Реза Пахлави, син на последниот ирански шах Мохамед Реза Пахлави беше прелиен со црвена течност денеска во Берлин. Инцидентот се случил додека Пахлави ја напуштал прес-конференцијата, за време на која го критикувал прекинот на огнот меѓу САД и Иран.

Напаѓачот веднаш бил приведен од полицијата.

Пахлави е син на последниот ирански шах Мохамед Реза Пахлави, кој беше соборен од власт во 1979 година.

Пахлави, кој не се сретна со официјални лица во Берлин, денеска изјави дека договорот за прекин на огнот „претпоставува дека однесувањето на иранската влада ќе се промени“, но дека тоа нема да се случи.

– Не мислам дека тоа ќе се случи. Не велам дека на дипломатијата не треба да ѝ се даде шанса, но мислам дека ѝ се дадени доволно шанси – рече Пахлави.

Пахлави ја поддржа воената интервенција на САД и Израел на Блискиот Исток.

The post РЕЗА ПАХЛАВИ ПРЕЛИЕН СО БОЈА НА ПРЕС-КОНФЕРЕНЦИЈА ВО БЕРЛИН Синот на последниот ирански шах е против примирјето appeared first on plusinfo.mk.

Иранската опозиција во егзил најави дека е подготвена да формира привремена влада доколку дојде до пад на власта во Техеран.

Национален совет за отпор на Иран соопшти дека има план за транзициска власт која би организирала избори во рок од шест месеци по евентуалното соборување на сегашното раководство во земјата.

Планот се темели на политичка програма од десет точки предложена од лидерската фигура на организацијата, Марјам Раџави. Со него, како што наведуваат од НЦРИ, треба да се овозможи мирен пренос на власта и воспоставување демократски институции.

Организацијата ја отфрла идејата за политичка транзиција под водство на Реза Пахлави, син на последниот ирански шах, кој живее во егзил во Соединетите Американски Држави.

Националниот совет за отпор на Иран е формиран во 1981 година од страна на движењето Народни муџахедини на Иран, кое има за цел промена на политичкиот систем во Иран.

Сепак, организацијата со години предизвикува контроверзии. Дел од опозициските групи во и надвор од Иран ја отфрлаат, а нејзините активности се забранети во земјата.

МЕК во минатото водеше вооружени активности против иранската власт од територијата на Ирак и во одредени периоди беше ставена на листите на терористички организации во Европа и САД. Критичарите тврдат дека нејзината внатрешна структура е недемократска.

Од НЦРИ тврдат дека располагаат со мрежа на поддржувачи, разузнавачки капацитети и „ослободителни сили“ кои можат да дејствуваат и во силно обезбедени делови од Иран.

The post ИРАНСКАТА ОПОЗИЦИЈА ВО ЕГЗИЛ ИМА ПЛАН Најавена привремена влада ако падне режимот appeared first on plusinfo.mk.

Додека во германскиот град се одржува престижната Минхенска безбедносна конференција, улиците на Минхен ги преплавија околу 200.000 демонстранти, кои излегоа на протест против властите во Иран.

Според полицијата, собирот поминал мирно, а граѓаните се собрале на плоштад во западниот дел од градот со јасна порака – бараат пад на Исламска Република Иран по крвавото задушување на протестите што започнаа кон крајот на декември.

Дел од демонстрантите носеа знамиња со зелено-бело-црвени ленти и симболот лав и сонце – обележје на монархијата што беше соборена во 1979 година.

Протестите не се ограничени само на Германија. За денеска се најавени митинзи со повик за меѓународна акција против Техеран и во Торонто и Лос Анџелес.

Во меѓувреме, протераниот син на соборениот шах, Реза Пахлави, од егзил упати директен повик до Доналд Трамп да му „помогне“ на иранскиот народ.

– Време е да се стави крај на Исламската Република – порача Пахлави, додавајќи дека граѓаните не бараат реформи, туку целосен крај на режимот.

Масовноста на протестот во Минхен се толкува како силна порака до меѓународната заедница, токму во момент кога светските лидери дебатираат за глобалната безбедност.

The post НАД 200.000 ЛИЦА НА УЛИЦИТЕ ВО МИНХЕН Масовен протест против Исламската Република appeared first on plusinfo.mk.

Врховниот лидер на Иран, ајатолахот Али Хамнеи, за првпат јавно го обвини американскиот претседател Доналд Трамп дека е „директно одговорен за жртвите и штетите“ во земјата, пренесува СкајЊуз. Според него, протестите биле „дело на странски терористи и вандали што ги уништуваат сопствените улици за да му угодат на претседателот на друга земја“.

„Трамп е одговорен за жртвите, штетите и за клеветите што ги упати против иранскиот народ“, напиша Хамнеи на мрежата Икс, во својата прва објава по повеќе од пет дена молк.

Паралелно, активистичката агенција ХРАНА објави дека во репресијата се убиени најмалку 3.090 лица, од кои 2.885 биле демонстранти. Државната телевизија на Иран, пак, признава само 300 загинати, додека британски Скај њуз потврди независно најмалку 110 смртни случаи, меѓу кои жени и деца. Сведоштвата зборуваат за прикриена бруталност и тајни погреби.

Протестите започнале на 28 декември поради инфлацијата и сиромаштијата, а за неколку дена се прошириле низ цел Иран. Студенти и трговци марширале во Техеран, повикувајќи на крај на клерикалното владеење и потсетувајќи на времето на Реза Шах, симбол на секуларниот Иран пред 1979 година.

Интернетот бил целосно блокиран над една недела, а NetBlocks јави дека „конекцијата се враќа по повеќе од 200 часа темнина“. Властите сега прават процена на штетата – уништени се стотици џамии, болници и амбулантни возила.

Трамп, кој првично најави „помош за иранскиот народ“, потоа го смени тонот и се заблагодари на иранското раководство за откажувањето на „над 800 бесења“.

– Никој не ме убедил да не нападнам, јас самиот се убедив – изјави тој пред новинарите, додавајќи дека „времето ќе покаже кој имал право“.

Али Ваез од Меѓународната кризна група коментираше дека Трамп „очајно бара излез“ од ветувањето за воени мерки.

Во меѓувреме,  прогонетиот престолонаследник Реза Пахлави од Вашингтон порача дека „Исламската Република ќе падне – не ако, туку кога“, најавувајќи преодна влада за враќање на демократијата. Но, аналитичарите предупредуваат дека тоа сценарио е далеку од реалност.

Во Лондон, пак, пред иранската амбасада избувнаа немири. Неколку полицајци се повредени, четворица демонстранти хоспитализирани, а полицијата приведе повеќе лица по фрлање проектили.

The post АЈАТОЛАХОТ ГО ПРОЗВА ТРАМП „ЗА ЖРТВИТЕ И ЗА КЛЕВЕТИТЕ“ Најмалку 3.000 лица се убиени во Иран, од нив 2.885 демонстранти appeared first on plusinfo.mk.

Синот на соборениот ирански шах, Реза Пахлави, повика на итна акција во Иран. Според него брза интервенција на САД би можела да ги ограничи жртвите и да го забрза падот на сегашното раководство.

– Најдобриот начин за да се гарантира помалку жртви во Иран е да се интервенира порано, за конечно да падне овој режим. Претседателот Доналд Трамп мора многу брзо да донесе одлука – рече Пахлави во интервју за американската телевизија Си-Би-Ес.

Тој истакна дека комуницирал со американската администрација, но не наведе детали.

Пахлави го обвини иранското раководство дека се обидува да ја измами меѓународната заедница со давање сигнали за подготвеност за преговори за прекин на немирите.

– Играта ќе се смени кога режимот ќе разбере дека повеќе не може да се потпира на продолжена кампања на репресија без светот да реагира на тоа… Солидарноста со иранскиот народ значи поддршка на нивните барања, а нивните барања се овој режим да си оди – истакна Пахлави, кој со години живее во егзил во САД.

The post РЕЗА ПАХЛАВИ БАРА БРЗА ВОЕНА ИНТЕРВЕНЦИЈА НА САД ВО ИРАН Синот на соборениот шах го повика Трамп брзо да одлучи appeared first on plusinfo.mk.

Иран денеска е речиси целосно отсечен од надворешниот свет, откако властите го блокираа пристапот до интернет во обид да го запрат ширењето на масовните антивладини протести. Видеоснимки што сепак стигнаа до светските медиуми прикажуваат запалени згради и возила во повеќе ирански градови, што сведочи за ескалација на немирите.

Врховниот лидер на Иран, ајатолахот Али Хаменеи, во телевизиско обраќање порача дека државата нема да попушти пред, како што ги нарече, „вандалите“. Тој ги обвини демонстрантите дека дејствуваат во интерес на опозициски групи во егзил и на САД. Истовремено, организациите за човекови права алармираат дека безбедносните сили користат огнено оружје против цивили, особено во јужниот дел на земјата.

Протестите, кои првично избувнаа поради тешката економска состојба, наглиот пад на вредноста на иранскиот риал и инфлацијата од околу 40 отсто, брзо прераснаа во директен бунт против владејачкиот режим. Поради блокадата на интернетот, протокот на информации е драстично намален, телефонските врски се во прекин, а откажани се и голем број меѓународни летови кон Техеран.

Иранската државна телевизија за немирите ја обвини дисидентската организација „Муџахедини на народот“ (МЕК), која дејствува од странство. Иако властите јавно признаваат дека економските проблеми се реални, паралелно спроведуваат остри репресивни мерки против оние кои ги квалификуваат како „насилни бунтовници“.

Во меѓувреме, опозициските лидери во егзил, меѓу кои и Реза Пахлави, син на соборениот ирански шах, упатија повици за масовно излегување на граѓаните на улиците. Американскиот претседател Доналд Трамп изјави дека внимателно ја следи ситуацијата, но засега се воздржува од директна средба или јавно изразена поддршка за Пахлави.

Германија упати најостра осуда за насилството врз демонстрантите, нагласувајќи дека правото на мирен протест и слободата на медиумите мора да бидат гарантирани.

The post РЕЖИМОТ ВО ИРАН УДИРА ЖЕСТОКО Интернетот исклучен, полицијата пука врз демонстранти appeared first on plusinfo.mk.