Располагаме со квалитетно јагне, кое што е барано надвор од нашите граници. Досега се откупени некаде 120.000 јагниња согласно податоците со кои што располагам. Побарувачката на јагниња би требало да заврши во текот на 7 до 10 дена. Се очекува да се откупат дополнително од 8 – 10.000 јагниња, значи дека ќе биде сето откупено, изјави министерот за земјоделство Цветан Трипуновски.

Во делот на овчарството, вели тој,  морам да кажам дека согласно ветувањата и Програмата ние ги зголемивме субвенциите за 50%. Сега субвенцијата за грло овца изнесува 3.000 денари. Дополнително за литар предадено млеко од постоечките 6 денари ги зголемивме за 7 денари за литар.

– Органските производителите добиваат дополнително 1.500 денари по грло. Работиме да се зголеми сточниот фонд и поради тоа предвидовме мерка за зголемување на основното стадо, секој кој што ќе го зголеми своето стадо за минимум 30% ќе добиe 30% зголемени субвенции -рече Трипуновски во гостување на ТВ 24.

Во однос на реакцијата на сточарите дека се намалуваат нивните стада со Програма според која  секој фармер треба да има минимум предадено 50% од јагнињата за да може да биде корисник на основната мерка, тој рече дека ќе се направи корекција.

– Ја следиме состојбата и по завршување на откупот, наредниве денови ќе направиме анализа. Ги уверувам фармерите дека секогаш ќе бидеме на нивна страна и ако треба да направиме некоја корекција во делот на Програмата, сигурно ќе ја направиме – нагласи тој.

Тој додаде дека во текот на вчерашниот ден на околу 4.500 млекопроизводители им се исплатени субвенции за цела 2024 година.

The post ОТКУПЕНИ СЕ ПОВЕЌЕ ОД 120.000 ЈАГНИЊА Трипуновски најави корекција на основот за субвенција кај јагнињата appeared first on plusinfo.mk.