Германските истражители пронашле трет дрон во близина на аеродромот Лајпциг-Хале, а откритието дополнително ја зголеми загриженоста дека обидот за напад на почетокот на август можеби бил посериозен отколку што првично се претпоставуваше.

Третиот дрон бил пронајден на 14 август во поле во близина на западниот дел од аеродромот. Еден ден подоцна, истражителите таму откриле и непозната супстанција.

Според првичните анализи, станува збор за околу 50 грама РДХ, високоексплозивна материја која се користи во воени цели.

Случајот започнал на 4 август, кога во близина на украински товарен авион „Антонов“ бил пронајден првиот дрон. Според досегашните сознанија, тој бил опремен со експлозив и можел да биде наменет за напад врз авионот.

Нападот, сепак, не бил извршен бидејќи детонаторот, според истрагата, не функционирал.

Германските власти претходно се сомневаа дека уште еден дрон можеби се судрил со товарен авион на „ДХЛ“. Авионот морал да го прекине слетувањето поради затворањето на аеродромот. Вториот дрон досега не е пронајден, ниту се откриени негови остатоци.

Пронаоѓањето на третиот дрон сега отвора нови прашања за тоа колку беспилотни летала биле употребени и кој стои зад нивното испраќање.

Сојузното обвинителство на Германија претходно го опиша случајот како „сериозен напад врз германската транспортна и логистичка инфраструктура“.

Германскиот министер за внатрешни работи Александер Добринт изјави дека случајот со Лајпциг не треба да се гледа како изолиран инцидент, туку како дел од поширока структура со која се соочуваат германските власти.

Тој не ја исклучи ниту можноста зад ваквите активности да стојат странски сили.

Аеродромот Лајпциг-Хале има особено значење бидејќи претставува важен логистички центар, вклучително и за транспорт на воена помош за Украина.

Истрагата продолжува, а германските власти се обидуваат да утврдат дали трите дрона биле дел од координирана операција и која била нивната крајна цел.

The post ТРЕТ ДРОН СО ЕКСПЛОЗИВИ ПРОНАЈДЕН КАЈ АЕРОДРОМОТ ВО ЛАЈПЦИГ Германските власти стравуваат дека ова не е случаен инцидент appeared first on plusinfo.mk.