За Владата предводена од ВМРО-ДПМНЕ главен приоритет се интересите на македонските граѓани, а направен е уште еден значаен чекор од кој директна придобивка ќе имаат токму граѓаните на Република Македонија, истакна на прес-конференција Драгана Бојковска, член на ИК на ВМРО-ДПМНЕ и пратеник.

Таа посочи дека станува збор за „конкретен, видлив и практичен чекор кон европската иднина на Македонија“, преку приклучување кон иницијативата „Роаминг како дома“.

– Оваа иницијатива директно ги засега граѓаните, компаниите, студентите, работниците, македонската дијаспора и сите оние кои патуваат или комуницираат со земјите од Европската Унија – изјави Бојковска.

Со новиот модел, граѓаните ќе можат да користат мобилни услуги, повици, СМС-пораки и интернет без дополнителни роаминг трошоци, односно под услови еднакви со домашните тарифи.

– Поконкретно, добиваме помали трошоци за граѓаните, полесна комуникација со семејствата, пријателите и деловните партнери во Европа, подобри услови за компаниите и поевтина прекугранична соработка – додаде таа.

Според Бојковска, Владата во изминатиот период презела сериозни чекори за усогласување на домашното законодавство со европските регулативи во областа на електронските комуникации.

Таа појасни дека биле изработени четири гап-анализи, врз основа на кои е подготвен законски текст за измени и дополнувања на Законот за електронските комуникации.

– Нацрт-законот беше објавен на ЕНЕР на 20 јануари 2026 година, по што беше спроведена владина постапка. На 24 февруари 2026 година беше утврден текстот на Предлог-законот – истакна Бојковска.

Со тоа, како што додаде, Владата го заокружила клучниот дел од подготовките за приклучување кон иницијативата „Роаминг како дома“.

Таа информираше и дека на 4 јуни 2026 година Советот на Европската Унија го одобрил отпочнувањето преговори со земјите од Западен Балкан за проширување на режимот „Roam Like at Home“, што отвора простор за секторски преговори со Европската комисија.

– Ова е исклучително значаен чекор, затоа што ја отвора вратата за преговори со секоја од земјите од регионот, вклучително и Македонија – нагласи таа.

Дополнително, најави дека на 12 јуни 2026 година ќе се одржи состанок со министри од Западен Балкан и претставници на Европската комисија, на кој ќе се разговара за следните чекори и подготвеноста на земјите.

– Ова значи дека Македонија не доцни и дека е подготвена. Ова е директен показател дека Владата предводена од ВМРО-ДПМНЕ испорачува резултати – рече Бојковска.

Таа порача дека ова е пример за вистинска европска интеграција со конкретни придобивки за граѓаните.

– Помалку празни зборови, а повеќе резултати, конкретни решенија и работа – додаде пратеничката.

На крајот, Бојковска истакна дека Владата продолжува со дигитална трансформација и европско усогласување со цел подобрување на животниот стандард на граѓаните.

– Ова е успех за граѓаните на Македонија. Продолжуваме посветено, одговорно и со резултати – заклучи таа.

The post ГРАЃАНИТЕ ЌЕ КОРИСТАТ МОБИЛНИ УСЛУГИ БЕЗ ДОПОЛНИТЕЛНИ ТРОШОЦИ ВО ЕУ Македонија се приклучува кон иницијативата „Роаминг како дома“ appeared first on plusinfo.mk.

Порталот за услуги бележи рекордни резултати и станува централна точка за електронските услуги за граѓаните, вели министерот за дигитална трансформација, Стефан Андоновски.

Според податоците за 2025 година, порталот за услуги оствари 290% раст на издадените услуги и 166% раст на корисниците.

– Со овој раст порталот за услуги е најкористената дигитална алатка во државата. Јас сум многу задоволен како граѓаните го препознаваат и како го користат. Успешноста ја мериме преку бројки – рече министерот Андоновски во гостување на Телма.

Денес порталот е динамична платформа, додаде министерот, која генерира 3 до 4 нови услуги месечно.

– Ако имавме еден портал кој што беше непрепознатлив и луѓето не сакаа да го користат, денес имаме портал кој што генерира 3 до 4 нови услуги месечно, а кои граѓаните најмногу ги користат – додаде Андоновски.

Во врска со предизвиците околу дигиталната трансформација посочи дека определени институции процесите ги водат со значителна динамика, но има и институции кои имаат „страв“ или немаат воспоставен процес на дигитализација.

– Дигитализацијата не е процес на една Влада или на едно Министерство. Ова треба да биде процес на секоја институција – и на законодавната и на извршната и на судската власт. Дигитализацијата веќе не смее да се сфаќа како нешто што е убаво да се има, туку како нешто што е задолжително да се има – истакна Андоновски.

Тој очекува годинава да се заокружи процесот за „Роаминг како дома“ со ЕУ и смета дека почнатите активности во меѓувреме ќе ги мотивираат телеком операторите да им излезат во пресрет на граѓаните со трошоците при патување во странство.

– Минатата година имаше определено поместување кај еден од операторите со надолно регулирање на цените во роаминг, кај другиот оператор имаше други политки, попусти или дополнителни погодности, така што мислам дека ова ќе ги мотивира операторите. Имаме добра соработка со нив. Овој дел, поддршката на граѓаните кога патуваат навистина не е голема сума за нив, а за граѓаните е голема погодност да не мора да вадат нова сим картичка, туку едноставо да го активираат пакетот од некој од домашните оператори – рече Андоновски.

Говорејќи за придобивките оцени дека „Роаминг како дома“ е едно ниво подолу од визната либерализација.

– Во време на дигитализација да им дозволите на сопствените граѓани слободно да патуваат и притоа да не треба да трчаат до трафика да најдат сим картичка или да бараат која сим картичка е прифатена во таа држава, да плаќаат дополнителни трошоци или да имаат скриени трошоци кај своите домашни телеком оператори ако некој случјано им заѕвони на телефонот, а се некаде во Европа, е навистина нешто што е придобивка од заедничкиот пазар – посочи Андоновски.

Според него, ако постоел притисок од регионот и од Македонија порано ќе сме го фателе рокот и со Украина и со Молдавија.

– Процесот доби на динамика кога побара Украина, поради миграцијата од војната, но кога ќе ги исполните условите дома многу е лесно да лобирате – рече Андоновски.

Тој вели дека е неблагодарно да кажува рокови за завршување на преговорите и да се ефектуира одлуката за „Сурфај како дома“. Повтори дека државава ќе ги исполни своите обврски до средината на март само ако добиеме позитивен одговор од ЕУ дека законот е добар и законодавството е добро транспонирано.

– Потоа влегуваме во преговори. Ќе зависи и од ЕУ, од институциите во Европската Комисија, но и од земјите членки. Но, да бидам оптимист дека годинава можеме да го заокружиме овој процес – наведе Андоновски.

Најави и деека за првпат ќе се донесе стратегија за развој на медиумите.

– Стратегијата ќе ја носиме бавно, со широки дискусии. Веќе почна со работа работна група, во рамки на еден поголем ИПА проект. Ќе донесеме решение за сите предизвици, дали е закон за МИА, дали е закон за МТВ, за аудиовизуелни медиумски услуги… Мора да носиме закони што ќе ни ги поткреваат стандардите и ќе ни даваат простор за развој. Треба да се поттикнува развојот на сите медиуми, независноста, транспарентноста и чесните правила на игра – рече министерот Андоновски.

The post ДИГИТАЛИЗАЦИЈАТА НЕ НЕ НЕШТО ШТО Е УБАВО ДА СЕ ИМА, ТУКУ Е ЗАДОЛЖИТЕЛНО ДА СЕ ИМА За 166% порасна бројот на корисниците на порталот за услуги appeared first on plusinfo.mk.

Со измени на Законот за електронски комуникации, што се поставени за расправа на Единствениот национален регистар на прописи (ЕНЕР) државава ги пренесува во домашното законодавство потребните европски регулативи со што ќе може да се приклучи кон иницијативата „Роаминг како дома“ на Европската Унија. Со тоа ќе им се овозможи на граѓаните и на бизнисите да користат мобилни услуги во земјите на ЕУ без дополнителни роаминг трошоци, како да се дома.

За законските измени чиј носител е Министерството за дигитална трансформација, на ЕНЕР може да се достават коментари уште четири дена.

Со законот треба да се воспостават јасни правила за ограничување на цените на роаминг услугите со што, како што стои во нацрт врзијата, ќе се овозможи зголемена заштита на корисниците преку транспарентно информирање и механизми за спречување на неочекувано високи трошоци и зајакнување на регулаторната улога на надлежните институции во областа на електронските комуникации. Целта е да се овозможи укинување на трошоците за роаминг при патување во земјите на ЕУ, зголемена правна сигурност и предвидливост на цените и олеснет пристап до дигитални услуги, е-услуги и мобилна комуникација во странство.

Министерот за дигитална трансформација Стефан Андоновски минатиот месец во телевизиско интервју рече дека мора да ги завршиме нашите домашни обврски до февруари и оти останатото ќе биде лобирање и договор на ниво Македонија-ЕУ и Западен Балкан-ЕУ.

Покрај пренесувањето на четири регулативи во Законот за електронски комуникации преку измената што е во нацрт верзија до јули годинава треба да се донесат и подзаконски акти од страна на Агенцијата за електронски комуникации.

Државава е дел од Регионалниот договор за роаминг во Западен Балкан од 1 јуни 2021 година. Граѓаните имаат можност да користат мобилни комуникациски услуги во земјите од Западен Балкан под исти услови како и во домашните мрежи, без дополнителни трошоци за роаминг. И покрај овој напредок на регионално ниво, роамингот со земјите членки на ЕУ сè уште не е целосно регулиран согласно европските стандарди.

Европската комисија на Лидерскиот самит со земјите од Западен Балкан за Планот за раст одржан на 30 јуни и 1 јули 2025 година формално извести дека ќе започне постапка за изнаоѓање правно решение со кое ќе се овозможи земјите од регионот да пристапат кон инцијативата за „Роаминг како дома“.

Во август 2025 година Владата на Република Северна Македонија ја разгледа и усвои Информацијата за Иницијативата на Европската комисија за укинување на роаминг трошоците со земјите од Европската Унија, како дел од Планот за раст на Европската Унија за земјите од Западен Балкан, со Акциски план за усогласување со европското законодавство за роаминг и прилози. Согласно акцискиот план се задолжи Министерството за дигитална трансформација, во соработка со Агенцијата за електронските комуникации да го спроведе Акцискиот план во кој е утврдено дека најдоцна до 22 декември 2025 година да се изработи и до Владата да се достави детална анализа на правната празнина (GAP analysis) меѓу националното законодавство и релевантните регулативи на Европската Унија, и најдоцна до април 2026 година да изработи законски/подзаконски акти врз основа на деталната анализа.

The post СО ЕВРОПА ЌЕ ЗБОРУВАМЕ КАКО ДОМА Ќе се укинува роамингот со земјите членки на ЕУ appeared first on plusinfo.mk.

Mакедонија до февруари ќе ги заврши домашните задачи за „роаминг како дома“ во ЕУ, а останатото ќе биде лобирање и договор, рече вечерва министерот за дигитална трансформација Стефан Андоновски.

Тој не смета дека Црна Гора и Албанија пред Македонија ќе ја добијат оваа поволност зашто, како што истакна, сиот ангажман зависи од секоја држава поединечно.

– И тогаш кога првпат ја спомнав оваа замисла и идеја, беше дека ние мораме да си ги завршиме нашите домашни обврски и тие ќе ги завршиме до февруари. Останатото ќе биде лобирање и договор на ниво Македонија – ЕУ и Западен Балкан – ЕУ – нагласи министерот во интервју за емисијата „360 степени“ на МРТ 1.

Според него, она што Македонија треба да го заврши се четири регулативи пренесени во Законот за електронски комуникации, во една измена, и дополнително еден или два подзаконски акти.

– Ова прашање е едно од најважните кои нè засегаат и сметам, барем според мое мислење, е на ниво на визната либерализација, затоа што навистина се чувствува придобивката да бидете дел од поширокиот европски простор и во рамки на телекомуникацискиот свет. За нас беше топ-приоритет, но во ниту еден момент не бевме поставени во групата на Украина и Молдавија, кои први го започнаа процесот што беше инициран и од војната во Украина и од напливот на бегалци од Украина кон Полска и кон останатите држави на Европската Унија – напомена Андоновски.

Како што потенцира министерот, има две страни во договарањето за „роаминг како дома“ – едната е политичка, а другата е завршувањето на домашната задача.

– Политичкиот аспект потекна како проект од Украина и поради тоа тие беа ставени на брза лента и нивниот процес е завршен, а тие можат да ги користат услугите од оваа година. За нас, како и за Црна Гора и Албанија, беше најавено дека процесот ќе се одвива во текот на 2026 година, доколку ние ги имаме исполнето домашните обврски – рече министерот.

На прашањето дали станува збор за нефер и непринципиелен однос на ЕУ или за отсуство на иницијативност од земјите од регионот, вклучувајќи ја и Македонија, тој е дециден дека воопшто не се работи за отсуство на иницијативност.

– Не, не би се согласил дека е отсуство на иницијативност, зашто првпат се повика Европската Унија да обезбеди еднакви роаминг-услови за Македонија и за регионот уште на почетокот на Берлинскиот процес, кога тоа беше овозможено за државите од Западен Балкан, што значи дека и моите претходници и претходните влади се обидувале на некој начин да дискутираат, но ќе дојдам до тоа дека, за жал, не беше завршена домашната задача. Вториот аспект, политичкиот, сметам дека потекна од Украина поради кризата и беше вграден во договорите со Украина и со Молдавија во моментот кога тие беа потпишани. Кај нас и кај Црна Гора и Албанија нема потпишано таков вид договор, што значи ќе треба билатерално да се договараме. Во нашите договори за стабилизација и асоцијација не стојат прашањата на роаминг како можност за ослободување. Околу домашната задача – ние требало уште од 2018 година да го приспособиме европскиот комуникациски код. Тоа е еден голем законик на Европската Унија, во нашиот Закон за електронски комуникации, и уште четири други регулативи – две од 2016 година, една од 2018-2019 и една од 2022 година. За жал, ниту една од овие регулативи не биле пренесени во македонското законодавство. Ние направивме голем чекор со донесувањето на Законот за електронски комуникации во текот на 2025 година и на крајот на 2025 дополнително го доусогласивме – објасни министерот.

The post ДО ФЕВРУАРИ ЌЕ ГИ ЗАВРШИМЕ ОБВРСКИТЕ ЗА РОАМИНГ КАКО ДОМА ВО ЕУ Потоа следи лобирање до договор со Брисел appeared first on plusinfo.mk.

На претстојниот Дигитален самит на Западен Балкан 2025 што ќе се одржи на 1 и 2 октомври во Скопје земјите од Западен Балкан ќе усвојат заедничка изјава со повик кон ЕУ да се забрза процесот „роаминг како дома“ и нула трошоци за интернет за нашите граѓани во ЕУ.

„Унијата пред еден месец излезе со патоказ што треба да го исполниме како држави за да пристапиме кон оваа зона, но потребна е активност и од нејзина страна. Ние нашите обврски ќе ги завршиме до декември 2025 година и очекувам наредната година први да го потпишеме договорот за роаминг со нула трошоци за македонските граѓани – рече денеска министерот за дигитална трансформација Стефан Андоновски.

Според него, Македонија е многу напред во однос на исполнувањето на условите.

– Главна беше измената на Законот за електронски комуникации за исполнување на клучните регулативи и директиви на ЕУ, што ние веќе го направивме летово. Остануваат уште неколу подзаконски акти што треба да ги завршиме до крајот на годинава и со тоа ќе ги исполниме условите. Во напредна фаза сме, го изработивме нашиот Акциски план и мислам дека ќе бидеме први од регионот – истакна Андоновски.

Како што објасни, во принцип, секоја држава од Западен Балкан одговара за себе.

– Минатиот пат, кога се потпишаа договорите за роаминг на Западен Балкан ги потпишаа сите држави во исто време. Овој пат, со оглед дека е во врска со ЕУ, би требало да биде секоја држава за себе. Планот на ЕУ е за сите држави од Западен Балкан. Тоа останува да го дискутираме на претстојниот Дигиталниот самит на Западен Балкан 2025 и се надевам дека ќе имам е конкретен одговор на ова прашање, но наша обврска е ние да бидеме подготвени до јануари – рече министерот.

Тој денеска ја најави организацијата на Дигиталниот самит на Западен Балкан 2025, кој повторно ќе се одржи во Скопје, на 1 и 2 октомври 2025 година во Музејот на современата уметност.

Ова регионална платформа ги поврзува владите од регионот, деловната заедница, академијата и меѓународните партнери, со цел забрзување на дигиталната трансформација во регионот.

Самитот ќе биде организиран на две сцени – главна и технолошка, со три носечки приоритети: Дигитален паричник – сигурен и препознатлив пристап до јавни и приватни услуги, Интероперабилност – поврзување на системи и регистри за прекугранични електронски услуги и Сајбер-безбедност – заштита на личните податоци и критичната инфраструктура.

На технолошката сцена ќе бидат отворени теми за вештачка интелигенција, 5Г и оптичка инфраструктура, дигитални вештини и за пристапот на регионалните компании до единствениот европски дигитален пазар.

Министерот најави дека се очекуваат повеќе од 800 учесници и говорници, меѓу кои: претседателот на Владата Христијан Мицкоски, министри од Црна Гора, Албанија, високи претставнци од Србија, Косово, Босна и Херцеговина, високи претставници на Европската комисија, Регионалниот совет за соработка, ИТУ, бизнис секторот од регионот и други меѓународни организации.

The post МАКЕДОНИЈА ДО ДЕКЕМВРИ ЌЕ ГИ ИСПОЛНИ УСЛОВИТЕ ЗА „РОАМИНГ КАКО ДОМА“ Скопје ќе биде домаќин на Дигиталниот самит на Западен Балкан 2025 appeared first on plusinfo.mk.