Премиерот Христијан Мицкоски во интервју за емисијата „Објектив“ на Македонската телевизија ги отфрли обвинувањата дека најновиот договор со Обединетото Кралство ќе го зголеми државниот долг. Напротив, тој увери дека долгот е намален и дека државата се раздолжува.

– Македонија не е ништо задолжена, туку напротив, ако ги гледате податоците, долгот е намален – рече Мицкоски, одговарајќи на критиките за новите заеми поврзани со британскиот финансиски пакет.

Објаснувајќи ја динамиката на проектите што ќе се реализираат со тие средства, Мицкоски потенцираше дека плаќањата нема да започнат веднаш, туку откако ќе започне реализацијата на проектите.

– Теоретски, утре да почнеме да градиме, првата фактура ќе пристигне во 2027. Колку побрзо и поефикасно ќе градиме, толку ќе расте и нашиот БДП, бидејќи во градежништвото барем трипати се вртат парите. Расте градежништвото, расте индустриското производство, растат услугите – појасни тој.

Според Мицкоски, паралелно со растот на БДП, ќе се активираат и обврските, а повлекувањето на средствата ќе биде контролирано и рационално, без да се наруши фискалната стабилност на земјата.

– Ние нема да ги повлечеме средствата за да стојат на сметка, па одеднаш да го зголемиме долгот, туку тоа ќе оди паралелно со економскиот раст – потенцираше тој.

Мицкоски исто така најави намалување на долгот до крајот на годинава и потсети дека се вратени стари долгови направени од претходната влада.

– Државата е раздолжена со неколку проценти, споредено со тоа што го затекнавме. Вративме обврзница од половина милијарда евра што ја земала претходната влада на СДСМ во 2018 година. Сето тоа е направено транспарентно – рече премиерот.

Тој објасни и како функционира механизмот за финансирање преку „UK Export Finance“, истакнувајќи дека се работи за поволни услови, благодарение на добриот кредитен рејтинг на Обединетото Кралство.

– Министерството за транспорт доби барање од МЖ Транспорт и Инфраструктура, кои се обратија до Министерството за финансии, кое пак доби задолжение од Владата. Условите беа понудени на 20-тина финансиски институции и ќе се изберат најдобрите. Ако ние сами ги земеме парите со нашиот кредитен рејтинг ББ-стабилен, ќе вратиме можеби 75% низ камати. Но, со тоа што Велика Британија гарантира со својот ААА рејтинг, ние добиваме услови два до трипати поповолни – заклучи премиерот Мицкоски.

The post НИШТО НЕ СМЕ СЕ ЗАДОЛЖИЛЕ, НАПРОТИВ СЕ РАЗДОЛЖУВАМЕ Премиерот Мицкоски ги отфрли обвинувањата за наводниот долг appeared first on plusinfo.mk.

Македонската берза за долгорочни хартии од вредност објави дека првата обврзница е издадена на 19 октомври на сума од 22,66 милиони евра. Парите ќе треба да се вратат за 3 години, а каматната стапка изнесува 3,95 отсто.

Втората државна обврзница е на сума од 9,38 милиони евра. Нејзиниот рок на враќање е 15 години, а каматната стапка е 5,6%.

И третата обврзница со рок на враќање од 15 години е издадена на износ од 31,72 милиони евра. Каматната стапка на оваа обврзница е 5,6%.

Издавањето на обврзниците е предвидено со ребалансот на буџетот и е дел од планот за задолжување и раздолжување.

Аукциите се согласно Календарот на државни хартии од вредност достапен на веб страницата на Министерството за финансии.

Според објавените податоци, вчера се достасани државни хартии од вредност во износ од 36,5 милиони евра, а на 30 октомври треба да се вратат уште 2,2 милиони евра. Во текот на овој месец Владата треба да се раздолжи со вкупно 121,5 милиони евра.

Според Министерството за финансии, во следните 5 години Владата ќе треба да врати 6 милијарди евра на домашните и на странските кредитори.

The post НОВО ЗАДОЛЖУВАЊЕ ОД 73,8 МИЛИОНИ ЕВРА Државата треба да врати 122 милиони евра во октомври appeared first on plusinfo.mk.

Миле Бошков претседател на Бизнис конфедерацијата тврди дека решението е едноставно сигурно и функционира веќе неколку месеци меѓу компаниите.

– Досега на софтверската платформа за повеќестрано безготовинско порамнување се вклучени 350 компании од најмали до најголеми кои пријавиле долгови и побарале тие да се пребијат со некоја од фирмите кои им должат. Софтверот преку соодветен алгоритам ги бара можностите за пребивање на долгот и испраќа извештаи до нив. Компаниите можат да ја прифатат или не операцијата пребивање или делумно да ја прифатат по што потпишуваат спогодба. Во овој период склучени се 50 спогодби за порамнување меѓу компаниите – вели Бошков.

Бизнис конфедерацијата смета дека ќе биде подобро кога оваа софтверска платформа би се поврзала и со софтверот на Управата за јавни приходи со цел да се овозможи и долгот за данок или повратот на даноците да се вклучи во процесот на пребивање на долговите.

– Тоа би значело повеќе можности за компаниите, а би се искористил и повратот на даноците за порамнување на одделни долгови. Дополнително значајно за компаниите и економијата е што со примената на овој начин на порамнување се забрзува движењето на парите и се ослободува капиталот заробен во долгови. На овој начин се наплатуваат побарувањата и од оние кои не се во состојба да платат затоа што нив други им долажат, се намалуваат трошоците за наплата – нема извршувања и долги судски постапки, се исплаќаат обврските без употреба на готовина, се зголемува прометот и се подобруваат билансите на компаниите. Сите трансакции се регистрирани со што се намалува можноста за даночна евазија. При тоа и државата ќе има поголем бенефит отколку да зема пари само од камати на долговите – вели Бошков.

Дополнителен бенефит, според него, е тоа што со решението, од една страна, се намалува внатрешниот долг, а од друга страна се зголемува ликвидноста на компаниите како и коефициентот на обрт, што, пак, доведува до зголемен обем на работа и добивка, што секако, директно позитивно влијае на вкупниот БДП.

Аплицирањето на платформата која ја изработи компанијата Ролсофт РСМ дел од меѓународната компанија од Израел е лесно и е безбедна во однос на податоците кои се внесуваат во ПБП/MCS системот. Тие се целосно заштитени од преглед или злоупотреба и при пристапувањето во апликацијата клиентите ги гледаат податоците само од своите доверители и должници, податоци кои секако ите им се познати. Клиентот добива код со кој може да пристапува и управува со својата сметка во апликацијата. Циклусите на компензации се одвиваат периодично за што се поставува распоред на интернет страна на Ролсофт РСМ, а сите регистрирани клиенти добиваат информација на нивната меил адреса.

– При циклусот на компензација најважна е опцијата која во рок од 48 часа од добивањето на прелиминариот извештај овозможува: компанијата да ја одбие понудената компензација; да ја прифати делумно т.е. да определи помал износ за порамнување од понуденот или да ја прифати во целост – појаснуваат од Ролсофт РСМ.

Во однос на обврските на компаниите кои аплицирале на платформата од Бизнис конфедерацијата велат дека се однесуваат само на финалниот извештај.

– Единствено што плаќаат компаниите кои сакаат да се раздолжат меѓу себе е процент од вкупно договорената сума за раздолжување по испорачан финален извештај за порамнување изразен како процент во висина од 1 до 2,5 отсто на сумата на реализираното порамнување – вели Бошков.

Ваков систем за мултилатерални компензации MCS, појаснуваат од Бизнис конфедерацијата веќе функционира во нашето опкружување и се реализирани многубројни циклуси на порамнување.

Предлогот на Бизнис конфедерацијата е добро разбран од премиерот и вицепремиерот за економски прашања, а што ќе се случува натаму засега е непознато.

Во меѓувреме, Министерството за економија подготвува нов закон за инсолвентност во кој се предвидува фирмите кои се неспособни да ги плаќаат долговите наместо во стечај да продолжат да работат и со судски надзор сами да се решат од долговите.

The post Бизнисмените смислија лесен начин како да се раздолжат меѓу себе appeared first on plusinfo.mk.