Еврокомесарката за проширување и соседска политика Марта Кос оцени дека Македонија е меѓу земјите кои покажале најголем напредок во спроведувањето на Реформската агенда, но порача дека вистинскиот исчекор кон Европската Унија зависи од продолжувањето на пристапниот процес и исполнувањето на преземените обврски.

Во интервју за МИА, во пресрет на денешната посета на Скопје, Кос истакна дека земјата заслужува признание за реформите, поради што може да очекува и поголема европска финансиска поддршка.

– Северна Македонија постигна силен напредок во рамките на Реформската агенда и сега е меѓу водечките земји во Западен Балкан. Колку повеќе една земја ги исполнува реформите, толку повеќе поддршка добива – вели Кос.

Таа нагласува дека денеска во Скопје ќе разговара со премиерот Христијан Мицкоски за европскиот пат на земјата, реформите и спроведувањето на Планот за раст за Западен Балкан. Според најавите од Европската комисија, во фокусот на посетата ќе бидат напредокот во реформите и следните чекори во евроинтегративниот процес.

Осврнувајќи се на застојот во пристапните преговори и барањето на македонската Влада за гаранции пред евентуалните уставни измени, Кос вели дека проширувањето функционира според јасни правила и дека никој не може однапред да гарантира дека нема да се појават нови прашања во текот на процесот.

– Сега имаме можност, што се случува еднаш во генерацијата, да го оствариме проширувањето. Оние што ги исполнуваат своите обврски напредуваат, а оние што не ги исполнуваат – заостануваат. Во моменти на забрзување, застојот значи фактичко назадување – порача еврокомесарката.

Кос смета дека Европската Унија треба побрзо да им ги доближува придобивките од членството на земјите кандидати, наведувајќи ги приклучувањето на Македонија кон SEPA, програмите Erasmus+, EU4Health и Digital Europe како конкретни примери за постепена интеграција уште пред полноправното членство.

Таа предупредува дека предолгото блокирање на евроинтеграциите носи и безбедносни ризици.

– Кога Европа ќе остави вакуум, другите ќе се обидат да го пополнат. Затоа, кога земјите кандидати ги исполнуваат своите обврски, и ние мора да ги исполниме нашите – истакнува Кос.

На крајот од интервјуто, таа упати директен апел до македонските власти.

– Проширувањето е во движење. Северна Македонија припаѓа на европското семејство. Вратата е отворена пошироко отколку кога било во една генерација. Сега е време да се испорача и да не се троши повеќе време на изговори. Искористете го овој прозорец на можност – тоа е во ваши раце – порача Марта Кос во интервјуто за МИА.

За време на еднодневната работна посета на Скопје, еврокомесарката Марта Кос ќе има средба со премиерот Христијан Мицкоски, а според најавите ќе разговара и со претставници на Владата задолжени за европските прашања. Во фокусот на разговорите ќе бидат деблокирањето на пристапниот процес, спроведувањето на Реформската агенда, Планот за раст за Западен Балкан и следните чекори на земјата на патот кон членство во Европската Унија.

The post ПРОЗОРЕЦОТ НА ЕУ ЗА ПРОШИРУВАЊЕ Е ОТВОРЕН КАКО НИКОГАШ ДОСЕГА Марта Кос порачува Македонија да не го пропушта овој момент appeared first on plusinfo.mk.

Покажавте силни перформанси во рамките на реформската агенда. Доаѓам во Скопјe за да ја охрабрам Владата да го стори истото тоа и во пристапните преговори затоа што сега имаме можност која се случува еднаш во генерацијата, да го оствариме проширувањето – вели во интервју за МИА еврокомесарката за преговори за проширување и соседска политика непосредно пред нејзината утрешна посета на Скопје.

– Северна Македонија покажа дека може да испорача резултати кога има политичка волја. Ова јасно го гледаме во нејзините силни перформанси во рамките на реформската агенда. Ќе дојдам во Скопјe за да ја охрабрам Владата да го стори истото тоа и во преговорите за пристапување. Сега имаме можност која се случува еднаш во генерацијата, да го оствариме проширувањето. Ова доаѓа со јасни избори. Оние што ги исполнуваат своите обврски напредуваат. Ова го гледаме најјасно во Црна Гора и Албанија. Оние што не ги исполнуваат своите обврски, заостануваат. Во моменти на забрзување застојот значи фактичко назадување – вели еврокомесарката Кос на прашањето дали има предвид нова иницијатива за деблокада на македонската евроинтеграција.

Според неа, напредокот во преговорите за пристапување бара клучен елемент: доверба меѓу земјите кандидати и земјите членки.

– Според моето искуство, таквата доверба првенствено се гради врз два елемента: исполнување на обврските и ставот на земјите кандидати кон ЕУ и нејзините земји членки. Ова почнува со добрососедски односи. Кога меѓусебната доверба расте, процесот на пристапување станува побезбеден. Убедена сум дека ова би било случај и за Северна Македонија – нагласува Кос.

Таа притоа укажува дека досега нема случај на давање гаранции на земја кандидат дека нема да се појави друг спор за време на пристапниот процес до ратификацијата на договорот за пристапување од последната од 27-те земји членки.

– Вистината е дека ниедна земја кандидат никогаш не добила гаранција дека нема да се појави друг спор за време на процесот на пристапување сè до моментот кога и последната земја членка ќе го ратификува договорот за пристапување. Ова е начинот на кој функционира проширувањето на ЕУ. Важно е да се прифати оваа реалност – нагласува Кос.

Во коментар на германско-францускиот нон пејпер, кој промовира постепена интеграција на Западен Балкан во ЕУ пред полноправно членство, таа вели процесот на пристапување бара време, но оти во денешниот свет Европската Унија не може да си дозволи да чека предолго. И, вели, задоволна е од тоа што гледа како европските лидери ја водат оваа дебата, со цел да се изнајдат начини, вели, „да ја доближиме ЕУ до идните граѓани многу порано“.

– По летото, Комисијата има намера да предложи нови начини на земјите членки да ги доближат земјите кандидатки до ЕУ пред пристапувањето. Но, има една важна точка. Ова ќе бара напредок во преговорите за пристапување. Ова останува приоритет. Без таков напредок, понатамошната постепена интеграција ќе биде ограничена – посочува еврокомесарката Марта Кос во интервјуто за МИА, што целосно ќе биде објавено утре.

Комесарката за проширување Кос ќе пристигне утре во Скопје да разговара за патот на земјата кон ЕУ и напорите за реформи, со фокус на спроведувањето на агендата за реформи во рамките на планот за раст за Западен Балкан. До денес, посочуваат, земјата добила 142,1 милиони евра во рамките на Инструментот за реформи и раст по напредокот во спроведувањето на клучните реформи.

За време на посетата на земјата комесарката Кос ќе се сретне со премиерот Христијан Мицкоски и со вицепремиерот и министер за европски прашања, Беким Сали. Нивните дискусии, се посочува, ќе се фокусираат на напредокот во спроведувањето на агендата за реформи, приоритетите за постепена интеграција во ЕУ и пошироките случувања поврзани со патот на земјата кон ЕУ.

Како што наведуваат од Кабинетот на еврокомесарката, предвидено е Кос и премиерот Мицкоски да одржат заедничка прес-конференција. Таа ќе се сретне и со претседателот на Собранието, Африм Гаши, за да разговараат за важноста на конструктивниот политички дијалог и широката меѓупартиска поддршка за реформите поврзани со ЕУ.

Комесарката Кос ќе посети студентски дом во Скопје, реновиран со средства од ЕУ. Таа исто така ќе се сретне со младински организации од земјата за да разговараат за можностите што ги нуди поблиската интеграција со ЕУ на младите луѓе, вклучително и преку програми, како што се „Хоризонт Европа“ и „Еразмус+“.

Подоцна во текот на денот, комесарката Кос ќе се сретне со претставници на организациите на граѓанското општество и медиумите за да разговара за спроведувањето на клучните реформи поврзани со ЕУ, особено во областа на владеењето на правото – наведуваат од Кабинетот на еврокомесарката Кос.

The post ВИСТИНАТА Е ДЕКА НИТУ ЕДНА ЗЕМЈА КАНДИДАТ НЕ ДОБИЛА ГАРАНЦИИ Еврокомесарката Кос доаѓа во Скопје со порака дека шансата е сега appeared first on plusinfo.mk.

Според последните анализи на Европската комисија, уште еднаш се потврдува дека Македонија заедно со Албанија и со Црна Гора во нашиот регион е признаена како „фронтранер“ во однос на постигнатите реформи согласно Реформската агенда – оцени Антонио Милошоски, член на ИК на ВМРО-ДПМНЕ и пратеник.

– Според правилата на планот за раст на Европската комисија, финансиската поддршка којашто се насочува кон земјите кандидати е условена од степенот на постигнати реформи и тука Албанија, Македонија и Црна Гора се оценети со највисока оценка за разлика од други земји кандидати во регионот.

Оваа потврда од Европската комисија дека Македонија ги спроведува обврските од Реформската агенда, односно дека има значителен напредок е силна потврда, но исто така и мотивација за македонската Влада и за парламентарното мнозинство да продолжиме со ова темпо.

Како држава ја поздравуваме оценката на Европската комисија, како и нивниот план за реалокација на средства од Планот за раст, при што од оние земји коишто постигнале послаби реформи би се одзеле одреден дел на средства и истите би се алоцирале кон Албанија, Македонија и Црна Гора како земји коишто предничат во спроведувањето на реформите согласно Реформската агенда.

Со овие проценки на Европската комисија, за жал на Венко Филипче, се растура нивната манипулација дека Македонија заостанува во реформите, но оваа проценка од Европската комисија ни дава за право да упатиме еден апел до претседателот на СДСМ, Филипче, доколку Европската комисија ги препознава реформите коишто Македонија ги има постигнато, тогаш барем тој како претседател на оваа опозициска партија да не ги попречува законите коишто се дел од обврските во Реформската агенда, исто како и Изборниот законик и да биде прагматичен во интерес на државата, да дозволи и овој закон да биде изгласан и со тоа Македонија да си го зацврсти и својот углед во Брисел пред Европската комисија и да си овозможи добивање на поголем дел на средства од Планот за раст – рече Милошоски.

The post ЕВРОПСКАТА КОМИСИЈА ЈА ПОТВРДИ МАКЕДОНИЈА КАКО ЛИДЕР ВО РЕФОРМИТЕ Милошоски го повика СДСМ да не ги блокира законите од Реформската агенда appeared first on plusinfo.mk.

Владата ќе продолжи со реформите и со евроинтегративниот процес, но нема да прифати уставни измени без јасни гаранции дека тоа е последното барање на патот кон Европската Унија, го повтори премиерот Христијан Мицкоски ставот за евроинтеграциите на Македонија.

– Ќе се бориме, ќе спроведуваме реформи, ќе ја реализираме реформската агенда и ќе ги решаваме домашните проблеми. Тоа е она што можам да го ветам: жилава и бескомпромисна борба за подобар живот на граѓаните, а истовремено и за зачувување на националните интереси – истакна Мицкоски во гостување на Сител.

Осврнувајќи се на критиките дека Владата не успева да го деблокира европскиот пат на државата, премиерот оцени дека најголемата фрустрација кај граѓаните не произлегува од моменталниот застој, туку од, како што рече, долгогодишните понижувања и отстапки направени без очекувани резултати.

– Сметам дека фрустрацијата кај граѓаните е голема поради понижувањата што ги доживеавме изминативе години, би рекол и децении, како и поради националните отстапки што беа направени, а притоа не добивме ништо. Иако политичарите во минатото ветуваа чуда. Ни ветуваа дека ако смениме знаме, ако смениме Устав, ако смениме име и прифатиме сè што ќе се побара од нас, ќе имаме европско здравство, поквалитетно образование и подобар живот – рече тој.

Мицкоски нагласи дека не може да предвиди кога земјава ќе го надмине актуелниот застој во процесот на пристапување кон ЕУ, но вели дека Владата нема да се откаже од борбата за решавање на проблемот.

– Можеби ќе биде потребно и повеќе време. Не сум пророк за да ви кажам дали тоа ќе биде за една година, 2 години, 5 години или никогаш. Не знам. Но, можам да ви ветам дека ќе се борам со сета сила што ја имам, заедно со луѓето околу мене – вели премиерот.

Според него, во меѓувреме е променета и перцепцијата на европските партнери за македонските позиции, при што дел од високите европски функционери веќе разговараат за можни гаранции и за поинаков пристап кон спорот.

– Ако пред две-три години ни велеа дека сè е завршено и дека тоа е понудата на маса, денес дел од високите европски политичари велат: „Почекајте, да размислиме за гаранции. Да разгледаме поинаков пристап кон ова прашање“. Последните пораки од Брисел, вклучително и од претседателката Урсула фон дер Лајен, се дека Македонија е меѓу земјите што испорачуваат резултати и реформи. Тоа е она што можам да го ветам и што ќе продолжиме да го правиме. Но, не можам да ветам дека ќе се согласам на уставни измени што некој друг ги прифатил, без јасна гаранција дека тоа е последното барање и без јасно видлива цел. Тоа не можам да си го дозволам – нагласи премиерот.

The post ГРАЃАНИТЕ НЕ СЕ ФРУСТРИРАНИ ОД СЕГАШНИОТ ЗАСТОЈ КОН ЕУ, ТУКУ ОД МИНАТИТЕ ПОНИЖУВАЊА Мицкоски ќе се бори за влез во Унијата, но со зачувуани национални интереси appeared first on plusinfo.mk.

ВМРО-ДПМНЕ покажа дека реформите доаѓаат со многу труд, работа и одговорност, и носат конкретни резултати. Еден од најважните приоритети на Владата предводена од ВМРО-ДПМНЕ е Реформската агенда. Нејзиното спроведување е доказ дека Македонија конечно има јасен план, институционална дисциплина и политичка волја да испорачува резултати – изјави Драгана Бојковска, член на ИК на ВМРО-ДПМНЕ и пратеник.

– Особено значаен дел од Реформската агенда е дигиталната трансформација, област во која Македонија веќе бележи конкретен и мерлив напредок. Преку исполнување на чекорите од Реформската агенда, досега се обезбедени 31,7 милиони евра од Планот за раст, токму во делот на дигиталната трансформација.

Тоа се средства кои доаѓаат поради исполнети обврски. Тоа се средства кои се резултати на реформи, донесени закони и јасна посветеност на државата да се движи напред. Ова е суштината на пораката дека Македонија забрзува. Забрзува во реформите, забрзува во дигиталната трансформација и забрзува во испораката на резултати за граѓаните.

Дигиталната трансформација значи конкретна промена за граѓаните од услуги без непотребно чекање, до помалку бирократија, поедноставни процедури и институции кои работат побрзо и поефикасно. Токму тоа го прави Владата предводена од ВМРО-ДПМНЕ.

Во 2025 година беше донесен најголемиот пакет на закони во областа на дигиталната трансформација. Тој реформски пакет ги поставува темелите на модерна дигитална држава, усогласена со европските стандарди и подготвена да одговори на потребите на граѓаните и на бизнисот. Оваа динамика продолжува и годинава. Ќе бидат донесени и останатите законски решенија кои се дел од Реформската агенда, со цел Македонија да остане меѓу водечките држави во регионот во спроведување на реформите.

Разликата е јасна. Имаме конкретни чекори, испорачуваме реформи, создаваме систем и градиме држава којашто е сервис на граѓаните. Тоа е суштината на реформите кои ги спроведува ВМРО-ДПМНЕ.

ВМРО-ДПМНЕ и во наредниот период ќе продолжи да работи на целосно спроведување на Реформската агенда, на развој на дигитализацијата и на нејзиното вклучување во сите области од општеството – рече Бојковска.

The post ДИГИТАЛНА ТРАНСФОРМАЦИЈА ДОНЕСЕ 31,7 МИЛИОНИ ЕВРА ОД ПЛАНОТ ЗА РАСТ Реформите доаѓаат со многу труд, но носат опипливи резултати appeared first on plusinfo.mk.

Министерот за правда  Игор Филков денеска во Владата на брифинг со амбасадорите на ЕУ ги презентираше резултатите од спроведувањето на Реформската агенда во областа на владеењето на правото, реализираните законски реформи и следните чекори во исполнувањето на европските обврски на државата.

Во обраќањето, министерот Филков истакна дека Министерството за правда во изминатиот период реализирало најобемен законодавен реформски циклус, со силна динамика, професионален пристап и целосна посветеност на европската агенда.

– За помалку од две години подготвивме околу триесет законски решенија, од кои тринаесет се директно поврзани со Реформската агенда. Овој законодавен циклус претставува најобемен реформски процес реализиран од Министерството за правда во толку краток временски период и е јасен доказ за институционалниот капацитет, одговорноста и решителноста со кои се спроведуваат реформите – истакна министерот.

Тој нагласи дека реформите се реализираат во тесна координација со Владата, Европската комисија, експертската јавност и меѓународните партнери, со единствена цел – создавање функционален, ефикасен и европски правосуден систем.

Во рамките на четвртото барање за ослободување средства од Реформската агенда, во областа „Владеење на правото” се следат 17 реформски чекори, при што седум од нив се поврзани со донесување на 13 законски решенија што се во надлежност на Министерството за правда.

Министерот информираше дека сите законски решенија се подготвени, четири веќе се донесени од Собранието, а останатите се наоѓаат во различни фази од законодавната постапка. Според тековната динамика, ќе биде пријавена реализација на осум реформски чекори, додека за уште два продолжуваат активностите за обезбедување поширока политичка поддршка, пред сè за Законот за јавното обвинителство и Изборниот законик.

„Пред амбасадорите беа презентирани и најзначајните реализирани резултати, меѓу кои донесувањето на новиот Закон за Судскиот совет, целосно усогласен со препораките на Оценската мисија на Европската Унија и Венецијанската комисија, како и новите Закони за судска служба и за јавнообвинителска служба, со кои се гарантираат правата на вработените, се унапредува системот на вработување и се воспоставува правично вреднување на трудот“, се вели во соопштението на Министерството за правда за брифингот.

Министерот Филков посочи дека се пополнети сите работни места во Агенцијата за управување со одземен имот, избрани се двајца нови членови на Судскиот совет согласно новиот закон, додека постапката за избор на третиот член е во завршна фаза. Дополнително, преку платформата на Европската комисија се евидентира континуирано зголемување на бројот на истраги, обвиненија, пресуди, конфискации и случаи на управување со одземен имот во предметите од областа на корупцијата, организираниот криминал и перењето пари.

Во завршна фаза се и новиот Закон за јавното обвинителство, Законот за судски буџет, новиот Закон за кривичната постапка и новиот Кривичен законик, со кои ќе се комплетира најобемниот реформски пакет во правосудството во последните години и ќе се воспостави современа правна рамка усогласена со европските стандарди.

– Реформите се инвестиција во иднината на државата. Со нив градиме посилни институции, поефикасно правосудство, повисока доверба кај граѓаните и побрза европска интеграција. Таму каде што е потребен политички консензус, очекувам одговорност и државнички пристап од сите политички чинители, затоа што европските реформи се обврска кон државата и кон идните генерации – порача министерот за правда Игор Филков.

The post НАЈОБЕМНИОТ РЕФОРМСКИ ЦИКЛУС ВО СУДСТВОТО Е РЕАЛНОСТ Министерот Филков ги презентираше реформите пред амбасадорите appeared first on plusinfo.mk.

СДСМ и Левица во коалиција го блокираат Изборниот законик, а причина се ниските рејтинзи на двете партии, вели портпаролот на ВМРО-ДПМНЕ Валентин Манасиевски на партиска прес-конференција.

Според Манасиевски СДСМ и Левица здружено, ќе го блокираат Изборниот законик, оној кој со месеци го договараа.

„Истиот Закон во кој ВМРО-ДПМНЕ прифати сѐ што тие предложија. Единствено нешто што побаравме е по електронски пат нашата дијаспора да може да гласа уште на следните претседателски избори. Прво го прифатија ова наше барање, а денес истите го блокираат.

Јавноста мора да знае дека овој Закон е дел од Реформската агенда и тој се носи со сугестии и забелешки од страна на ОБСЕ и ОДИХР.

Упатуваме јасна порака до СДСМ и до Левица да предложат амандмани со кои бараат корекција на начинот на заокружување и на поднесување на приговори и да ги повлечат другите амандмани и заедно, консензуално да го донесеме овој Изборен законик.

Нашата дијаспора има право да учествува по електронски пат на следните претседателски избори, во време кога вештачката интелигенција има клучна улога.

Венко Филипче и Димитар Апасиев, со блокада на овој Закон, сакаат директно да ѝ нанесат штета на Македонија во делот на исполнување на реформите од Реформската агенда, но и во повлекувањето на средства од Планот за раст.

Почитувани граѓани,

На СДСМ и на Левица им пречи тоа што ВМРО-ДПМНЕ работи чесно, одговорно и транспарентно. Им пречи што сме први во регионот во исполнување на реформи од Реформската агенда и во повлекување на финансиски средства од Планот за раст.

Ние ќе продолжиме по тој пат, бидејќи тој пат е вистинскиот за Македонија“, порача Манасиевски од партиската говорница.

The post НИСКИОТ РЕЈТИНГ, ПРИЧИНА ЗОШТО СДСМ И ЛЕВИЦА „КОАЛИЦИСКИ“ ГО БЛОКИРААТ ЗАКОНИКОТ Го договараа со месеци, за сега да ја рушат Реформската агенда? appeared first on plusinfo.mk.

Собранието со 59 гласа „за“, 3 гласа „против“ и без воздражни ја изгласа потребата да се донесат по скратена постапка измените и дополнувањата на Изборниот законик, кој е дел од реформската агенда.

Потпретседателот на Собранието, Антонио Милошоски ги задолжи Комисијата за политички систем и односи меѓу заедниците, како матично работно тело и Законодавно правната комисија да заседаваат по предлог измените.

Предлогот до Собранието е доставен од група пратеници, и тоа Антонио Милошоски, Зеќирија Таири, Даниел Стојчевски, Блерим Беџети и Иванка Василевска. Левица не го потпиша овој предлог со образложение дека не се согласува со предложениот начин на финансирање на партиите, бидејќи тие иако имаат шестмина пратеници, на партијата ќе ѝ бидат исплатени исто како кога беа двајца.

Со измените, меѓу другото, се предвидува електронско гласање на дијаспората, а има промени и во делот на државното финансирање на партиите.

Предлагачот, образложувајќи зошто Изборниот законик треба да се донесе по скратена постапка, посочи дека за него се дискутира 4 месеци во рамки на Министерството за правда, каде учествуваа претставници на политичките партии, освен СДСМ, кој на почетокот учествувваше во работната група, а потоа се повлече.

– Во рамките на овие дискусии се согласивме за околу 28 препораки на ОДИХР, коишто беа консензуално прифатени. Во работната група во Министерството за правда за ниту една тема немаше надгласување и секогаш се одеше со консензус. Ќе имаме можност тие работи да ги дискутираме и за време на собраниската седница и за време на комисиите – рече Милошоски, образложувајќи го предлогот.

Во врска со изборниот модел, Милошоски укажа дека најголем дел од политичките партии се за една изборна единица, но, една партија била за 8, а друга за 3 изборни единици, па, бидејќи не се постигнал консензус, останува сегашното решение со 6 изборни единици.

За гласањето на дијаспората Милошоски појасни дека е постигнат консензус тоа да биде овозможено согласно праксата во Франција и во Естонија и да има електронско, безбедно и заштитено гласање.

– Морам да напоменам дека учестото на претставници од ДИК, Државниот завод за ревизија, АВМУ и од Антикорупциската комисија беше од голема помош. Овие институции излегоа со свои перпоаки кои во најголем дел беа прифатени. Препораките беа за тоа измените во Изборниот законик на овие институции да им го олеснат спроведувањето на изборите, во смисла да бидат демократски, фер, транспарентни и ефикасни – посочи Милошоски.

Во врска со моделот за користење пари од државвниот буџет за изборно рекламирање, Милошоски рече дека е постигнат едногласен консензус.

– Немаше ниту една партија која надгласала друга или некои преставници на политички партии да занемариле предлог на други колеги од политичките партии и ценам дека овој постигнат консензус од најголем број од политичките партии кои учествуваа во работната група во Министерството за правда треба да се цени како солидно постигнување и унапредување на нормите на Изборниот законик – порача Милошоски.

Тој потенцираше дека предлог измените се во согласност со Реформската агенда. Додаде дека усвојувањето на Изборниот законик ќе го направи одржлив и оправдан во следните 5, 10 и 15 години.

– Согласно тоа сметам дека би било добро во скратена постапка истиот да биде усвоен и поддржан консензуално од сите политички партии во Собранието – појасни Милошоски.

Координаторот на пратеничката група на Левица, Борислав Крмов, реагираше на начинот на кој се носи ИЗ, обвинувајќи дека јавноста е доведена во заблуда со тврдењата дека за текстот е постигнат широк политички консензус.

– Не е точно дека сте имале каков било консензус од партијата Левица за овој документ. Сето тоа се лаги. Ние сме доведени да прифатиме којзнае што, само за да фрлите неколку ситни трошки и потоа да тврдите дека има согласност. Исправањето на неуставните решенија не е услуга кон Левица, туку ваша обврска – изјави Крмов.

Пред гласањето на дневниот ред, координаторот на пратеничката група на СДСМ, Оливер Спасовски, побара точката да биде симната од дневен ред, посочувајќи дека ова законско решение секогаш досега се носело со консензус.

– Точно е дека СДСМ почна да работи во работната група којашто беше за подготовка на Изборниот законик, но мора да потсетиме дека ја напуштивме во моментот кога одлучивте како парламентарно мнозинство да го измените Законот за влада, кој исто така, е донесен со консензус. На почетокот во работната група укажавме дека носењето на Изборниот законик треба исклучиво да биде со консензус помеѓу политичките субјекти – рече Спасовски.

Пратеникот од Левица Сашко Јанчев, исто така, побара симнување на оваа точка од дневен ред, нагласувајќи дека е евидентно дека нема консензус.

И пратеничката Моника Зајкова побара симнување на точка од дневен ред, укажувајќи дека тоа што се прави е класичен заговор против граѓаните, симулирајќи консензус и буткајќи го законот.

Пратениците гласаа по секој од предлозите и во трите гласања не беше усвоено да се симне точката од дневниот ред.

The post ДИЈАСПОРАТА ЌЕ ГЛАСА ЕЛЕКТРОНСКИ, ОСТАНУВААТ 6 ИЗБОРНИ ЕДИНИЦИ Собранието ја изгласа потребата од измени на Изборниот законик appeared first on plusinfo.mk.

Актуелните геополитички случувања уште еднаш потврдуваат дека проширувањето а ЕУ не е само една од политиките на Европската Унија, туку стратешка инвестиција во иднината, безбедноста и конкурентноста на Европа, рече денеска министерот за дигитална трансформација и меѓународен секретар на ВМРО-ДПМНЕ, Стефан Андоновски во Виена.

Тој учествуваше на панел-дискусијата „Проширувањето на Европската Унија: Од посветеност до подготвеност на земјите кандидати, во рамките на Политичкото собрание на Европската народна партија (ЕПП) во Виена, каде учествува заедно со пратеничката Иванка Василевска.

Во своето обраќање Андоновски ја поздрави стратешката определба на Европската народна партија за продолжување на политиката на проширување на ЕУ.

– Прашањето денес не е дали проширувањето е потребно. Прашањето е дали Европа е подготвена своите стратешки амбиции да ги претвори во политички одлуки – истакна Андоновски.

Тој нагласи дека подготвеноста за членство има две страни – обврската на земјите кандидати да ги спроведуваат реформите и подготвеноста на Европската Унија да ги прифати оние држави кои ги исполнуваат критериумите.

Говорејќи за реформите во Македонија, министерот истакна дека дигиталната трансформација претставува еден од клучните двигатели на европската интеграција.

– Дигиталната трансформација не е само технологија. Таа го менува начинот на функционирање на државата. Кога институциите електронски разменуваат податоци, се намалува бирократијата. Кога услугите се дигитални, се намалува корупцијата. Кога секоја службена постапка остава дигитална трага, се зголемува отчетноста. Тоа не се ИТ проекти, туку суштински реформи за владеење на правото и за поефикасна јавна администрација – рече Андоновски.

Тој потсети дека преку Националниот портал за услуги денес се достапни повеќе од 300 електронски услуги, дека платформата за интероперабилност поврзува речиси 100 институции, а државата воведува СМАРТ лиценци, електронско управување со документи, дигитален идентитет и дигитален паричник.

Андоновски посочи дека токму реформите во областа на дигитализацијата имаат значаен придонес во успешната имплементација на Реформската агенда, при што речиси една четвртина од досега обезбедените средства преку Инструментот за реформи и раст се поврзани со исполнувањето на реформите во дигиталниот сектор.

Осврнувајќи се на Планот за раст, СЕПА и иницијативата „Роаминг како дома“, Андоновски нагласи дека тие се важни придобивки за граѓаните, но не смеат да станат замена за полноправното членство.

– Овие иницијативи треба да бидат мост кон членството, а не негова замена. Најголемата сила на процесот на проширување отсекогаш била неговата кредибилност – кога една држава ги исполнува критериумите и ги спроведува реформите, таа треба да напредува – истакна Андоновски.

Во завршницата од своето обраќање, тој порача дека процесот на проширување мора да остане заснован на заслуги и на исполнување на Копенхашките критериуми, а не да биде заложник на билатерални прашања.

– Доколку реформите станат споредни во однос на билатералните спорови, се доведува во прашање кредибилноста на целата методологија на проширување. Ако сите се согласуваме дека Европа се протега од Украина до Ирска и од Кипар до Финска, тогаш треба да разговараме како европските компании, научници и иноватори заеднички ќе победуваат во глобалната трка за вештачка интелигенција, квантни технологии и нови индустрии. Политиките на блокади не ги запираат нашите глобални конкуренти – тие само ги ограничуваат европските партнерства и европскиот потенцијал – порача Андоновски.

The post ПОЛИТИКАТА НА БЛОКАДИ ГО ОГРАНИЧУВА ПОТЕНЦИЈАЛОТ НА ЕВРОПА, ПОРАЧА АНДОНОВСКИ ПРЕД ЕПП Земјите што се реформираат мора да напредуваат кон ЕУ appeared first on plusinfo.mk.

Европскиот пат мора да биде предвидлив и сигурен, да се темели на мерит систем, не на билатерални прашања, а Македонија не е наивна и ја бара оваа предвидловст на европскиот пат. Вака истакна шефот на македонската дипломатија Тимчо Муцунски по средбата со колегата од Литванија, Кестутис Будрис.

Муцунски посочи дека дијалогот со Бугарија треба да продолжи со поддршка од земјите‑членки и европските институции.

– Не сме лековерни. И не сме наивни да мислиме дека одеднаш ќе има од страна на Бугарија, за жал да го кажам, некаква голема промена на позиција која е прилично агресивна и радикална. Затоа треба да го искористиме следниот период да најдеме начин на дипломатско ниво да се намалат тензиите и да продолжиме да разговараме врз основа на вредности, врз основа на принципи, врз основа на потребата политиката на проширување да биде базирана на мерит, а не на субјективни билатерални прашања – рече Муцунски порача дека се неопходни јасни уверувања за непречено одвивање на евроинтегративниот процес.

За скандалот со доверливата нота која Бугарија ја објави со информации за патувањето на семејството на македониот премиер Христијан Мицкоски Муцунски вели дека Македонија уште очекува соодветен одговор.

Министерот истакнува дека изјавата од Софија  „се работи за стара информација не е во духот на добрососедството.

– Истрагата треба да се направи таму каде што најдобро знаат, нека се направи. И мислам дека тука, од официјална гледна точка, ние со Софија ја затворивме темата и очекуваме соодветен одговор од нивна страна. Според мене, не е во духот на добрососедството и пријателството да се каже дека се работи за стара информација. Тоа не е добар пристап кога ја оспоруваме дипломатската комуникација – рече минисерот кој денеска на посета го прими колегата од Литванија, Кестутис Будрис.

Во однос на реформската агенда и роковите, министерот изјави дека верува во умешноста и на претседателот на Собранието и на парламентарното мнозинство.

– Очекуваме во овој извештаен период, кој што завршува заклучно со 30 јуни, да бидеме најдобри во регионот и да ја потврдиме нашата посветеност кон реформите и кон европските интеграции. Конкретно за изборниот закон, јас ќе кажам, жалам што опозицијата не учествува во активната реформа. Ќе повторам, и тоа ќе го кажам како и неколкупати наназад. Не може и опозицијата во државата да вели дека е за Европската Унија, ако се во прашање законите и реформите поврзани со Европската Унија да има застој во процесите. Ни треба национален консензус во општеството, и доколку навремено се обезбедеше тој национален консензус, за европските реформи, немаше да бидеме сега во ситуација во последен момент да треба политички да се менаџираат овие состојби, но јас верувам во умешноста и на претседателот на Собранието и на парламентарното мнозинство – рече тој, додавајќи дека очекува повторно да бидеме најдобри во регионот во другите извештаи.

Будрис истакна дека Македонија е на вистинскиот пат, дека ЕУ го препознава тоа и дека Литванија, која од 1 јануари ќе претседава со Унијата ќе ја подржи Македонија во интеграциите. Во својот говор Будрис трипати ја пофали земјата.

Во фокус на посетата на Будрис во Македонија, според информациите од македонското МНР биле продлабочувањето на политичките и економските односи, зајакнувањето на евро-атлантската соработка и силната поддршка за европската интеграција на Македонија.

The post НЕ СМЕ НАИВНИ, БАРАМЕ ГАРАНЦИИ НА ПАТОТ КОН ЕУ За Муцунски одговорот „стара нота“ за скандалот со Софија не е добрососедски appeared first on plusinfo.mk.