Просечната плата е зголемена за 70 проценти, за два ипол пати е помал јавниот долг, за 120 милони евра е поголем бруто домашниот производ, а старосната пензија е за 325 проценти побрзо растечка на месечно ниво, изјави вечерва премиерот Христијан Мицкоски.

– Ќе се обидам да дадам пет параметри кои се многу важни кога зборувате за економијата и квалитетот на живот и морате да се споредите со претходната влада. Некои ми велат ама не треба да се споредува со нив. Не можеме ние да водиме политика на чувство. Ние мораме да правиме компаративна анализа како било претходно со тие кои сме ги победиле, па да видиме дали сме подобри или полоши од нив. Ако сме подобри тоа треба да го кажеме, ако сме полоши треба да си признаеме и да се обидеме да бидеме подобри“, рече Мицкоски во гостување на  Сител.

Според него, пет параметри се битни: просечна плата, просечна старосна пензија, јавен долг, пораст на бруто домашен производ и последната стапка на инфлација.

– Просечната плата – ако анализирате 84 месеци влада на СДСМ и ДУИ, кога велам 84 месеци зборувам од јуни 2017 година, кој е прв месец на таа влада, заклучно со мај 2024 година, кој е последен месец на таа влада. Ако го анализирате порастот на просечната плата во тој период и го споредите со порастот на просечната плата од јули 2024 година, кој е наш прв месец како Влада предводена од ВМРО-ДПМНЕ, а во составен дел како коалициски партнери ЗНАМ и ВЛЕН и последниот податок, кој го има објавено Државниот завод за статистика, тоа е мај 2026 тоа се 23 месеци, ќе дојдете до заклучок дека за 70 проценти повеќе расте просечната плата во овој период на оваа влада споредено со периодот на претходната влада. И тоа се бројки. И овие бројки вие не можете да ги лажирате – истакна Мицкоски.

Потенцира дека старосната пензија во периодот на оваа Влада, за која ја правел лично анализата, е за 325 проценти побрзо растечка на месечно ниво, споредено со претходната влада на СДСМ и ДУИ.

– 325 проценти старосната пензија. Значи плата, пензија. Дали е тоа доволно? Не е. Дали треба да биде подобро? Треба да биде. Но, дали е многу повеќе? Да, многу повеќе. ​Или пак ако ги споредите јавниот долг и бруто домашниот производ. И ако анализирате повторно два периода. Првиот период нека биде 1 јануари 2018, затоа што 2017 година е споделена година меѓу две влади и крајот на тој период нека биде 31 декември 2023 година зашто не 2024-та, бидејќи е повторно споделена година на две влади. И оваа влада, кога е ВМРО-ДПМНЕ, ВЛЊН и ЗНАМ, 1 јануари 2025 година и еве, нека биде крајот на 2026 година. Ќе дојдете до заклучок дека јавниот долг е за два и пол пати помал, а бруто домашниот производ е за 120 милиони евра поголем во периодот кога е оваа влада споредено со претходната влада на СДСМ и ДУИ – рече Мицксоки.

Тој ја споредо и инфлацијата.

– И последно, инфлацијата од јули месец 2026 година – 2,3 проценти, споредено со јули месец 2022 кога е војната во Украина – 16 проценти. Седум и пол пати помала. Тогаш сме претпоследни или трети од позади во регионот ако анализираме 12 држави од Словенија до Турција, само мислам дека зад нас се БиХ, Романија и Турција. Сега сме втори. Србија е 1,9 процент, ние сме 2,3 проценти, па потоа се Словенија итн. ​Ова се бројки. И ова е разликата меѓу економските параметри на оваа Влада за 23 месеци споредена со економските параметри на претходната влада за 84 месеци. Дали е тоа доволно? Не е. Но, ние мора да имаме предвид од каде почнавме. Дали е потребно повеќе? Да, и ќе работиме да биде уште повеќе. Но, веќе не сме на дното. Веќе никој не се потсмева со нас и со нашите параметри, туку напротив, гледаат со почит и тоа го истакнуваат сите релевантни меѓународни финансиски институции – додаде Мицкоски.

Премиерот најави две нови инвестиции и проширување на инвестицијата на веќе постоечка компанија во земјава.

Мицкоски со претставници на овие компании се сретнал додека беше на патување заедно со своето семејство во Брисел. Нагласи дека не станува збор за пи-ар како што зборуваат некои аналитичари, туку дека е логично да се сработи нешто што е во интерес на граѓаните и на државата, иако бил на одмор.

– Во суштина сум пргав кога станува збор за работата и сакам да сработам. Имаше таква можност, тие луѓе да се наоѓаат во тој дел на Европа. Бараа состанок со мене. Јас ги навигирав таму. Се сретнавме. Во два дена ги имав тие три состаноци. Но, многу скоро, од денеска, на есен ќе ги објавиме. Станува збор за една компанија којашто доаѓа од Европската Унија, една компанија од Соединетите Американски Држави и една компанија којашто веќе има постоечка инвестиција, ќе прави проширување – рече Мицкоски.

Според премиерот, овие инвестиции се веќе извесни и логично е тој како претседател на Владата да го води тој процес и да привлече што е можно повеќе инвеститори.

The post РАСТЕ ПРОСЕЧНАТА ПЛАТА, ИНФЛАЦИЈАТА СЕ НАМАЛУВА Мицкоски низ бројки ја спореди Владата на ВМРО-ДПМНЕ со претходната на СДСМ appeared first on plusinfo.mk.