Уролошкиот тим на болницата успешно изведе роботски асистирана нефректомија (отстранување на бубрег) кај 59-годишна пациентка. Операцијата ја изведоа уролозите д-р Александар Мицковски, проф. д-р Сотир Ставридис и д-р Владимир Лозановски со поддршка на тимот анестезиолози, медицински сестри и други здравствени професионалци вклучени во оперативниот процес.

Интервенцијата беше изведена според планираниот тек, а пациентката по четиридневниот престој во болницата, во добра здравствена состојба, замина дома. Таа изрази огромна благодарност до целиот тим на болницата, за успешниот третман и за професионалноста.

– Не постојат зборови со кои сакам да изразам благодарност за стручноста на докторите и на целиот персонал во болницата. Голема предност за мене и моето семејство беше фактот дека тука во Македонија има болница во која се работи роботска хирургија, која беше единственото решение за мојата комплицирана здравствена состојба. За многу кратко време по операцијата јас веќе можам да се движам и да заминам дома, а она што е најважно е што ќе имам квалитетен живот, без болка – изјави пациентката Ќамиле Љубоја.

Кај комплексни тумори на бубрег, улогата на роботски асистирана технологија е од големо значење бидејќи му овозможува на хирургот високопрецизни и контролирани движења, подобрена визуализација на оперативното поле и пристап до анатомски структури во ограничен простор, што е од особено значење при сложени уролошки интервенции.

– По успешната примена кај операциите на простата, сега роботската технологија ја применивме и кај пациент со тумор на бубрег. Ова е прва изведена роботски асистирана нефректомија во нашата земја, со што докажавме дека сме пионери во многубројни уролошки интервенции. Ваквите интервенции бараат прецизна хируршка работа и максимална контрола во секоја фаза од операцијата, а токму тука доаѓаат до израз предностите на роботскиот систем. Горди сме што благодарение на роботската технологија, на пациентите во земјава и регионот им даваме шанса за високобезбедна и прецизна хирургија, која за нив значи побрзо закрепнување и значително намален ризик од компликации – изјави д-р Александар Мицковски, специјалист по урологија.

Со проширувањето на спектарот на процедури, „Аџибадем Систина“ континуирано ја развива примената на роботската хирургија како дел од редовната клиничка практика и создава можност современи минимално инвазивни хируршки процедури да им бидат достапни на сѐ поголем број пациенти од земјата и регионот.

The post СО РОБОТСКА ХИРУРГИЈА ИЗВАДЕН БУБРЕГ ВО „АЏИБАДЕМ СИСТИНА“ Пациентката си замина дома по 4 дена appeared first on plusinfo.mk.