Ервоамбасадорот Михалис Рокас денеска изјави дека гледа забрзување на реформите во земјава во сите 51 реформски чекори, додека во овој период работат заедно со Владата и од 10 ќе бидат исполнети девет и половина од нив. За Изборниот законик, Рокас смета дека законот во основа е добар и се надева дека партиите ќе постигнат консензус.

– Ние се фокусирани на 10-те чекори коишто беа во грејс периодот и којшто истекуваа на 30 јуни. И овие 10 чекори мора да кажам дека навистина внимателно работевме, непосредно со Владата со цел да ги исполниме овие чекори. Убеден сум дека поголемиот дел од работата е завршен и дека ќе имаме извонредни резултати. Како што знаете, тие ќе бидат доставени во следните 10 дена до Европската комисија на една последна проценка и крајната одлука се носи некаде во септември, но ова е навистина добар успех. Меѓутоа, во исто време ја имавме и таа редовна вежба која што заврши на 30 јуни оваа година, и тука започнува тој грејс период од една година. И со тоа имаме добар напредок, но она што е важно е дека во сите 51 чекор има напредок. Јас сум навистина сигурен дека гледам забрзување во реформите, меѓутоа во секој случај треба да ги почекаме последните резултати и проценката на Европската комисија по летниот распуст – рече Рокас, кој денеска беше на промоција на нова воена опрема во касарната Илинден.

За тоа дали 10 реформски чекори ќе бидат исполнети, Рокас вели дека тоа ќе биде проценка и оти работат заедно со Владата „со цел да постигнеме девет, девет и половина“. – Во секој случај убеден сум дека ќе имаме добри резултати, но мора да разберете дека проценката всушност се прави од Европската комисија – рече евроамбасадорот.

За Изборниот законик, рече дека има дискусии со политичките партии кои што се одвиваат во моментов, но оти е потребно да се постигне консензус.

– Законот сам по себе е добар закон. ОДИХР и Европската комисија дадоа позитивна проценка и оценка, но она што преостана во моментов се модалитетите. Јас разбирам дека има несогласувања кога станува збор за овие моделитети, но чувствувам дека има добра волја тоа да се надмине. И Комисијата во Парламентот за Изборниот законик веќе работи, и се надевам дека партиите на толку важна работа, ќе бидат во можност да седнат и да постигнат консензус кога станува збор за ова сензитивно прашање. Меѓутоа, основите на законот и законот сам по себе, се навистина добри – рече евроамбасадорот Рокас.

The post ЕВРОАМБАСАДОРОТ РОКАС ГЛЕДА ГОЛЕМ НАПРЕДОК ВО РЕФОРМИТЕ „Изборниот законик е добар, се надевам дека ќе се постигне консензус“ appeared first on plusinfo.mk.

Парламентарното мнозинство ќе продолжи со донесување на реформските закони кои се дел од европската агенда, и покрај, како што тврдат од власта, обидите за нивно блокирање од страна на СДС и ДУИ.

Ова вечерва го порача пратеникот и координатор на пратеничката група на ВМРО-ДПМНЕ, Никола Мицевски, на собраниска седница, нагласувајќи дека сите закони побарани од Европската комисија ќе бидат усвоени.

– Еве сега пред сите ви порачуваме дека она што значи реформа на државата, а што не успеавте 7 години да го направите вие, нема да дозволиме да се закочи ниту оваа вечер, ќе продолжиме да работиме и сите реформски закони кои ги бара Европската комисија од нас и коишто значат напредок на државата, а коишто не ги направивте вие ќе бидат направени од ова парламентарно мнозинство – истакна Мицевски.

Тој додаде дека реформскиот процес нема да биде стопиран и дека законите ќе се носат и во услови на политички несогласувања.

– Затоа сите сме тука да продолжиме да ги спротивставиме аргументите. Се надевам дека ќе прекинете со опструкцијата на комисиите кои беа закажани, а коишто организирано ги правевте и СДС и ДУИ – рече тој.

Мицевски нагласи дека министерите надлежни за реформските процеси биле присутни, но дека, според него, опозицијата намерно го кочи процесот.

Во своето обраќање, тој оцени дека граѓаните веќе ја дале својата оценка за претходното владеење на СДС и додаде дека парламентарното мнозинство ќе продолжи со работа до крајот на роковите.

– За ваквиот ваш однос 7 години граѓаните ви ја испорачаа фактурата. Продолжете така да се однесувате, ние сме тука и ќе продолжиме да работиме – изјави Мицевски.

Тој потсети дека рокот за дел од реформските закони е 30 јули и изрази очекување дека тие ќе бидат донесени во предвидениот период.

The post ПАРЛАМЕНТОТ ВО ПОЛИТИЧКА БИТКА ЗА ЕУ ЗАКОНИТЕ Мицевски обвини за блокади од СДС и ДУИ appeared first on plusinfo.mk.

Лидерот на Демократската унија за интеграција Али Ахмети ќе учествува на утрешната лидерска средба во Клубот на пратениците, изјави вечерва портпаролката на партијата Арта Биљали Зендели по состанокот на Генералниот совет на ДУИ во Мала Речица.

Одлуката за присуство на Ахмети на лидерската средба била донесена едногласно од членовите на Генералниот совет.

Биљали Зендели не прецизира кои ќе бидат барањата на ДУИ на утрешната средба на лидерите на парламентраните политички партии, посочувајќи оти „тоа е ексклузивно право на Ахмети“.

Лидерската средба што ја иницира премиерот и претседател на ВМРО-ДПМНЕ, Христијан Мицкоски, треба да се одржи утре во Клубот на пратениците во Скопје, а на неа, како што е најавено, ќе се разговара за реформските закони од правосудството, за изборот на народен правобранител, за Изборниот законик и за укинување на техничката влада, но и за други прашања на предлог на учесниците на средбата.

Од опозициските партии потврда дека ќе учествуваат има и од Левица, додека лидерот на СДСМ, Венко Филипче, го одби повикот за лидерска за укинување на техничката влада обвинувајќи дека Мицкоски „бара алиби за распишување предвремени избори“.

Од коалициските партнери во Владата на средбата се очекуваат претседателот на ЗНАМ и градоначалник на Куманово, Максим Димитриевски, а од коалицијата „Вреди“, градоначалникот на Тетово, Биљал Касами.

Лидерската средба ја поздравија и Либерално-демократската партија и ДОМ.

The post АХМЕТИ ЌЕ ДОЈДЕ НА ЛИДЕРСКАТА СРЕДБА, НЕЈАСНО Е ШТО ЌЕ ПОБАРА „Тоа е ексклузивно право на лидерот на ДУИ“ appeared first on plusinfo.mk.

Премиерот Христијан Мицкоски утре во Клубот на пратениците ќе одржи лидерска средба со претседателите на парламентарните партии кои имаат пратенички групи во Собранието, на која ќе се разговара за реформските закони од правосудството, за изборот на народен правобранител, за Изборниот законик и за укинување на техничката влада. Освен за овие теми, како што најави премиерот, може да се разговара и за други прашања на предлог на учесниците на средбата.

Од коалициските партнери во Владата на средбата се очекуваат претседателот на ЗНАМ и градоначалник на Куманово, Максим Димитриевски, а од албанскиот партнер Вреди, градоначалникот на Тетово, Биљал Касами и координаторот на пратеничката група Беким Ќоку.

Од трите опозициски пратенички групи, засега има потврда за учество само од Левица и се очекува оваа партија да ја претставува нејзиниот претседател Димитар Апасиев.

ДУИ денеска попладне на седница на Генералниот совет на партијата ќе донесе одлука дали нејзиниот лидер Али Ахмети ќе дојде на состанокот. Вчера партијата одржа седница на Претседателството на Генералниот совет, свикана од Ахмети, на која се дискутирало за актуелните политички теми и за прашања за внатрепартиската организација.

Претседателот на СДСМ Венко Филипче, пак, веднаш по најавата од Мицкоски одби да учествува и дури ги повика и останатите опозициски партии да не учествуваат.

Филипче, кој претходно бараше лидерска средба за клучни теми и предлагаше да се укине техничката влада, ја одби поканата од Мицкоски со образложение дека немал намера да седи „со криминалци на маса“. За техничката влада рече дека немало да дозволи таа да се укине, затоа што била гарант за фер избори, како и дека ќе овозможи да нема злоупотреби на системот „Сејф сити“ за следење на опозицијата во предизборните периоди. За реформската агенда, пак, рече дека дискусијата за законите ќе се води во парламентот каде што СДСМ ќе ги поддржи сите. Додаде и дека ако сепак се укине техничката влада, СДСМ во секој случај ќе учествува на парламентарни избори.

• ФИЛИПЧЕ НЕМА ДА ОДИ НА ЛИДЕРСКА СРЕДБА СО МИЦКОСКИ Техничката влада мора да остане

Од Владата велат дека добиле известување од СДСМ дека нема да учествува на состанокот.

Пратеникот на Левица, Амар Мециновиќ, вчера на прес-конференција во Собранието рече дека сега е моментот да се влезе во конструктивен дијалог за клучните прашања. Додаде дека како партија една и пол година се обидуваат да влезат во комуникација со владиното мнозинство преку предлагање закони и барање консензус за клучни државни прашања.

– Сметаме дека сега е време да влеземе во конструктивен дијалог, за да можеме да го обремениме овој процес со позитивни насоки, затоа што за нас најважно е да се создаде демократска атмосфера за време на избори и нашите барања ќе бидат во таа насока – рече Мециновиќ.

Левица најави дека прифаќа да се укине техничката влада, но, само ако се воведе една изборна единица и се обезбеди еднаков пристап до медиумското претставување во предизборниот период за сите политички субјекти.

Премиерот Мицкоски неодамна рече дека од лидерите очекува консензус за клучните прашања за државата.

– Да разговараме за изборот на народен правобранител. Да покажеме зрелост дека како политичари и како држава разговараме отворено на сите тие теми во врска со нашата цел, ЕУ, и за законите што треба да се донесат. Ајде да седнеме и да разговараме. Јас не би сакал да влегувам во укинување на техничката влада без консензус, затоа што тоа е политички некултурно, а ваков тип на измени во политичкиот систем треба да се носат со консензус. Ако велиме дека техничката влада е некаков имплант, ако велиме дека техничката влада можеби има проблеми и со уставноста, го кочи системот, не му дава доволно простор за маневар, ајде да ги направиме и тие измени – повика премиерот Мицкоски.

Откако Филипче го одби премиерот Мицкоски рече дека мислел дека ќе се покаже зрелост и широчина.

– Тема на лидерската средба е само Законот за влада. Ако ние се однесуваме неодговорно како што се однесува тој, нам не ни е потребна лидерска средба, ние со 61 глас може да ја избришеме техничката влада, не ни е потребно мислењето на опозицијата. Но, сакавме процесот да биде инклузивен. Сакавме да поразговараме и за Изборниот законик, Законот за Јавното обвинителство, Законот за јавнообвинителска и судска служба, Законот за Советот на јавни обвинители – рече Мицкоски.

Се очекува на лидерската средба да се дискутира и за законите за кои е потребно бадентерово мнозинство кои се заглавени во Собранието затоа што ДУИ не ги поддржува, особено за измените на Законот за прекршоците, од кои зависи дали од 1 февруари ќе профункционира казнувањето преку СМС и мејл на возачите чии прекршоци се регистрирани од камерите на „Сејф сити“.

САМИ МОЖЕМЕ ДА ЈА УКИНЕМЕ ТЕХНИЧКАТА ВЛАДА, НО САКАМЕ ИНКЛУЗИВЕН ПРОЦЕС До скоро СДСМ бараше лидерска средба, а сега Филипче ја одбива

The post ФИЛИПЧЕ СЕ САМОИЗОЛИРА, ЛИДЕРИТЕ ЌЕ ОДЛУЧУВААТ ЗА КЛУЧНИ ПРАШАЊА Мицкоски бара поддршка за укинување на техничката влада и за реформите во правосудството appeared first on plusinfo.mk.

Мислев дека ќе покажеме зрелост, широчина и на тој начин како политички чинители да се обединиме, оние партии кои имаме пратенички групи во Собранието, рече денеска премиерот Христијан Мицкоски, одговарајќи на новинарско прашање да го коментира ставот на претседателот на СДСМ, Венко Филипче, кој денеска рече дека нема да оди на лидерската средба и дека партијата сака да остане техничката влада.

– Тема на лидерската средба не беше само Законот за влада. Ако ние се однесуваме неодговорно како што се однесува тој и генерално опозицијата, нам не ни е потребна лидерска средба, ние со 61 глас може да го смениме Законот за влада и да ја избришеме техничката влада, не ни е потребно мислењето на опозицијата. Но, сакавме процесот да биде инклузивен, и покрај тоа што имаме огромно мнозинство градоначалници, речиси двотретинско мнозинство во Парламентот, така што, ако сакавме да се однесуваме незрело и неодговорно како што се однесуваат тие можевме и без лидерска средба – рече премиерот Мицкоски.

Сакавме да поразговараме и за реформските закони, кои исто така треба да се донесат во  Парламентот, додаде Мицкоски.

– Да разговараме за Изборниот законик, Законот за Јавното обвинителство и за другите реформски закони од правосудството, како Законот за јавнообвинителска и судска служба, за Законот за Советот на јавни обвинители. Сакавме да разговараме и за народниот правобранител. Има многу закони кои ценев дека треба да се донесат во инклузивен процес – рече Мицкоски.

Ќе повторам, додаде тој, нам апсолутното мнозинство ни овозможува тоа да го направиме и без консултации.

– Имаме неодговорна, неконструктивна опозиција, безидејна, која се служи со вакви квалификации какви што слушнавме од Филипче. Ваквиот тип однесување во јавноста е составен дел од неговиот менаџерски договор што го потпишал со СДСМ, па претпоставувам дел од обврските од тој договор се ваквите коментари за Владата и одбивањето на ваквите средби. Но, тоа е негов избор – рече премиерот.

Тој додаде дека денеска или утре формално ќе бидат доставени поканите за средбата која е планирана да се одржи на 14 јануари во Клубот на пратеници.

– Збунувачки се пораките од опозицијата, до скоро тие бараа лидерска средба. Велат дека се за интегрирање во ЕУ, зборуваме за реформските закони, а тие бегаат од средбата. Навистина збунувачко и нејасно однесување, но тоа е што е. Ние ќе работиме во интерес на граѓаните, ќе градиме, ќе сториме сè што е наша моќ да ги придвижиме процесите напред, а тие одбрале да тонат во своето политичко опозициско мочуриште – рече премиерот Христијан Мицкоски денеска во Гевгелија.

ФИЛИПЧЕ НЕМА ДА ОДИ НА ЛИДЕРСКА СРЕДБА СО МИЦКОСКИ Техничката влада мора да остане

The post САМИ МОЖЕМЕ ДА ЈА УКИНЕМЕ ТЕХНИЧКАТА ВЛАДА, НО САКАМЕ ИНКЛУЗИВЕН ПРОЦЕС До скоро СДСМ бараше лидерска средба, а сега Филипче ја одбива appeared first on plusinfo.mk.