Премиерот Христијан Мицкоски очекува ребалансот на Буџетот оваа недела да биде усвоен на седница на Владата, по што ќе биде доставен во Собранието на понатамошно разгледување.

– Очекувам оваа недела ребалансот да помине на владина седница и да се најде во Парламентот – изјави кусо Мицкоски, одговарајќи на новинарско прашање по најавата за нова инвестиција вредна 20 милиони евра.

Во меѓувреме, Министерството за финансии веќе ги започна консултациите и состаноците за изработка на ребалансот на буџетот.

Министерката за финансии Гордана Димитриеска-Кочоска претходно соопшти дека ребалансот ќе биде подготвен согласно среднорочната фискална рамка и стратешките приоритети на Владата, меѓу кои се стабилни јавни финансии, фискална консолидација, инфраструктурен развој, енергетска транзиција и подобрување на животниот стандард на граѓаните.

Таа во објава на социјалните мрежи посочи дека глобалната економија се соочува со сериозна неизвесност, предизвикана од геополитичките случувања и конфликтите на Блискиот Исток, што влијае врз енергетските текови, инфлацијата и глобалниот економски раст.

„Затоа остануваме посветени на одговорно и дисциплинирано управување со јавните финансии, со јасен фокус на зачувување на макроекономската стабилност, поддршка на економскиот раст и реализација на капитални инвестиции“, напиша Димитриеска-Кочоска.

The post РЕБАЛАНСОТ НА БУЏЕТОТ ОВАА НЕДЕЛА НА ВЛАДА Мицкоски најави дека предлогот бргу ќе се најде во Собранието appeared first on plusinfo.mk.

Преку усвоениот Ребаланс на Буџетот, на денешната седница на Советот на Град Скопје биле обезбедени 50 милиони денари за изградба на нова противпожарна станица за потребите на Бригадата за противпожарна заштита на Град Скопје.

Новата станица, како што информираат од прес-службата на Град Скопје, ќе биде лоцирана во Општина Аеродром, во близина на Центарот за јавно здравје, и претставува значајна инвестиција во безбедноста на граѓаните и унапредувањето на условите за работа на скопските пожарникари.

Со реализацијата на овој проект, како што се наведува во соопштението, ќе се овозможи подобра организација на противпожарните служби, побрза реакција при интервенции, поефикасно спасување човечки животи и зголемена заштита од пожари и други вонредни ситуации во урбаните и приградските подрачја на градот.

„Пожарникарите секојдневно се соочуваат со сериозни ризици во извршувањето на своите задачи и затоа заслужуваат современи услови за работа, модерна опрема и соодветна инфраструктура. Изградбата на новата станица е конкретен чекор кон целосна модернизација на Противпожарната бригада на Град Скопје и создавање систем кој ќе биде подготвен, брз и ефикасен кога тоа е најпотребно“, посочуваат од Град Скопје.

Градот Скопје изразува благодарност до сите советници кои го поддржале овој проект и придонеле за неговата реализација.

„Станува збор за инвестиција од трајно значење која директно ќе придонесе за поголема безбедност и подобар квалитет на живот на сите граѓани. Град Скопје продолжува посветено да работи на реализација на проектите кои носат конкретни резултати и придобивки за градот и неговите жители“, се вели во соопштението на Град Скопје.

The post ЌЕ СЕ ГРАДИ НОВА БАЗА ЗА СКОПСКИТЕ ПОЖАРНИКАРИ ВО АЕРОДРОМ Градот обезбеди 50 милиони денари од буџетот appeared first on plusinfo.mk.

СДСМ се повлекува од Комисијата за финансирање и буџет, соопшти денеска лидерот на партијата Венко Филипче.

Тој најави кривична пријава и интерпелација за претседателот на Собранието Африм Гаши бидејќи задолжил друг пратеник да ја води Комисијата со која претседателствува Сања Лукаревска од СДСМ.

– Нашата пратеничка група нема да учествува во ова брутално, секојдневно задолжување на земјата за огромни суми, стотици милиони евра, милијарди евра пари, кои не одат никаде, освен строго контролирано во партиските фирми преку тендерските постапки. Ние нема да учествуваме во комисиската расправа на оваа тема и целосно се повлекуваме од неа. Дополнително, сакам да укажам на уште еден скандал. Скандал кој не е нов и кој претседателот на Собранието веќе континуирано го спроведува, а тоа е дека, кршејќи го Деловникот, закажува состанок на Комисијата за финансирање и буџет, комисија што ја води нашата пратеничка Сања Лукаревска, и покрај тоа што таа е тука и не е отсутна, а Деловникот тоа не го дозволува. Кога пратеникот е тука, тој задолжува друг пратеник да ја води оваа комисија – рече Филипче на прес конференција.

Филипче рече дека вкупниот долг на земјава од 8,5 милијарди евра во 2024 година, сега е близу 11 милијарди евра.

The post СДСМ СЕ ПОВЛЕЧЕ ОД КОМИСИЈАТА ЗА ФИНАНСИРАЊЕ И БУЏЕТ Филипче најави кривична за Гаши бидејќи закажал седница без Лукаревска appeared first on plusinfo.mk.

Нашиот фокус останува заштитата на животниот стандард на граѓаните и ребалансот нема да оди надвор од тие рамки, вели министерката за финансии Гордана Димитриеска-Кочоска во интервју за МИА во контекст на започнатите разговори за ребалансот на Буџетот.

Според Димитриеска-Кочоска, граѓаните треба да бидат спокојни дека Буџетот е ликвиден, се сервисираат сите обврски, редовно се исплаќаат платите и пензиите и обврските кон економијата.

– Во овој контекст, нема да бидат засегнати ставките кои придонесуваат за економски раст и кои се реализираат согласно планираната динамика, особено капиталните инвестиции, како и мерките за поддршка на граѓаните насочени кон унапредување на животниот стандард – вели Димитриеска-Кочоска.

Таа вели дека при ребалансот се има предвид и тоа дека нашата економија не е имуна на случувањата надвор и затоа се практикува внимателен пристап во креирањето на политиките кои ќе обезбедат стабилност, отпорност и одржлив развој на македонската економија.

-Пристапот при разговорите со министрите е заснован на реално завршените проекти и на реалните очекувања за нивна понатамошна реализација до крајот на годината, со цел средствата да се насочат кон приоритети кои се изводливи, мерливи и имаат конкретен ефект – вели Димитриеска -Кочоска.

Според неа, со ребалансот на Буџетот ќе се остане во основата на среднорочната фискална рамка утврдена со Фискалната стратегија за периодот 2027–2031 година.

Согласно со објавените податоци во првиот квартал годинава јавниот долг во апсолутен износ изнесува 10,747 милијарди евра или 59,7 % од БДП и, посочува министерката, бележи намалување за 1,5 п.п. во споредба со состојбата на 30 јуни 2024 година или кога ја преземавме власта.

– Имаме многу внимателен пристап во управувањето со јавниот долг и севкупно со јавните финансии и сме силно посветени на создавање услови за остварување повисоки и одржливи стапки за развој – вели министерката за финансии.

The post СЕ ПОДГОТВУВА РЕБАЛАНС НА БУЏЕТОТ Димитриеска-Кочоска вели дека приоритет се проектите кои обезбедуваат економски раст и мерките за поддршка на граѓаните appeared first on plusinfo.mk.

Од СДС не очекуваме конструктивна или пак аргументирана критика, туку празни соопштенија кои ги пишуваат колку да помине денот. Тоа е само доказ дека кај нив владее очај и паника, од тоа што следи во октомври, а тоа е историски најголем пораз на СДСМ, соопшти ВМРО-ДПМНЕ,

„Времето кога инфлацијата беше над 20%, кога граѓаните живееја со 150 денари на ден, кога платите и пензиите стагнираа во нивно време – сега тоа време заврши. Сега сме сведоци на поинаква политика која е исклучиво во интерес на граѓаните и на подобрување на животниот стандард“, соопшти партијата.

Состојбата која ја наследивме беше тешка и лоша, но не се предадовме туку работевме и денес продолжуваме во ист правец, се додава во  соопштението.

„Од држава која беше на раб на банкрот, сега сме држава која е во топ 5 економии во Европа. Држава во која платите растат во образованието, културата, полицијата, здравството, пензиите се зголемуваат – сега веќе и до 7000 денари за само 18 месеци! Растот на БДП е 3.2%, што е убедливо подобар од минатите години на владеење на СДСМ. Индустриското производство бележи раст од 9,4%, извозот на земјоделските производи е зголемен за 50% во споредба со минатата година. Исто така, многу важно е да се напомене дека после долг период, ребаланс на Буџет ќе се прави поради зголемени приходи, а не поради минус“, потенцира ВМРО-ДПМНЕ.

Овие индикатори, се додава, значат раст, развој и економска стабилност, како и правилно управување со јавните финансии. Ова значи чесно и домаќинско работење, за добробит на граѓаните.

„Владата предводена од ВМРО-ДПМНЕ нема да ги остави граѓаните како што тоа го направи СДС, туку напротив, ќе работи за подобрување на стандардот“, се вели во соопштението на ВМРО-ДПМНЕ.

The post ЗАВРШИ ВРЕМЕТО НА ЕКОНОМСКИ ГРАБЕЖ Сега Македонија е во топ 5 економии во Европа, порачува ВМРО-ДПМНЕ appeared first on plusinfo.mk.

Се наоѓаме во исклучително клучна точка кога треба да се оцениме дали се движиме во насоката што е усвоена со Фискалната стратегија. Клучно е економското почитување на фискалните правила, порача денеска претседателот на Фискалниот совет Глигор Бишев во обраќање на дебатата за ребалансот на Буџетот за 2025 година во матичната собраниска комисија.

Фискалниот совет до Комисјата за финансирање и буџет достави три документи, Мислење за буџетот, за Фискалната стратегија и Анализа дали постои фискален простор за евентуално дополнително задолжување и дали тоа значително ќе ја наруши стабилоста на буџетот.

Бишев истакна дека ревидираниот Буцет е во согласнот со буџетската стратегија и ја повтори препораката доколку инвестиците за капитални расходи не се реализираат како што се проектирани да не се пренаменуваат за тековни раходи, туку да се заштедат и да се пренаменат за трошења за наредните години. Фискалниот совет направи две сценарија, едно без значителни структурни промени и реформи со раст од 3% и второ со позначителни ивестици на приватен и јавен сектор, раст  на продуктивноста и реформи, со раст од 3,7 до 4% од БДП годишно.

Осврнувајќи се на остварувањата во првите 5 месеци од годинава и ревидираниот буџет, наведе дека растот е воден од домашната потрошувачка и посочи дека кога растот ќе достигне одредено ниво макроекономските политики треба постепено да им отстапат место на меѓународните пазари, на приватниот сектор, повеќе да се извезува.

– Од тој аспект раст од 3%, 3,5 %, е веќе индикација дека не може да одржуваме буџетски дефицит понатаму од околу 4% за да го стимулираме домашниот раст само со мерки на домашната потрошувачка.
И од тој аспект имајќи го предвид во Фискалната стратегија и за 2025 и 2029 година, Фискалниот совет прифати постепено намалување на буџетските дефицити, а исто така и на јавниот долг, се со цел пак да не биде контрапродуктивно. Меѓшутоа, сега се наоѓаме во исклучително клучна точка кога треба да се оцениме дали се движиме во насоката што е усвоена со Фискалната стратегија – рече Бишев.

За пет месеци, дополни, иако буџетскиот дефицит е помал во однос на истиот период од претходната година, тој е на ниво од 1,8% од БДП, што значи на годишно ниво доколку се оди онака како што е планирано со ревидираниот буџет би биле околу 4%.

– Најголемиот предизвик е што целиот овој дефицит е резултат на тековните расходи.  Значи капиталните расходи во однос на планирањето се рализирани со 22,5% и од тој аспект доколку очекуваме забрзување на капиталните расходи до крајот на годината, постои голем ризик доколку не се остварат проектираните приходи, особено ДДВ,  наша препорака е тоа да се следи и навреме да се реагира –  оцени Бишев.

Посочувајќи дека тековните трансфери и плати во буџетот учествуваат со 65% од вкупните расходи порача дека „ е многу тешко за маневарски простор за корекција кога има вакви буџетски обврски. И затоа, потецираше, овие ризици мора да се имаат предвид кога економијата ја влече агрегатната побарувачка.

Фискалниот совет, како што рече, ја охрабрува определбата да се води сметка за секој трошок вклучително и трошокот на задолжување којшто достигна 2%, каматните расходи достигнаа скоро 2% од БДП.

-И од тој апсект ако се погледа примарниот буџетски дефицит, ќе се види дека тој многу побргу се намалува од вкупниот буџетски дефицит. Тука треба да се искористат сите обиди особено во период сега на намалување на каматните стапки на меѓународните финансиски пазари. Ја повторуваме нашата препорака доколку инвестициите за капитални расходи не се реализираат онака како што се проектирани, да не се пренаменуваат во тековни расходи коишто и така се веќе на максимално високо ниво во Буџетот за 2025 година. Нашата препорака е да се заштедат во тој случај и да се пренаменат за трошење за наредните години – рече Бишев.

Ревидираниот буџет, дополни, е во согласност со буџетската стратегија и предложената до Партламентот.

Во однос на тоа дали има простор за дополнително задолжување за инфраструктура, а не за дефицит врз основа на тековните расходи,  направиле симулација со моделот на ОЕЦД. Земени се две сценарија со дополнителни инвестици од 2 милијарди евра. Едното да се реализира во три години, другото да се реализира во пет години.

– Се доаѓа дека наместо намалување на јавниот долг би имало благо зголемување, едното сценарио кои би достигнало до 65 проценти, а второто сценарио 63 проценти. И од тој аспект клучно е економското почитување на фискалните правила, а не само само формалното,  инвестициите да генерираат раст на продуктивноста и буџетските дефицити врз основа на тековни јавни расходи да конвергират кон нула. Значи во тој случај исклучокот, она што е правило во ЕУ, би бил само врз основа на јавни инвестиции –  потенцира претседателот на Фискалниот совет.

Претходно заменик-министерот за финансии Николче Јанкуловски во образложение на ребалансот рече дека предложените измени и дополнувања на Буџетот се потврда на фискалната политика за неопходноста од консолидација и подобрено управување со јавните финансии. Рече дека се базираат на непроменети макроекономски претпоставки и прилагодување на фискалните проекции кои на расходната страна обезбедуваат целосно финансирање и реализирање на стратешките приоритети и програмски определби без да се промени нивото на буџетскиот дефицит.

Тој побара поддршка за предложениот ребаланс од пратениците истакнувајќи дека со него ќе се обезбеди поефикасно и поодговорно управување со јавните финансии, со фокус на стабилност, отчетност и ефективност во трошењето.

The post РЕВИДИРАНИОТ БУЏЕТ Е ВО СОГЛАСНОСТ СО БУЏЕТСКАТА СТРАТЕГИЈА Бишев предлага непотрошените пари за капитални инвестиции да не се трошат за друга намена appeared first on plusinfo.mk.

Владата денеска го усвои Предлог ребалансот на Буџетот за 2025 година. Вкупните приходи се проектирани на ниво од 362,4 милијарди денари, а капиталните расходи се планирани во висина од 47,5 милијарди денари.

Проекцијата за БДП останува 3,7 проценти, а инфлацијата се очекува понатаму да се стабилизира и е проектирана на ниво од 2,8 проценти.

– Вкупните приходи се проектирани на ниво од 362,4 милијарди денари или за околу 1 процент повеќе во однос на Буџетот, односно за околу 3,5 милијарди денари. Растот на планираните средства е резултат на зголемени неданочни приходи – административни такси, концесии, добивка од Народната банка и други неданочни приходи, како и проширување на самофинансирачките активности на институциите, што ќе овозможи тековното работење и програмските приоритети наместо со целосно финансирање од буџетски средства да ги финансираат со користење средства од сопствени приходи – информираше министерката за финансии, Гордана Димитриеска-Кочоска на прес-конференција.

Како што дополни, даночните приходи остануваат непроменети. Според министерката, тоа е резултат на остварените приходи и подобрената методологија која што се користи за проектирање, која придонесува за помали отстапки меѓу проекциите што се прават и остварувањата на тие проекции.

Димитриеска-Кочоска информираше дека вкупните расходи се планирани на ниво од 403,7 милијарди денари и исто така бележат раст од околу 1 процент, односно за околу 3,5 милијарди денари како и на приходната страна, и се должи пред се на развојната компоненета.

– Со предложените измeни, или ребаланс вршиме реалокација на средства меѓу буџетските корисници, дообезбедуваме средства за непречена исплата на плати пред се во Министерството за внатрешни работи, каде обезбедивме раст на платите на вработените од 10 проценти. Исто така, обезбедени се дополнителни средства за исплата на зголемените пензии и транзициски трошоци и најважно е обезбедувањето дополнителни околу 300 милиони денари за капитални расходи – додаде Димитриеска-Кочоска.

Таа напомена дека капиталните расходи се планирани во висина од 47,5 милијарди денари, а измените се во насока на додавање средства за динамизирање на реализацијата на проектите кај коишто е веќе потврдена добра реализација, пред се во Министерството за одбрана.

Исто така, како што посочи, продолжува финансиската поддршка и соработка на Владата со општините, за кои претходно со донесената прераспределба беа обезбедени дополнителни 600 милиони денари.

– Инвестициите остануваат приоритет на Владата и тоа го следи овој Предлог-ребалансот на Буџетот, а целта е да ја поттикнеме економската активности и да го оствариме проектираниот раст. Оттука, со Ребаласнот не се ревидира стапката на раст и таа останува на 3,7 проценти, како што беше проектирана и со Буџетот за 2025 година. Остварувањата во првиот квартал и регистрираниот раст на БДП од 3,2 проценти прилагоден согласно сезонските и календарските податоци, е јасен сигнал дека проекцијата е остварлива и реална – рече Димитриеска-Кочоска.

Таа потенцира оти очекува таквиот тренд да продолжи и во наредниот период поддржан пред се од домашната потрошувачката, зголемените инвестиции во инфраструктурата и енергетиката, финансиската поддршка на инвестициската активност на домашните производни компани, но и мерките за зголемување на расположливиот доход на домаќинствата, а имајќи го предвид незивесното окружување и послабата побарувачка на нашите главни трговски партнери.

Како што појасни, инфлацијата, која што на почетокот на годинава регистрираше нагорен тренд, се очекува понатаму да се стабилизира и е проектирана на ниво од 2,8 проценти.

– Проекцијата за инфлацијата ја темелиме на очекувањата за доследна примена на законските прописи, пред се на Законот за нефер тргоски праткики, кои треба да спречат неоправдано зголемување на цените, особено кај основните прехранбени производи. Измените и дополнувањата на Буџетот за 2025 година кои се усвоени од Владата се потврда на фискалната политика и нашите напори за фискална консолидција и домаќинско управување со јавните средства, односно парите на даночните обврзници – рече Димитриеска-Кочоска.

Таа дополни дека буџетскиот дефицит останува непроменет и во апсолутен износ и како процент од БДП, односно 41,3 милијарди денари или 4 проценти од БДП.

– Измените и дополнувањата на буџетот за 2025 година се потврда на фискалната политика која ја водиме во изминатата година и со која обезбедуваме консолидација и стабилизирање на макроекономската состојба. Економската активност добива на динамика и забрзува, таквиот тренд ќе го одржиме и во наредниот период со политиките кои се планирани со Ребалансот. Дисциплинираниот пристап во упраувањето со јавните финансии ќе продолжи, буџетскиот дефицит останува непромент и во апсолутен износ и како процент од БДП и е понизок од остваренито дефицит минатата година, внимателен и сериозен пристап применуваме и во управувањето со јавниот долг, а за тоа најважен показател е намалувањето од 36 милион евра регистрирано во првиот квартал од 2025 година – рече Димитриеска-Кочоска.

Во однос на тоа каде се крати, Димитриеска-Кочоска рече дека најмногу се крати од Владата, во најголем дел има прераспределба меѓу инвестициите.

The post УСВОЕН Е ПРЕДЛОГ-РЕБАЛАНСОТ НА БУЏЕТОТ ЗА 2025 ГОДИНА Вкупните приходи се проектирани на ниво од 362,4 милијарди денари appeared first on plusinfo.mk.

Министерството за финансии од денеска почнува со преговорите со останатите министерства за ребалансот на буџетот, изјави министерката за финансии, Гордана Димитриеска Кочоска.

-По овој прес ќе го имаме првиот состанок да кажеме во период којшто следи, сигурно десеттина дена ќе работиме на такви преговори со надлежните министерства, а потоа ќе видиме како ќе се одвиваат работите. Премногу е рано и не би можела сега да ви кажам детали околу тоа – вели Димитриеска Кочоска.

Таа посочи дека утре имаат владина седница, но в среда и четврток, како Министерство ќе имаат прилично збиена агенда за преговорите и деталите околу ребалансот на буџетот.

Ребалансот на буџетот, годинава е планирано да се донесе летово бидејќи наесен се локалните избори.

The post ПОЧНУВА ПОСТАПКАТА ЗА РЕБАЛАНС НА БУЏЕТОТ Се преговара со министерствата за деталите appeared first on plusinfo.mk.

Премиерот Христијан Мицкоски денеска рече дека, поради локалните избори, ребаланс на Буџетот ќе има најверојатно на крајот на јуни.

Одговорајќи на новинарски прашања во рамки на посетата на општина Штип, Мицкоски напомена дека се уште не е направена анализа, но ќе се направи по што ќе се излезе со предлог пред пратениците.

– Логично е да има прераспределба на средства во месецот што следи поради импликацијата врз буџетските средства како резултат на проектите што ги поднесоа општините на вториот повик, зашто се работи за вкупно 16 милијарди денари. Логично е најмалку еднаш во годината да има ребаланс. Лани тоа беше при крајот на јули, но годинава тоа ќе биде проблем зашто ќе се распишат локалните избори и затоа ќе биде најверојатно на крајот на јуни- изјави Мицкоски.

Тој дека треба да се направи анализа пред да се испрати предлог за ребаланс на буџетот пред пратениците.

– Важно е дека владините мерки даваат резултати, имаме дефлација два месеца по ред, раст на индустриското производство во првиот квартал единствени во регионот и едни од ретките во Европа, имаме позитивна бројка во делот на извозот во првото тромесечје, очекувам резултат што ќе ги натфрли проекциите на меѓународните институции во делот на растот на БДП. Има неколку параметри кои дават јасна слика на траекторијата во која макроекономски треба да се движиме и тие ќе бидат опфатени во ребалансот – истакна Мицкоски.

The post ЛОКАЛНИТЕ ИЗБОРИ ГО ПОМЕСТИЈА РЕБАЛАНСОТ НА БУЏЕТОТ Мицкоски најави дека ќе биде донесен до крајот на јуни appeared first on plusinfo.mk.

Ребаланс на буџетот ќе има и очекувано е тоа дека ќе се случи, но очекувам да биде во летниот период, вели министерката за финансии Гордана Димитриеска-Кочоска во разговор со дописничката на МИА од Атина..

– Сега ќе имаме мини прераспределба, откако ќе заврши јавниот повик за општините, а прераспределбата што ја планираме е бидејќи не можевме однапред да ги предвидиме парите во кое Министерство да се доделат – вели Димитриеска-Кочоска.

Министерката деновиве учествува на десеттиот Делфи економски форум во Грција, каде што една од главните економски теми се царините од САД и вчерашната нова одлука на американскиот претседател Доналд Трамп.

The post ЛЕТОВО ЌЕ ИМА РЕБАЛАНС НА БУЏЕТОТ Планирана е мини прераспределба на парите по јавниот повик за општините appeared first on plusinfo.mk.