Легендарниот хрватски рокер повторно се најде во центарот на вниманието по загрижувачките сцени од настапот во Макарска. Фронтменот на групата „Мајке“ викендов на фестивалот „Модро и зелено“ не успеа да ја изведе ниту првата песна, а членовите на неговиот тим му помогнаа да ја напушти сцената, додека публиката го испрати со аплауз.

Баре со децении е една од најпрепознатливите фигури на хрватската рок-сцена. Роден е во август 1965 година, а со својот специфичен глас, бескомпромисните настапи и песните што одбележаа генерации стекна култен статус.

Но, зад големиот музички успех се крие живот исполнет со тешки моменти, трагедии и долгогодишна борба со зависноста, за која Баре во текот на годините отворено зборуваше.

Еден од најтешките моменти во неговиот живот се случи кон крајот на 1995 година, кога почина неговата сопруга Мирјана од последици од предозирање со хероин, а зад неа останаа Баре и нивниот тогаш едногодишен син Миран. Во брак биле само две години.

Музичарот подоцна во интервјуа се присетувал на трауматичниот момент кога се разбудил покрај сопругата и сфатил дека таа починала. Нејзината смрт целосно го скршила, а потоа се соочувал и со сериозни психички тешкотии.

Токму неговиот син Миран, како што еднаш призна Баре, одиграл голема улога во неговиот живот. Тој откри дека татковството силно го променило и истакнал дека без синот веројатно денес не би бил жив.

– Да не станев татко, сега немаше да седам тука, туку ќе бев мртов – рече тогаш.

Меѓутоа, нивниот однос со текот на годините заладил. Баре отворено признава дека нема контакт со синот, што, особено како што старее, сè потешко му паѓа.

– Моето дете не ме доживува како татко, немаме никаков однос… Жал ми е, но ми е мило што успеав да го школувам – раскажал тој и додал дека кај синот чувствува горчина и дека Миран не бара контакт со него.

За нивниот однос зборуваше и во едно од неговите претходни интервјуа. Призна дека го напуштил синот кога тој имал пет години и дека Миран пораснал со баба му и дедо му. На почетокот го посетувал, а подоцна повремено се среќавале кога неговиот син студирал во Задар, каде што Баре одел поради концерти.

– Но, повторно сум зафркнал, знаеш. Сето тоа сè повеќе ме мачи како што стареам. Свириш, па забораваш, па не стигнуваш на неговиот роденден, забораваш да му честиташ. Зафркнав, што да ти кажам – искрено призна тој.

И покрај нарушениот однос, Баре е горд на она што го постигнал неговиот син. Миран завршил два факултета, а Баре вели дека тој и неговиот татко се погрижиле финансиски да биде обезбеден.

Голема трагедија Баре доживеал и неколку години пред смртта на сопругата. Гитаристот на „Мајке“, Марин Покровац, загина во 1990 година во сообраќајна несреќа заедно со уште двајца пријатели. Неговата смрт силно ги погодила членовите на групата, по што следуваше и прекин на нивната работа.

Баре никогаш не ја криел ниту својата долгогодишна борба со зависноста. Со тешки опијати почнал да експериментира уште во периодот кога бил основан бендот, а подоцна отворено зборуваше и за периодот кога беше зависник кој користел дрога интравенски. Зависноста ја опишува како една од најлошите работи што му се случиле во животот.

Бројните лични трагедии, загуби и сопствените битки ги преточил и во музиката. Искреноста, ранливоста и мрачните животни искуства станаа неразделен дел од песните со кои низ децениите стекна верна публика.

И покрај сите падови и трагедии што го одбележаа неговиот живот, Баре секогаш одново ѝ се враќал на музиката и сцената. Затоа, последните сцени од Макарска ги загрижија неговите обожаватели. Откако мораше да го прекине настапот уште пред вистински да започне, од групата „Мајке“ соопштија дека Баре не се чувствувал добро, но дека по враќањето во хотелот му било подобро.

The post ХРВАТСКИОТ МУЗИЧАР ПОМИНА НИЗ ТРАГЕДИИ ШТО ЗАСЕКОГАШ ГО ОДБЕЛЕЖАА Горан Баре ја загуби сопругата, а денес страда поради односот со синот appeared first on plusinfo.mk.