Џеј Зи ќе биде главната ѕвезда на музичкиот спектакл на полувремето на Супербоул 2027, официјално потврдија Националната фудбалска лига (НФЛ), „Епл мјузик“ и неговата компанија „Рок Нејшн“. За раперот ова ќе биде прв настап како главен изведувач на еден од најгледаните музички настани во светот, и тоа на сцената на која со години им помага на други ѕвезди да блеснат.

Настапот ќе се одржи на 14 февруари 2027 година, на стадионот „Софи“ во Инглвуд, Калифорнија, каде што ќе се игра финалето на американската професионална лига во американски фудбал. Објавата беше направена за време на преносот на натпреварот меѓу „Далас каубојс“ и „Филаделфија иглс“.

– Од „Reasonable Doubt“ до сцената на полувремето на Супербоул – ова беше патување. Триесет години музика, работа и култура на најголемата светска сцена. Ова продолжение на мојот пат и понатаму е остварување на сонот – изјави Џеј Зи по објавувањето на веста.

 

View this post on Instagram

 

A post shared by Apple Music (@applemusic)

Изборот е особено интересен поради неговата долгогодишна улога зад сцената. Од 2019 година, „Рок Нејшн“ соработува со НФЛ во организацијата на музичкото шоу, а Џеј Зи има важна улога во изборот на изведувачите. Во изминатите години на полувремето настапија ѕвезди како Ријана, Кендрик Ламар, Ашер и Бед Бани.

Комесарот на НФЛ, Роџер Гудел, откри дека уште при склучувањето на договорот со „Рок Нејшн“ имал една желба – Џеј Зи еден ден самиот да застане на сцената, кога ќе почувствува дека е вистинското време за тоа.

– Со години имавме привилегија да соработуваме со Џеј Зи и „Рок Нејшн“ и да го гледаме огромното влијание што го има врз шоуто на полувремето. Не можам да дочекам публиката ширум светот да ја доживее уметноста, креативноста и културното влијание што ќе ги донесе на сцената – изјави Гудел.

Во 2024 година, кога го прашаа дали некогаш би сакал да биде главната ѕвезда на Супербоул, раперот одговори дека не сака прерано да ја избере самиот таа можност.

– Мислев дека би било себично да се изберам себеси прерано. Можеби за некоја година – изјави тогаш тој.

Настапот доаѓа во период кога Џеј Зи одбележува 30 години од својот деби-албум „Reasonable Doubt“, објавен во 1996 година, како и 25 години од албумот „The Blueprint“. Во рамките на јубилејот одржа концерти во Њујорк, Лондон, Париз и Лос Анџелес, а неодамна учествуваше и во документарната серија „JAŸ-Z in 8“, посветена на неговата кариера.

Сега вниманието се префрла на прашањето кого ќе покани како специјален гостин. Многумина веќе ја споменуваат неговата сопруга Бијонсе, која во 2013 година беше главна ѕвезда на шоуто на полувремето, а во 2016 година се појави и како гостинка за време на настапот на „Колдплеј“. Се разбира, засега нема официјална потврда дека таа ќе му се придружи.

Минатогодишното шоу на полувремето, предводено од Бед Бани, привлече огромно внимание и собра околу 128 милиони гледачи во САД. Џеј Зи сега ќе има можност да го претвори своето долгогодишно влијание зад сцената во настап пред милионска публика.

The post ИЗНЕНАДУВАЊЕ НА НАЈГОЛЕМАТА СПОРТСКА СЦЕНА Џеј Зи со години го продуцира спектаклот за Супербоул, а сега самиот ќе биде главната ѕвезда appeared first on plusinfo.mk.