Ребалансот на Буџетот за 2026 година, којшто беше усвоен во Собранието во понеделникот, е добро решение и еден од ретките ребаланси на Буџетот низ годините во којшто има зголемување на ставката на капитални расходи. Ова го истакна министерката за финансии Гордана Димитриеска-Кочоска во гостување во Дневникот на МТВ.

– Овој ребаланс е едно добро решение, имајќи ја предвид, целокупната состојба во економијата,  не само во Македонија, туку гледано и геополитички и имајќи ги предвид неизвесностите коишто ги имаме пред нас. Ова е еден од ретките ребаланси на буџетот каде што имаме зголемување на ставката на капитални расходи. При тоа  морам да кажам дека станува збор за зголемување на капитални расходи коишто директно значат одредени инвестиции. Значи, ние тука не зборуваме за одредени трансфери, аванси, префрлања на јавни претпријатија и така натаму, коишто во минатото беа евидентирани како капитални расходи, а при тоа не гледавме никаде инвестиција. Имено тоа ме радува.  Првпат, значи  има корекција на расходна страна или зголемување од околу 6 милијарди денари – рече Димитриеска-Кочоска.

Таа додаде дека речиси во сите министерска има зголемување на средства, но најголем дел од предвиденото зголемување на капиталните расходи се во делот на АА програмата, каде што има навистина висок процент на реализација на капиталните инвестиции и дека навистина работите на терен се гледа дека се одвиваат со забрзана динамика. Понатаму во Министерството за животна средина и просторно планирање, каде има зголемување во повеќе ставки. Најголемиот дел е кај капиталните расходи при тоа 700 милиони денари се предвидени за пречистителната станица во Скопје. Во Министерството за животна средина и просторно планирање има повеќе проекти коишто се поврзани со финансирање поврано со  ИПА. Има зголемување и на ставки во Министерството за одбрана во делот на капиталните расходи.

Министерката појасни дека со Ребалансот проектираните вкупни приходи ги покриваат тековните расходи и дека останува разлика којашто е насочена кон капитални расходи.

– Тоа значи дека целиот буџетски дефицит во суштина оди на финансирање на капиталните расходи или она што меѓу граѓаните е познато како инвестиции. И мора да се согласиме тука сите дека секојдневно најпрвин гледаме дека во секое едно, би рекла, населено место имаме пуштање во употреба на некој проект. Што значи дека навистина имаме реализација на теренот. И тоа секој граѓанин може да го види со голо око, што јасно покажува дека да, тоа купче, би рекла, можеби најмногу тежи. Од друга страна гледано и од економските параметри, преку бруто домашниот производ и растот на БДП, јасно покажува дека навистина и Владата има придонес, да кажеме, преку растот БДП, иако тој не е резултат само на тоа што го прави Владата, но и Владата има делумно придонес во растот на бруто домашниот производ – рече Димитриеска-Кочоска.

Во интервјуто се осврна на прибирањето приходи во Буџетот при што истакна дека полнењето е редовно и дека објавените податоци покажуваат дека кај сите даночни ставки има добра наплата. Единствената ставка кај која има пониска наплата се акцизите што е директно поврзано со мерките што беа преземени од страна на Владата.

Во врска со јавниот долг и задолжувањата, потенцира дека состојбата со јавниот долг досега успешно се менаџира, дека работите се под контролиа и дека задолжувањата креираат економски раст.

The post ПРВПАТ ИМАМЕ КАПИТАЛНИ РАСХОДИ ВО БУЏЕТОТ ШТО ЗНАЧАТ ОДРЕДЕНИ ИНВЕСТИЦИИ НА ТЕРЕН Димитриеска-Кочоска тврди дека државната каса редовно се полни appeared first on plusinfo.mk.

Ребалансот на Буџетот за 2026 година носи повеќе пари за капитални инвестиции и за развојни проекти, изјави на денешната прес-конференција  пратеникот на ВМРО-ДПМНЕ Бојан Стојановски.

Според него, Буџет не е документ на паника и не е отстапување од економската политика. Тој е навремено приспособување на Буџетот кон реалните економски движења и кон потребите на граѓаните, општините и стопанството.

-Вкупните приходи се зголемуваат за 4,57 милијарди денари, или 1,2% и достигнуваат 379,5 милијарди денари. Вкупните расходи се зголемуваат за 11,6 милијарди денари, или 2,8%. Да, дефицитот се зголемува и изнесува 4,1% од БДП. Но клучно прашање не е само колкав е дефицитот, туку за што се користи дополнителниот фискален простор. Одговорот е многу јасен. Капиталните расходи се зголемуваат за 5,81 милијарди денари, односно за 14,5%. Развојните потпрограми растат за 4,22 милијарди денари и достигнуваат повеќе од 41 милијарда денари. Тоа се средства за патишта, железница, водоводи, канализации, училишта, здравствени објекти, животна средина и локална инфраструктура. Тоа се инвестиции што создаваат работа денес, а вредност за граѓаните во годините што следуваат – рече Стојановски.

Тој тврди дека приходната страна ма Буџетот, не се гради врз нереални очекувања.

-Приходите растат систематски,,системски, пресметано и создаваат поголема вредност во економијата. Се крати таму каде што нема доволен приоритет, а се зголемува таму каде што има економски, развоен и општествен ефект. Затоа, кога опозицијата ќе зборува само за една бројка, ние ќе зборуваме за целата слика. Зборуваме за структурата на расходите, за проектите и за придобивките кои што треба да ги почувствуваат граѓаните – рече тој.

Стојановски вели дека овој Ребаланс треба да се оценува не само според тоа колку средства се планираат, туку според тоа што ќе се изгради и што ќе се подобри со нив.

-Тоа е разликата помеѓу непродуктивна потрошувачка и развојна политика – рече тој.

The post РЕБАЛАНСОТ НА БУЏЕТОТ НОСИ ПОВЕЌЕ ПАРИ ЗА ПАТИШТА, УЧИЛИШТА И ЗА ДРУГИ ИНФРАСТРУКТУРНИ ПРОЕКТИ Стојановски тврди дека тој е приспособен на потребите на граѓаните и реалните економски движења appeared first on plusinfo.mk.

Со ребалансот на Буџетот се обезбедуваат повеќе средства за капитални инвестиции, кои ќе бидат насочени кон изградба на патишта, железници, училишта, водоводи и други инфраструктурни проекти низ државата, изјави денеска на прес-конференција пратеничката од ВМРО-ДПМНЕ, Биљана Кузманоска.

Според неа, капиталните инвестиции со ребалансот се зголемуваат за 5,8 милијарди денари и ќе достигнат вкупно 45,9 милијарди денари, што претставува раст од 14,5 проценти.

– За секој буџет, па и за овој, најважното прашање е каде одат парите. Со ребалансот одговорот е јасен – тие се насочуваат во патишта, железници, водоводи, училишта и многу други проекти што ќе претставуваат додадена вредност за Македонија – изјави Кузманоска.

Таа нагласи дека продолжува реализацијата на повеќе капитални инфраструктурни проекти, меѓу кои изградбата на Коридорот 8 и Коридорот 10-д, автопатските делници Кичево – Букојчани, Кичево – Охрид, Тетово – Гостивар, Гостивар – Букојчани, Прилеп – Битола, како и автопатот Скопје – Блаце.

– Продолжува и изградбата на источниот дел од железничкиот Коридор 8, на делницата Бељаковце – Крива Паланка, а започнува и реализацијата на заедничкиот железнички граничен премин Табановце со Србија – рече пратеничката.

Кузманоска додаде дека со ребалансот се обезбедени средства и за изградба и реконструкција на основни и средни училишта, детски градинки, спортски и училишни сали, студентски и ученички домови, како и за хидросистеми, откупно-дистрибутивни центри и нови капацитети во затворот „Идризово“.

– Ова се средства што ќе значат рамномерен регионален развој, поддршка за инфраструктурни проекти во општините и подобар животен стандард за граѓаните. Зборуваме за развоен и домаќински буџет, со капитални инвестиции што достигнуваат 4,1 проценти од бруто-домашниот производ. Овие бројки не се само чекор напред, туку силен поттик за развојот на современа Македонија – истакна Кузманоска.

The post РЕБАЛАНСОТ Е РАЗВОЕН, 45,9 МИЛИЈАРДИ ДЕНАРИ ЗА ПРОЕКТИ Повеќе средства за патишта, железници, училишта и градинки appeared first on plusinfo.mk.

На денешната собраниска седница се обрати пратеникот од редовите на ВМРО-ДПМНЕ, Емил Спасовски кој оцени дека предложениот ребаланс на Буџетот за 2026 година претставува развоен, реален и финансиски одржлив документ, кој што е во интерес на граѓаните и државата.

Тој нагласи дека со ребалансот се обезбедуваат дополнителни средства за капитални инвестиции, кои достигнуваат 46 милијарди денари, што е зголемување од 5,8 милијарди денари или 14,5 проценти во однос на првично планираниот буџет. Тој додаде дека, според него, ребалансот има за цел забрзан економски раст и спроведување на фискална консолидација преку строга фискална дисциплина.

– Со ребалансот на Буџетот за 2026 година обезбедуваме дополнителни средства  за капитални инвестиции кои достигнуваат 46 милијарди денари и се зголемуваат за 5,8 милијарди денари, што е зголемување за 14,5% во однос на планираниот буџет. Средствата за платите и надоместоците се зголемуваат за 1,1 милијарда денари достигнувајќи 53,7 милијарди денари. Субвенциите и трансферите растат за 3,9 милијарди денари или 10,4%. Овие средства одат за земјоделство, железнички сообраќај, студентски и ученички стандард, породилно боледување, мој ДДВ и други приоритетни расходи. Социјалните трансфери растат за 2,2 милијарди денари – рече Спасовски.

Во своето обраќање, Спасовски истакна дека предложениот ребаланс обезбедува повеќе средства за инфраструктура, здравство, образование, социјална заштита, спорт и култура.

– Ова значи дека овој ребаланс предвидува подобра инфраструктура, повисоки плати и пензии, подобро здравство, подобро образование, повеќе грижа за ранливите категории, повеќе за спортот и културата. Во патната инфраструктура продолжува реализација на коридорот 8 и коридорот 10Д и автопатот Скопје-Блаце, за кој денеска во Владата се потпиша договор и конечно македонска компанија ќе го гради овој автопат. Во железничката инфраструктура продолжува изградбата на источниот дел од железничкиот коридор 8, делницата од Бељаковце до Крива Паланка – вели Спасовски.

На истата седница Александар Јамалов од ВМРО-ДПМНЕ истакна дека ребалансот на Буџетот за 2026 година не претставува само измена на буџетските ставки, туку документ што ќе овозможи нови инвестиции, реализација на проекти, економски раст и подобрување на животниот стандард на граѓаните.

– Кога ги анализираме макроекономските показатели во период 2017 до 2026 година гледаме јасен тренд, БДП по тековни цени расте од околу 618 милијарди денари во 2017 година на повеќе од 1 билион денари во 2025 година, а позитивен тренд продолжи и во 2026 година, тоа значи дека економијата создава поголема вредност, се движи напред и има капацитет да поддржи нов инвестициски циклус – рече Јамалов.

Пратеникот Жан Дрвошанов, пак, од ВМРО-ДПМНЕ истакна дека кај инфраструктурните проекти во општините имаме зголемување од 113% или 300 милиони денари.

Пратеникт посочи  и дека железничката инфраструктура добива 743 милиони денари односно дека истата покажува раст за 25,3%, како и тоа дека во 2026 година во рамките на железничката инфраструктура во соработка со ЕБОР ќе се спроведе и проектот со кој е предвидено изградба на заеднички железнички граничен премин со Република Србија односно изградба и опремување на железничка станица Табановце.

The post ЗА 14,5% ПОВЕЌЕ KAПИТАЛНИ ИНВЕСТИИ СО ПРЕДЛОЖЕНИОТ РЕБАЛАНС НА ДРЖАВНАТА КАСА Парите одат во патишта, плати и пензии, вели ВМРО-ДПМНЕ appeared first on plusinfo.mk.

Во првата половина од годината, односно во периодот јануари-јуни, вкупните приходи во Буџетот се реализирани во износ од 170 (поточно 169,9  милијарди денари што е раст за 8,6% во споредба со истиот период од претходната година и има реализација на планот од над 45%.

Министерката за финансии Гордана Димитриеска-Кочоска во експозето на ребалансот на Буџетот за 2026 година во комисиската расправа во Собранието оцени дека јавните финансии се стабилни, приходната страна се реализира согласно очекувањата, а расходите се насочени кон исполнување на законските обврски и реализација на приоритетните развојни политики.

– Особено е значајно што најголемиот дел од приходите доаѓаат од редовната економска активност. Даночните приходи достигнаа 96,7 милијарди денари, при што приходите од ДДВ изнесуваат 43,3 милијарди денари и учествуваат со околу 44,7% во вкупните даночни приходи. Приходите од данок на личен доход достигнаа 17,5 милијарди денари, приходите од данокот на добивка 13,8 милијарди денари, а по основ на акцизи се реализирани 13,9 милијарди денари – наведе министерката.

Таа појасни дека податоците покажуваат раст на приходите од данокот на личен доход за 11,7%, данокот на добивка за 14,5%, данокот на додадена вредност 16,4% и раст од 8,3% кај увозните давачки бележат раст.

Според министерката ова е директна потврда дека економската активност продолжува, дека компаниите работат, дека платите растат и дека институциите успешно ја реализираат политиката на подобра наплата и намалување на сивата економија.

Социјалните придонеси во првата половина од годината, а како најзначаен извор за финансирање на пензискиот и здравствениот систем, достигнаа 58,8 милијарди денари, што претставува раст за 7,5% во споредба со истиот период минатата година.

На расходната страна на Буџетот, која е реализирана во износ од 205,9 милијарди денари е во насока на исполнување на законските обврски кон граѓаните.

– Во првата половина од 2026 година се исполнети обврските кон стопанството, односно извршен е поврат на средства по основ на солидарниот данок во висина од 1,2 милијарди денари. За исплата на пензии се издвоени 58,1 милијарди денари и е обезбедена редовна исплата на пензиите за сите пензионери, за финансирање на здравствениот систем се реализирани 25,5 милијарди денари, додека пак, за социјална заштита на најранливите категории на граѓани се исплатени 7,6 милијарди денари -рече министерката и додде дека кон  општините се трансферирани 15,1 милијарди денари блок-дотации за образование, детска заштита, култура, противпожарна заштита и останатите пренесени надлежности, како и дополнителни 2,4 милијарди денари средства од данокот на додадена вредност.

Таа информира и дека во првата половина од годината државата дисциплинирано ги сервисираше сите обврски кон домашните и странските кредитори. За камати се исплатени 12 милијарди денари, додека за отплата на главнина по основ на домашен и надворешен долг се сервисирани 60,7 милијарди денари.

– Ова е исклучително важно, бидејќи финансиската дисциплина и навременото сервисирање на долгот се предуслов за зачувување на довербата на инвеститорите, меѓународните финансиски институции и кредитните агенции – рече таа.

Димитриеска-Кочоска потенцира дека на расходната страна, политиката останува непроменета – навремена исплата на сите законски обврски, дисциплинирано управување со јавните средства и приоритетно финансирање на развојните политики.

Според неа, најсилен показател за развојната политика на Владата е реализацијата на капиталните расходи којашто во првата половина од годината достигна 19,4 милијарди денари, што претставува раст од 53,5% во однос на истиот период минатата година.

Тоа, смета министерката, значи дека државата инвестира повеќе во патишта, железници, комунална инфраструктура, училишта, градинки, здравствени установи, водоводи, канализации, енергетски проекти и локален развој.

-За изградбата на Коридорите 8 и 10-д до крајот на мај се реализирани 6,3 милијарди денари, а дополнително, за инфраструктурните проекти во општините се реализирани 2,1 милијарди денари – рече таа.

The post ДРЖАВНАТА КАСА Е ВО ТОП ФОРМА Димитриеска-Кочоска кажа на што се трошат парите appeared first on plusinfo.mk.

Собраниската Комисија за финансирање и буџет денеска треба да ја почне расправата по Предлогот за изменување и дополнување на Буџетот за 2026 година, во второ читање. За ребалансот на Буџетот поднесени се 224 амандмани.

Вкупните приходи се ревидираат на ниво од 379,2 милијарди денари, што е зголемување за околу 4,2 милијарди денари или за 1,1% во однос на иницијалниот Буџет за 2026 година. Вкупните расходи, пак, се ревидираат на 425,2 милијарди денари. Обезбедени се дополнителни средства за капитални инвестиции кои достигнуваат околу 46 милијарди денари и се зголемуваат за околу 5,8 милијарди денари, зголемување за 14,5%.

Согласно проекциите, за годинава се очекува економски раст од 3,5%, инфлација од 4,5%, а буџетскиот дефицит 4,1% од БДП.

На приходната страна даночните приходи остануваат речиси на првично планираното ниво и се проектирани на 213,2 милијарди денари, што е минимално намалување од околу 900 милиони денари, односно за 0,4%.

Неданочните приходи се зголемуваат за околу 2 милијарди денари, како резултат на подобрата реализација на административните такси, концесиите, и поголемото користење на сопствените приходи од страна на буџетските корисници.

Кај расходите за стоки и услуги има намалување од околу 900 милиони денари преку реалокација на средствата и нивно насочување кон приоритетните потреби.

Буџетскиот дефицит од 46,1 милијарди денари, како и обврските за отплата на долг во вкупен износ од 76,4 милијарди денари, ќе се финансираат преку комбинација на домашно и странско задолжување. Притоа, над 54 милијарди денари се наменети за редовно сервисирање на обврските кон странските кредитори, а околу 20 милијарди денари за отплата на домашниот долг.

The post ПОДНЕСЕНИ 224 АМАНДМАНИ НА РЕБАЛАНСОТ НА БУЏЕТОТ Расправата ќе покаже колку од нив се прифатливи appeared first on plusinfo.mk.

Ребалансот на Буџетот за 2026 година е насочен кон обезбедување средства за реализација на капитални инвестиции, исполнување на обврските преземени со колективните договори и поддршка на развојните политики кои директно влијаат врз квалитетот на живот на граѓаните, изјави министерката за финансии Гордана Димитриеска- Кочоска.

Говорејќи за зголемувањето на расходите со ребалансот, министерката посочи дека Министерството за финансии мора да води сметка не само за бројките, туку и за реалните потреби на граѓаните и институциите.

– Министерот за финансии има најтешка улога, затоа што ако сакаме да ги гледаме работите само од аспект на тоа каков треба да биде буџетскиот дефицит, ќе кажеме – да, министерот се држи цврсто до бројката, но на другата страна имаме живот и реалност- рече Димитриеска-Кочоска во поткастот „Каде се парите”

Во однос на капиталните инвестиции, министерката истакна дека тие не смеат да се гледаат исклучиво како трошок, туку како вложување во идниот развој на државата и подобрување на условите за живот на граѓаните.

Таа посочи дека капиталните инвестиции имаат директен придонес за економскиот раст, но и долгорочни ефекти врз развојот и животниот стандард.

– Капиталните инвестиции директно влијаат на бруто-домашниот производ, а по нивната реализација директно и индиректно влијаат врз економијата и подобрувањето на квалитетот на живот- рече таа.

 Димитриеска-Кочоска додаде дека одлуката за зголемување на капиталните расходи е резултат на подобрената реализација на проектите и зголемената подготвеност на институциите да ги спроведуваат планираните активности.

– Ние констатиравме дека во последните неколку месеци одредени министри се фокусирани и посветени на работата и како резултат на тоа кажавме – во ред, нека имаме поголема реализација – рече таа.

Во делот на приходите, Димитриеска-Кочоска нагласи дека наплатата на даноците се движи согласно очекувањата и дека досегашните показатели не упатуваат на значителни отстапувања од проекциите.

– Растот на приходите од ДДВ и останатите даноци е над нивото потребно за исполнување на годишните проекции. Податоците покажуваат дека приходите се движат во согласност со планот и нема основа за тврдења дека Буџетот се соочува со проблеми во наплатата: Јас не можам да кажам дека има некакви отстапувања. Математиките до сега покажуваат дека даноците ќе се собираат – истакна Димитриеска-Кочоска.

Осврнувајќи се на буџетскиот дефицит, таа нагласи дека дефицитот не треба да се анализира преку апсолутни бројки, туку преку неговото учество во бруто-домашниот производ, бидејќи само така може да се направи реална споредба меѓу различни години и економски услови.

– Процентите постојат токму заради тоа, да бидат споредливи. Не можеме да споредуваме нешто што не е споредливо -рече Димитриеска-Кочоска и потсети дека државата во 2020 година се соочи со буџетски дефицит од 8% од БДП.

Во однос на јавниот долг, министерката истакна дека Министерството за финансии води внимателна политика на управување со јавните финансии и дека довербата на меѓународните финансиски пазари е потврдена преку успешното издавање на еврообврзницата со историски најниска маргина.

– И поради тоа, кога ја издававме еврообврзницата, имавме најниска маргина досега, историски гледано – рече таа.

Министерката нагласи дека фискалната политика останува насочена кон одржување на стабилноста, но и кон обезбедување средства за развојни проекти кои ќе дадат долгорочни резултати за економијата.

The post РЕБАЛАНСОТ НА БУЏЕТОТ СОЗДАВА УСЛОВИ ЗА ПОГОЛЕМИ ИНВЕСТИИИ И ЗА РЕАЛИЗАЦИЈА НА КАПИТАЛНИТЕ ПРОЕКТИ Димитриеска-Кочоска во одбрана на зголемувањето на трошоците од државната каса appeared first on plusinfo.mk.

Во овој ребаланс на Буџетот капиталните инвестиции се зголемени од 39 милијарди денари, колку што претходно беа предвидени, на цели 47 милијарди денари (763 милиони евра) и тоа се должи токму на реализација на капитални проекти во сите институции, од автопатските секции, преку програмата за финансирање на општините каде дополнително се обезбедени околу 2 милијарди денари, преку обезбедени дополнителни пари за пречистителни станици како скопската, битолската, тетовската преку Министерството животна средина. Тоа се сѐ проекти коишто се реализираат и токму тоа е причината за зголемени буџетски дефицит од 3,5% на 4,1%, бидејќи имаме за 7 милијарди денари повеќе капитални инвестиции споредено со тоа што беше претходно, објасни премиерот Христијан Мицкоски прашан во Собранието за реализацијата на капиталните инвестиции и ребалансот на Буџетот.

– Ние денеска зголемуваме буџетски дефицит не поради субвенции, не поради социјални трансфери, плати, пензии, туку поради капитални инвестиции, нешто што на времето беше невозможно, затоа што немаше капацитет, немаше проектен менаџмент. И во таа состојба ние сме обвинети дека сме го зголемиле буџетскиот дефицит. Да имаме 7 милијарди денари зголемени социјални трансфери, па да речеме безмилосно се трошат парите и заради тоа е буџетскиот дефицит. Ама не е така, и тоа во услови на криза, во услови кога два месеци имавме намалено ДДВ, кога имавме повеќе од 3 месеци намалени акцизи, во услови на најголемата енергетска криза којашто човештвото ја памети. И повторно, ние во овој ребаланс на Буџетот немаме никаков проблем да обезбедиме средства и да ги реализираме тие капитални инвестиции – рече Мицкоски.

Во однос на реализацијата на капиталните инвестиции, Мицкоски кажа кога ќе бидат завршени дел од нив.

-Очекувам во првиот квартал следната година да можеме сите да ја возиме делницата од Кичево до Охрид, целосно да ја возиме, целосно да биде функционална таа делница. Во првата половина следната година да можеме да ги возиме првите 10 километри од автопатот Прилеп-Битола. Напредува реализацијата на автопатот Тетово-Гостивар-Букојчани и  до крајот на годината ќе почнат градежните работи на автопатот Букојчани, поврзување со таканаречениот автопат Кичево- Охрид- рече тој.

Мицкоски откри и дека после многу децении, македонска компанија добила проект да гради автопат, а тоа е делницата Блаце – Скопје.

-Во август месец почнуваме со Блаце-Скопје. Градежната компанија „Гранит”, после не знам колку децении македонска градежна компанија добива да гради автопат во Македонија финансирано од европски заемодаватели – рече премиерот Мицкоски.

The post СО РЕБАЛАНСОТ НА БУЏЕТОТ КАПИТАЛНИТЕ ИНВЕСТИЦИИ СЕ ЗГОЛЕМУВААТ НА 763 МИЛИОНИ ЕВРА Мицкоски најави и дека во август продолжува изградбата на автопатот Скопје-Блаце appeared first on plusinfo.mk.

Министрствата за животна средина и за транспорт и врски ќе добијат најмногу пари за капитални расходи со ребалансот на буџетот за годинава. Пари ќе добие и државната изборна комисија, но и министерствата за образование и за здравство.

Ова го соопшти министерката за финансии Гордана Димитриеска Кочоска образложувајќи ги проекциите од ребалансираниот буџет кои денеска се прифатени од Владата.

-Министерството за животна средина ќе добие 2,3 милијарди денари за капитални расходи од кои 1 милијарда денари се пари од сметката на Министерството од кредити и од други приходи. Транспорт ќе добие 1,4 милијарди денари бидејќи поради силната реализација на проектите ова Министерство веќе нема пари на сметката за капитални расходи. Пари ќе добие и Министството за образование во износ од 426 милиони денари како и Државната изборна комисија која побара повеќе ,а доби 200 милиони денари дополнителни средства за инвестиции за обнова на инвентар и опрема. Дополнителни средства ќе добијат и други институции но во помал износ – рече Димитриеса Кочоска.

Таа појасни дека за разлика од Буџетот со ребалансот расходниот дел од буџетот се зголемува за околу 179 милиони евра од кои за капитални инвестиции има дополнителни 100 милиони евра.

Димитриеска –Кочоска појасни и дека нема да се зголеми процентот на буџетскиот дефицит во БДП и тој ќе остане 4,1%, а дел од парите ги добиваат државните институции со ребалнсираниот буџет се добиени од  нивните сметки создадени од  очекуваните донации и како резултат на неданочни приходи каде што според проценките на министерката се чуваат повеќе од 10 милиони денари.

– Особено значајно е што со ребалансот се обезбедуваат дополнителни средства за капитални инвестиции. Капиталните расходи достигнуваат околу 46 милијарди денари и се зголемуваат за околу 5,8 милијарди денари или за 14,5 проценти во однос на иницијалниот Буџет. Не зборуваме за дефицит кој финансира тековна потрошувачка, туку за дефицит кој финансира развој – рече Димитриеска-Кочоска.

Димитриеска-Кочоска информира и дека зголемување на расходите ќе има и за плати ставка која е зголемена за 1,1 милијарда денари.

Со овој ребаланс вкупните приходите остануваат во рамки на проектираното односно се ревидираат од  374,9 милијарди денари на 379,2 милијарди денари. Вкупните расходи се ревидираат на 425,2 милијарди денари,

-Дополнителните средства се насочуваат кон јасно утврдени приоритети – обезбедување средства за земјоделски субвенции, поддршка на железничкиот сообраќај, спортот, студентскиот и ученичкиот стандард, како и дополнителна поддршка за најранливите категории граѓани преку социјалните надоместоци, народните кујни и мерките за деинституционализација- рече Димитриеска -Кочоска.

Дефицитот се зголемува од 39,2 милијарди денари на 46,1 милијарда денари. За првпат, како што рече министерката, зголемувањето на дефицитот е резултат пред сè на повисоките капитални расходи и инвестициите во инфраструктурата.

Буџетскиот дефицит и обврските за отплата на долг во вкупен износ од 76,4 милијарди денари ќе се финансираат преку комбинација на домашно и странско задолжување. Притоа, над 54 милијарди денари се наменети за редовно сервисирање на обврските кон странските кредитори, а околу 20 милијарди денари за отплата на домашниот долг.

The post МИНИСТЕРСТВАТА ЗА ЖИВОТНА СРЕДИНА И ЗА ТРАНСПОРТ ЌЕ ДОБИЈАТ НАЈМНОГУ ПАРИ ОД РЕБАЛАНСИРАНИОТ БУЏЕТ Дмитриеска-Кочоска информира дека најголем дел од парите ќе бидат потрошени за инвестиции appeared first on plusinfo.mk.

Ребалансот на Буџетот ќе се  разгледува утре на седница на Владата, најави министерката за финансии Гордана Димитриеска Кочоска, споделувајќи дека ќе има нагорна корекција на буџетскиот дефицит поради зголемените потреби за финансирање на капитални инвестиции.

– Планот е утре на редовна владина седница да се разгледува ребалансот на Буџетот. Она што во овој момент можам да го кажам е дека ќе имаме одредена корекција на буџетскиот дефицит нагоре и првпат ќе имаме зголемување на буџетски дефицит како резултат на зголемени потреби за финансирање на капиталните расходи, односно за капиталните инвестиции, што мислам дека согласно Законот за буџети ги оправдува состојбите. А и во исто време имаме одредени корекции, на приходната страна во делот на акцизата заради мерките кои ги имавме во изминатиот период – изјави Димитреска Кочоска, на новинарско прашање.

Генерално, појасни министерката за  финансии, има зголемување на капиталните расходи за инфраструктура.

-Имаме, зголемени капитални расходи во делот на Министерството за животна средина, имаме околу одредени ИПА проекти, имаме зголемување за АА програмата, така што утре во детали ќе информираме точно која институција колку дополнителни средства има за капиталните расходи – рече Димитриеска Кочоска.

Прашана колку чинеа мерките за намалување на ДДВ-то и акцизите што траеја во изминатиот период, министерката рече дека акцизата треба да се коригира за околу 1,5 милијарди денари.

– Многу е тешко да се направат прецизни пресметки затоа што има и индиректни ефекти. Нашите пресметки покажаа дека некаде една и пол милијарда денари треба да ја коригираме акцизата. Но, мора да бидеме внимателни, затоа велам тешко е да се направат проекциите. Не заборавајте, во изминатиот период ја имавме најниската цена на нафтата во регионот. Се сеќавате дека редици автомобили со странски таблици точеа бензин во Македонија, што значи дека и покрај тој позитивен ефект намалуваме 1,5 милијарда. Кога не би било купувањето од странските лица сигурно негативниот ефект би бил поголем, односно тоа е она што Владата го даде како поддршка на граѓаните и стопанството – рече Димитриеска Кочоска, која е домаќин на Годишниот состанок на Управниот одбор на Центарот за извонредност во финансиите – ЦЕФ (2026 Annual Meeting of the CEF Governing Board).

The post СЕ ЗГОЛЕМУВА БУЏЕТСКИОТ ДЕФИЦИТ ЗА ДА СЕ ФИНАНСИРААТ КАПИТАЛНИ ПРОЕКТИ Владата ќе даде мислење за предложениот ребаланс на буџетот appeared first on plusinfo.mk.