Времето утре ќе биде сончево и многу топло, со мала до умерена локална облачност, најавува Управата за хидрометеоролошки работи. Ќе дува слаб до умерен ветер од јужен правец. Во Скопје, сончево и многу топло со слаб до умерен ветер од јужен правец.

И за утре УХМР издаде црвен аларм за екстремно топло време. Во препредувањето се наведува дека дневната температура во некои градови ќе стигне до 43 степени Целзиусови. Ова се однесува најмногу на Скопскиот, Вардарскиот и на Југоисточниот регион. Над 40 степени утре ќе биде во Скопје, Велес, Штип, Струмица, Демир Капија и во Гевгелија.

Денеска е измерена највисока температура од 43,1 степени, во Гевгелија. Ова е досега највисоката измерена температура ова лето.

Екстремно жешко беше и во Демир Капија со 42,8 и во Велес со 42,7 степени, како и во Скопје со 41,9 и во Кавадарви со максимална температура од 41,6. Во Струмица беша измерени 40,7, а во Штип 40,4 степени Целзиусови.

На горештините им се гледа крај, но дури од недела, кога се очекува промена на временската состојба и мало разладување. Во попладневните часови ќе има услови за локална појава на нестабилност, со пороен дожд и со грмежи. Ветерот ќе го промени правецот во северен, а дневната температурата ќе биде во опаѓање.

Алармите за предупредување на населението од временски непогоди се издаваат во жолта, портокалова и во црвена боја и се дел од системот за метеопредупредувања во Европа. Жолт аларм значи умерена опасност од временските прилики, со можност за умерени последици по околината, портокалов значи дека опасноста е голема, а црвениот аларм предупредува за екстремна опасност, со можност за катастрофални последици по луѓето, нивните имоти и по околината.

Алармите се издаваат за различни временски прилики и појави: за ветер, дожд, горештина, студ, снег, мраз, грмотевици, крајбрежни настани, шумски пожари, лавини, поплави, порои, опасности на море и за суша.

The post ГЕВГЕЛИЈА СЕ ИСПЕЧЕ НА 43,1 СТЕПЕН Екстремна топлина и врел ветер се очекуваат во Скопје, Велес и во Демир Капија appeared first on plusinfo.mk.

Иако имало почетни обиди уште во 19 век, во 1902 година американскиот пронаоѓач Вилис Кериер (Willis Carrier) го инсталирал првиот систем за климатизација и ја формирал фирмата Carrier која постои и денес и една од најголемите во светот во оваа област. Набргу се појавиле индивидуални клима уреди во моноблок изведба (т.н. прозорски климатизери) како и разни системи за централна климатизација. Повозрасните граѓани се сеќаваат дека првите индивидуални клима уреди во Македонија беа моноблок единици и беа со релативно висока цена. Првиот клима уред во сплит (разделена) изведба го има пласирано на пазарот фирмата Тошиба (Toshiba), а во Македонија се појавува по 1985 година со многу висока цена. Денес кога ќе се спомне клима уред се мисли на сплит систем, а цената е неколку пати пониска од порано. Паралелно со индивидуалните клима уреди, во Македонја се вградуваа(т) и централни системи за климатизација кај поголеми објекти од јавен и комерцијален карактер.

Многу е важна одлуката за тоа каков систем за климатизација да се одбере. Тоа треба да се направи уште во фаза на проектирање на објектот, а не по завршување на неговата изградба. Исто така, треба истовремено да се разгледува и системот за греење. Ова е особено важно бидејќи денес сите клима уреди и ладилни машини може да служат и за ладење и за греење (режим на топлинска пумпа). Изборот на опремата треба да се прави според направени пресметки на топлински добивки на просториите бидејќи денес има згради со повисока енергетска класа така што ладилниот капацитет кај нив може да биде два или повеќе пати помал за иста квадратура. Дури и при избор на индивидуален клима уред пожелно е да биде консултирано стручно лице или да се направи контакт со специјализирана фирма. Голем број граѓани и фирми не се запознаени со можните опции при избор на систем за климатизација.

Каков систем за климатизација да се одбере најмногу зависи од намената на објектот, неговата големина, цената на опремата и др. Наједноставен и најефтин е клима уредот во сплит изведба, а тоа е и најраспространетиот тип. Најчесто се монтира еден ваков клима уред за секоја просторија. Ако се работи за објект со две или повеќе простории, тогаш не треба да се ставаат посебни клима уреди за секоја просторија, туку може еден систем кој се состои од една заедничка надворешна единица и соодветен број внатрешни единици. За поголем објект со повеќе простории има опција за централен систем со индиректно ладење (и греење) каде што има ладилна машина за ладење вода (или антифриз), во пракса наречена „чилер“, која со помош на пумпа и низ цевководна мрежа циркулира во вентилаторски конвектори (фен-коил единици) во просториите. Кај овие системи постои можност за добивање на санитарна топла вода со многу помала потрошувачка на електрична енергија отколку со класичен електричен бојлер.

За простории во кои престојуваат поголем број на лица потребно е доведување на свеж воздух кој се подготвува во т.н. клима-комори во кои се врши филтрирање, ладење (или греење) и влажење (во зима). Потоа, со каналски развод воздухот се уфрлува во просториите преку соодветни решетки.

За објект со поголем број на простории, може да се користи и централен VRF систем. Тој се состои од една надворешна единица и неколку десетици внатрешни единици, а сите се поврзани со цевки во кои струи специјален ладилен флуид (наречен фреон во минатото).

Во нашата земја, но и во регионот, често гледаме слики на згради каде на фасадите се монтирани голем број клима уреди и тоа за секоја просторија одделно. Како примери кај нас ќе ги наведам зградите на Министерството за труд и социјални работи, МОН (порано „Нова Македонија“), Народна банка на РМ и др. Ова е погрешен концепт, а изгледот со „струпки“ на фасадата треба да се избегнува, и има решенија како тоа да се направи. Затоа, треба да се донесат и некакви прописи, а и архитектите не треба да го дозволуваат тоа.

На крај како дополнение на одговорот на прашањето од насловот да кажам дека тоа не се решава со методот „плукни и залепи“ или со ставање сплит клима уреди купени од продавници за широка потрошувачка и монтажа од било кој. Се работи за комплексна проблематика. За наоѓање на соодветно решение, како и за изведување на современ систем за климатизација (и греење) се препорачува контакт со специјализирана фирма која може да дава консултации, да прави проектирање, да врши испорака на опрема, монтажа, сервисирање, обезбедени резервни делови и сл.

The post Каков систем за климатизација да се одбере? appeared first on plusinfo.mk.

Во Скопје денеска ќе биде сончево и многу топло со мала локална облачност. Минималната температура ќе се спушти до 19, а максималната ќе достигне до 40 степени.

Во наредните денови ќе продолжи периодот на сончево и многу топло време со дневна температура која насекаде ќе биде над 30°C, а наместа ќе надминува 40°C поради што до крајот на следната работна седмица ќе биде активирано портокалово ниво за опасност од високи температури.

Во недела во попладневните часови во западните делови ќе има локална појава на пороен дожд и грмежи.

The post 42 СТЕПЕНИ ПОД СЕНКА И денеска ужасно топло appeared first on plusinfo.mk.

Високите температури ги загрозуваат здравјето и животите на многу милиони луѓе, и затоа тие тогаш ги вклучуваат своите клима уреди (оние што ги имаат). Притоа се троши електрична енергија, а електричните мрежи се оптоваруваат, некогаш до максимум.

Рекордно високите температури ја поттикнуваат побарувачката (купувањето) на опрема за климатизација, а со тоа се зголемува потрошувачката на електрична енергија. Бидејќи поголемиот дел од електричната енергија се произведува со согорување на фосилни горива, како последица на тоа се зголемуваат емисиите на стакленички гасови кои го прават светот уште пожежок со што се создава еден вид на маѓепсан круг.

Побарувачката за клима уреди најбргу се зголемува во земјите во развој каде што мал број на домаќинства поседуваат такви уреди. Според Меѓународната агенција за енергија (IEA) во САД и Јапонија повеќе од 90% од домаќинствата имаат клима уреди, додека во Југоисточна Азија само 15%. Тој број е околу 5% во Индија и Африка. Во најжешките делови на светот живеат околу 2,8 милијарди луѓе, а само 10% од нив имаат пристап до клима уред или други опции за ладење во своите домови.

Кога расте потребата за ладење, зголемената употреба на клима уредите го оптоварува електроенергетскиот систем во земјата. Во екстремни случаи може да дојде до преоптоварување и „пад“ на системот.

Ладењето претставува околу 10% од светската потрошувачка на електрична енергија, но тоа не се одвива рамномерно во светот. Во потоплите земји, тоа може да доведе до зголемена потрошувачка на електрична енергија за повеќе од 50% во текот на летото. Во најжешките региони, капацитетот на мрежата треба да покрие скоро двојно зголемување на потрошувачката на електрична енергија во споредба со поблагите месеци.

Одвреме навреме се случуваат глобални енергетски кризи при што се покачува цената на електричната енергија, а тоа се одразува на џебот на корисниците на клима уредите при плаќањето на сметките за потрошена ел. енергија. На големината на тие сметки влијае и квалитетот на клима уредите, најмногу изразен преку нивната енергетска ефикасност. Во многу земји, вклучувајќи ја и РМ, се донесени прописи за задолжителна ознака на апаратите што трошат ел. енергија. Воведени се енергетски класи (А+, А, В, …, F) каде што А+ е најдобра. Веројатно уредите со најдобра класа се поскапи, но по 2 до 3 години разликата во пари се враќа заради помала потрошувачка на енергија. Во ЕУ и САД при производството на клима уредите мора да се применуваат задолжителни стандарди за минимални енергетски карактеристики.

Во контекст на енергетската ефикасност треба да се истакне значењето на истата кај изградбата на становите (зградите) така што тие треба да имаат добра топлинска изолација на ѕидовите и квалитетни прозорци. На тој начин драстично се намалува потребниот ладилен капацитет на просториите, а со тоа и цената на клима уредот и неговата потрошувачка на ел. енергија. Затоа, при изборот на системот за ладење треба да се направи консултација со стручно лице, а купувањето на опремата е пожелно да биде од специјализирана продавница.

Намалувањето на потребниот капацитет за ладење ја намалува електричната моќност на клима уредите, а со тоа се олеснува оптоварувањето на електричната мрежа, односно има услови за постабилен електроенергетски систем на локално ниво и вкупно во земјата.

Во клима уредите се користат специјални ладилни флуиди, како што се флуоројаглеводородите (HFC) наречени и F-гасови. Тие се моќни стакленички гасови кои исто така придонесуваат за глобалното затоплување на планетата. Веќе неколку децении полека се воведуваат алтернативни флуиди со помал потенцијал на глобално загревање.

Во летниот период во градовите се јавува и т.н. урбан топлински остров како последица на поголеми површини од асфалт и бетон (познато и како бетонизација) кои се загреваат од сончевото зрачење, а потоа тие вршат дополнително топлинско зрачење на непосредната околина. На ова треба да се додаде и топлината што клима уредите ја предаваат на околниот воздух. Заради ова, температурата во одредени делови од градот (во топлинските острови) е за неколку степени целзиусови повисока отколку во околината каде што претежно има зеленило.

Пред неколку децении во РМ имаше мал број на инсталирани клима уреди. Но во последниве години нивниот број рапидно се зголемува така што при големи горештини преку лето потрошувачката на електрична енергија е многу зголемена. Во РМ потребите за електрична енергија вообичаено се поголеми во зимскиот период, но кога има горештини потребите се големи и во летниот период.

На крај кратко да резимирам: при повисоки надворешни температури се зголемуваат потребите за ладење на просториите, а тоа предизвикува поголемо глобално загревање, станува пожешко. А за да се намали тоа влијание потребен е посебен приод од повеќе аспекти: мерки на меѓународно и национално ниво, паметна урбанизација, зголемување на енергетската ефикасност на зградите и опремата за ладење, обука на стручни лица, соодветни информации кон граѓаните итн.

The post Колку повеќе ладиме, станува уште пожешко на планетата Земја appeared first on plusinfo.mk.

Сончево и многу топло време со мала локална облачност, најавуваат метереолозите за денеска. Ќе дува слаб до умерен ветер од јужен правец, кој долж Повардарието повремено ќе засилува. УВ факторот ќе биде 9.

Најтопло ќе биде во Гевгелија и Демир Капија каде се очекува температурата денеска да достигне до 40 степени.

Во Скопје ќе биде сончево и многу топло со умерен ветер од југоисточен правец и со максимална температура од 39 степени.

До сабота ќе се задржи многу топло време со натпросечна температура и со умерен, а во сабота засилен јужен ветер. Под влијание на атмосферски фронт во сабота попладне и во ноќните часови ќе биде нестабилно со пороен дожд и грмежи, наместа во форма на невреме со интензивен дожд за кратко време (над 20 л/м2 за 6 часа), силен ветер, поинтензивни електрични празнења и услови за појава на град, предупредуваат од УХМР.

The post ПРЕД ВИКЕНД НА 40 СТЕПЕНИ, ЗА ВИКЕНД РАЗЛАДУВАЊЕ Времето денеска сончево и многу топло appeared first on plusinfo.mk.

Идеалната собна температура за спиење е помеѓу 19-21°С. Ноќната облека, односно постелнината, прекривките и пижамите помагаат да се создаде микроклима околу нашата кожа која ја одржува оваа идеална температура. Затоа, ако прекривката со јорган е премногу, може да се претпочита тенок чаршаф за подобар ноќен сон. Изберете широка и памучна облека.

Отворањето на прозорците може да помогне ако дува благо ветре (доколку има соодветна заштита од инсекти), но надворешната бучава понекогаш може да биде негативен фактор за квалитетен сон. Пред спиење туширајте се со млако или ладно туширање или мијте ги Вашите раце, нозе, лице и врат за полека да ја намалите телесната температура.

Избегнувајте алкохол, кофеин и зачинета храна навечер – тие ја зголемуваат температурата на вашето тело и дирузеата (мокрењето). Следствено, почестото будење носи понеквалитетен сон и ќе бидете недоволно спремни за утрешниот топол ден.

Испијте најмалку една чаша вода пред спиење и чувајте во Ваша близина вода во текот на ноќта. Редовно информирајте се за топлотните бранови.

Идеална собна температура денски е 21°С, а во ноќта 18°С. Но во период на топлотни бранови најдобро е собната температура да се одржува на околу 25°С.

За разладување на внатрешни простории треба добро да се процени пред да ги отворите  прозорците на вашиот дом. Ако температурата надвор е повисока отколку внатре, може да изгубите релативно поладно засолниште. Наместо тоа, во периодот од 10 до 17 часот цврсто затворете ги прозорците и завесите, надворешните или внатрешните ролетни во просториите свртени кон сонце. По потреба, може да се користат чаршафи или крпи.

Отворете ги прозорците кога воздухот се чувствува поладен надвор отколку внатре.

Употребата на електричните уреди создава топлина. Исклучете ги грејните тела, како и електричната опрема и светлата што не се во употреба.

Електричните вентилатори можат да помогнат, но само ако температурата е под 35°С. Можете да ја разладите просторијата без вентилатор следејќи ги другите совети.

Температурата на климата не треба да биде наместена под 7°С од надворешната. Пример: Ако е надвор 35°С, клима уредот максимум треба да ви биде наместен на 28°С.

За поголема ефикасност и економичност на ладењето, изладете една или две соби наместо цела куќа.

Гответе во поладно време од денот. Употребата на ринглата и рерната да биде колку што е можно пократко време, а пред и после употреба да следи соодветна аклиматизација на просторијата каде се употребувале тие.

Дрвјата се одличен начин да се одржуваат градовите ладни, па дури и едно дрво на улица или градина дава мерливи придобивки. Размислете и за садење дрвја со семејството или соседите чии позитивни придобивки ќе ги почувствувате вие и идните генерации. Особено поволен ефект за ладењето даваат дрвјата со голема крошна.

The post КАКО ДА СЕ БУДИТЕ ОДМОРЕНИ НА ВАКВИ ТЕМПЕРАТУРИ? Совети за спиење и за разладување на домот appeared first on plusinfo.mk.

Вработените во Зоолошката вложуваат максимални напори во обидот да ги разладат.

Топлотниот бран и температурите кои достигнаа над 40 степени ја внесоа земјава во портокалова фаза, па спасот послесно да се надмине „пеколот“, покрај луѓето, го посакуваат и жителите на Зоолошката градина во Скопје.

Секогаш кога стрелката на термостатот ќе ја надмине нормалната температура, зоо-негувателите им овозможуваат на своите крзнени пријателчиња да го добијат потребното освежување.

Од ЗОО Скопје за Плусинфо велат дека секогаш во најтоплите денови, по препорака на биолог и во согласност со нивната табличка за исхрана, се прават сладоледи за разладување на животните.

– Морските лавови добиваат замрзнати „десерти“ со папалина и сардина, нивните омилени риби. Нилскиот коњ, слоновите, макаки мајмуните добиваат разладени лубеници, а овошни сладоледи добиваат и лемурите, патасите, шимпанзата, капуцинерите. За големите мачки- тигрите, лавовите се подготвуваат сладоледи од месо – нѐ информираа од Зоолошка.

Оттаму додаваат дека покрај исхраната, се внимава животните постојано да се на сенка или во климатизирани простории, да имаат целодневно свежа вода, како за пиење, така и за капење.

– Во повеќето живеалишта има базени, а животните ги разладуваме и со црево. Најмногу во оваа активност уживаат слоновите и мечките – велат од ЗОО Скопје.

И наредните денови зоо-негувателите ќе имаат полни раце работа бидејќи Управата за хидрометеоролошки работи (УХМР) прогнозира дека топлото време ќе се задржи и во текот на следните денови, а на целата територија на државата в четврток и в петок ќе биде активно портокалово ниво на опасност од високи температури.

The post (ФОТО+ВИДЕО) ОВОШЕН СЛАДОЛЕД ЗА ЛЕМУРИТЕ, ЛУБЕНИЦА ЗА НИЛСКИОТ КОЊ Еве како се разладуваат животните во скопската Зоолошка градина appeared first on plusinfo.mk.

При високите дневни температури и силна сончева енергија, лекарите ги советуваат луѓето да го ограничат своето време надвор. Сепак, неретко во домот е потопло отколку надвор. Следат неколку совети за тоа.

Погрешни и вистински бои

Говорејќи за надворешноста на куќата, Гудел Дејвид, стручњак за домови и основач на компанијата за бојадиување „Пејнтс акрилик“ (Paints Acrylic) советува да се избегнуваат каква било потемна боја за надворешните ѕидови од куќата.

– Темните бои апсорбираат повеќе топлина отколку светлите бои, така што ако ја обоите надворешноста на Вашата куќа во темна боја, многу веројатно е оти ќе се чувствувате потопло внатре. Наместо тоа, се препорачува посветла или рефлектирачка боја за надворешноста на Вашиот дом – како бела, беж или сива – објаснува тој.

Апарати кои произведуваат топлина

Многу од секојдневните активности во домаќинството создаваат повеќе топлина. Тука спаѓаат готвење, сушење алишта, па дури и вклучување на машината за миење садови. Се разбира, не треба да се престане со тие работи, но познавачите едноставно предлагаат да не се користат тие уреди во најжешките делови од денот. Оваа промена може да направи забележителна разлика во вкупната температура дома.

Премногу сончева светлина

Многумина претпочитаат повеќе природна светлина во секојдневниот простор, особено во долгите летни денови, но и тука не треба да се претера.

И прекумерната сончева светлина создава потопла средина во домот. Препораките, секако, говорат за завеси и ролетни за заштита од Сонцето. Како и топлината, така и сончевата светлина треба да се зачува ограничена.

Несоодветна изолација

Уште една честа грешка што придонесува за дополнителна топлина во просторот за домување, е лошата изолација. Том Алан, стручњак за греење, водовод и апарати смета дека сопствениците на куќи треба да додадат изолационен материјал на ѕидовите, покривот и прозорците.

– Но, тоа мора да се направи стручно. Најдобро е да се консултирате со професионалец, за да ги одредите најдобрите можности за изолација за Вашиот дом – забележува тој.

Прениска температурата во разладувањето на домот

Логично е да се претпостави дека поставувањето на температурата на термометарот на клима-уредот на што пониско ниво – ќе доведе до побрзо ладење на домот… Тоа е огромна заблуда, според стручњаците. Тоа само прави клима-уредот да работи со поголема сила и подолго, зголемувајќи ги температурите и трошоците за енергија.

The post ГОТВЕТЕ НАВЕЧЕР, СПУШТЕТЕ РОЛЕТНИ Неколку совети со кои ќе добиете посвеж дом во текот на летото appeared first on plusinfo.mk.

Во пресрет на летото и најавените екстремно високи температури, од Град Скопје информираат дека граѓаните немаат потреба од грижа, затоа што речиси сите чешми и фонтани од кои тече питка вода, а се во централното градско подрачје и се во функција, ќе можат да се разладат.

– На територијата на Град Скопје има повеќе од 250 чешми за пиење вода од кои 77 се нови, поставени близу детски игралишта, паркови и на останати јавни места каде има поголема фреквенција на граѓани – нè информираа градските служби.

Оттаму додаваат дека согласно Договорот за кризна состојба кој Градот Скопје го има со Црвениот крст при екстремно високи температури, предвидени се мобилни тимови (од 5 до 7 тима) на пунктови кои ќе делат вода за пиење, ќе вршат мерење на крвен притисок и ќе нудат соодветна помош за граѓаните.

– Овие пунктови ќе бидат поставени на јавни места како автобуски постојки и во близина на болници или пазари, каде има поголема фреквенција на граѓани. Од страна на Црвениот крст предвидено е да се врши транспорт на граѓани поради изнемоштеност, пакети за ранливи категории граѓани, а дополнително пунктовите за бездомници ќе бидат приспособени на потребите од топлото време – велат од Град Скопје.

Службите на Градот ја следат состојбата со најавените високи температури и ќе дејствуваат согласно препораките на надлежните институции.

Како што веќе пишувавме, поради најавените високи температури за време на летните месеци, здравствените власти ги предупредуваат граѓаните да бидат внимателни.

Раководителката на Итната медицинска помош (ИМП) при Здравствен дом Скопје, д-р Милица Бубало, вели дека во периодот што следи не очекува зголемена работа и истовремено ги советува граѓаните на што да посветат внимание.

– Искрено сметам дека граѓаните добро ги знаат препораките на здравствените служби кога станува збор за заштита од топлото време, ги почитуваат и ќе ги почитуваат. Поради тоа не очекуваме зголемена работа за овој период. Нормално дека ќе има случаи каде што ќе треба да интервенираме, но се надеваме дека ќе бидат во помал број – вели д-р Бубало.

Раководителката на ИМП апелира до граѓаните при топло време да не излегуваат во периодот од 11 до 17 часот, да носат светла и лесна памучна облека, да носат шапка на главата и очила, како и да го заштитат тилот, да консумираат доволно количество течности, кои нема да бидат ни премногу ладни, ни премногу топли, да консумираат свежо приготвена храна и да избегнуваат алкохолни пијалаци и тешка храна.

Од Управата за хидрометеоролошки работи пред официјалниот старт на летото информираа дека нè чека многу топло време во трите претстојни месеци, а за кога се очекува надминување на просечните температури дури и до 3 степени, а најголемо отстапување се очекува во јули.

– За територијата на Република Северна Македонија постои голема веројатност за надминување на температурите од многугодишните просечни вредности. Надминувањето на температурите е предвидено дека може да достигне и до 3 степени Целзиусови, речиси на целата територија. Најголемото позитивно отстапување на температурата на воздухот за оваа сезона се очекува да биде во јули – велат од УХМР.

The post МОЖЕ ДА СЕ РАЗЛАДИТЕ НА 250 ЧЕШМИЧКИ НИЗ СКОПЈЕ Тимовите на Црвениот крст на готовс пред горештините appeared first on plusinfo.mk.

Денеска во 11:13 часот пристигна астрономското лето, кое уште на почетокот ни донесе многу сонце и високи температури, па поради тоа здравствените власти ги предупредуваат граѓаните да бидат внимателни.

Раководителот на Итната медицинска помош (ИМП) при Здравствен дом Скопје, д-р Милица Бубало, вели дека во  периодот што следи не очекуваат зголемена работа, и истовремено ги советува граѓаните на што да посветат внимание.

– Искрено сметам дека граѓаните добро ги знаат препораките на здравствените служби кога станува збор за заштита од топлото време, ги почитуваат и ќе ги почитуваат. Поради тоа не очекуваме зголемена работа за овој период. Нормално дека ќе има случаи каде што ќе треба да интервенираме, но се надеваме дека ќе бидат во помал број – вели д-р Бубало.

Раководителката на ИМП апелира до граѓаните при топло време да не излегуваат во периодот од 11 до 17 часот, да носат светла и лесна памучна облека, да носат шапка на главата и очила, како и да го заштитат тилот, да консумираат доволно количество течности, кои нема да бидат ни премногу ладни, ни премногу топли, да консумираат свежо приготвена храна и да избегнуваат алкохолни пијалаци и тешка храна.

– Ниту еден организам не може да издржи прекумерна топлина, особено кога има физичка активност, па затоа треба и младите и возрасните многу да внимаваат. Поради поголема изложеност на високи температури може да се јават секакви симптоми, затоа граѓаните доколку почувствуват нешто што не е вообичаено на нивното секојдневно однесување на телото, да се јават на 194 или кај матичните лекари – вели д-р Бубало.

Според неа, истото важи и за хронично болните, посебно тие со срцеви, невролошки и белодробни болести, потребно е да бидат посебно дисциплинирани во однос на овие препораки и редовно да ја земаат својата терапија. За сите промени во здравствената состојба задолжително да го консултираат својот матичен лекар.

Како што претходно нè информираа од Управата за хидрометеоролошки работи, нè чека многу топло време ова лето со надминување на просечните температури дури и до 3 степени, а најголемо отстапување се очекува во јули, велат од Управата за хидрометеоролошки работи (УХМР).

– За територијата на Република Северна Македонија постои голема веројатност за надминување на температурите од многугодишните просечни вредности. Надминувањето на температурите е предвидено дека може да достигне и до 3 степени Целзиусови, речиси на целата територија. Најголемото позитивно отстапување на температурата на воздухот за оваа сезона се очекува да биде во јули – велат од УХРМ.

Според анализите, за целиот југоисточен регион на Европа се предвидува летните температури да достигнат натпросечни вредности, а тоа важи и за нашата земја.

Вообичаено при зголемени натпросечни температури Министерството за здравство дава препорака да се ослободат од работни обврски бремените жени и лицата на возраст над 60 години. Доколку и натаму температурата расте на работодавците им се препорачува адекватна вентилација и по можност климатизација во затворен работен простор, да не работат на отворено за време на најтоплиот период од денот, односно од 11 до 17 часот, промени во организацијата на работниот процес (воведување двосменска работа), обезбедување засолништа каде вработените можат да се разладуваат одреден период во текот на работата, почести паузи во текот на работата и консумирање течности, работната облека да биде од лесна порозна ткаенина, а при работа на отворен простор да се носат очила и капи, како и предупредување за зголемени опасности од несреќа при работа (пожари).

The post ДОЈДЕ ЛЕТОТО, А СО НЕГО И „ПЕКОЛОТ“ Како најлесно да се справите со високите температури? appeared first on plusinfo.mk.