Поранешниот потпретседател на СДСМ, и екс-градоначалник на Скопје од редовите на неговата партија, Петре Шилегов, во интервју за неделникот „Фокус“ не штеди зборови за критика за состојбите во партијата, за обидите за смена на актуелното раководство и за, како што вели, „распадот“ на СДСМ.

Тој вели дека јавно побарал оставка откако претходно имал неколку средби со раководството и со актуелниот претседател на партијата.

Тој посочува дека СДСМ бележи историски слаби резултати во најголемите урбани центри, наведувајќи дека партијата е петта во Скопје, трета во Куманово, Велес, Штип, Битола и Прилеп.

– И вие да имате позиција дека не чувствувате политичка одговорност и се убедувате дека тоа се добри резултати, тоа за мене значи или дека сте политички незрели или свесно ја уништувате оваа приказна – вели Шилегов.

Според Шилегов, СДСМ веќе извесен период е „заробена од одредена структура“.

Тој додава дека во јавноста се зборува за наводен договор меѓу актуелното раководство на СДСМ и раководството на ВМРО-ДПМНЕ, со цел партијата да биде, како што вели, „ставена во лер“.

Шилегов смета дека СДСМ упорно ги промашува главните теми за политичко дејствување и дека партијата настапува без јасна емоција и убедливост.

– За жал, јас гледам дека СДСМ е политички импотентен – вели Шилегов, додавајќи дека претставниците на партијата често зборуваат со флоскули и без уверување во она што го кажуваат.

Во интервју за „Фокус“ Шилегов оценува дека наместо да се отвораат теми како сиромаштијата, стопирањето на реформите и суштинските проблеми на граѓаните, политичкиот фокус се насочува кон прашања за кои, според него, однапред се знае дека ќе паднат на Уставен суд.

The post СДСМ Е ПОЛИТИЧКИ ИМПОТЕНТНА ПАРТИЈА Шилегов без ракавици за состојбата во опозицијата appeared first on plusinfo.mk.