Државниот завод за ревизија изразил неповолно мислење за реалноста и објективноста на финансиските извештаи на Националната установа Албански театар – Скопје за 2024 година, а за усогласеноста со законската регулатива, упатствата и воспоставените политики дадено е мислење со резерва.

Ревизијата на сметката на основниот буџет утврдила повеќе слабости во финансиското работење и управувањето со средствата на установата. Меѓу констатираните состојби се слабости во процесот на попис на средствата и изворите на средства, невоспоставена материјална евиденција за материјалните средства, како и евидентирање градежни објекти, без обезбеден акт за сопственост.

Ревизорите утврдиле и дека некои од материјалните средства и понатаму се водат како средства во подготовка и покрај тоа што за нив е обезбедено одобрение за употреба. Дополнително, констатирани се недостатоци во постапките за набавка, прием и задолжување со материјали и ситен инвентар, како и слабости во евидентирањето на полното работно време.

Во извештајот е наведено и дека се намирувале обврски по проекти од претходни години, без за нив да бидат предвидени средства во тековниот годишен план за работа.

Во делот „Нагласување прашања“ ревизијата укажува на нерегулиран начин на користење недвижни и движни ствари, функционирање на Управниот одбор без законски утврдениот број членови, прашања поврзани со систематизацијата на работните места, користењето на паркинг-просторот наменет за публиката и тековни судски постапки.

Ревизорите посочуваат и на слабости во системот на внатрешни контроли, односно недонесени интерни процедури за значајни процеси, несистематизирано работно место за раководител на единицата за финансиски прашања и неназначени лица за вршење ex-ante и ex-post финансиска контрола.

Државниот завод за ревизија дал препораки за надминување на утврдените состојби и подобрување на работењето на установата.

Од НУ Албански театар, како што велат од ДЗР, доставен е допис со кој се информира дека одговорнoто лице нема забелешки во однос на нацрт-извештајот на овластениот државен ревизор. 

The post ЕВИДЕНТИРАЛЕ ГРАДЕЖНИ ОБЈЕКТИ БЕЗ ДОКУМЕНТ ЗА СОПСТВЕНОСТ Неповолна ревизија за Албанскиот театар appeared first on plusinfo.mk.

Голема виолетова модринка на десната страна од лицето го стави Ендру Маунтбатен-Виндзор повторно во центарот на вниманието на британската јавност.

Поранешниот принц беше фотографиран додека возел во близина на својот нов дом на имотот Сандрингам. Британските медиуми наведуваат дека нема причина за загриженост и дека не е познато како ја заработил повредата.

Во исто време, нов извештај отвори прашања за привилегиите што со години ги уживал преку кралските имоти. Ендру ги изнајмувал колибите на „Ројал Лоџ“, пишува Би-Би-Си. Принцот, неговото семејство и персоналот користеле 12 имоти во сопственост на Крунскиот имот и Кралското домаќинство.

Поранешниот принц вложил 7,5 милиони фунти во обновата на „Ројал Лоџ“(во превод Кралската Ложа) кога го добил закупот. Според договорот, поради таа инвестиција не плаќал месечна кирија.

Плаќал симболична кирија

Според извештајот на Британската национална канцеларија за ревизија, Ендру со години плаќал значително пониска кирија за Кралската ложа во Виндзор.

Договорот му овозможувал и да издава под закуп 3 колиби што се наоѓале во рамки на имотот.

Во извештајот не е наведено колкав приход остварил, но откритијата предизвикаа критики и дополнителен интерес во јавноста.

Former Prince Andrew’s luck just goes from bad to worse

He was pictured today MASSIVE bruise on his face

I wonder which lucky person had the chance to give him that

Source: The Sun pic.twitter.com/NIkqCyOYBq

— Mario Nawfal (@MarioNawfal) June 4, 2026

Ќерките на Ендру не плаќаат ниту денар   

Документот ги опфати и условите под кои живеат други членови на британското кралско семејство.

Ревизорите наведуваат дека дел од договорите биле склучувани пред повеќе децении и содржеле различни услови во споредба со пазарните цени.

„Дејли Мејл“ тврди дека во извештајот пишува и дека меѓу оние кои уживале во шемата на Ендру се неговите ќерки Беатрис и Јуџин. Тие не извршуваат кралски должности, работат и се мажени, но не плаќаат ни денар за живеење на кралски имот.

„И двете жени имаат свои кариери, богати сопрузи и домови од повеќе милиони фунти на друго место и сигурно ќе се соочат со прашања зошто не можат сами да си ја платат егзистенцијата“, се вели во текстот.

Сепак, според извештајот, во анализираните случаи биле следени стандардните процедури и проценки.

Според некои написи, истрагата за примањата на принцот може да потрае цела година.

Контроверзиите не стивнуваат

Ендру останува една од најконтроверзните личности во британското кралско семејство.

Во последните години неговото име најчесто се поврзува со аферата околу американскиот финансиер и осуден сексуален престапник Џефри Епштајн.

По скандалот, тој ги загуби повеќето кралски должности и почести, а повеќе не ја користи титулата „Неговото кралско височество“ во официјалните настапи.

Фотографиите со модринката дополнително го привлекоа вниманието на јавноста во период кога повторно се отвора дебатата за неговите привилегии и улога во кралското семејство.

The post ПРИНЦОТ ЕНДРУ СНИМЕН СО МОДРИНКА НА ЛИЦЕТО Ревизијата откри како заработувал од кралските имоти appeared first on plusinfo.mk.

Државната комисија за спречување на корупцијата согласно своите надлежности по сопствена иницијатива отвори предмет во врска со наодите во ревизорскиот извештај на Државниот завод за ревизија за Институтот за јавно здравје.

Како што се посочува во соопштението на ДКСК, предметот е отворен поради потребата да се проверат наводите изнесени во јавноста и да се согледаат евентуални ризици од корупција, судир на интереси, злоупотреба на службена положба или други неправилности во работењето.

„ДКСК ќе ги преземе сите потребни дејствија за прибирање и за анализа на релевантната документација и информациите од надлежните институции, со цел утврдување на фактичката состојба“ соопшти ДКСК.

Во извештајот на Државниот завод за ревизија се наведува дека во ИЈЗ постоел несоодветен начин на наградување на вработените, како и набавка на непотребна медицинска опрема, односно, била купувана опрема која веќе ја поседувале, наместо онаа што навистина недостигала. Дополнително, биле набавувани електронски уреди како компјутери, лаптопи и мобилни телефони со пониски технолошки спецификации од оние што биле платени. Исто така, бил склучен договор за телекомуникациски услуги со двојно повисоки цени – наместо 80.000 денари биле исплатени 1,5 милион денари. Во извештајот се споменува и кабел долг 15 километри, набавен за 15.000 евра, за кој не се знае каде се наоѓа.

Директорката на Институтот за јавно здравје, Марија Андоновска вчера на прес-конференција по објавениот извештај на ДЗР изрази надеж дека Јавното обвинителство ќе реагира за утврдените неправилности во овој Институт, кои се направени пред таа да дојде на чело на институцијата.

– И мене некои работи ми изгледаа нестварно штом дојдов на оваа функција, што се случувало пред јас да дојдам на позицијата – рече Андоновска.

Кога стапила на директорската позиција со нејзиниот тим констатирале дека нема реагенси и немало евиденција за нив.

– Некои од луѓето примале плата, а не доаѓале на работа, колеги ги евидентирале дека доаѓаат на работно место, а тие за возврат им давале пари – посочи Андоновска.

Таа информираше и дека ИЈЗ склучувал договори на дело со веќе вработени лица. Се издавал простор сопственост на ИЈЗ на пекарница, нешто што е спротивно на законот. Се правеле јавни набавки што не биле предвидени во годишниот план.

Андоновска рече дека од 44.000 до 88.000 денари се добивало плус на платата на едно вработено лице за архивска граѓа, како, на пример, за чистење двор.

Таа истакна и дека некои од вработените во Институтот за јавно здравје чесно и професионално си ја вршеле работата и апелираше да не се ставаат сите вработени  во ист кош.

Рече и дека повеќето од работите што се случувале во Институтот сега се надминати.

The post АНТИКОРУПЦИСКА ЌЕ ЈА ПРОВЕРИ РАБОТАТА НА ИНСТИТУТОТ ЗА ЈАВНО ЗДРАВЈЕ Ќе се бараат корупција, судир на интереси и злоупотреби appeared first on plusinfo.mk.

Државниот завод за ревизија изрази мислење без резерва за финансиските извештаи на Академијата за судии и јавни обвинители за 2024 година оценувајќи дека тие реално и објективно ја прикажуваат финансиската состојба на институцијата. Истовремено, за усогласеноста на работењето со законската регулатива, упатствата и воспоставените политики е дадено мислење со резерва поради утврдени одредени слабости и неправилности.

Според конечниот ревизорски извештај, надоместоците на членовите на Управниот одбор и Програмскиот совет биле исплаќани месечно и во целост наместо според присуството на одржаните седници. Ревизорите констатирале и дека рокот за завршување на втората фаза од почетната обука на осмата генерација слушатели за судии и јавни обвинители бил надминат за три месеци, што довело до дополнителни исплати за ментори и координатори.

Во извештајот се наведува дека дел од договорите со менторите биле склучени по истекот на периодот на менторство, а биле исплаќани и средства за координатори и членови на комисии за оценување на практична настава иако нивниот статус и правото на надоместок не се утврдени со Законот за Академијата.

Ревизијата утврдила и надминување на законски утврдениот максимум за прекувремена работа и дека не е извршено претходно писмено известување до подрачниот инспектор на труд за воведување прекувремено ангажирање на вработените. Исплатени се средства за прекувремена работа на вработено лице во денови за кои му се исплатени и дневници за службен пат во странство и за присуство на седница која се одржала во текот на полното работно време.

Дополнително, констатирани се слабости во контролата на користењето на картичките за гориво, неправилности во тендерската документација и набавка на стоки и услуги, без спроведена постапка за јавна набавка.

Државниот завод за ревизија дал препораки за надминување на утврдените состојби и унапредување на системот на контроли и управување во институцијата.

Во извештајот се нотира дека од страна на претходното одговорно лице на Академијата за судии и јавни обвинители доставени се забелешки на нацрт-извештајот на овластениот државен ревизор. Забелешките, како што велат од ДЗР, се разгледани и утврдено е дека тие претставуваат известувања за причините што довеле до утврдените состојби. 

The post ЗЕЛ ДНЕВНИЦИ ЗА СЕДНИЦА И ЗА СЛУЖБЕН ПАТ ВО СТРАНСТВО АМА И ЗА ПРЕКУВРЕМЕНА РАБОТА Што открива ревизијата за Академијата за судии и јавни обвинители? appeared first on plusinfo.mk.

По објавениот извештај на Државниот завод за ревизија, директорката на Институтот за јавно здравје, Марија Андоновска, на денешната прес-конференција изрази надеж дека Јавното обвинителство ќе реагира за утврдените неправилности во Институтот направени во времето пред таа да дојде на чело на институцијата.

– И мене некои работи ми изгледаа нестварно штом дојдов на оваа функција, што се случувало пред јас да дојдам на позицијата – рече Андоновска.

Кога дошла на директорската позиција, со нејзиниот тим констатирале дека нема реагенси и немало евиденција за реагенси.

– Дел од луѓето примале плата, а не доаѓале на работа, колеги ги евидентирале дека доаѓаат на работно место, а тие за возврат им давале пари – посочи Андоновска.

Некои лица биле примени на работа без административен испит, а исто така констатирале и неправилни унапредувања и исплаќање додатоци. Несоодветен начин имало за наградување на вработените, се набавувала непотребна медицинска опрема. Се набавувале апарати што веќе ги имаат, наместо нешто што недостасува. Фармацевтски техничар извршувал услуги на медицинска сестра или лаборант, со што здравствените услуги биле ставени под знак прашалник.

Андоновска информираше дека пред таа да дојде на чело на ИЈЗ, се случувало да се склучи договор на дело со веќе вработени лица. Се издавал простор сопственост на ИЈЗ на пекара, нешто што, подвлече таа, било спротивно на Законот. Се правеле јавни набавки што не биле предвидени во годишниот план.

На новинарско прашање, Андоновска одговори дека од 44 до 88.000 денари се добивало плус на платата на едно вработено лице за архивска граѓа – како на пример, чистење двор.

Андоновска истакна дека дел од вработените во Институтот за јавно здравје си ја вршеле чесно и професионално работата, па апелираше сите вработени да не се ставаат во ист кош. Таа уверува дека најголем дел од работите што се случувале во Институтот, сега се надминати.

The post ГИ ОТЧУКУВАЛЕ ДЕКА СЕ НА РАБОТА ЗА ПАРИ Андоновска бара Обвинителството да се заинтересира за неправилностите во Институтот за јавно здравје appeared first on plusinfo.mk.

Мрежен кабел за интернет долг 15 километри – купен 15.000 евра, а никаде го нема, набавени компјутери, лаптопи, ајфони за кои постои само барање без реверс каде завршиле, склучен договор од 1.600.000 денари за мобилни телекомуникациски услуги или двојно повеќе од предвидените 800.000 денари, како и договор од 1,1 милион денари за фиксна телефонија, иако биле предвидени 550.000 денари, се само некои од недоследностите во работењето на Институтот за јавно здравје (ИЈЗ) што ги утврдило актуелното раководство.

Како што изјави за МИА директорката на Институтот, Марија Андоновска, во институцијата не била направена ревизија од 2017 година.

Директорката за денеска (03.06.2026) најави прес-конференција на која ќе соопшти повеќе детали околу неправилностите во работењето на ИЈЗ.

– Утврдивме и дека за прослава на 100-годишнината на ИЈЗ за еден час биле потрошени 50.000 евра. Па за што за еден час може да се потрошат 50.000 евра? Понатаму, ако законот дозволува за 1.000 евра или за 62.000 денари да набавиш некакви, одредени средства што ти се потребни без распишување јавна набавка, тие над милион и нешто имаат потрошено надвор од дозволеното. Замислете, 1.000 евра дозволени, а потрошиле над 20.000 евра. По 500.000 денари се давало за репрезентација, споредено со сега кога имаме нула репрезентација, некористење службено возило, немање службени патувања. Јас не користам мобилен телефон службен, не користам службен број. Постои евиденција – доколку се добие одреден апарат, на кого се издава апаратот, се задолжува. Постојат реверси и слично. Исплаќани се и одредени додатоци на плата незаконски, билдани, награди, активни, пасивни приправности – се спротивно на закон. Месечно по 5 милиони денари се штедат сега на тоа кога се изрегулирани коефициентите, кога не се исплаќа незаконски во однос со исплатите. Во однос на мрежниот кабел од 15.000 евра, ниту знаеме каде е, ни што е, ни зошто е – истакна Андоновска.

Таа потенцира дека на барање на ИЈЗ е извршена ревизијата, чиј извештај со неповолно мислење беше објавен вчера.

– Во однос со извештајот на Државниот завод за ревизија, би сакала да спомнам неколку работи. Најпрво, при моето доаѓање во Институтот за јавно здравје, уште од самиот почеток утврдив многу неправилности. Веднаш беше информирана јавноста, информирани беа и надлежните институции. Дури испративме писмо и сами побаравме да дојде Државниот завод за ревизија да ги утврди оние неправилности со кои ние се соочуваме. Ден за ден наоѓавме нови и нови неправилности. Немаше крај на неправилностите. Практично, не најдовме една работа што била правена законски или по некаков пропис. Очекував на самиот почеток дека барем Јавното обвинителство, по допрен глас, ќе покрене некаква постапка – рече директорката.

Таа напомена дека Извештајот на ДЗР се однесува за периодот пред нејзиното доаѓање на местото директор на ИЈЗ.

– Се работи за 2024 година. Но, сакам да напоменам и дека ревизија немало во Институтот од 2017 година. Можеби и затоа се настанати толку многу проблеми и неправилности во функционирањето. Голем дел од овие неправилности, освен што беа комуницирани со јавноста, беа предадени и до Секторот за криминалистика и организиран сериозен криминал — Единица за корупција, која, претпоставувам, поради обемноста на материјалите – повеќе од дваесетина класери,  сè уште не е дојдено до некаков резултат или исход на целата таа ситуација. И како што спомнав, неправилностите се премногу. Нема нешто да издвоиме, да речеме: „е, ова го правеле како што треба“. Најдовме празна сметка на Институтот. Имаше испразнета сметка, која сега, од 0 денари тогаш, ние ја направивме во моментов да изнесува 150 милиони. Исто така, ги вративме долговите од над 50 милиони. Наследивме нула денари на сметка, а сега имаме вратени долгови и 150 милиони денари. Се поставува прашањето, каде се овие пари кои се практично пари на народот? Влегувале во овој Институт и требало бидат употребени правилно, за нови услуги, нова опрема, нова дијагностика, за услуги што треба да ги добијат граѓаните. Каде завршувале овие средства? – прашува Андоновска.

Државниот завод за ревизија изрази неповолно мислење за финансиските извештаи и усогласеноста на финансиските трансакции на Институтот за јавно здравје за 2024 година, откривајќи неправилности во евиденцијата, побарувањата и спроведувањето на програмите за јавно здравје.

The post ЗА ПРОСЛАВА НА 100-ГОДИШНИНАТА НА ИЈЗ БИЛЕ ПОТРОШЕНИ 50.000 ЕВРА Институтот за јавно здравје се расфрлал со пари appeared first on plusinfo.mk.

Државниот завод за ревизија утврди сериозни неправилности во работењето на Државната изборна комисија за 2024 година, изразувајќи неповолно мислење и за финансиските извештаи и за усогласеноста со законската регулатива. Според ревизорите, извештаите не ја прикажуваат објективно финансиската состојба, а дел од активностите не се спроведени согласно прописите.

Клучните наоди покажуваат системски слабости во управувањето со средствата и организацијата на изборните процеси. Меѓу нив се издвојува фактот дека пописот на имотот и обврските не е спроведен согласно законските правила, што директно влијае врз точноста на финансиските податоци.

Дополнително, дел од недвижностите со кои располага Комисијата воопшто не биле проценети, па не се ниту евидентирани во сметководствените книги. Ова отвора прашања за реалната вредност на државниот имот со кој управува институцијата.

Ревизијата утврди и дека планирањето на буџетските средства за изборите не било во согласност со законски утврдениот сооднос. Наместо пропишаната распределба, значителен дел од средствата биле пренасочени, при што над 129 милиони денари биле прелеани кон трошоци за политичко рекламирање.

Проблеми се забележани и во начинот на кој изборните органи ја доставувале документацијата за трошоците. Во повеќе случаи извештаите биле некомплетни, без основни документи како фискални сметки, патни налози или записници, што го отежнува следењето на трошењето на јавните пари.

Во делот на јавните набавки, ревизорите констатирале дека се набавувале стоки и услуги без да се спроведе законска постапка, како и недоследна примена на Законот за јавни набавки. Ова, според извештајот, го нарушува принципот на транспарентност и еднаков третман на понудувачите.

Посебно е посочена и спорната набавка на софтвер за обработка на изборни резултати, каде што условите не биле јасно дефинирани, а договорот бил потпишан пред да се обезбеди банкарска гаранција.

Ревизорите укажуваат и на организациски слабости, меѓу кои и фактот дека во текот на најголемиот дел од 2024 година институцијата немала генерален секретар, што влијаело врз координацијата и управувањето со административните процеси.

Дополнителен ризик претставува и нерешеното прашање со складирањето на изборниот материјал. Комисијата долго време немала соодветен магацин, што отвора можност за несоодветно чување и потенцијално оштетување на чувствителна опрема, вклучително и уредите за биометриска идентификација.

И покрај утврдените слабости, ревизорите нотираат дека дел од претходно дадените препораки остануваат неспроведени или само делумно реализирани, што укажува на континуитет на проблемите во работењето. Од вкупно девет препораки од претходната ревизија, само една е целосно исполнета.

Во насока на надминување на состојбите, Државниот завод за ревизија дал повеќе препораки, меѓу кои усогласување на законската рамка за финансирање на изборите и преиспитување на моделот за распределба на средствата за политичко рекламирање.

Целосната ревизија за работата на ДИК може да ја читате на следниот ЛИНК.

The post ГРЕШКИ ВО ТЕНДЕРИТЕ И ТРОШЕЊЕТО ПАРИ, СКАПА ОПРЕМА „СКАПУВА“ Ревизорите најдоа куп неправилности во работата на ДИК appeared first on plusinfo.mk.

Нема кој да врши инспекциски надзор во градежништвото, бидејќи последниот инспектор кој работел на тоа исполнил услови за пензија на крајот на 2025 година. Државниот инспекторат за градежништво и урбанизам веќе осма година го води в.д. директор кој треба својата работа да ја заврши за шест месеци, а на негово место да биде назначен директор со решение. Општините речиси и да не реагираат на неправилностите од извршените редовни и вонредни инспекциски надзори, а општинските инспектори често не ги гледаат неправилностите на терен.

Ова се дел од состојбите кои ги открил државниот ревизор при контролата на работењето на Државниот инспекторат за градежништво и урбанизам за 2024 година.

Ревизорите утврдиле дека последен пат директор на Инспекторатот е именуван во 2018 година со решение. Тој е разрешен во мај 2018 година.

„До моментот на вршење на ревизијата, функцијата директор ја обавуваат вршители на должност назначени со Решенија од страна на Владата и тоа за периоди подолги од шест месеци, со што се создава ризик раководењето со ДИГУ да биде извршувано од страна на лица кои не ги исполнуваат законски дефинираните услови“, забележуваат ревизорите.

Ревизорите обелоденуваат дека во инспекторатот нема доволен број инспектори. Додека траела ревизијата имало само двајца од кои едниот бил пред пензија, а се потребни 8.

Ревизорите констатираат дека и во овој случај Министерството за финансии не давало согласност за нови вработувања, иако е констатирано и дека еден од инспекторите исполнува услови за пензија.

„Од извршениот увид во документацијата и предметите од извршените инспекциски надзори ревизијата утврди дека од систематизирани 19 работни места за инспектори, во 2024 година спроведувањето на инспекцискиот надзор го вршат 5 инспектори и тоа, 3 во областа на градежништвото, од кои едно работно место – градежен инспектор од август 2024 година е ставено во мирување и 2 во областа на урбанизмот. Во моментот на вршење на ревизијата, инспекцискиот надзор во областа на градежништвото се спроведува од страна на 1 инспектор, кој до крај на 2025 година се стекнува со право на старосна пензија, со што ДИГУ останува без градежни инспектори, односно без можност од спроведување на инспекциски надзор во областа на градежништвото“, се наведува во извештајот од ревизијата.

Ревизијата покажува и низок степен на реакција на општините по донесените решенија и други акти на инспекторите по извршените инспекциски контроли.

Од извршениот увид во 14 предмети во урбанизмот каде што општината се задолжува да преземе мерки за отстранување на утврдените неправилности, до моментот на вршење на ревизијата постапено е само по 4 предмети.

Иста е состојбата и при вонредните контроли кои ги извршил Државниот инспекторт во кои се утврдени неправилности кои не ги пронашле општинските градежни инспектори или каде што не направиле контрола, донесени се решенија, но нема реакција на нив.

„Со увид во 17 предмети за извршен инспекциски надзор од страна на Државниот инспекторат за градежништво и урбанизам, кај 6 предмети се утврдени неправилности кои се однесуваат на бесправно изградени објекти. До моментот на вршење на ревизијата, од страна на општините постапено е само по 4 предмети, а за еден предмет поради непреземени мерки од страна на овластениот градежен инспектор истиот е доставен до МВР за понатамошно постапување“, информираат ревизорите.

Ревизорите утврдиле дека не се води правилно пописот во инспекторатот, а дека не се води и точна евиденција на работното време што според ревизорите влијае и на пресметка на плата врз основа на присуство на работното место.

Исто така утврдено е дека инспекторатот нема целосно воспоставен систем на внатрешни финансиски контроли, што создава ризик од евидентирање на финансиски трансакции во деловните книги кои не се темелат на веродостојна сметководствена документација.

The post ДРЖАВНИОТ ИНСПЕКТОРАТ ЗА ГРАДЕЖНИШТВО ОСТАНА БЕЗ ИНСПЕКТОРИ Институцијата 8 години нема директор appeared first on plusinfo.mk.

ЈП „Колекторски систем – Скопје“ повеќе од 35 години работи без дозвола за собирање, одведување и пречистување на отпадни води, покажува ревизијата на Државниот завод за ревизија за 2024 година. Ревизорите утврдиле бројни неправилности, поради што дале неповолно мислење за реалноста на финансиските извештаи и за усогласеноста со законската регулатива.

Претпријатието се соочува со сериозни финансиски проблеми. Вкупните обврски достигнуваат 493.108 илјади денари (над 8 милиони евра), а сметката му е блокирана уште од основањето. Во 2024 година фактурирани се само околу 33% од испуштената пречистена вода – 3.736.453 кубни метри од вкупно 11.300.390 кубни метри.

Во финансиските извештаи се евидентирани и побарувања од ЈП „Водовод“ Охрид и ЈП „Водовод и канализација“ Струга во вкупен износ од 364.491 илјади денари (околу 5,9 милиони евра), преземени по статусна промена во 2019 година. Но, претпријатието нема направено процена за нивната наплатливост, што, според ревизорите, доведува до необјективно прикажување на финансиската состојба.

Инфраструктурата на системот – цевковод долг 40,9 километри, пумпни станици и пречистителна станица – изградена пред повеќе од три децении, сè уште не е запишана во катастарот на инфраструктурни објекти. Освен за парцела од 812 квадратни метри кај пумпната станица Подмоље, претпријатието нема имотни листови ниту за објектите ниту за земјиштето под нив.

Во Централниот регистар сè уште не е евидентиран дел од основната главнина во износ од 251.452 илјади денари (околу 4,1 милион евра), преземен по присоединувањето на РЕ „Колектор“ Струга од МЈП „Проаква“ во 2019 година.

Ревизијата нотира и исплата на паушални адвокатски услуги од 519 илјади денари (8.439 евра) без соодветна документација, по договор склучен во 2020 година на 10 години, со неповолни услови за претпријатието.

Дополнително, системот нема протокомери за мерење на влезната отпадна вода, нема СКАДА-систем за мониторинг, ниту резервни агрегати за електрична енергија. Претпријатието нема ни сопствен информациски систем за корисници, па ги користи базите на водоводните претпријатија од Охрид, Струга и Дебарца.

Според ревизијата, финансиските показатели укажуваат на сериозен ризик за ликвидноста. Просечниот рок за плаќање на обврските кон добавувачите е 1.139 дена, односно повеќе од три години, додека наплатата на побарувањата трае во просек 333 дена.

Ревизорите препорачуваат изработка на план за финансиска стабилизација, со мерки за деблокирање на сметката, наплата на побарувањата, намалување на задолжувањата и оптимизација на трошоците, со цел долгорочна одржливост на работењето и подобра заштита на Охридското Езеро.

Што е ЈП „Колекторски систем“?

Јавното претпријатие Колекторски систем – Скопје е основано во декември 2018 година со Одлука на Владата на Република Македонија. Основната примарна дејност на претпријатието е собирање, одведување и прочистување на отпадни води преку канализациски системи, пречистителни станици и колекторски системи, како и нивно контролирано испуштање во реципиентот, со цел заштита на Охридското Езеро.

Колекторскиот систем има вкупна должина од 40,9 км и се состои од: примарен (источен и магистрален) колектор, кој се протега од пумпна станица Елешац до пречистителна станица Враништа, во должина од 26,7 км и западен колектор, кој се протега од Елен Камен до пречистителна станица Враништа со должина од 14,2 км.

Јавното претпријатие има својство на правно лице, со седиште во Скопје.

The post ОД ОСНОВАЊЕ РАБОТИ БЕЗ ДОЗВОЛИ, БЕЗ ИМОТНИ ЛИСТОВИ, СО БЛОКИРАНА СМЕТКА, СО ДОЛГОВИ… Ревизијата открива хаос во „Колекторски систем – Скопје“ appeared first on plusinfo.mk.

Државниот завод за ревизија при ревизија во Министерството за односи меѓу заедниците за 2024 година констатирал кусоци на материјални средства, вклучувајќи 30 преносни компјутери, исплата на 61 процент на име плата на вработените без да се обезбедат податоци за нивното присуство на работа и точење нафтени деривати во возила за кои не може да се потврди дека се во сопственост на Министерството.

ДЗР денеска на својата веб страница објави извештаи за извршена ревизија на финансиските извештаи заедно со ревизија на усогласеност на Министерството за односи меѓу заедниците на сметката на основниот буџет (637) за 2024 година и ревизија на усогласеност на тема „Јавни набавки во Министерство за односи меѓу заедниците (претходно Министерство за политички систем и односи меѓу заедниците) во 2023 година.

Како што соопшти ДЗР, изразено е неповолно мислење во однос на реалноста и објективноста на финансиските извештаи и усогласеноста со законската регулатива, упатства и воспоставените политики. Со извршената ревизија, утврдиле состојби кои укажуваат на слабости при начинот на евидентирање и користењето на средствата со кои располага Министерството за односи меѓу заедниците.

– Ревизорите утврдија нецелосно спроведен попис на средствата и обврските со состојба на 31.12.2024 година, при што 28 проценти од вкупните основни средства со сегашна вредност од 1.565 илјади денари, односно 25.360 евра, не се пронајдени при вршењето на годишниот попис на основни средства, а како резултат на невоспоставена пракса на издавање реверси за задолжување на вработените со опремата која им е доделена на користење, исто така 30 преносни компјутери не се пронајдени со пописот. За седум моторни возила не е воспоставена сметководствена и материјална евиденција, додека, пак, за побарувањата од вработените во износ од 2.102 илјади денари односно 34.000 евра кои потекнуваат од минати години (2012-2020 година), Министерството не располага со документација за неподмирениот износ, односно кое лице должи и во кој износ, се вели во соопштението од ДЗР.

Оттаму укажуваат дека за дел од наведените состојби, по промена на раководството, во текот на 2024 година преземени се активности за нивно надминување, а за дел постапуваат и други надлежни органи.

Утврдени се и состојби со извршена ревизија на документацијата за реализација на Програмата за финансирање на активностите на здруженијата и фондациите за 2023 година, по која на 33 здруженија и фондации исплатени се средства во износ од 19.800.000 денари, односно 320.900 евра. Ревизорите наведуваат дека Програмата е донесена со задоцнување во октомври 2023 година, кога е објавен и јавниот повик за финансиска поддршка на здруженијата и фондациите, а не во рок од 30 дена по донесување на Буџетот како што е уредено со Кодексот на добри практики за финансиска поддршка на здруженијата на граѓани и фондации. Во одделението за соработка со здруженија и фондации во 2024 година во периодот на реализација на програмата, од девет предвидени работни места, не било пополнето ниту едно. Исто така, Комисијата за распределба на финансиски средства за финансирање на програмски активности на здруженија и фондации од буџетот на Министерството составена од 18 членови од повеќе државни институции, не обезбедила документација за извршеното бодирање на апликациите од страна на секој член на комисијата за 138 поднесени апликации опфатени со Предлог ранг листата. Здруженијата и фондациите кои се стекнале со правото на користење средства од Министерството, дел од документацијата ја доставиле на албански јазик, без превод на македонски јазик, што не е во согласност со одредбите на Законот за употреба на македонскиот јазик.

– Согласно Извештајот за користење на распределените средства и за постигнатите резултати од поддржаните активности на здруженијата и фондациите за 2023 година, од вкупно 33 здруженија и фондации, 17 односно 51 процент од нив треба да извршат поврат на средствата во Буџетот на државата во износ од 1.225 илјади денари, односно 19.850 евра, од причина што не доставиле докази за трошење на средствата. До денот на ревизијата 14 здруженија вратиле средства во износ од 361 илјада денари, со две здруженија се води постапка за медијација за враќање на средствата во износ 264 илјади денари, додека за едно здружение е поведена судска постапка за поврат на средства во износ од 600 илјади денари. За исплата на плати и надоместоци за 244 вработени во Министерството, исплатени се 165.010 илјади денари, од кои за 150 вработени по Потпрограмата К5 – Соодветна и правична застапеност на заедниците и како преведувачи или за 61 процент од вработените, исплата на плата се врши без да се обезбеди доказ за присутност на работа и за полно работно време, и покрај воспоставената електронска евиденција на работното време за вработените, се вели во соопштението од ДЗР.

Со Законот за преземање на административни службеници вработени преку Потпрограма К5 во Министерството за политички систем и односи меѓу заедниците, наведува ДЗР, предвидено е Министерството по преземање на вработените, да донесе измена на актот за систематизација на работните места со цел усогласување со потребите на Министерството. Актите за внатрешна организација и систематизација на Министерството, во период од нивно донесување во 2019 година па се до 2025 година изменети се шест пати, со добиени согласности. Заклучно со 31.12.2024 година од предвидените 2.556 работни места пополнети се 244 работни места односно пополнетост од 10 проценти поради неизвршени усогласувања со одредбите од законот што влијае на реалното согледување на потребните капацитети на Министерството.

Како што наведува ДЗР, во текот на 2025 година започната е изработка на функционална анализа како основа за подготовка и донесување нови акти за внатрешна организација и за систематизација на работни места во Министерството, која до денот на ревизијата не е изработена.

Во однос на реализација на договорите за јавни набавки ревизорите констатирале дека во известувачкиот период на име трошоци за нафтени деривати исплатени се средства во износ од 516 илјади денари, како што соопштуваат, без да се врши контрола на регистарските таблици и видот на набавеното гориво поради што овозможено е моторни возила кои не се во сопственост на Министерството или возила за кои нема податок за регистарски броеви да полнат гориво, односно да набавуваат течен нафтен гас кој не е предвиден како вид на гориво во склучениот договор за набавка.

– При спроведување на две постапки ревизорите утврдиле дека за понудената цена, за сервисирање на возила од 0,01 денар за 1 работен час и за провизија од 0,01 проценти од износот на угостителската услуга, комисиите не побарале објаснување за понудената невообичаено ниска цена. Притоа, во дел од фактурите за сервисирање на возилата за 2024 година вршена е замена на делови кои не се предвидени со листата во тендерската документација, за дел од ставките фактурирани се цени кои се неколку пати повисоки од прифатената понуда, а за извршените услуги не се доставени работни налози како прилог на фактурите. Исто така, при изборот на најповолен економски оператор за набавка на услуги од авторска агенција, иако како критериум е поседување лиценца А, Б, В или Г за вршење привремени вработувања, комисијата за јавни набавки не побарала да се достават бараните лиценци како доказ за исполнување на условите за учество во постапката за ЈН. Вредноста на склучениот договор е 11.800.000 денари, соопшти ДЗР.

The post РЕВИЗИЈАТА ОТКРИ ГРДИ ЗЛОУПОТРЕБИ ВО „МИНИСТЕРСТВОТО НА ГРУБИ“ Фалат пари, фалат 30 лаптопи, се земале плати без работа, фрчеле пари за фантомски здруженија… appeared first on plusinfo.mk.