Набавени се 70.000 дози четиритипна вакцина против сезонски грип. Од Министерството велат дека континуирано го зголемуваат бројот на обезбедени вакцини.

Пријавувањето се врши со пополнување на апликација на страницата vakcinacija.mk.

„На тој начин, директно се регистрирате за вакцинација во системот Мој Термин. Согласно распоредот предвиден во планот за вакцинација, преку смс ќе добиете повратна информација за точниот датум, час и место кога треба да се вакцинирате“, соопшти Министерството за здравство.

Со бесплатна вакцинација се опфатени следните ризични групи: повозрасни лица (над 65 години), лица со хронични заболувања, здравствени работници, бремени жени, деца на возраст од 6 месеци до 5 години, како и лица сместени во установи за социјална заштита на стари лица и вработените во установи за социјална заштита на стари лица.

„Потсетуваме дека вакцинацијата против сезонски грип е најефикасна мерка за превенција, која спречува појава на потешки форми на грип, компликации и смртен исход особено кај ризичните групи“, се вели во соопштението на Министерството за здравство.

The post ПОЧНА ПРИЈАВУВАЊЕТО ЗА БЕСПЛАТНА ВАКЦИНАЦИЈА ПРОТИВ ГРИП За ризичните групи обезбедени 70.000 дози appeared first on plusinfo.mk.