Самото учество во групната фаза на Конференциската лига за Шкендија значи загарантирани 3,2 милиони евра – сериозна финансиска инјекција за клубот.

Дополнително, секоја победа во групите ќе биде наградена со 400.000 евра, а нерешен резултат со 133.000 евра, што ја прави европската авантура далеку повредна од спортска перспектива.

Иако македонскиот првак синоќа беше елиминиран од Лига Европа, по поразот на гостувањето кај Лудогорец во Разград со 4:1 по продолженија и вкупни 5:3, клубот од Тетово сепак ја обезбеди европската есен преку Конференциската лига.

Реваншот Шкендија го отвори несигурно, што бугарскиот тим знаеше да го искористи. Куртулус во 9. минута го отвори резултатот, а Чочев во 24. веќе ја надополни предноста. Со тоа беше избришана минималната добивка на тетовци од првиот меч во Скопје (2:1).

Тетовскиот тим во вториот дел заигра поофанзивно и со голот на Тамба во 64. минута избори продолженија. Но таму, Лудогорец повторно наметна темпо. Текпетеј во 98. минута донесе водство, а Бајл во судиското продолжение на второто продолжение стави крај на надежите на Шкендија за Лига Европа.

И покрај елиминацијата, клубот ја исполни главната цел – европска групна фаза и милионска заработка. Противниците во Конференциската лига ќе бидат познати денеска на ждрепката во Монако.

Извлекувањето ќе почне во 13:00 часот по средно европско време.

Шкендија ќе игра против шест ривали, три дома и три на гости.

Финалето на Лигата на Европа е на стадионот Бешикташ во Истанбул, додека финалниот натпревар од Конференциската лига ќе се игра на „Ред Бул Арена“ во Лајпциг.

УЧЕСНИЦИ ВО ЛИГАТА НА КОНФЕРЕНЦИЈАТА: Фиорентина, АЗ Алкмар, Шахтјор, Слован Братислава, Рапид Виена, Легија Варшава, Спарта Прага, Динамо Киев, Кристал Палас, Лех Познан, Рајо Ваљекано, Шамрок Роверс, Омонија, Мајнц, Целје, Риека, Зрињски, Линколн, КуПС, АЕК Атина, Абердин, Дрита, Брејдаблик, Сигма Оломуц, Самсунспор, Раков, АЕК Ларнака, Шкендија, Хакен, Лозана, Универзитатеа Крајова, Хамрун, Ноа, Шелбурн.

The post ПОРАЗ ВО РАЗГРАД, УТЕХА НА СМЕТКА Шкендија плива во пари, а заработката допрва ќе расте appeared first on plusinfo.mk.