Ренџерската служба на Националниот парк „Пелистер“, во соработка со СВР Битола, спровела повеќечасовна акција за пронаоѓање лица вооружени со огнено оружје, кои навлегле длабоко во територијата на паркот. Се претпоставува дека станува збор за ловокрадци.

Од паркот„ Пелистер“ соопштија дека на 12.08.2026 (среда) некаде после 19 часот, после прибрани информации од различни извори од терен, од страна на ренџерската служба на ЈУНП Пелистер предводена од директорот Иванчо Тошевски во соработка со СВР Битола започнала акција за пронаоѓање на вооружени лица со огнено оружје кои навлегле длабоко во територијата на НП Пелистер.

Во потргата биле вклучени две патроли на НП Пелистер потпомогнати со полициски службеници од СВР Битола. Двете патроли се движеле по тешко достапен терен на 2.000 и повеќе метри надворска височина во текот на ноќта, независно една од друга и имале за цел да пристапат од различни страни, од правец на селото Велушина и од правец на Инфоцентар до локација на која се наоѓале вооружените лица.

„Некаде после 23:30 часот и повеќе од три часа пешачење, вооружените лица беа лоцирани во близина на локација Голема грива во зона на строга заштита. Од моментот на лоцирање на вооружените лица со сите понатамошни активности раководеа полициските службеници. Акцијата беше завршена во раните утрински часови во четири саатот наредниот ден на 13.08.2026 (четврток) со спроведувањето на лицата до полициска станица“, соопшти НП „Пелистер“.

Теренот на кој се одвивала потрагата е тешко достапен и тежок за контрола на ренџерската служба поради немање соодветна инфраструктура за редовни патролни активности.

„Шумските патишта кои според сите стратешки документи на НП Пелистер требало да бидат клучни артерии за заштита на природата (противпожарна заштита и контрола на ренџерска служба) за жал биле оставени полека да пропаѓаат. Истите патишта се високо на агендата на активности на НП Пелистер и веќе се работи на нивно опоравување. Токму во тој дел на НП Пелистер каде е најголемата површина на строга заштита за жал од поединци се уште има обиди за незаконити активности, но во соработка со СВР Битола истите навремено ги спречуваме во нивните намери“, се додава во соопштението од НП Пелистер.

The post ВООРУЖЕНИ ЛОВОКРАДЦИ НАВЛЕГЛЕ ВО СТРОГО ЗАШТИТЕНА ЗОНА НА ПЕЛИСТЕР Откриени се на 2.000 метри височина во ноќна акција која траела повеќе од 3 часа appeared first on plusinfo.mk.