Германија за нас претставува повеќе од економски партнер. Таа е симбол на индустриска моќ, технолошки развој, дисциплина, иновации и стабилен економски модел кој со децении создава вредност и напредок. Германските компании тука кај нас не се само инвеститори. Тие се партнери во трансформацијата на нашата македонска економија. Тие отвораат работни места, носат нови стандарди, нова корпоративна култура, технолошко знаење и практики кои го менуваат економскиот пејзаж на државата,  рече премиерот Христијан Мицкоски во обраќањето на Германско-македонскиот бизнис самит.

Нашата цел е јасна, рече Мицкоски, да изградиме модерна, ефикасна и конкурентна економија која ќе биде интегрирана во европските синџири на вредност и ќе создава можности за домашните компании, за младите луѓе и за идните генерации.

– И токму затоа, нашата Влада останува цврсто посветена на создавање предвидлива, стабилна и про-бизнис средина. Во изминатиот период презедовме сериозни чекори за стабилизација на економијата, подобрување на институционалната ефикасност и поддршка на инвестициите. Работиме на намалување на административните бариери, дигитализација на услугите, модернизација на инфраструктурата и создавање услови за побрзо и поефикасно водење бизнис – реле Мицкоски.

Тој рече и дека веќе е јасно дека економскиот раст повеќе не може да се темели само на евтина работна сила или традиционални модели на производство.

– Новата економија бара паметни фабрики, автоматизација, вештачка интелигенција, дигитални платформи, напредно производство, зелени технологии и постојано вложување во човечкиот капитал. Затоа ние како Влада го отвораме патот кон економија базирана на знаење. Нашата визија е да создадеме држава во која младите инженери, програмери, иноватори и претприемачи нема да мора да ја бараат својата иднина надвор, туку ќе имаат можност да создаваат дома — во модерна економија која ги вреднува нивното знаење и талент. Инвестираме во дигитална инфраструктура, во модернизација на образованието, во дуалното образование, во технички и ИТ вештини, затоа што без обучен кадар нема успешна дигитална трансформација. – рече Мицкоски.

Тој додаде дека технолошката револуција отвора големи можности, но и сериозни предизвици.

– Во тој процес, партнерството со германската економија е исклучително важно. Германските компании имаат огромно искуство во индустриската дигитализација, паметното производство, енергетската ефикасност и применетите технологии – рече Мицкоски.

Премиерот рече и дека земјата располага со млади, талентирани и амбициозни луѓе.

– Имаме стратешка географска позиција. Имаме потенцијал да станеме регионален центар за нови технологии, логистика, напредно производство и дигитални услуги. Нашата задача како Влада е тој потенцијал да го претвориме во реален економски раст.Затоа работиме на политики што ќе поттикнат иновации, стартап екосистем, истражување и развој, поврзување помеѓу универзитетите и индустријата, како и поголема поддршка за домашните компании кои сакаат да инвестираат во модерни технологии – рече тој.

Мицкоски потсети и на инвестициите во инфраструктурата за да одговори на барањата на современата економија.

The post ГЕРМАНСКИТЕ КОМПАНИИ СЕ ПАРТНЕРИ ВО ТРАНСФОРМАЦИЈАТА НА ЕКОНОМИЈАТА Мицкоски очекува преку германски искуства да создаде економија примамлива за младите таленти appeared first on plusinfo.mk.