од Сулина.

Сè уште е непознато дали бродот бил погоден од дрон, но борбени авиони синоќа полетале поради група беспилотни летала, што биле забележани во областа на Сулина и на украинскиот Змиски Остров, што се наоѓа во близина на романскиот брег.

– На бродот имаше 12 лица. Четворица од нив се безбедни, а осум во моментот се водат за исчезнати. Поморскиот координативен центар и структурите за спасување итно мобилизираа специјализирани бродови и авиони. Хеликоптер на Генералниот воздухопловен инспекторат полета, а бродот за пребарување и спасување „Аполо“, во сопственост на Романската агенција за спасување човечки животи на море, е испратен во областа – се наведува во соопштението на Романската поморска администрација.

Некои од романските медиуми велат дека бродот бил погоден од два дрона.

Министерот за одбрана на Романија, Раду Мирута, синоќа изјави дека на комерцијален брод закотвен во романските територијални води, во близина на украинската граница, избувнал пожар по експлозија.

Тој наведе дека сè уште е непознато дали пожарот бил предизвикан од напад со беспилотно летало бидејќи романската противвоздушна одбрана не детектирала беспилотни летала во тој регион. Бродот е упатен кон романското пристаниште Констанца во Црното Море, каде што е планирана истрага за причината за пожарот.

Мирута посочи дека екипажот на бродот, кој плови под знамето на Коморите, успеал сам да го изгасне пожарот пред пристигнувањето на романските спасувачки екипи. Никој од 17-те члена на екипажот од Сирија, Индија и од Иран не е повреден.

Пред девет дена турски трговски брод што превезувал жито беше погоден од беспилотно летало и потона во близина на романскиот град Сфнту Георге на Црното Море, при што загинаа двајца членови на екипажот.

Нападите со беспилотни летала врз трговски бродови во Црното Море сè се почести. Изминатите денови неколку бродови беа погодени и во економската зона на соседна Бугарија во Црното Море.

The post ПОЖАР ИЗБИ НА ТОВАРЕН БРОД ВО ВОДИТЕ НА РОМАНИЈА Осум морнари се водат за исчезнати appeared first on plusinfo.mk.

Претседателката на Молдавија, Маја Санду, на маргините на вчерашниот Молдавски безбедносен форум во Кишињев, изјави дека го поддржува обединувањето со Романија и верува дека таквото сценарио би ѝ обезбедило на нејзината земја повисоко ниво на безбедност.

– Верувам дека Молдавија би имала поголема безбедност заедно со Романија. Оваа дискусија се води од првиот ден на независноста – истакна Санду.

Таа додаде дека обединувањето е можно само ако постои волја кај мнозинството.

Санду посочи дека според анкетите мнозинството граѓани не се за обединување со Романија, туку ја поддржуваат интеграцијата со Европската Унија.

Според неа, Романија отсекогаш ѝ помагала на Молдавија и има важни заеднички проекти во енергетскиот сектор и во други области.

– Романија е увозник број еден на стоки од Молдавија и е наш главен економски партнер. Затоа, сè што се случува во Романија влијае и на нас – нагласи Санду.

На почетокот на годината, Санду изјави дека би гласала за обединување со Романија доколку се одржи референдум за ова прашање.

The post ПРЕТСЕДАТЕЛКАТА НА МОЛДАВИЈА ПОСАКУВА ОБЕДИНУВАЊЕ СО РОМАНИЈА Мнозинството Молдавци се за влез во ЕУ, а не за спојување appeared first on plusinfo.mk.

Македонија постигнала билатерални договори и решенија со Хрватска, со Швајцарија и со Романија за олеснување на движењето на професионалните возачи, а преговорите продолжуваат и со други европски земји.

Со Бугарија и со Грција се разговара за можноста превозниците што влегуваат и излегуваат во ист ден да не подлежат на регистрација, изјави вицепремиерот и министер за транспорт Александар Николоски.

Гостувајќи во поткастот „Каде се парите? со Горан Теменугов“, Николоски објасни дека засега нема единствено решение за проблемите на македонските превозници во Шенген-зоната, поради што Владата преговара со државите поединечно.

– Склучивме билатерален договор со Хрватска, потоа потврди Швајцарија, а во финална фаза сме со одредени други држави. Со Романија потпишавме да се даваат дозволи, а не визи – рече Николоски.

Тој нагласи дека различните држави прифаќаат различни решенија, во зависност од сопствените процедури и од потребите на транспортниот сектор.

Разговорите со Бугарија и со Грција се насочени кон превозниците што реализираат кратки транспортни операции, со влез и со излез од земјата во ист ден.

Според Николоски, целта е тие возачи да бидат ослободени од регистрацијата за која во моментов се разговара со двете земји.

Министерот оцени дека проблемот не произлегува од намерна политика против балканските превозници, туку од бирократски систем што премногу бавно ги менува правилата.

– Мислам дека се работи за обична бирократска процедура и за бирократизиран систем на носење одлуки, кој е пребавен и на кој му е тешко да се смени – изјави Николоски.

Тој предупреди дека последиците не ги чувствуваат само транспортните компании од земјите надвор од Шенген-зоната, туку и европските инвеститори што зависат од нивните услуги.

Според неговите податоци, повеќе од 87 отсто од странските директни инвестиции во Македонија потекнуваат од Европската Унија, а компаниите не можат лесно да најдат алтернативни начини за транспорт.

Николоски ја отфрли можноста дека ограничувањата се дел од поширок план за истиснување на балканските превозници од европскиот пазар.

– Да беше ова некој голем план, чија цел е да се уништат балканските превозници и бизнисот да го земат други превозници, ќе го видевме. Нема таква работа – рече министерот.

Тој смета дека европската бирократија тешко се приспособува на новите околности, иако постојните ограничувања создаваат проблеми и за компаниите во самата Европска Унија.

Министерството за транспорт најавува продолжување на билатералните разговори, со цел македонските професионални возачи полесно да се движат и да работат на европските транспортни коридори.

The post ХРВАТСКА, ШВАЈЦАРИЈА И РОМАНИЈА ПРИФАТИЛЕ РЕШЕНИЈА ЗА МАКЕДОНСКИТЕ ПРЕВОЗНИЦИ Николоски најави разговори и со Бугарија и со Грција appeared first on plusinfo.mk.

Два руски беспилотни летала погодиле цивилен товарен брод во Црното Море, при што загинал капетанот, тврди украинскиот претседател Володимир Зеленски. Бродот „Роџад Мамадов“, кој бил во турска сопственост и превезувал пченка, се запалил во близина на романските територијални води, а потоа потонал.

„Ужасен напад од два руски беспилотни летала врз цивилен брод во неутрални води што превезуваше пченка, во сопственост на Турција. На бродот имаше граѓани на Азербејџан и Индија“, објави Зеленски на Икс.

Романското Министерство за внатрешни работи потврди дека членовите на екипажот биле спасувани од бродот, но засега не ја наведе причината за пожарот. Националната поморска администрација го идентификуваше пловилото како „Роџад Мамадов“.

Според Зеленски, капетанот загинал, 11 членови на екипажот биле спасени, а еден од нив е повреден.

– За жал, во моментов знаеме дека капетанот на бродот починал. Изразувам сочувство. Се утврдува судбината на уште едно лице. Единаесет членови на екипажот се спасени, од кои еден е повреден – наведе украинскиот претседател.

A Turkish grain ship, the Royad Mammadov, was hit by a suspected drone in the Black Sea off Romania

A major fire broke out, and the vessel is at risk of sinking.

The captain is injured. Thirteen crew are missing. https://t.co/m3DChLWyp1

— Visegrád 24 (@visegrad24) October 5, 2026

Првичните информации за бројот на загинатите не се целосно усогласени. Романските податоци наведуваат две жртви, додека Зеленски зборува за загинат капетан и уште едно лице по кое се трага.

Русија засега не го коментирала конкретниот инцидент. Руското Министерство за одбрана, сепак, во претходно соопштение навело дека руските сили погодиле два товарни брода.

Бродот пловел под знамето на Свети Китс и Невис кон Равена во Италија, а според „ВеселФајндер“, последното пристаниште од кое испловил било украинскиот Измаил. Романските медиуми објавија дека инцидентот се случил во близина на нафтена платформа со која управува романската енергетска компанија ОМВ Петром.

Романија е членка на НАТО и има 614 километри долга копнена граница со Украина. Од почетокот на војната повеќепати беа регистрирани инциденти со руски беспилотни летала во романскиот воздушен простор, додека пловечките мини во Црното Море претставуваат дополнителен ризик за трговските и енергетските рути.

The post 📽️ ТУРСКИ БРОД СЕ ЗАПАЛИ И ПОТОНА ВО ЦРНОТО МОРЕ Според Зеленски руски дронови гаѓале во неутрални води appeared first on plusinfo.mk.

Турски товарен брод натоварен со жито бил погоден од дрон во Црното Море, во близина на романските територијални води, при што загинале две лица, а 11 членови на екипажот биле спасени. Бродот „Ројад Мамадов“ потонал по пожарот што избувнал на него, а романските служби спроведоа голема спасувачка операција.

Инцидентот се случил во близина на нафтената платформа Пескаруш, во Црното Море, околу 20 наутички милји од романскиот брег и околу девет наутички милји југоисточно од платформата. Романските власти ја активирале операцијата за пребарување и спасување откако бил пријавен сериозен поморски инцидент.

Според романската Агенција за спасување човечки животи на море (ARSVOM), Центарот за поморска координација во 10:37 часот побарал интервенција за спасување на екипажот од „Ројад Мамадов“. На местото веднаш се упатиле спасувачките бродови „SAR Apollo“ и „SAR Ares“, а во акцијата се вклучил и брод на крајбрежната стража.

На бродот избувнал пожар, по што тој почнал да тоне. Првично било пријавено дека 13 членови на екипажот се водат како исчезнати. Во продолжението на акцијата, 11 од нив биле спасени, додека две лица биле пронајдени мртви. Романското Министерство за внатрешни работи соопшти дека повредените биле преземени со хеликоптер на Генералниот инспекторат за воздухопловство, со помош на витло, за да им биде укажана итна медицинска помош.

Бродот пловел под знамето на Свети Китс и Невис, бил во турска сопственост и превезувал жито. Пред инцидентот го напуштил украинското пристаниште Измаил и, според досегашните информации, се упатувал кон Италија, односно кон Равена.

 

View this post on Instagram

 

A post shared by Digi24 (@digi24ro)

Капетанот бил меѓу повредените

Во првичните информации од спасувачката операција се наведуваше дека капетанот на бродот е повреден, додека бројот на исчезнати членови на екипажот изнесувал 13. Подоцна романските власти потврдија дека 11 членови се спасени, а две лица се пронајдени мртви.

Романските спасувачки служби објавија дека операцијата продолжила со ангажман на бродови на крајбрежната стража и хеликоптер на Генералниот инспекторат за воздухопловство.

Според достапните информации, бродот бил погоден во близина на платформата Пескаруш, која е морска платформа за експлоатација на нафта и природен гас управувана од „OMV Petrom“. Платформата се наоѓа на околу 20 наутички милји од романскиот брег.

Инцидентот се случил надвор од територијалните води на Романија, но во нејзината ексклузивна економска зона.

Засега нема официјална потврда кој го извршил нападот со дрон, ниту пак се објавени детали за типот на дронот или оружјето со кое бил погоден бродот. Романските извори потврдуваат дека бродот бил погоден од дрон, но истрагата за околностите продолжува.

The post 📽️ ДРОН ПОГОДИ ТУРСКИ БРОД ВО ЦРНОТО МОРЕ Двајца загинати, 11 морнари спасени, бродот потонал appeared first on plusinfo.mk.

Илјадници ученици од цела Романија организираат голем протест во понеделникот и се појавуваат во училниците целосно облечени во црно како израз на несогласување со новиот закон што предвидува воведување задолжителни училишни униформи, јавуваат локалните медиуми.

Протестот е организиран од Националниот студентски совет – официјалната институционална структура што ги претставува интересите и ги штити правата на сите ученици во основното и средното образование во земјата. Организацијата посочува дека црната облека го симболизира нивното несогласување со воведувањето униформи без широк консензус и разгледување на мислењата на самите ученици и нивните родители.

Спорниот нормативен акт веќе ја помина првата фаза од законодавниот процес, откако беше усвоен од Сенатот (горниот дом на романскиот парламент). Проектот моментално го разгледува Домот на пратеници (долниот дом на романскиот парламент), кој во овој случај е телото што ја носи конечната одлука.

Претставниците на студентите изразуваат загриженост дека задолжителното воведување униформи би можело да ја продлабочи социјалната нееднаквост доколку трошоците за нив не бидат целосно на товар на државата и дека таквата мерка го ограничува правото на самоизразување.

Од друга страна, подносителите на проектот го аргументираат својот предлог со потребата од подобрување на дисциплината, безбедноста во училиштата и бришење на визуелните разлики во социјалниот статус на децата.

The post НЕОБИЧЕН ПРОТЕСТ ВО РОМАНИЈА Илјадници ученици дојдоа на училиште облечени во црно appeared first on plusinfo.mk.

Изјава која ѝ се припишува на американската амбасадорка во Грција, Кимберли Гилфојл, предизвика политички реакции во регионот, откако „The Wall Street Journal“ објави дека таа на приватна вечера во Атина во март годинава наводно зборувала за политичката криза во Романија и сугерирала дека САД би можеле да направат нешто слично и во Грција.

Според „The Wall Street Journal“, кој се повикува на лице присутно на вечерата и на други луѓе запознаени со разговорот, Гилфојл во текот на дискусијата наводно рекла:

„Можеме да го направиме тоа во која било земја што ќе ја посакаме. Можеме да го направиме тоа и овде“.

Според извештајот, разговорот се водел во контекст на тогашната политичка криза во Романија и очекувањата дека ќе падне владата предводена од Илие Болојан. Владата на Болојан подоцна, на 5 мај 2026 година, беше соборена со гласање недоверба во романскиот парламент.

Сепак, важно е дека изјавата не е директно потврдена од Гилфојл. Нејзиниот адвокат ја оспорил верзијата на „The Wall Street Journal“ за разговорот.

Според истите извори, на наводната изјава остро реагирал грчкиот министер за животна средина и енергетика, Стaврос Папаставру.

Тој, според извештајот, одговорил дека САД не можат да ја сменат владата на Грција бидејќи таа е избрана од грчките граѓани.

Разговорот наводно станал напнат пред останатите гости на вечерата. „The Wall Street Journal“ наведува дека токму Папаставру влегол во расправија со Гилфојл за време на вечерата.

Спорниот разговор привлече внимание поради прашањата што ги отвора за односот меѓу Вашингтон и неговите сојузници, особено во момент кога САД активно ги промовираат своите енергетски интереси во Југоисточна Европа.

Гилфојл во последниот период имаше активна улога во промовирањето на американскиот течен природен гас (LNG) во регионот. Во пролетта годинава таа престојуваше и во Бугарија и Романија во рамки на напорите за зголемување на продажбата на американскиот природен гас на европските пазари.

Случајот добива дополнителна политичка димензија поради енергетските интереси во регионот и американската поддршка за таканаречениот Вертикален коридор за гас.

Според регионалните извештаи, Вашингтон во последниот период се залага за поголема улога на американскиот „LNG“ во европското снабдување со енергија, вклучително и преку инфраструктурата во Југоисточна Европа.

Токму поврзувањето на политиката и енергетиката е една од причините поради кои наводите за разговорот во Атина предизвикаа внимание во Романија и Грција.

Во Романија, пак, веќе се појавија политички реакции на информациите. Дел од политичарите побараа објаснување за контактите со американската амбасадорка, додека други ги отфрлија наводите како измислени или извадени од контекст.

Грција и САД се блиски сојузници во НАТО и соработуваат во областите на одбраната, енергетиката и регионалната безбедност.

Грција има и значајна геостратешка позиција во Источниот Медитеран, вклучително и пристаништето Александруполис и американската воена инфраструктура во заливот Суда.

Поради тоа, секое тврдење дека американски дипломат на приватен состанок зборувал за можноста Вашингтон да влијае врз промена на влада во сојузничка земја има потенцијално сериозна политичка тежина.

Но, засега станува збор за наводи за приватен разговор, објавени од „The Wall Street Journal“ врз основа на сведоштво на присутен на вечерата и други лица на кои им бил пренесен разговорот. Гилфојл, преку својот адвокат, ја оспорува таквата интерпретација.

The post „МОЖЕМЕ ДА ЈА СОБОРИМЕ КОЈА БИЛО ВЛАДА НА БАЛКАНОТ И ДА СОЗДАДЕМЕ ПОЛИТИЧКА КРИЗА“ Шокантни наводи за зборовите на амбасадорката на Трамп во Грција appeared first on plusinfo.mk.