До крајот на годината не се очекува ревидирање на стапката на раст и промени во буџетскиот дефицит. Состојбите се следат, а буџетскиот дефицит, растот на БДП и задолжувањата ќе се одвиваат во согласност со проектираното во ребалансот на буџетот, вели министерката за финансии Гордана Димитриеска-Кочоска .

– Остануваме на проекцијата што ја имавме, особено имајќи предвид дека стапката на раст во вториот квартал е 4,3%. И во однос на буџетскиот дефицит, она што ни е проектирано, тоа ќе остане, без оглед на тоа дали ние ќе правиме ребаланс или нема да правиме ребаланс. Доколку се одлучиме и правиме ребаланс на буџетот, во исто време ќе работиме на кратење и на приходната и на расходната страна. Доколку останеме на истата состојба како сега, повторно кажувам дека дефицитот нема да оди надвор од предвиденото, во исто време и задолжувањето, бидејќи и тоа е дел од ребалансот, кој поминал во Собранието и тоа, да кажеме, се некои рамки во кои Министерството за финансии мора да се движи – изјави Димитреиска -Кочоска во интервју за МРТВ во Њујорк.

Таа рече дека состојбите будно се следат дека се реагира во согласност со случувањата на глобално ниво.

– Ги следиме состојбите и врз основа на тоа ќе ги носиме одлуките. Ние во Министерството за финансии минатата недела имавме состанок со Управата за јавни приходи и Царинската управа во насока на тоа да видиме кои се нашите очекувања во согласност со состојбите, какви се очекувањата до крајот на годината, како се полни буџетот и она што може заеднички да го кажеме – тој е во рамките на планираното, освен кај акцизата поради мерките – рече Димитриеска- Кочоска.

Според неа, мерките што се преземени како одговор на кризата се соодветни и дека имаат влијание на буџетот.

– Она што е очигледно е дека најмногу имаме влијание кај акцизата и таму се и мерките најголем период фокусирани, но, од друга страна, може да потврдиме дека Македонија е една од земјите што навистина има највисока стапка на раст и најстабилна и една од пониските инфлации, што јасно покажува дека мерките биле навистина насочени таму каде што треба. Морам да кажам дека во текот на целата дискусија постојано провејуваше фактот дека ние треба да се фокусираме на долгорочен раст, кој се заснова на продуктивност. За да имате добра продуктивност, во исто време треба да имате што е можно поевтини параметри или суровини. На некој начин и енергетските суровини се тие што треба да одржат пониски цени за да имаме поголема конкурентност, така што би рекла дека сме во добра насока, но неизвесноста останува и натаму, а ќе се приспособуваме во согласност со состојбите на светско ниво бидејќи тоа не зависи од нас – рече Димитриеска-Кочоска.

Министерката во Њујорк учествуваше на работната сесија „Поттикнување на растот во новата економија“, организирана во рамките на „Состаноците за влијанието врз одржливиот развој 2026“ (Sustainable Development Impact Meetings 2026) на Светскиот економски форум.

The post ТРЕБА ДА СЕ ФОКУСИРАМЕ НА ДОЛГОРОЧЕН РАСТ ЗАСНОВАН НА ПРОДУКТИВНОСТ Димитриеска-Кочоска оценува дека сме на добар пат да го постигнеме тоа appeared first on plusinfo.mk.