Македонија се наоѓа во период на интензивен инфраструктурен развој, со изградба на 6 автопатски делници истовремено, инвестиции што треба значително да ја подобрат патната поврзаност во земјава и да дадат нов импулс на економијата, истакна заменик-претседателот на Владата и министер за транспорт Александар Николоски.

– Станува збор за обемен градежен потфат со кој ретко која земја во регионот, па и пошироко, може да се пофали – рече тој во гостување на ТВ Алфа.

Секој од овие проекти има значајна улога во поврзувањето на регионите и заокружувањето на главните патни коридори, рече Николоски.

Тој се осврна на динамиката на изградба на автопатите, предизвиците со кои се соочуваат изведувачите и очекуваните рокови за завршување на делниците.

– Автопатот Кичево-Букојчани е еден исклучително значаен проект, проект којшто ја прави целината на автопатот кој што оди од Скопје, преку Тетово, Гостивар, Кичево, до Охрид и до Струга, но исто така е клучен за Коридорот 8, затоа што без овој автопат, трите други автопати коишто се градат во моментов, Охрид-Кичево, Букојчани-Гостивар и Гостивар-Тетово, ќе немаа смисла, односно не ќе можат да се спојат. Со овој автопат целиот Коридор 8 добива смисла – рече заменик претседателот на Владата.

Николоски посочи дека станува збор за исклучително тежок, планински терен, на кој ќе се градат тунел долг 370 метри, 5 големи вијадукти, 4 помали мостови, 5 натпатници, 4 потпатници и 2 клучки. Како особено значајно го истакна и учеството на домашните инженерски компании.

Вицепремиерот Николоски очекува роковите да бидат запазени и во изградбата на останатите автопатски делници.

– На автопатот Прилеп-Битола работите се одвиваат со одлична динамика, рокот на завршување е до крајот на 2029 година, но очекувам веќе в година да имаме отворено дванаесетина километри од 40. Тетово-Гостивар, иако изгледа лесен, има доста објекти и таму има предизвици, но се решаваат и очекувам во рокот до крајот на 2029 година да биде завршен. Гостивар-Букојчани или обиколницата на Стража, тој е најтежок за работа, затоа што целиот е низ планина, има многу мостови, еве веќе почна осмиот мост да се работи овие денови. Тој е 31 колометар и таму очекувам 2029-2030 да биде завршен. За Букојчани-Кичево рокот за изведба е 4 години, изведувачите ветуваат дека за 3 години и 6 месеци ќе го завршат. Охрид-Кичево, една поголема делница очекувам да пуштиме во следниве месец дена, а целиот да биде завршен напролет во зависност од временските прилики – истакна вицепремиерот Николоски.

Тој рече дека растот на бруто-домашниот производ (БДП) на Македонија се очекува да достигне 3,5%.

– Денеска стигна ревидирање во однос на проценката на БДП, и тоа ревидирање не го направи Македонија, туку Меѓународниот монетарен фонд, една од двете најрелевантни институции за економија во светот, заедно со Светската банка, коишто велат дека растот на БДП ќе биде на 3,5%, а нивната проценка првично беше 3,1% – посочи Николоски.

Тој нагласи дека ваквите очекувања се особено значајни ако се земат предвид актуелните глобални економски предизвици, вклучително и енергетската криза, како и фактот дека голем број држави се соочуваат со стагнација или рецесија. Како еден од главните двигатели на економскиот раст, Николоски го посочи градежништвото.

– Голем удел во овој раст има градежништвото, 6 квартали досега имаме двоцифрен раст на градежништвото. Вториот квартал во оваа 2026 година, растот беше скоро 22%, а очекувам и во третиот и во четвртиот растот да биде двоцифрен, што сигурно придонесува и во растот на БДП, така што ефектите се гледаат веднаш – рече вицепремиерот Александар Николоски.

The post ТУНЕЛ, 5 ВИЈАДУКТИ, 4 МОСТОВИ, 5 НАТПАТНИЦИ ЌЕ СЕ ГРАДАТ НА АВТОПАТОТ КИЧЕВО-БУКОЈЧАНИ Два автопати ќе бидат завршени до крајот на 2029 година appeared first on plusinfo.mk.

Проценките покажуваат дека комбинацијата од реформи во областите на пазарот на трудот, човечкиот капитал, деловното окружување и доброто управување има потенцијал да го зголеми БДП на земјава за околу 14%, доколку се затвори половина од јазот којшто постои во однос на водечките економии од Централна, Источна и Југоисточна Европа.

Ова го изјави гувернерот на Народната банка Трајко Славески на Годишната меѓународна конференција „Координација на политиките за конвергенција кон ЕУ: фискален простор и монетарно закотвување во услови на забрзана интеграција”, којашто се одржа во Кишињев, Молдавија.

Славески оцени дека реалното приближување на земјите од Западен Балкан сѐ уште е бавна и дека структурните реформи се од суштинско значење за зајакнување на потенцијалот за раст и за побрзо економско приближување кон Европската Унија.

Славески нагласи дека воспоставената и долго одржувана макроекономска стабилност создаде цврста основа за развој на нашата економија, додека зголемената трговска отвореност и интеграцијата во европските и глобалните синџири на вредност значително го променија економскиот и извозниот профил на земјата.

– Во 2025 година, трговската отвореност достигна околу 130% од БДП, што претставува речиси двојно зголемување во споредба со раниот период на транзицијата – рече Славески.

Во однос на потребната реформска агенда, тој посебно ги издвои институционалните реформи и реформите во областа на доброто управување.

– Владеењето на правото, ефикасноста на институциите и поголемата предвидливост ќе ја подобрат инвестициската клима, ќе ја зајакнат ефикасноста на јавните политики и ќе ги зголемат ефектите од инвестициите во човечкиот капитал и приватниот сектор – оцени Славески.

Гувернерот посочи дека подлабоката интеграција во Единствениот пазар на ЕУ може да послужи како важен катализатор за нашиот процес на конвергенција.

– Во овој поглед, Планот за раст на ЕУ за Западен Балкан обезбедува сеопфатна рамка за унапредување на оваа интеграција, комбинирајќи поблиска интеграција во единствениот пазар, подлабока регионална интеграција преку заедничкиот регионален пазар, забрзани реформи и финансиска поддршка – рече Славески.

Како конкретен пример за непосредните економски придобивки од интеграцијата Славески го посочи членството на земјава во Единствената област за плаќање во евра (СЕПА).

– За граѓаните, трошокот за испраќање 500 евра е намален за шестпати во споредба со претходните кореспондентски банкарски аранжмани, додека за компаниите трошокот е околу осумпати понизок за трансакција од 20.000 евра. Вкупните заштеди од пониските банкарски провизии се проценуваат на околу 5 милиони евра во првата година. Во тек се и оперативните подготовки за воспоставување на клонот ТИПС, кој ќе обезбеди инфраструктура за инстант плаќања којашто ќе биде компатибилна со таа на ЕУ и ќе овозможи побрзи и поефикасни платежни трансакции -рече Славески.

The post РЕФОРМИТЕ ЗА ПРИБЛИЖУВАЊЕ КОН ЕУ ЌЕ ГО ЗГОЛЕМАТ БДП ЗА 14% Славески смета дека треба да се засилат реформите во доброто управување appeared first on plusinfo.mk.

Премиерот Христијан Мицкоски очекува да продолжи трендот на раст на македонската економија и годинава да ја завршиме со раст на БДП меѓу 3,5 и 4 проценти.

Во гостувањето во дневникот на МТВ, Мицкоски истакна дека по силното придвижување во вториот квартал очекува раст од 3,5 до 4 отсто и во останатите два квартала.

– Првите параметри кои излегуваат за првиот месец од третиот квартал како што се индустриското производство, туризмот, градежништвото, се охрабрувачки дека може да имаме силен трет квартал. Треба да видиме како ќе биде во следните месеци, но очекувам 2026 година да ја завршиме со реален раст меѓу 3,5 и 4 проценти, со што во континуитет ќе продолжиме да растеме на реална основа, а номинално растот да биде над 8 проценти – рече Мицкоски.

Посочи дека денес веќе може да се зборува за БДП кој номинално е 22 милијарди долари, и 12 илјади долари по глава на жител.

– Нешто што за нас претставуваше цел на крајот на мандатот еве го постигнуваме на нешто повеќе од половина од мандатот. Потврдениот рејтинг од агенцијата Фич е потврда за она што го работиме. И покрај нихилизмот и желбата на опозицијата да банкротира државата, бидејќи знаат во какви долгови и каков хаос ја оставија. Тие секоја вечер легнуваат и се молат нешто лошо да ѝ се случи на државата. Но, за нивна жал, а за среќа на државата и на граѓаните тоа не се случува, одиме напред. Дали е совршено, не е совршено, дали има проблеми има проблеми, но ние ги решаваме, особено по катастрофата што ја наследивме. Факт е дека се живее подобро отколку пред три години, а ќе сториме се да се живее подобро и по три години отсега – истакна Мицкоски.

The post ГОДИНАТА ЌЕ ЗАВРШИ СО РАСТ НА БДП МЕЃУ 3,5 и 4% Мицкоски вели дека вредноста веќе е 22 милијарди долари appeared first on plusinfo.mk.

Во вториот квартал имаме исклучително висока економска активност и зголемен БДП од 4,3%, што е потврда за политиките на Владата, оцени денеска премиерот Христијан Мицкоски.  Тоа, според него, е уште една лоша вест за опозицијата која, како што рече, „повторно жали што Македонија оди напред, а не е вовлечена во нивното политичко мочуриште на лаги, клевети, измислици и конструкции“.

Мицкоски порача дека државата ќе продолжи да оди напред. Не е лесно, вели тој, не се сите проблеми решени, бидејќи се наследени многу, но важно е дека работиме и се трудиме се што е наследено да го решаваме, а да не создаваме нови проблеми. Резултатите после 25-26 месеци излегуваат на површина, имаме раст на индустриско производство, стабилизирана инфлација.

Според Мицкоски, остварениот раст во првото полугодие е меѓу најсилните во Европа и е континуиран во услови кога кај нашиот најголем трговски партнер – Европската Унија и земјите од еврозоната е 1,2%, односно еден процент.

Кога на растот од 4,3% во вториот квартал ќе се додаде и растот во првото тримесечје од 3,1%, како што посочи, дава отприлика 3,7% во првото полугодие од оваа година, што е еден од најсилните во Европа.

– Повторно ги повикувам оние на социјалните медиуми да почнат да ме исмејуваат, но јас ќе си стојам до мојот став дека ова е едно од четирите најголеми зголемувања на БДП и во првата половина на годината и во второто тримесечје во услови кога имаме за истиот квартал 2025 година 3,5% раст. Словенија има 3,8% раст во вториот квартал годинава, но 0,7% во вториот квартал 2025 година. Пред нас уште се Малта и Данска. Ги повикувам повторно ботовите на опозицијата со нивните политички мочуришта да почнат повторно да снимаат рилсови и да ме исмејуваат, но тоа се фактите, за жал, не можат фактите да ги негираат – рече Мицкоски.

Тој додаде дека и 2024 година со раст на БДП изнесуваше 3% со што земјата беше рангирана во првата половина од земјите во Европа, во 2025 година имавме раст од 3,5%, сега во првото полугодие сме веќе со 3,7%.

– Имаме континуиран раст во услови кога нашиот најголем трговски партнер – Европската Унија и земјите од еврозоната имаат во целина 1,2 %, односно еден процент. Ако го погледнете растот на БДП во периодот 2006 -2008 имаме раст од 5%, но тогаш ЕУ и еврозоната растат со толкав или поголем процент, што само по себе говори за политиките на оваа Влада, што претставува уште една лоша вест за опозицијата во Македонија – рече Мицкоски.

Според податоците на Државниот завод за статистика во второто тримесечје од 2026 година поголем пораст е забележан во секторот Градежништво од 21,9%.Финалната потрошувачка во второто тримесечје од 2026 година номинално расте за 7,0 отсто, а нејзиното учество во структурата на бруто-домашниот производ е 83,2 отсто.Бруто-инвестициите во второто тримесечје од 2026 година номинално растат за 14,5 отсто како резултат на порастот на бруто-инвестициите во основни средства.

Според сезонски и календарски приспособените податоци, стапката на раст на бруто-домашниот производ во второто тримесечје од 2026 година, во однос на второто тримесечје од 2025 година, е 4,0%.

The post ВИСОКИОТ ЕКОНОМСКИ РАСТ ВО ВТОРИОТ КВАРТАЛ Е ПОТВРДА ЗА ВЛАДИНИТЕ ПОЛИТИКИ Мицкоски оцени дека растот од 4,3% е четврти најголем во ЕУ appeared first on plusinfo.mk.

Во изминатите 10 квартали македонската економија бележи континуиран раст, а највисок раст е забележан во вториот квартал од годинава од 4,3% што зборува дека политиките што ги води владата се добри, изјави денеска на прес-конференција министерката за финансии Гордана Димитриеска Кочоска која додаде дека со овој раст македонската економија е петта по раст во Европската унија.

Државниот завод за статистика денеска објави дека ДВП во второто тримесечје од годинава порасна за 4,3% во однос на истиот период од 2025 година.

Таа оцени дека токму тој континуитет на растот е доказ дека економијата се движи во позитивна насока.

– Ако ја погледнеме целата патека, од 1,6% раст во првиот квартал од 2024 година денес сме на 4,3%. Уште поважно е што во сите десет последователни квартали во овој период економијата бележи позитивен раст, а во најголемиот дел од периодот стапките се движат околу и над 3 проценти. Тоа е суштината на овие податоци. Не зборуваме за раст во еден изолиран квартал, туку за континуитет на економскиот раст – рече Димитриеска- Кочоска.

Структурата на БДП, појасни, покажува дека растот има широка основа и е поддржан од повеќе сегменти на економијата.

– Особено силен импулс доаѓа од инвестициите. Бруто-инвестициите во вториот квартал бележат реален раст од 16,5% што укажува на засилена инвестициска активност во економијата. Позитивни се движењата и во надворешната трговија. Извозот на стоки и услуги реално е зголемен за 10,4%, што претставува дополнително забрзување во однос на растот од 6,2% во првиот квартал. Истовремено, увозот на стоки и услуги бележи раст од 12,5%. Растот на извозот е особено значаен, ако се има предвид дека се остварува во услови на релативно умерена европска економска активност и покажува зголемена активност на домашниот извозен сектор – рече министерката.

Позитивни резултати, дополни таа, се забележуваат и на производната страна.

-Градежништвото бележи силен раст од 21,9%, преработувачката индустрија расте за 4,1%, трговијата, транспортот и угостителството за 4,1%, а информациите и комуникациите за 4,3%.  Растот е поддржан и од домашната потрошувачка. Финалната потрошувачка реално расте за 2,8%, при што потрошувачката на домаќинствата е зголемена за 3,3% – информира Димитриеска – Кочоска.

Таа посочи дека според достапните податоци за вториот квартал од 2026 година, со економски раст од 4,3 проценти, Македонија е петта по стапка на раст меѓу европските земји за кои се објавени податоци. Повисоки стапки бележат Словенија со 5 проценти, Данска со 4,7 проценти и Малта со 4,5 проценти.

– Истовремено, растот на македонската економија е значително над просекот на Европската Унија од 1,2 проценти и еврозоната од 1 проценти. И во регионот нашата стапка на раст е меѓу повисоките. Растот од 4,3 проценти е повисок од растот во Србија од 3,8 проценти, Бугарија од 2,5 проценти и Хрватска од 1,7 проценти. Овој резултат добива дополнително значење ако се погледне поширокиот економски контекст – рече Димитриеска-Кочоска.

Историски, како што посочи, македонската економија повисоки стапки на раст остварувала во периоди на посилна европска економија, имајќи ја предвид силната трговска поврзаност на нашата економија со европскиот пазар. Денес растот од 4,3% на реална, односно 8,3% на номинална основа го остваруваме во поинакви услови – при умерен раст на европската економија, глобални неизвесности и геополитички ризици. Тоа, наведе таа, е особено значајно за мала и отворена економија како нашата, силно поврзана со европскиот пазар.

– Македонската економија забрзува и покрај предизвикувачкото надворешно окружување – нагласи Димитриеска Кочоска.

Таа потенцираше и дека позитивните движења има и кај индустриското производство и оти во услови на бројни надворешни ризици и ценовни притисоци, имаме значително смирување на инфлацијата.  Годишната стапка на инфлација од 4,8% во мај се намали на 3,4% во јуни и на 2,3% во јули. Тоа, укажа, е намалување од 2,5 процентни поени за само два месеца.

– Значи, од една страна имаме забрзување на економскиот раст, а од друга намалување на инфлацијата и смирување на ценовните притисоци. Тоа е големата слика што сакам денес да ја видиме – оцени министерката.

Таа рече дека Владата е посветена да постигне повисоки стапки на раст и уште подобри резултати за сите граѓани.

– Инвестираме во капитални проекти, го поддржуваме приватниот сектор и инвестициите, работиме на создавање подобро и попредвидливо деловно окружување и одговорно управуваме со јавните финансии. Бројките денес покажуваат дека економијата расте, економската активност забрзува и политиките што ги спроведуваме даваат резултати. Целта е економскиот раст да се преточува во повисок животен стандард за граѓаните, повеќе можности за компаниите, повеќе инвестиции и посилна и поконкурентна македонска економија – рече  Димитриеска Кочоска.

The post МАКЕДОНИЈА 10 КВАРТАЛИ БЕЛЕЖИ КОНТИНУИРАН РАСТ НА ЕКОНОМИЈАТА И Е МЕЃУ ПЕТТЕ ВО ЕВРОПА Димитриеска-Кочоска оцени дека растот на БДП е поддржан од повеќе сегменти на економијата appeared first on plusinfo.mk.

За само две години, Владата предводена од ВМРО-ДПМНЕ покажува дека со одговорно и чесно управување може да се постигнат конкретни економски резултати, соопшти партијата.

„Наследивме економски пустош, осиромашени граѓани, ослабени и нефункционални институции и огромни обврски. Денес, со внимателно управување со јавните финансии, не само што се намалува јавниот долг, туку се намалува и државниот долг. Државниот долг сега изнесува 51,7% од БДП, што претставува намалување од 41 милион евра. Ова е јасен показател дека политиките на Владата даваат резултати и дека Македонија се движи во насока на финансиска стабилизација“, соопшти ВМРО-ДПМНЕ.

Позитивните трендови се потврдуваат и преку економскиот раст, се додава во соопштението.

„БДП веќе седум квартали по ред бележи раст од над 3% проценти, што укажува на стабилна економска активност и зголемена доверба во економските политики. За ВМРО-ДПМНЕ економијата не е статистика на хартија, туку подобар животен стандард, стабилни јавни финансии, повеќе инвестиции и сигурна иднина за граѓаните. Додека претходната власт оставаше долгови, корупција и економски хаос, денес Владата работи на стабилизирање на државните финансии и создавање услови за економски раст. Резултатите се мерливи. Долгот се намалува, финансиската стабилност се зајакнува, а државата конечно се управува домаќински“, соопшти ВМРО-ДПМНЕ.

Талогот од СДСМ е несреќен поради успесите на државата, додаде партијата.

„Податоците од Државниот завод за статистика укажуваат на забавување на инфлацијата. Инфлацијата во јули изнесува 2,3 проценти на годишно ниво што покажува тренд на намалување. Во јули стапката на инфлација во Македонија е под просекот на еврозоната каде изнесува 2,9 проценти. Колку за споредба во април 2026 година инфлацијата на годишно ниво изнесуваше 5,7 проценти, во мај 4,8 отсто и во јуни 3,4 проценти“, посочи ВМРО-ДПМНЕ.

Особено е значајно што и во текот на јули продолжува трендот на намалување на цените на храната и безалкохолните пијалаци, кои се пониски за 1,1 процент во однос на претходниот месец, додава партијата.

„Ова е од големо значење бидејќи храната има најголемо влијание врз семејниот буџет и животниот стандард на граѓаните. Овие податоци од надлежната институција, Државниот завод за статистика, се потврда на политиките кои ги креира Владата предводена од ВМРО-ДПМНЕ. Бројките несомнено се позитивен сигнал за движењата во економијата. Владата предводена од ВМРО-ДПМНЕ продолжува да ги следи економските движења  и да креира мерки во интерес на граѓаните и нивниот животен стандард“, се вели во соопштението.

The post ДРЖАВАТА КОНЕЧНО СЕ УПРАВУВА ДОМАЌИНСКИ, ТАЛОГОТ ОД СДСМ Е НЕСРЕЌЕН ПОРАДИ ТОА Инфлацијата се забавува, долгот се намалува, а БДП расте appeared first on plusinfo.mk.

Македонија останува на проекцијата за економски раст повисок од 3,5 проценти годинава, порача премиерот Христијан Мицкоски, оценувајќи дека резултатите од првиот квартал се охрабрувачки.

–  Ние остануваме на оние проекции коишто ги имавме, дека ќе биде над 3,5 проценти. Имајќи предвид дека во првиот квартал остваривме реален раст од 3,1 процент, а со усогласени вредности 3,3 проценти, што во однос на бруто домашниот производ претставува еден од најдобрите резултати во Европа во овој момент – изјави Мицкоски.

Премиерот истакна дека, и покрај критиките и различните толкувања на економските показатели, Владата останува уверена во насоката по која се движи економијата.

– Колку и да сакаат поединци да ја извртуваат вистината или сатирично да го пренесуваат сето тоа, за нив имам лоша вест. Македонија забрзува, Македонија победува и Македонија, како многу пати во историјата, ќе победи – порача Мицкоски.

Тој не најави промени во економските проекции и оцени дека досегашните показатели се во согласност со очекувањата на Владата.

Владината проекција предвидува раст на бруто-домашниот производ од над 3,5 проценти, што би било повисоко од остварувањата во повеќе европски економии во истиот период.

The post РЕАЛНО Е МАКЕДОНИЈА ДА ОЧЕКУВА ЕКОНОМСКИ РАСТ ОД 3,5% Владата останува уверена во своите политики appeared first on plusinfo.mk.

Растот на БДП повторно е помеѓу првите пет во Европа, како процент, а податоците не се наши туку ги објави Евростат, изјави денеска на прес-конференција премиерот Христијан Мицкоски која ја држеше заедно со министерката за финансии Гордана Димитриевска -Кочоска.

Мицкоски  ги сподели податоци од Државниот завод за статистика и Евростат според кои во првиот квартал во земјава е остварен раст на БДП од 3,1% што е седми квартал по ред од доаѓањето на владата на ВМРО-ДПМНЕ со раст на домашниот бруто производ којшто се наоѓа најпрво во првата половина на Европа, а потоа и во првите пет земји во Европа според Еуростат.

-Веднаш зад Малта, Полска и Србија е Македонија која е во првите пет во Европа – рече Мицкоски, подвлекувајќи дека тоа се податоци на Евростат.

Мицкоски се повика и на статистичките податоци за индустриското производство и за вработеноста во зeмјава кои , како што рече, говорат за позитивните политики на владата.

-Индустриското производство во април 2026 година е зголемено за 7,6% споредено со април месец минатата година, во првите четири месеци од 2026 година и со тоа, како ретко која држава во Европа имаме индустриско производство кое е во позитива, мала, 0,2%, но е позитива во услови кога ја имаме епски најголемата криза во светот- рече Мицкоски.

Третиот параметар, рече Мицкоски е бројот на нововработени лица која е зголемена во првите 21 месец од доаѓањето на оваа влада.

-Бројот на вработени се зголеми за овој период цели 16.000 нови работни места. Овие податоци се лоша вест за оние кои се молат Македонија да не успее, но добра вест за огромен број на граѓани- рече премиерот.

Премиерот додаде дека цел на оваа влада е да се обезбеди подобар живот на граѓаните.

– Покажуваме дека со скромни ресурси можеме да направиме многу. Остануваме посветени на решавање на проблемите, враќање на долговите и решавање на нафтената криза, која е увезена. Обезбедуваме инвестиции и отвораме нови работни места. Ние мораме да обезбедиме напредок и да ги оставиме изговорите, нема очајување – рече Мицкоски.

Тој очекува во периодот што следи темпото и резултатите од работата да бидат уште посилни.

-Економскиот раст и зголемувањето на БДП не се само бројки- тие се доказ за нашата работа, инвестиции и заедничка посветеност кон подобра иднина. Нашата цел е силна, стабилна и конкурентна економија што ќе создава нови работни места, повисоки плати и подобар животен стандард за сите. Ќе продолжиме со политики што поттикнуваат развој, иновации и економски напредок. Заедно, чекор по чекор, ја градиме иднината на нашата држава – рече Мицкоски.

The post РАСТОТ НА БДП КАКО ПРОЦЕНТ ПОВТОРНО Е МЕЃУ ПРВИТЕ ПЕТ ВО ЕВРОПА Мицкоски вели тоа е добра вест за граѓаните, но лоша на оние кои не ѝ мислат добро на земјата appeared first on plusinfo.mk.

Растот на економијата во 2025 година е најголем показател дека политиките и во услови на неизвесност може да се креираат и да остваруваат резултати – рече денеска министерката за финансии Гордана Димитриеска-Кочоска осврнувајќи се на најновите податоци што ги објави Државниот завод за статистика.

Кочоска на прес-конференција напомена дека БДП во четвртиот квартал од 2025 забележал раст од 3,5%, што е потврда, како што рече, за позитивните економски движења во земјата и покажува континуитет во остварување позитивни резултати, кои шест квартали по ред го задржуваат ова темпо и создаваат услови за постигнување повисоки стапки на раст.

Значајно е, дополни, што растот се надоврзува на високиот раст од 4,3% во истиот квартал минатата година.

-Во споредба со државите од регионот и ЕУ, Македонија повторно е меѓу земјите со највисок раст. За четвртиот квартал од 2025 повисок раст е забележан само на Малта, на Кипар и во Полска. Ако споредуваме со земјите во регионот, растот во Србија изнесува 2,2%, во Хрватска 3,6, во Бугарија 3, во Словенија 2 отсто. Кумулативно, реалниот раст во 2025 година достигна 3,5%, што е во линија со проекциите на Министерството за финансии, а номиналниот раст е нешто повисок од очекуваниот, што е потврда за внимателноста и сериозниот пристап при планирање и водење на фискалната политика. Буџетскиот дефицит за 2025 година е во рамките на очекуваното, 4% од БДП, а кај јавниот долг има намалување и изнесува 59,3% од БДП – потенцира министерката.

Според неа, растот не економската активност во четвртиот квартал е на широка основа, при што речиси сите сектори забележаа раст.

– Силната динамика во градежништвото продолжи со раст од 14,6 проценти, а тоа се должи на зголемената активност во нискоградбата, која забележа реален раст од 12,5 отсто во четвртиот квартал. Ова е уште една потврда дека силната посветеност на Владата на реализација на капиталните инвестиции и оптимизацијата на нивните трошоци, динамика и услови за градба, придонесе за динамизирање на економската активност. Висок раст од 8,1 отсто е забележан кај стручни и научни дејности, трговијата и транспортот бележат раст од 4,4 отсто, преработувачката индустрија 3,6 отсто… Земјоделството забележа благо намалување од 0,4 отсто – истакна Димитриеска-Кочоска.

Особено охрабрува, оцени министерката, високиот раст на извозот на стоки и услуги од 9,7 %, што упатува на натамошно закрепнување на извозната активност, почната од почетокот на годината, по намалувањето во изминатите години.

– Приватната потрошувачка остана стабилна, со реален раст од два отсто, поддржана од растот на платите. Бруто-инвестициите забележуваат намалување од три отсто во услови кога има висок раст на корпопративното кредитирање и раст во градежништвото. Треба да се има предвид дека минатата година имавме рекорден раст на бруто-инвестициите во последниот квартал, од 23,7%. Македонската економија изминатиот период е под силно влијание на случувањата надвор, но тоа е предизвик што стои пред Владата и онака како што и досега во изминатите 20 месеци покажавме како се работи на економски план, така и ќе продолжиме, ќе создаваме мерки и политики од интерес на стопанството и граѓаните, истовремено имајќи ја предвид состојбата на меѓународно ниво – порача министерката.

The post МАКЕДОНИЈА ПОВТОРНО Е МЕЃУ ЗЕМЈИТЕ СО НАЈВИСОК РАСТ НА БДП Продолжуваат позитивните движења во македонската економија appeared first on plusinfo.mk.

Од СДС не очекуваме конструктивна или пак аргументирана критика, туку празни соопштенија кои ги пишуваат колку да помине денот. Тоа е само доказ дека кај нив владее очај и паника, од тоа што следи во октомври, а тоа е историски најголем пораз на СДСМ, соопшти ВМРО-ДПМНЕ,

„Времето кога инфлацијата беше над 20%, кога граѓаните живееја со 150 денари на ден, кога платите и пензиите стагнираа во нивно време – сега тоа време заврши. Сега сме сведоци на поинаква политика која е исклучиво во интерес на граѓаните и на подобрување на животниот стандард“, соопшти партијата.

Состојбата која ја наследивме беше тешка и лоша, но не се предадовме туку работевме и денес продолжуваме во ист правец, се додава во  соопштението.

„Од држава која беше на раб на банкрот, сега сме држава која е во топ 5 економии во Европа. Држава во која платите растат во образованието, културата, полицијата, здравството, пензиите се зголемуваат – сега веќе и до 7000 денари за само 18 месеци! Растот на БДП е 3.2%, што е убедливо подобар од минатите години на владеење на СДСМ. Индустриското производство бележи раст од 9,4%, извозот на земјоделските производи е зголемен за 50% во споредба со минатата година. Исто така, многу важно е да се напомене дека после долг период, ребаланс на Буџет ќе се прави поради зголемени приходи, а не поради минус“, потенцира ВМРО-ДПМНЕ.

Овие индикатори, се додава, значат раст, развој и економска стабилност, како и правилно управување со јавните финансии. Ова значи чесно и домаќинско работење, за добробит на граѓаните.

„Владата предводена од ВМРО-ДПМНЕ нема да ги остави граѓаните како што тоа го направи СДС, туку напротив, ќе работи за подобрување на стандардот“, се вели во соопштението на ВМРО-ДПМНЕ.

The post ЗАВРШИ ВРЕМЕТО НА ЕКОНОМСКИ ГРАБЕЖ Сега Македонија е во топ 5 економии во Европа, порачува ВМРО-ДПМНЕ appeared first on plusinfo.mk.