Вкупно 1.199 фирми се нови даночни обврзници за ДДВ, а 231 фирма се дерегистрирале од обврската за плаќање ДДВ, покажуваат податоците на  Управата за јавни приходи објавени по завршувањето на рокот за регистрацијата и доброволна дерегистрацијата на даночните обврзници за данокот на додадена вредност (ДДВ).

Рокот за оваа обврска на фирмите и поединците е 15 јануари.

Од УЈП денеска информираа дека новите 1.199 даночни обврзници ги добиле и решенијата за задолжителна и доброволна регистрација за ДДВ во кои е наведен и датумот од кога треба да го пресметуваат.

Исто така решенија за престанок на регистрацијата добиле и  231 обврзник.

И едните и другите, според УЈП треба да се однесуваат според законските одредби.

The post РЕЧИСИ 1.200 ФИРМИ СТАНАА НОВИ ДАНОЧНИ ОБВРЗНИЦИ ЗА ДДВ Управата за јавни приходи издаде 231 решение за престанок на обврската appeared first on plusinfo.mk.

Град Скопје го обвини АД „Македонски пошти“ за ненавремена испорака на решенијата за данок на имот до граѓаните.

Ова се наведува во реакцијата од Градот испратена до редакцискиот мејл на Плусинфо синоќа нешто пред 23 часот, а по повод објавата на текстот „СКОПЈАНИ СÈ УШТЕ ЧЕКААТ ХАРТИЕНИ РЕШЕНИЈА ЗА ДАНОК НА ИМОТ Градот ветуваше брза испорака, но решенијата ги нема ни по 3 месеци“. 

„Град Скопје постапи навремено и одговорно во процесот на изработка и испорака на решенијата за данок на имот и комунална такса. Решенијата беа целосно изработени и испечатени во предвидениот рок, по што истите беа доставени до АД Македонски пошти, согласно склучениот Договор, со цел навремена достава до сите даночни обврзници најдоцна до 31.03.2025 година. Причината за доцнењето во испораката лежи исклучиво кај АД Македонски пошти, кое без известување и без образложение не ја изврши својата обврска во договорениот рок. Со ова постапување, Македонски пошти грубо ги прекрши обврските кои произлегуваат од договорот со Град Скопје“, се наведува во реакцијата од Градот.

Во таа насока, Град Скопје соопшти дека презел соодветни правни чекори, односно поднесен е приговор до Агенцијата за пошти, а во подготовка е тужба за надомест на штета пред надлежен суд против АД „Македонски пошти“.

„Јавноста треба да биде запознаена дека Град Скопје не ја сноси вината за доцнењето, туку напротив, постапи целосно професионално и одговорно, обезбедувајќи навремено издавање и предавање на решенијата за понатамошна дистрибуција. Воедно, сакаме да укажеме дека Градот ги прими новинарските прашања, но поради кратките рокови до објава на текстот, без да се даде соодветно време за одговор, не беше во можност да реагира навремено“, се додава во реакцијата од Градот.

Плусинфо вчера објави дека три месеци по изготвувањето, граѓаните и фирмите сѐ уште не ги добиле решенијата за данок на имот, односно за комунална такса за 2025 година.

СКОПЈАНИ СÈ УШТЕ ЧЕКААТ ХАРТИЕНИ РЕШЕНИЈА ЗА ДАНОК НА ИМОТ Градот ветуваше брза испорака, но решенијата ги нема ни по 3 месеци

The post АРСОВСКА ГИ ОБВИНИ МАКЕДОНСКИ ПОШТИ ЗА ДОЦНЕЊЕТО НА РЕШЕНИЈАТА ЗА ДАНОК НА ИМОТ Градот ќе ја тужи Поштата appeared first on plusinfo.mk.

Иако Град Скопје уште на средината на март објави дека решенијата за данок на имот за 2025 година се изготвени и дека наскоро ќе бидат доставени на домашните адреси на граѓаните, многумина и по речиси три месеци сè уште не ги добиле овие документи. Дополнително, голем број фирми сè уште не добиле решенија за плаќање на комунална такса – фирмарина, што предизвикува збунетост кај граѓаните и кај деловните субјекти.

– Секоја година навреме добивавме решение за данокот на имот, а оваа година уште го чекам. Не знам ни колку изнесува, ниту кога треба да го платам. Немам пристап до интернет, не сум регистрирана на тие портали, и искрено, не знам ни како се користат. Ова е непријатна ситуација – вели Вера С. (68) од скопската населба Пролет.

И таа не е единствена. Многу граѓани, особено постари лица, пензионери или луѓе кои не се технички обучени, велат дека без хартиени решенија не можат да ја исполнат својата законска обврска.

Од Град Скопје преку нивната официјална веб-страница информираа дека решенијата за данокот се достапни онлајн и дека граѓаните можат да ги преземат и да ги платат преку платформата со регистрација и внесување матичен број. Според законот, рокот за издавање на решенијата е најдоцна до 31 март, што значи дека документите се веќе подготвени, но сè уште не се испратени до граѓаните во хартиена форма.

„Данокот за имот за 2025 година може да се подмири најдоцна до 15 ноември. За таа цел, ве охрабруваме да го користите порталот на Град Скопје за навремено извршување на обврските“, информираа пред три месеци градските власти.

Сепак, голем дел од скопјани не се чувствуваат вклучени во ваквиот начин на комуникација.

– Не е сè во тоа дали можеш да платиш онлајн, туку дали некој ќе те информира на време. Не добивме никакво известување. А казните, кога ќе дојдат, се реагира веднаш – додава Гоце Д. од Аеродром.

Во меѓувреме, Општина Карпош пред неколку дена ги повика жителите кои сè уште не добиле решенија да се обратат до урбаната заедница на која припаѓаат или директно до Одделението за утврдување и наплата на даноци, такси и други надоместоци, на адреса ул. Радика бр. 9.

Од таму потсетуваат дека секој граѓанин може лично да побара копија од решението за својот данок, со што ќе го избегне евентуалното доцнење и ќе ги исполни обврските навреме.

По реакциите на граѓани од повеќе скопски општини во врска со пресметките за данокот на имот, и од Општина Центар информираат дека на располагање им стои даночната канцеларија, каде граѓаните можат да добијат информации и помош во врска со своите решенија.

– Како и сите други општини што гравитираат на територијата на Град Скопје, и Општина Центар – Скопје има формирано даночна канцеларија, во која за сите прашања од областа на данокот на имот, граѓаните можат да добијат соодветен одговор – велат од Општина Центар за Плусинфо.

Од Центар додаваат дека работата на оваа канцеларија се одвива во соработка со Град Скопје, кој како надлежен орган ги носи решенијата за данокот.

Од Општина Аеродром за Плусинфо објаснуваат дека надлежна институција за изготвување и испраќање на решенијата е Град Скопје, но сепак на располагање стојат и локалните општински служби кои можат да помогнат.

– Жителите на Општина Аеродром може да се обратат и до нашите локални служби, кои ќе им помогнат со насоки како да ги регулираат своите обврски во врска со данокот на имот – нѐ информираа од Општината.

Според нив, граѓаните кои сè уште не го добиле решението можат секој работен ден да се обратат директно во собата број 6, на првиот кат од општинската зграда, во Одделението за даноци, такси и други сопствени приходи.

– Таму може да добијат дупликат од решението, како и сите потребни информации за начинот на уплата. На самото место има ПОС терминал, така што обврската може веднаш да се плати со картичка, со увид во лична карта – велат од Општина Аеродром за Плусинфо.

Дополнително, граѓаните може да пристапат и до веб-страницата на Општина Аеродром, во делот „Проекти и документи“ под менито „Буџет“, каде е поставен директен линк до платформата на Град Скопје, преку која може електронски да се изврши уплата на данокот на имот.

Од Општина Аеродром додаваат дека ќе продолжат да бидат достапни за сите свои сограѓани во интерес на навремено и ефикасно регулирање на нивните обврски.

Граѓаните очекуваат поголема транспарентност од градските власти и поефикасна комуникација, особено кога се работи за масовни обврски како што е данокот на имот.

Плусинфо за ова испрати прашања до Град Скопје и до Секторот за даноци и комунални такси. Прашавме зошто доцнат решенијата за кои беше информирано од нивна страна дека се завршени и дека наскоро ќе пристигнат на домашна адреса на корисниците. Но до објавувањето на овој текст не добивме никаков одговор.

The post СКОПЈАНИ СÈ УШТЕ ЧЕКААТ ХАРТИЕНИ РЕШЕНИЈА ЗА ДАНОК НА ИМОТ Градот ветуваше брза испорака, но решенијата ги нема ни по 3 месеци appeared first on plusinfo.mk.

Цените на храната неоправдано растат во Европската Унија, а особено на Балканот, и покрај бранот бојкоти на супермаркетите. Владите преземаат најразлични мерки за надминување на состојбата кои немаат големи резултати.

Така, бугарското Министерство за земјоделство одлучи да основа синџир малопродажни продавници „Продавници за народот“, кои ќе имаат максимална маржа од 10% и ќе продаваат претежно бугарски производи.

Бугарската влада обезбеди околу 5 милиони евра почетен капитал за околу 1.500 „Продавници за народот“ кои главно ќе бидат отворени во најсиромашните и земјоделските области.

Таму, објасни бугарскиот министер за земјоделство Георги Тахов, инфлацијата најтешко го погодува населението кое сè помалку пари може да троши на храна.

Целта е првенствено домашната храна и земјоделските производи што подиректно, без крупни посредници, да се доставуваат до потрошувачите.

Медиумите во ЕУ и на Балканот ги пренесоа оценките на здруженијата на потрошувачи и производители дека растот на цените на храната значително ги намалува платите и приходите на граѓаните не само на Западен Балкан, туку и во Бугарија, Грција и Хрватска.

Општ заклучок на здруженијата на потрошувачи и производители во ЕУ е дека цените на храната растат, земјоделците добиваат сè помалку пари за своите производи, а профитот сè повеќе оди во касите на големите преработувачи и ланци супермаркети.

И во самата Европска Унија, на пример граѓаните на Белгија – каде цените на храната во последните неколку години силно пораснаа – во пограничните подрачја речиси сите потребни работи и храна ги набавуваат во Франција и Германија.

На Балканот, сите добро знаат дека многу производи во соседните земји се поевтини, а храната и многу други работи се значително подостапни не само за граѓаните на Србија, туку и на Словенија и особено Хрватска, по многу попристапни цени во Трст и околината, каде супермаркетите секојдневно се полнат со словенечки и хрватски купувачи.

Француската влада неодамна ги повика директорите на неколку најголеми мрежи продавници за храна во Франција и Германија и побара објаснување за сериозните наоди дека на таен состанок во еден град во Германија се договориле за законски строго забранет картел на цени за прехранбените производи.

Претставниците на германските земјоделци и некои пратеници во Европскиот парламент токму на порталот „Проџект-синдикејт“ објавија податок дека само 4 големи синџири малопродажни продавници во Германија контролираат 85 % од пазарот на храна.

„Многу голема концентрација е“, како што беше наведено, и во секторот на преработувачи на земјоделски производи.

Германската Комисија за монополи кон крајот на минатата година предупреди дека „големата пазарна концентрација сериозно ги погодува и производителите и потрошувачите на храна“.

И српската влада минатата есен соопшти дека подготвува сериозни казни за неколку синџири продавници за храна поради сериозно сомневање дека се договориле за подигање на цените на храната и одржување неоправдано високи маржи.

Но, оттогаш нема вести дали надлежното министерство и инспекциите презеле нешто, иако самите граѓани во неколку наврати ги бојкотираа големите синџири супермаркети.

Претставниците на земјоделските здруженија во ЕУ и пратениците во Европскиот парламент во соопштение јасно ставија до знаење дека „ако Европа сака во иднина сама да се храни, мора земјоделството да го направи економски и еколошки одржливо … и тоа не со субвенции, туку со воспоставување фер пазарни услови и цврсто одржливи стандарди“.

Тие укажуваат дека еден од чекорите треба да биде и она што го презеде германската влада, а тоа е договорите за набавка и продажба на храна да се прават трилатерално, непосредно меѓу земјоделците, преработувачите и продажните синџири „за да се знае точно какви маржи се оправдани за пазарот и за потрошувачите“.

The post ХРАНАТА НА БАЛКАНОТ И ВО ЕВРОПА Е НЕОПРАВДАНО СКАПА Решението можеби е во германскиот модел на маржи appeared first on plusinfo.mk.

Дијалогот во политиката е неопходен и добредојден, ги поздравувам сите видови дијалог во политичката комуникација, но не треба да се даде повторно можност креаторот на проблемите да биде и креатор на решенијата, рече вечерва претседателот на Движењето ЗНАМ, Максим Димитриевски, коментирајќи ја вчерашната средба меѓу премиерот Христијан Мицкоски и лидерот на СДСМ Венко Филипче.

Како што нагласи Димитриевски во Дневникот на ТВ Сител, „не треба да се дозволи истите луѓе кои не доведоа во ваква состојба да бидат и креатори на решенија. Имаме легитимна, стабилна Влада, со апсолутно мнозинство која носи одговорност да изнаоѓа решенија“.

Според претседателот на ЗНАМ, Филипче манифестира „чисто лицемерие“ со кое сака да постигне ефект на самопрогласен лидер на опозицијата, а во моментов е само претседател на опозициска политичка партија. Димитриевски не ја исклучува можноста и другите партиски лидери од опозицијата да побараат „вакви форми на дијалог“.

На прашањето за евентуална лидерска средба, Димитриевски не исклучува свое присуство иако смета дека таквите средби, како што истакна, се повеќе дебата меѓу политичките репрезенти, а одговорноста за сите постапки секогаш ја презема власта.

„Препукувањето“ меѓу потпретседателот на Собранието Антонио Милошоски и министерот за правда Игор Филков, Димитриевски го квалификува како изнесување лични ставови и видувања, подвлекувајќи дека ВМРО-ДПМНЕ и ЗНАМ немаат никакви отворени прашања кои би го нарушиле функционирањето на Владата и парламентарното мнозинство.

– Секогаш сме подготвени на разговор и дијалог, посебно кога се во прашање државните интереси и кога има потреба од компромиси и постигнување консензус, но би било лошо да се воспостави пракса креаторот на проблемите да биде и составен дел на решенијата. Имаме нов Деловник во Собранието кој остава голем простор за дискусија во рамки на легитимна постапка при донесување на законите, а роковите се продолжени и сметам дека тоа треба да се сведе на пратеничките групи. За сите идни нови решенија секогаш се добредојдени експертски мислења во веќе претходно планирани процедури. Да земам за пример, како тие што го донесоа најконтроверзниот Казнен закон што дозволи амнестија на голем број луѓе од претходната власт и на добар дел на луѓето од периодот на владеењето на Груевски, сега ќе влезат во постапка и процедура за креирање ново законско решение поврзано со измените во Казнениот законик? Да, добредојдени се сите ставови, дијалогот исто така, но сметам дека не треба да се даде повторно можност креаторот на проблемите да биде и креатор на решенијата – рече Димитриевски.

Според него, досега имало многу лидерски средби, но сериозен епилог од нив немало.

– Лидерските средби се воспоставена форма што се практикува во кризни моменти за државата, сме имале многу такви видувања, но сериозен епилог немало. Повеќе тоа би го дефинирал како дебата меѓу политичките репрезенти кои би се состанувале и би разменувале мислења што е здраво за демократијата, но одговорноста за сите постапки секогаш ја презема власта. Имаме редовна комуникација со премиерот, одржуваме редовни средби, редовно се брифираме за се. Веќе разговаравме за повеќе теми, меѓу кои и за оваа, за одржување редовни средби. Како претседател на ЗНАМ не исклучувам присуство на такви средби, но повторно ќе потенцирам, одговорноста е во Владата која само треба да им потврди на граѓаните дека ќе живеат во посигурна држава со систем на вредности и подобар стандард, како и дека ќе се решат најголемиот број проблеми кои особено беа креирани од претходната власт – истакна Димитриевски.

Во врска со „комуникацијата“ меѓу Милошоски и Филков, тој тврди дека се работи за изнесување лични ставови и дека нема проблем меѓу владините партнери.

– Премиерот тоа го дефинира како лош ден, а јас би го дефинирал како лоши и некоректни изјави, но како и да е, тоа се лични ставови и видувања, а неофицијални на партиите. Ние во коалицијата со ВМРО-ДПМНЕ немам никакви отворени прашања кои би го нарушиле функционалноста на Владата и парламентарното мнозинство. Можеби такви изјави ќе слушаме и во иднина и иако се лични, мислам дека е политички некоректно да се коментира вонпартиски органи и тела за одредени работи кои сепак претходно беа анализирани од мандатарот и претставниците во извршната власт – рече Димитриевски, додавајќи дека Филков има право на свое мислење и во иднина, повтори, не исклучува вакви испади или ставови на луѓе во партијата.

Претседателот на ЗНАМ оцени и дека не му е првпат на Милошоски да излегува со личен став и видување.

– Нормално е, секогаш пред избори се разгорува реториката на политичките репрезенти за да соберат ситни поени за себе – рече Димитриевски.

Тој не прецизира дали ќе биде повторно кандидат за градоначалник на локалните избори и повтори дека ЗНАМ ќе излезе со свои листи за советници. Во тек се, информира, разговори со ВМРО-ДПМНЕ за заемна поддршка на кандидатите во сите општини.

The post ДИЈАЛОГОТ Е ДОБРЕДОЈДЕН, НО НЕ СО СТАРИТЕ ЛИЦА Димитриевски рече дека креаторот на проблемите не треба да биде и креатор на решенијата appeared first on plusinfo.mk.

Дивеењето по скопските улици и булевари е проблем што граѓаните го посочуваат со години. Системот „Безбеден град“ никако да профункционира, класичните лежечки полицајци се поставуваат главно на споредни улици или пред училишта, а казните не секогаш ги стасуваат прекршителите.

По разговор и сугестија од нашиот читател Азби Нуредини, Плусинфо ја возобновува иницијативата за испитување на можностите за воведување сообраќајно решение кое би можело да помогне да се ограничи брзината на возењето по големите градски сообраќајници. Станува збор за паметни лежечки полицајци, кои успешно функционираат во други држави.

Веројатно, малку е познато дека идејата за безбедни сообраќајници кои нема да ги нервираат возачите пред неколку години поттикна македонски иновативен тим предводен од Виктор Настев да создаде паметен лежечки полицаец. Иновативната идеја, претставена преку проектот „Smart bumps“, содржи технолошки решенија со кои лежечкиот полицаец ќе ги казни само возачите кои возат пребрзо, а не и совесните, кои ја почитуваат брзината. Оваа идеја освои сребрен медал на саемот Taiwan Innotech Expo во Тајван кој е еден од најзначајните саеми за иновации во светот.

Овој иновативен концепт ги „наградува“ дисциплинирани возачи така што им овозможува непречено минување, а ги забавува оние што ја надминуваат брзината со тоа што им испречува пречка, односно лежечки полицаец. Дали ваквата технологија може да најде место во регулирањето на сообраќајот во градовите низ Македонија?

Како функционираат паметните полицајци?

Со паметните лежечки полицајци се избегнува стоп/старт однесувањето на возачите (кочење и повторно забрзување). Стоп/старт однесувањето поради лежечките полицајци е одговорно за зголемување на загадувањето со ПМ честички за 47 отсто и со CO2 за 60 отсто, но и за зголемување на потрошувачката кај возилата. Еден типичен лежечки полицаец е одговорен за преку 8 тони дополнително потрошено гориво годишно.

Во многу градови низ светот веќе се применува концептот на паметни лежечки полицајци, а меѓу најпознатите се шведскиот систем „Actibump“ и мексиканскиот „Tope Inteligente“.

За разлика од традиционалните лежечки полицајци, кои ги забавуваат сите возачи без разлика на нивната брзина, паметните системи работат селективно.

Системот „Tope Inteligente“ е паметен лежечки полицаец со сензори што ја мери брзината на возилата. Ако возачот се движи во рамките на дозволената брзина, „полицаецот“ се спушта, дозволувајќи непречено минување. Доколку возилото оди пребрзо, полицаецот останува подигнат и го принудува возачот значително да забави.

„Tope Inteligente“ е инсталиран на различни локации во Мексико, вклучувајќи го и градот Пуебла. Првите резултати покажуваат позитивни ефекти врз безбедноста во сообраќајот и намалувањето на загадувањето. Овој иновативен пристап кон управување со брзината има потенцијал да го подобри квалитетот на животот во урбаните средини, поттикнувајќи побезбедно и поеколошко возење.

За подобро разбирање на функционирањето на „Tope Inteligente“, погледнете го следново видео:

Шведскиот „Actibump“ е сличен концепт на мексиканскиот, кој користи напредни сензори за детекција на брзината. Ако автомобилот ја надмине дозволената граница, „лежечкиот полицаец“ се спушта и се прави како вдлабнатина на патот. Така се забавува возилото со механичка пречка. Ако возачот се движи според правилата, системот автоматски не се менува.

Овие решенија се користат во повеќе земји и покажале дека можат да ја намалат прекумерната брзина, без да го отежнат движењето на оние што возат правилно.

Нашите брзи возачи ги кочи само физичка пречка

Поставувањето паметни лежечки полицајци во Скопје, особено на булеварите Партизански одреди, Илинден, Србија и Борис Трајковски, каде што често се случуваат трки и пребрзо возење, би можело значително да ја зголеми безбедноста во сообраќајот.

Два паметни лежечки полицајци што ги изработи македонскиот иновативен тим со поддршка на Фондот за иновации беа поставени на улиците Вера Циривири Трена и Орце Николов во Скопје.

Никола Крстаноски, професор на Техничкиот факултет во Битола, познат и признат експерт за сообраќај и транспорт, ја поддржува идејата на главните и брзи сообраќајници во Скопје да се постават смарт лежечките полицајци.

– Секако дека тоа е добро решение. Овие „паметни“ лежечки полицајци ги казнуваат брзите возила, а ги наградуваат оние кои ги почитуваат пропишаните брзини. Се спуштаат кога некој вози според прописите, а се подигаат кога наближува возило кое вози со брзина подобра од дозволената. Јас верувам дека и системот „Сејф сити“ ќе ја подобри ситуацијата, но нашата сообраќајна култура е на такво ниво што најефикасни, сепак, се физичките пречки – вели професорот Крстаноски.

Но, тој предупредува дека за реализацијата на едно вакво решение ќе биде неопходно да се промени Правилникот за урбанистичко планирање, кој е подзаконски акт на Законот за урбанистичко планирање. Правилникот, меѓу другото, ги категоризира улиците во градот на основна улична мрежа (народски кажано, главни сообраќајници) и локална улична мрежа.

– Правилникот не дозволува на улиците од основната сообраќајна мрежа да се поставуваат вакви пречки. Тоа би требало да се промени – вели професорот.

За и против концептот

Предностите на овој воведувањето на овој концепт се намалување на брзината – возачите би се научиле дека нема смисла да возат пребрзо, бидејќи ќе бидат казнети механички, а можеби и ќе го оштетат возилото. Се намалуваат потрошувачката на гориво и загадувањето, бидејќи нема постојано запирање и забрзување, како што се случува со класичните лежечки полицајци. Се зголемува безбедноста на пешаците особено на критичните пешачки премини каде што сега се игнорира ограничувањето на брзината.

Можните предизвици се цената на инсталација, зашто овие системи се поскапи од класичните лежечки полицајци. Одржување – потребна е редовна проверка на системот за да не дојде до дефекти и прилагодување на возачите на новиот концепт.

Прилагодувањето на паметните лежечки полицајци на брзината со која се движат специјализираните возила, како на пример Брзата помош е дел од една понапредна технологија, која обезбедува многу пософистицирани услуги.

Со оглед на тоа дека сегашните мерки не секогаш даваат резултати, градските власти може да размислат за пилот-проект со паметни лежечки полицајци во неколку критични зони. Технологијата веќе докажала дека може да направи разлика во сообраќајната безбедност во други земји.

И министерот за локална самоуправа Златко Перински ги поддржува иницијативите за изнаоѓање нови технички решенија коишто ќе го подобрат сообраќајот во главниот град. Перински очекува сите централни и локални институции, секоја во рамките на своите надлежности, да предложи соодветни технички решенија и подобрување на прописите.

The post 📽️ ПАМЕТНИ ЛЕЖЕЧКИ ПОЛИЦАЈЦИ – МОЖЕ ЛИ ТОА ДА БИДЕ СПАС ОД БРЗИТЕ ВОЗАЧИ? Додека во светот идејата е сѐ поприфатлива, протитипот на македонските иноватори е фрлен во заборав appeared first on plusinfo.mk.

Тој рече дека во изминатите месеци работни групи работат на законската легислатива, потоа утврдуваат точни чекори кои треба да се преземат, предвидуваат кои членови треба да се укинат и кои се Закони треба да се сменат.

– Мислам дека околу 19 Закони се поврзани со темата, во насока на тоа како да создадеме системско решение и темелно и сериозно е сфатена работата за реорганизација. Заради тоа имаме состанок на Управички комитет во јануари, а не во јуни какошто се правело претходно – вели Тошковски.

Тошковски истакна дека за новите решенија за подобро функционирање на институциите кои се справуваат при пожари, поплави, земјотреси и други катастрофи ангажиран е и странски експерти, коишто нивното искуство и знаење ќе помогнат какошто вели во збивање на редовите.

– Во Македонија сепак има пожарникари, кои се спремни, одговорни, обучени, имаме и градоначалници, кои во изминатиот период и те како се покажаа добро. Но, тоа не заради тоа што државата создала капацитети, тоа е затоа што се уште имаме чесни, професионални, кои во рамки на своите институции заради нивната способност одговориле какошто треба на предизвиците, коишто сме ги имале, а не заради тоа што сме имале системско решение – вели Тошковски.

Тој посочи дека е потребно јакнење на капацитети, повеќе средства, како и домаќинско и професионално работење. Според него потребно е да се утврди кој ќе има командна улога во текот на пожарите, а во Уставот се говори за вонредна, а не за кризна состојба.

Тошковски вели дека еден од проблемите кои ги детектирале експертите е токму во тој дел, потоа се преклопуваат надлежностите на повеќе институции, а има и нефункционални институции од аспект и на материјални и човечки ресурси. Препораките се и дека треба најмногу да се реагира во делот на превенцијата, којашто опфаќа чистење на канали, обуки на професионалците, потоа создавање на заштитни зони во шумите.

Прашан за малиот број на пилоти во земјава, Тошковски најави дека ќе се отвори Центар за обука на пилоти, со што и овој проблем ќе се надмине, но не за кратко време, бидејќи е потребно време за да се обучат пилоти.

Директорот на Центарот за управување со кризи, Стојанче Ангелов на денешната прес-конференција рече дека три години зборувал дека системот за справување со кризи, системот за заштита и спасување и Противпожарната заштита се недоволно функционални. Тој потенцира дека од оваа Влада гледа решеност за системско надминување на овој проблем.

– Значи од страна на оваа Влада, министерот за внатрешни работи како раководител на Управувачкиот комитет ги предводи овие процеси, заедно со вицепремиерот, Љупчо Димовски, којшто предводи една работна група и секојдневно се работи сериозно на надминување на системските слабости – вели Ангелов.

Тој истакна дека ова не е едноставен процес, а спојувањето на ЦУК и ДЗС не треба да биде механички, од две недоволно функционални институции да се добие една, која ќе биде супер нефункционална. Ангелов истакна дека треба да се направи нова здрава институција, којашто ќе ги обедини функциите на двете постоечки институции ЦУК и ДЗС.

Претседателот на ЗЕЛС и градоначалник на Општина Кисела Вода Орце Ѓорѓиевски денес состанокот кој се одржа во ЦУК.

– Како Претседател на ЗЕЛС сакам да истакнам дека превенцијата е клучниот елемент за справување со предизвиците и дека само со заедничка посветеност, централната и локалната власт можат да изградат систем кој ќе биде подготвен да одговори на сите кризи. Како приоритет би ја посочил потребата од реформи во противпожарната заштита и создавање ефикасен и финансиски одржлив систем за заштита и спасување. Сметам дека поради недоволната финансиска поддршка и старите возни паркови на противпожарните единици, функционирањето на општините е отежнато. Од наша страна, ние, како раководство на Општина Кисела Вода, набавивме ново противпожарно возило, кое ќе биде ставено на располагање на противпожарната бригада за подобра ефикасност при интервенции. Обезбедивме и простории за нова противпожарна станица. За жал, иако се направени сите подготовки и адаптации, оваа станица сè уште не е функционална поради причини познати на градоначалничката на Скопје. Дополнително, набавивме мултифункционален багер за расчистување на речните корита, кои често се главната причина за излевање на реките и поплави. Сепак, освен што како градоначалници треба да делуваме посветено секој во својата општина, потребна е и заедничка работа и силна поддршка од централната власт. Во овој момент, со оглед на сето она што се случува во изминатиот период, јас сум голем оптимист околу надминување на голем дел од проблемите токму преку поддршка од централната власт за решавање на системските проблеми и сакам да апелирам на уште поголема соработка која има за цел да обезбеди стабилност и безбедност на нашите граѓани – изјави Претседателот на ЗЕЛС Орце Ѓорѓиевски.

На настанот во Центарот за управување со кризи, на кој присуствуваа и Директорот на Центарот за управување со кризи Стојанче Ангелов, министерот за внатрешни работи Панче Тошковски, министерот за одбрана Владо Мисајловски, потпретседателот на Владата Љупчо Димовски, директор на Дирекцијата за заштита и спасување Џевад Селами, како и директори и претставници на АД Водостопанство, УХМР, Национални шуми, беа дискутирани предлозите за времено унапредување на кризниот менаџмент во делот на справување со било какви кризи, и елементарни непогоди.

The post НАЈАВЕНИ СИСТЕМСКИ РЕШЕНИЈА ЗА ПРИРОДНИТЕ КАТАСТРОФИ Македонија ќе има систем за управување со кризи во следните 3 години appeared first on plusinfo.mk.

ВМРО-ДПМНЕ во своето последно соопштение го обвини СДСМ за целосна неспособност и незаинтересираност за намалување на загадувањето на воздухот во земјата за време на нивното седумгодишно владеење. Според партијата, тогашната власта повеќе се грижела за, како што наведуваат, „местење матни тендери“, отколку за обезбедување чист амбиентален воздух.

„СДСМ за седум години власт да се грижеа за амбиенталниот воздух и животната средина колку што се грижеа за местење матни тендери од кои профитираа милиони, до сега ќе се видеа првите резултати“, стои во соопштението на ВМРО-ДПМНЕ.

Од партијата објаснуваат дека загадувањето на воздухот е проблем кој не може да се реши со „магично стапче,“ туку бара долгорочни и системски решенија.

„Загадувањето не е проблем кој се решава од денес за утре, туку е предизвик кој бара стратегија на среден и долг рок“, велат од ВМРО-ДПМНЕ, додавајќи дека нивната стратегија е насочена кон долгорочна борба со овој проблем.

Според опозицијата, намалувањето на загадувањето треба да почне со промена на начинот на затоплување на домовите. Тие се залагаат за користење еколошки горива и централно затоплување, како дел од системските решенија.

„Потребно е промена на начинот на затоплување на домовите, што подразбира повеќе користење на еколошки горива, меѓу кои и централно затоплување“, нагласуваат од партијата.

Од ВМРО-ДПМНЕ истакнуваат дека нивната влада веќе работи на проекти за изградба на гасни централи и дека за ова имаат заинтересиран инвеститор.

„Владата предводена од ВМРО-ДПМНЕ интензивно работи на изградба на гасни централи, а веќе има и заинтересиран инвеститор“, потенцираат од партијата.

The post „САМО МАТНИ ТЕНДЕРИ И НИКАКВА ГРИЖА ЗА ВОЗДУХОТ“ Седум години СДСМ ништо не направи, обвинуваат од ВМРО-ДПМНЕ appeared first on plusinfo.mk.

Компанијата „Хот и Хот“ пред трговскиот центар Ист гејт синоќа ја презентираше својата нова иновација НОММАД, која нуди уникатни решенија за изградба на домови во природа без комплицирани административни процедури.

Овој проект претставува одговор на потребите на современите граѓани за удобен и еколошки живот, и има за цел да понуди безброј можности за создавање идеално живеалиште.

– Изградбата на дом на вашата посакувана локација никогаш не била полесна. Нашите модули не само што се луксузни, туку се и енергетски ефикасни и еколошки. Тоа значи дека можете да уживате во природа, а да не ја загрозите животната средина – велат претставниците на компанијата.

Како што споделија пред присутните, модулите НОММАД се дизајнирани да бидат брзо инсталирани на секое слободно место. Овие самоодржливи контејнери може да се постават без комплицирани процедури, а нивниот современ дизајн совршено се вклопува во природата. Компанијата осигурува транспорт и инсталација на модулите, што значи дека клиентите можат да се фокусираат на уживањето во својот нов дом.

– Флексибилноста на нашите модули е уште една од главните предности. Ако модулот од 27 м² не е доволен, можете лесно да додадете уште еден и да добиете малку поголема викендичка. Ова е одлично решение за сите оние кои сакаат да создадат простор за семејство и за пријателите – истакнаа од компанијата.

Покрај индивидуалните клиенти, НОММАД нуди и можности за угостителски објекти, кои можат да ги зголемат своите капацитети и да понудат нови содржини за своите гости. Со минималистичкиот и софистициран дизајн, модулите се идеални за интеграција во градските и во природните средини.

– Наша цел е да помогнеме на луѓето да создадат домови што ќе бидат во согласност со современите стандарди за живеење, а притоа да ја заштитиме природата. Со НОММАД, вашиот идеален дом ве очекува – порачаа од компанијата.

Како дел од новата ера на одржливо живеење, НОММАД не само што нуди практични решенија, туку и промовира одговорен однос кон животната средина. За сите заинтересирани, оваа иновација може да биде клучот за создавање совршен дом во природа.

Компанијата „Хот и Хот“ најави дека со вакви објекти ќе гради ресорт во Охрид.

The post 📽️ 📷 НОВА ЕРА ВО ЖИВОТОТ НА ОТВОРЕНО Компанијата „Хот-Хот“ го претстави иновативниот дом НОММАД appeared first on plusinfo.mk.

Владата на денешната 13-та седница донесе одлука согласно донесениот ребаланс на Буџетот да се исплатат сите заостанати плати на вработените во Национални шуми, со што, како што информираат од владината прес-служба, се решава проблемот на 2. 000 вработени лица во Национални шуми.

Инаку вработените во Национални шуми и покрај тоа што подолго време ги немаат земено своите плати, веќе неколку месеци се во првите редови и со сите расположливи средства водат битка со пожарите што ја зафатија земјата.

На седницата, Владата донела повеќе одлуки и решенија, меѓу кои и за изработка на проектна документација за изградба на обиколница во Кавадарци, спроведување на постапката за доделување на договор за воспоставување на Јавно приватно партнерство за изградба на катни монтажни гаражи во Универзитетски Клинички центар – Комплекс клиники „Мајка Тереза“ Скопје и повеќе кадровски решенија.

The post 2.000 ШУМАРИ ЌЕ ГИ ДОБИЈАТ ЗАОСТАНАТИТЕ ПЛАТИ Владата донесе одлука за да се реши проблемот во Национални шуми appeared first on plusinfo.mk.