Поголема достапност на лекови, реформа на итната помош, обнова на болниците и дигитално здравство се дел од проектите за кои денеска на прес-конференција зборуваше министерот за здравство, Сашо Клековски.

Министерот информираше дека новата есенцијална листа опфаќа 392 лека, од кои 193 се нови.

– Со ЦФ модулатори се лекуваат 126 пациенти со цистична фиброза, наспроти 3 во 2021 година. За пациентите со мултиплекс склероза се подготвени протоколи за дисперзирана терапија, а од вкупно 835 пациенти, 491 живеат надвор од Скопје. Деблокирана е донацијата на фактор  VIII, а за сезонскиот грип се обезбедени 86.000 дози вакцини – рече Клековски.

Резултатите што ги презентираме не се изолирани активности, туку дел од поширок процес на системско унапредување на здравството, додаде. Зад секоја бројка стои конкретна промена, односно повеќе пациенти со пристап до терапија и подобра достапност на здравствените услуги, посочи Клековски.

Тој информираше дека во болниците се обновени одделот за трауматологија во Хируршката клиника „Св. Наум Охридски“ и за неврофизиологија на Универзитетската клиника за неврологија, а во Бардовци е реновиран машкиот оддел 2. Потсети и дека Клиничката болница Битола доби опрема над 30 милиони денари и дека во Клиничката болница Тетово се вработени 109 досегашни вработени со договор на дело. Во болницата „Св. Еразмо“ во Охрид се очекува да завршат активностите за ново крило и 4 операциони сали, а реновирањето на психијатриските установи во Демир Хисар продолжува.

Министерот Клековски најави реформа на итната медицинска помош, која предвидува издвојување на службата од Здравствен дом Скопје, систем со парамедици и реорганизација на Ургентниот центар во Клиничкиот центар.

– Онаму каде што треба многу повеќе да направиме се радиодијагностиката, онкологијата, Клиничкиот центар  „Мајка Тереза“ и секако обмислување на концептот за долгорочна нега – рече Клековски.

Министерот зборуваше и за Стратегијата за дигитално здравство до 2030 година и за дигитализацијата на услугите.

– Свесни сме дека пред нас има уште многу работа. Но, важно е што процесите се движат, реформите се спроведуваат, а резултатите постепено стануваат видливи. Нашиот фокус останува на пациентот и создавањето здравствен систем кој ќе биде одржлив, современ и достапен за сите граѓани – истакна министерот за здравство.

The post ЌЕ СЕ РЕФОРМИРА ИТНАТА МЕДИЦИНСКА ПОМОШ Се подготвува и реорганизација на Ургентниот центар во Клиничкиот центар „Мајка Тереза“ appeared first on plusinfo.mk.